حكاية البت محمد ولد

الجزء 09

اجازتنا بتاعة السمستر بدت.... و الاء سافرت السعودية تجدد الاقامة وتجي ..وانا من اول يوم في الاجازة مشيت على بيت عمي عشان الحق مع الناس ترتيبات عرس غادة ...طبعا امي اخدت اجازة للعرس و هي و رانيا اصلا قاعدين يمشوا بيت ناس عمي كل يوم ... و بجوا برضه عماتي وخالات غادة وبناتهم ...

امي قالت لي الناس مقسمين مجموعات للشغل ...واحدين شغالين في الخبيز... وواحدين في البصل واللحمة المنشفة والبهارات و وواحدين في الريحة والدلكة .....لما جيت داخلة مع ناس امي لقينا خالتو اسيا وغادة و هشام وخالد ...

خالتواسيا قالت لي ( اها خلاص اجزتي ...غايتو رانيا ما قصرت غطت ليك ..تعالي يللا بعد دة ورينا ابداعاتك ...) غايتو مرة عمي دي خاتة فيني امل كبير ...

غادة قالت ليهم (عبير دي خلوها لي انا ...محتاجة ليها معاي في حاجاتي ...)

هشام قال ( وانا برضه محتاج ليها تساعدني في المشاوير البرة ...خلاص السواقة وقربت .تتعلمها..هي ذاتها يا امي ما ليها في حاجاتكم وبصلكم وخبيزكم ...)

كان مبتسم وهو بقول كدة ...يا ربي جادي و لا هظار ؟؟؟ اكيد جادي ...قصده اني محمد ولد ...تاني شعرت بالضيق البقيت اشعر بيه ...واستغربت في نفسي زمان لماكنت صغيرة بتبسط منها الحكاية دي ...حسة ليه؟؟؟

خالتو اسيا قالت ليه ( والله بس انت شايل حسها ساكت ...اها خلاص خليناها ليك انت واختك ....)

غادة طبعا محبوسة لكن مرات عندها حاجات عايزة تجيبها من برة .....وعايزة زول يرتب ليها حاجاتها الفي البيت ...طبعا عندها بنات خالاتها و بنات اهلنا التانين و هم طبعا احسن مني و اكتر خبرة مني في الحاجات دي ...لكن غادة قالت لي ( اولا ديل ح يقعدوا ينظروا لي وكلامهم كتير ...واعملي داك و خلي داك ...وانتي عارفاك ما ليك في الحاجات دي عشان كدة ما ح تنظري كتير ... تانيا انا ما بثق في زول غيرك يهبش لي حاجاتي دي ...تالتا عشان ح تكوني من الشباين عايزة اشتغل فيك و اعمل ليك اعادة تاهيل )

غايتو ما عرفت دة شكر ولا نبذ لي !!! غايتو كانت بتضحك وتقول في الكلام دة ..

المهم قعدت معاها وشفت الحاجات المفروض اعملها شنو...عندها لبسات عند خياطين مفروض اتابعهم ليها ...واتابع مع ناس الكوافير وحجز الزفاف و ناس الساونا و الحاجات دي ...مفروض برضه ارتب معاها شنطها الح تشيلهم معاها شهر العسل ...

بعد داك غادة طلعت الخلطات بتاعات الوش و الجسم وقالت لي ( الح اعمله انا برضه ح تعمليه انتي ..كفاية الوش المقشف المقشر دة ...)

طبعا انا الحكاية كانت بالنسبة لي غريبة وصعبة ..ما متعودة على الخلطات والكريمات والحاجات دي ...حدي كريم الجسم البتمسح بيه بعد الحمام ..في الشتاء جرسلين او جلسوليد او فازلين المتوفر منهم...و في الصيف البلقاه عند امي تونتي ون او نيفيا ...