لما رجعت من الجامعة خلصت حاجاتي سريع استعدادا لدرس السواقة ... ولما ماشة مع هشام على الميدان سألته من مقابلته مع العميد قال لي ( العميد قال الوظائف الدائمة بتاعتهم بفتحوها قبل بداية السنة الجديدة يعني لسة بعد كم شهر تاني ...لكن قال لي في الاثناء دي اشتغل معاهم كورسات متعاون بنظام الساعات...كدة كويسة معاي بتديني فرصة احسم امري قاعد ولا طالع قبل ما اتدبس معاهم في وظيفة ثابتة ...برضه بتديني فرصة اشوف شغل الشركة مع ناس ابوي وعمار...)
وبرضه بتدي فرصة لموضوع الاء يمشي لقدام ..كنت عايزة أساله عن مشواره مع الاء من الجامعة للبيت ....لكن اترددت بعد كلامه لي امس اني ما اتدخل... بقيت متحسسة من السؤال ...
بعد خلصنا درس السواقة واحنا راجعين هشام بدل يمشي على البيت مشى على اتجاه النيل ...وتاني مشى للمكان القاعدين فيه الناس يصطادوا ...انا في قلبي بجوة حسيت بسعادة غير مبررة ....وبيني وبين نفسي قلت انا اصلا من زمان بحب اطلع مع هشام و بالذات جية النيل دي ...يعني الفرحة دي ما حاجة جديدة ...غايتو دة التبرير الاديته لنفسي ...!!!!
المرة دي طبعا كنت لابسة هدوم عديل ..بنطلون و تونك ... ما لابسة توب عشان كدة نزلنا من العربية ...في ست شاي وحيدة قاعدة على طرف وزباينها ما كتار هشام مشى عليها وانا وراه ...قعدنا و طلبنا منها شاي ...بعد كبت لينا هشام قبل بمقعده على النيل و انا ذاتي معاه ... وانا الشمار لسة قاتلني... في موضوع الاء...
هشام كان سارح مع النيل ...قعدت اعاين ليه ساي .....كان لابس بنطلون جينز و قميص ازرق فاتح ... انا من زمان عارفة انه وسيم .. لكن فجأة لقيت نفسي بعاين ليه بنظرة مختلفة عن نظرتي ليه زمان ....نظرة جديدة ..ولاول مرة ...ما نظرة لاخ او صديق...لكن نظرة لراجل وسيم وجذاب...
ما عارفة هل دة كلام حنان لي هو الخلاني اعاين ليه كدة .ولا شنو.؟؟؟؟. ...انا كنت قاعدة مقابلة جانب وشه الشمال ...ولقيتني سارحة مع تقاطيعه الجذابة ....وجاتني رغبة شديدة لو انه يضحك او يبتسم عشان اشوف غمازته ...
فجاة ...كانه حس بي اتلفت علي ..وظبطتني بعاين ليه ...شعرت بالارتباك وخفت ..خفت نظراته تخترق عقلي وتشوف افكاري الدايرة حوله ...هو سكت يعاين لي لحظات.... عشان ما اديه فرصة يفكر و يستوعب نظراتي ليه سريع قعدت اتكلم... قلت اول حاجة خطرت على بالي ( اها ..قبيل الحصل شنو؟؟؟مع الاء قصدي ...)
قال لي ( نحن قلنا شنو ؟؟؟ مش قلت ليك انتي بس متابعة ومراقبة ...)
غاظني ...قلت ليه ( ليه مراقبة بس ؟؟؟ حكم رابع انا ؟؟؟ انا عايزة اكون حكم في الميدان ..عندي دور ..) طبعا الحكم الرابع في الكورة بكون واقف برة الملعب يراقب بس ...
هشام فقع الضحكة وانا واصلت ( يعني ما عارفني شمشارة وفضولية ؟؟؟ بعد ما دخلتني في الموضوع عايز تطلعني منه؟؟..بس انا بقيت زي الزول الفتحوا ليه شباك صغير لمدة ثانية على الجنة وقفلوه منه تاني...شحتفة روح يعني ...)
أنت تقرأ
حكاية البت محمد ولد
Random📝 بقلم: أمنيات محمد ولد لقب يطلق على البنت التي تتشبه بالاولاد ...تلبس مثلهم وتتصرف مثل تصرفاتهم ... عبير و منذ صغرها ارتبط بها لقب محمد ولد ...عندما كانت صغيرة لم تكن تمانع ...ولكن عندما كبرت ارادت ان تتخلص من هذا اللقب ..ان تخرج من اطار محمد ولد...
