حكاية البت محمد ولد

الجزء 10

بالليل مشيت لغادة زي عادتي اخدت قعدتي معاها ...خلاص دي اخر قعدات ليها في الدخان ...قبال تبدا نظافة الجسم ...

غادة بعد خلصت قامت دخلت جوة ...وانا اتوجهت على الباب الفاصل بيت بيوتنا ...فجأة جاء زول لافي على الزقاق وقربنا نتصادم ...عاينت لقيته دة هشام ...قلبي شح وضرب ...الجابه بيجاي شنو الليلة ؟؟؟

وقف عاين لي لحظات...حمدت الله انه الدنيا ضلام ما ح يشوفني كويس و القميص العجيب الانا اللابساه ...

قال لي (عبير ...؟ خلاص خلصتوا ؟؟؟) طبعا عارفني بقعد مع غادة !!!

قلت ليه براحة (آي ....)

قال لي ( خلاص تعالي ...) تعالي وين ؟؟؟

انا وقفت في مكاني وقلبي يضرب ..امشي وين بقميصي دة ؟؟؟

هو بدأ يتحرك و لما شافني واقفة ما اتحركت اتلفت علي وقال لي ( تعالي هنا الكراسي القريبة دي ...) وأشر على الكراسي القاعدات تحت الشجرة في طرف الحديقة ...

قلت ليه ( الوقت اتأخر وانـــ)

قاطعني ( ما ح أأخرك ..... عايزك دقايق بس...)

الحاح عجيب... انا حسة اعمل شنو ؟؟؟؟...ما عايزة اقول ليه انا ما لابسة كويس والفت نظره لقميصي المجبص دة ...هو حسة ما انتبه لي عشان الدنيا ضلام اقوم انا براي الفت نظره .؟؟؟؟..غايتو الكراسي على طرف الحديقة الضو برضه خفيف ...كتفت يديني قدامي احاول اغطي شوية من جسمي ...على الاقل رابطة شعري بطرحة ....

مشيت وراء هشام قلبي زايد ضرب و قعدنا في الكراسي ..حسة عايزني لشنو ؟؟؟ موضوع الاء .؟؟؟ مافي غيره ...

انتبهت انه هشام ساكت ما بتكلم ...عاينت ليه و قلبي فررر ...رغم الضو الخفيف شكله انتبه لقميصي الفضيحة دة ...لقيته منطط عيونه بعاين لي بعدين دنقر بارتباك كدة ...

انا ذاتي حسيت بنفسي مضطربة ....و قلبي يدق زي الهبابة.... و عشان اخلص من الموقف دة قلت ليه ( عايز تتكلم في شنو ؟؟؟ موضوع الاء ؟؟؟)

هشام سكت لحظات وهو مدنقر بعدين رفع راسه وشكله اتمالك نفسه قال لي ( كدة خليني من موضوع الاء ...كلميني عنك انت ...ما في حاجة كدة ولا كدة ؟؟؟)

انا اتخلعت وقلت ليه ( حاجة كدة وكدة شنو قصدك .؟؟؟؟..)

هشام ابتسم ابتسامة خفيفة وقال لي (فاهماني قاصد شنو ...يعني ما في حاجة في الافق ..عريس ولا خطيب .....لا حبيب ؟؟؟)

انا خلاص شعرت نفسي ح يغمى علي...حسة هشام دة جايبني هنا في الساعة دي عشان يقعد يحقق معاي في الموضوع دة .؟؟؟؟...اقول ليه شنو؟؟؟ ما في طريقة غير اجاوب واحاول اتخارج من الموقف دة سريع ...

قلت ليه ( تفتكر شنو يا هشام ؟؟؟ يعني في واحد عاقل بعاين ليه لمحمد ولد ؟؟؟)

من غير ارادته عيونه مشت على جسمي و سريع رفعها لعيوني وقال لي ( محمد ولد شنو كمان ؟؟؟ ما خلاص دة كان زمان ...حسة ما شاء الله ...ا..) وزي الكان عايز يقول حاجة زيادة لكن قطع كلامه ...