حكاية البت محمد ولد

الجزء 14

هشام قال لي براحة كدة ( اتأخرتي ....) ...

يعني كان منتظرني ...عارفني ح اطلع زي عادتنا ....ما نسى يعني ...الحاجة دي خلت شعور بالسعادة كدة غريب يغمرني كلي ...

ضحكت وقلت ليه ( ما كنت متاكدة انك ح تكون طلعت ...قلت يمكن نسيت ..ولا تكون تعبان من يوم امس ....)

قال لي براحة وهو بعاين في عيوني ( حاجة بنعملها انا وانت مع بعض مستحيل انساها ....) انا ارتبكت زيادة و دنقرت ...

قال لي ( يللا ...) واتحرك من جنب الباب ..

انا قلت ليه ( يللا وين ؟؟؟)

قال لي ( مشوار قصير ...ما بعيد ...حاجة تانية من حاجاتنا البنعملها سواء ...)

في اللحظة ديك انا لو قال لي نمشي نقع البحر بمشي بوراه ...اتحركنا على عربيته و هو رمى السيجارة في الارض وطفاها ...قلت ليه (اول مرة اشوفك بتشرب سيجارة...)

قال لي ( ما قاعد اشرب عادة ...كلها مرتين ولا تلاتة في حياتي ...لما اكون متوتر و لا متضايق ...) انا سكت ما عرفت اقول شنو ...

هشام اتحرك بالعربية و الشوارع كانت فاضية ...انا بيني وبين نفسي كنت متوقعة هو ماشي على وين ...شاطي النيل ...حبنا المشترك ...

وفعلا ...وصل المكان البنمشي ليه دائما ووقف العربية على الشاطي ....طبعا المكان فاضي ما في زول غيرنا ...وقعدنا الاتنين ساكتين لحظات نعاين للمنظر قدامنا ...الشجر المغسول بموية المطر ...قطرات المطر نازلة على موية النيل ...شبابيك العربية كانت فاتحة و الهواء البارد المنعش المشبع بريحة الطين الحلوة كان داخل علينا ....

اتمنيت لو اللحظة دي تستمر للابد ...نكون انا هشام قاعدين كدة مع بعض ...من غير كلام من غير ازعاج من غير اي منغصات ....لكن للاسف مافي طريقة ...ولابد مما ليس منه بد ...ولقيت نفسي بديت اتكلم مع هشام ( هشام ...بالنسبة ...بالنسبة ..لموضوع الاء ...)

وسكت واتلفت عليه ...قلت يساعدني في الكلام ..لكن كان بس ساكت يعاين لي ...دنقرت تاني و واصلت ( الاء طلعت مرتبطة ...)

تاني عاينت ليه ...اشوف ردة فعله ...لقيت مافي اي تغيير في تعابيره ...بس لسة بعاين لي ...قلت ليه (ما عايز تعرف مرتبطة مع منو ؟؟؟)

براحة كدة وبعد اهتمام ...ومن غير تغيير في تعابيره قال لي ( منو ؟؟؟؟)

عاينت ليه في عيونه طوالي وقلت ليه ( مع خالد ..اخوك ...لكن انا والله لما رشحتها ليك ما كنت عارفة الحكاية دي ...عرفت لي يومين بس ..كلمني خالد ...تتذكر لما جيت لقيتنا في الصالون داك ؟؟ دي كان اول مرة اعرف منه ....)

وانا بقول في الكلام دة لاحظت تعابير هشام يا دوبها بدت تتغير ...بدا يكون فيها انفعال بدل البرود والجمود داك ...كان بعاين لي بعدم تصديق ...انا وصلت سريع ( كان حصل بينهم سؤ فهم كدة بينهم ... وخالد قـــ...)