لصمتي حكايه بقلم شيماء المشهداني

الجزءالاول

#لصمتي_حكايه
القصه حقيقيه ..
بقلم .. الشيماء ..
الجزء الاول ..
الناشربارق العراقي
مثل أي بنت عاشت حياة صعبه كعدت استرجع ذكرياتي .. وايامي الي عشتها ماشفت طعم الفرح  عمري ٢٧ سنه .. اسمي  ساره ..
والدي أو والدتي .. الحمدلله عايشين وتعبوا ويانا مثل كل اب وام يضحون بنفسهم لاجل اولادهم .. والدي كان مثال الأب الصبور الحنون .. أو والدتي سيده عظيمه صبوره ..
عندي اخوه 3
احمد عمره 32 سنه
وعمر عمره  30 سنه
وعلي عمرة 25 سنه
واخت وحده اسمها نورس عمرها 34 سنه ..
جنا عايشين بيت جدو اهل بابا بيت جدو حالتهم الماديه كلش زينه الى ابعد الحدود جدو يشتغل مقاول مال بناء وعنده املاك وجاه .. وعلاقته بوالدي طيبه ويميزه عن عمامي لان بابا جان ابد ما يرد له كلمه  وجدي  شيطلب منه ينفذ لكن عمامي جانوا ميهتمون ولا يسمعوله بكلمه والي براسهم يسووه...
وبيوم اتخربط جدي وراح ابويه وداه للمستشفى ..
وتوفى جدي  ..
والدي كلش أتأثر عليه وعمامي ولا كأنه وبعد أيام من الفاتحه بدت نواياهم الخبيثه ..
اخذوا الورث والاملاك وكالو ابونا مديون ولازم نسدد عنه .. تدهورت حالتنا الماديه وهما أمورهم صارت زينه وتغيروا ..
وانكشفوا أنه هما كذبوا وطلعت بوكتهم لكن بقوا مصرين أنه هما مااخذوا شي وهذا المال من تعبهم وكدهم..
عاشوا حياتهم عيشة ملوك او والدي يركض على عيشتنا وحياتنا بسيطه لان حقه راح وإخوته باكوه كدام عينه وبقى ساكت وسلم امره لله ..
  تعب والدي علينا وكام يشتغل هواي حتى مرات يشتغل شفتين حتى في سبيل ما نحتاج لحد ..اونطلب من اي احد ..
وبسنه ١٩٩٩.. بيبي كالت اريد ابيع  البيت مال جدكم..
البيت هذا هو الشى الوحيد الي بقى من الورث ونفس الشى تكرر هم حاربوا والدي و ميردون ينطوه حقه وحتى بيبي هم قسمت فلوس البيت وظلمت والدي  .. بذاك الوقت عمري جان  10 سنوات..
..  والدي كال الها بعتب..
امي مايصير  البنات حقهم 5 ملايين واني تنطيني   مليونين ونص.. المفروض بالعكس للذكر حظ الانثيين ..
كالتله هذا مالي واني حرة بيه واني انطي مالي وتعبي للجناين واعوف بناتي  .. والدي كلش أتأثر وصار على خلاف وياها
لكن ما يفيد راح حقه بعد واصلا بيع البيت مايضر احد بس والدي لان كلهم متمكنين وعدهم قصور وأملاك  ..
وأخذ والدي المبلغ وطلب من صديقه مبلغ وامي هم اهلها ساعدوها ..
  والحمدلله لگينه بيت اشتريناه جان بيت صغير على كدنه..
ومرت السنين وارتاحينا لان  مستقرين وحدنا رغم جان البيت صغير بس خلصانين من مشاكل بيبي الي جانت كل يوم تتعارك ويه امي.. وتنتهي المشكله امي مهظومه وتبجي بسببها ..
جنت دائما اسال هالسؤال ليش اهل بابا ميحبونا وليش كوة يسوون مشكله ويفتعلوها ..رغم والدي علمنا أنه نحبهم ونحترمهم ودائما يكول هذولي اهلي حتى لو يتجاوزون أو يسوون مشكله يبقون اهلي واجبكم تحترموهم .. 
جانو اهل امي كلش يحبونا واحنا نحبهم ومن نشوفهم نفرح  ومن جانو يجون النه  نركض عليهم ونستقبلهم فرحانين ..  بس اهل والدي يضوجون واسمع  عماتي يكولون  اي اخذت اخونا  هو وجهاله ..
ماجنت الكى اي تفسير لهذا حقدهم على امي خاصه وعلينا ماشفنا منهم اي حنان أو اهتمام ..
صارت سنه 2003 وشفنا المر بيها لان والدي جان شغله ورزقه يوميا ..  وكعد فترة طويله وشفنا كل انواع الحرمان او والدي جان حاير بينا وعمامي عايشين بنعيم ولا واحد بيهم يسال او يكول شلون احنا عايشين ..
مرت الايام ورجعت الحياة لطبيعتها ورجعت المدارس وتعرفون اكيد ذيج الفترة صارت سنه عدم رسوب الكل نجح ونجحت للثالث متوسط  بس جان الوضع الأمني سىء  والناس تخاف تطلع..
والدي  جان يتمنى نكمل دراستنا ويصير النا مستقبل بس ما باليد حيله وبيوم جنت رايحه للمدرسة اني وصديقاتي شفت بنيه خاطفيها وكاتليها وذابيها باب المدرسه طبعا عم الرعب بينا كلنا والبجي والصياح وطلعونه من المدرسه للبيت لان خفنا وارعبنا رعب مو طبيعي رجعت للبيت تلكتني امي ..
اشبيج بنتي شو رجعتي .. شنو متخربطه وجهج اصفر ..
كمت ابجي وحجيت الها الي صار ..
وامي تضرب ايد بايد .. ربي سترك النوب
خطف وقتل البنات ..
امي اني صاعدة انام ماريد احد يكعدني احس جسمي كله يرجف.. 
  صعدت ونمت على وجهي  ما اعرف من الخوف لو اريد انسى شكل البنيه وهي مقتولة نمت ما حسيت على روحي وكعدت المغرب على صوت امي وهي تصحيني ..
كومي سارة بابا يريدج ..
اي يوم نازله وراج ..
نزلت غسلت وجهي واني امشي واحس الدنيا فوك راسي ..
رحت على بابا بوسته وكعدت يمه ..
كلي شنو هذا الي سمعته ..
اي بابا خطفوا بنيه وقتلوها .. 
كلي بابا اطلب منج طلب ..
شنو بابا ..
بابا اتركي المدرسة..
  ليش ...
بابا انتي بنيه وتعرفين اذا ابنية انخطفت حتى اذا رجعتي وما قتلوج شيصير لا تزعلين مني بابا بس هاي الحياة وهذا مجتمعنا ما يرحم البنات..
بس نورس تداوم..
(اختي جانت طالبه كليه ادارة واقتصاد )
حتى نورس ..راح اتأجل السنه..
باوعت عليه نورس وكالت اي  هي سنه وناجلها وبعدين نرجع بلكي تتحسن الاوضاع ..
كتله بكيفك بابا وتركت المدرسة بس على اساس سنه وحدة وارجع بهاي الفترة اختي نورس اجوها ناس وخطبوها لابنهم انخطبت وعشنا فرحة حلوه وامي وابويه فرحانين بخطوبتها واشتريت ملابس جدبدة وامي كالت لابويه نغير من اثاث البيت وغيرنا ورتبنا كل شي  .. وصارت الخطوبه  .. جان خطيب اختي اسمه مراد ..
بحفله الخطوبه جان اخو مراد وين مااروح يمشي ورايه جان اسمه هشام .. بس شكله جان ابد مامقبول ومااتقبلته ابد .. واني مواصفاتي بيضه صاحبه طول وجسم وملامحي ناعمه ..
بعد ما خلصت الخطوبه عرفت أنه هشام متعارك وي اهله ويريد يخطبني بس اهله يكولوله بعدك صغير مو مال زواج .. والحمدلله طلعت منهم ..
وبيوم مراد اتصل على نورس وكاللها صديقي سامر شاف ساره وعجبته ويريد يتقدملها ..
نورس اتفاجات وكلت منو يكول يقصد اختي لان جانت حفله وناس هواي ..
كاللها اليوم اجيكم ونتفاهم .. جانت نورس عاقدة وخطيبها اجا عادي ..
واندكت الباب الخارجي واني كاعده وي نورس ومراد ..
كالولي افتحي الباب ..
مراد انت افتح الباب ..
كالت نورس دكومي افتحي الباب يجوز بنيه بالباب ..دكومي ..
فتحت الباب ...
شاب وسيم وحلو ..طول وجسم ..
كال .. اريد مراد ..
اي لحظه ..
استغربت شجاب هذا علينا ..
راح مراد ورجع .. واشر لنورس ..
كالولي هذا فلم .. ردنا تشوفين الولد ويشوفج لان كلنا يجوز مو انتي ..
مراد كال هذا الولد يريد يتقدم الج وهو صديقي خوش ولد ..
بس اني بعدني صغيره واريد اكمل دراسه ..
نورس .. لج يادراسه نصيب واجاج ومنو يكول بابا يقبل ترجعين الأوضاع مداتستقر ..
اني ماشفته زين انتو ماكتولي ..
مراد.. مو مشكله اني اخليج تشوفيه ..
بعد فترة صارت خطوبه اخت مراد .. وعزمونا ونورس كالت .. سامر راح يجي يأخذنا حتى تشوفيه زين ..
لبست ملابس حلوة وفعلا اجانا سامر .. وهو يسوق السياره يباوع عليه بالمرايه ويبتسم .. جان عمرة ٢٥ سنه  .. شفته ماناقصه شي صح اني بعدني صغيره  وعمري جان بوقتها ١٥ سنه بس الزواج ستر للبنيه .. وافقت .. وتمت الخطوبه ..
وللحكايه بقيه ..