لصمتي حكايه بقلم شيماء المشهداني

الجزءالسابع

#لصمتي_حكايه
القصه حقيقيه..
بقلم..الشيماء
الجزء السابع
الناشربارق العراقي
..
  جان الجو حلو كل الاحبه مجتمعين ولمه حلوة وفرحانين وجابولي هدايا اهلي وكاعدين نركص ونضحك .. بعد ما خلصت السبعه راحوا اهلي وكمت انظف البيت وسويت عشه وكاعدين نسولف ونضحك اني ورافد  .. ونمنا  وكعدت الصبح ابلش تنظيف البيت العيد جانت أيامه قريبه  ..
واستلمت البيت من تنظيف..
تعبت من الشغل وكملت بالكوة ..واحس جسمي ثگل من التعب ..
سااارة ..
نعم عمة ..
تعرفين تسوين كليجه..
اي طبعا  عمه اعرف ..
اي  لعد سويلنه كليجة قبل العيد ..
  تدللين عمه ..
عجنت 7 كيلوات وسويتها وحدي وكلهم نايمين صارت الساعه 5 الفجر واني اشتغل ..  وبوقتها اهلي جانوا  عازميني اول يوم العيد كملتها للكليجه حتى اروح ومااعرف شي ورايه ..نمت  كعدت بدلت ورحنا لاهلي تونست وبالليل جانوا عازميني بيت عمي طلعنه من بيت اهلي رحنه لبيت عمي لحد هاي الايام حياتي طبيعية .. لكن من خلص العيد واني نوعا ما مرتاحة ماعندي مشاكل ..
وبيوم عمي ابو رافد  صاحني..
سارة عمو جيبيلي مي بنتي ..
اي عمو تدلل ..
رحت جبتله مي ونطيته دانتظره يكمل ألمي .. دخلت عمتي جان تكولي ..
شكو شعدج هنا..
عمو كلي يريد مي وجبتله..
ها خوش حجة المي..
ياحجة عمه .. عمو راد مي ..
من  عمى العماج لحكتيني على رجلي شبي رافد  ما مكتفيه وياه ..
عمه هاي شدتحجين هو ابو رافد يعني بمكان ابويه  طلب مني مي وجبتله ..
عمي صاح بيها وكال  شبيج يا مره مو عيب البنيه جابتلي ألمي ادري سوت جريمه...
سكتت بس احس انجنت مني ..
ومرت الايام ..و اذا اي واحد من ولدها يطلب مني شى وكالت ..
ها شسويتي وي ولدي ..
طبعا جنت انقهر واحتسب اجري لله واتحمل ظلمها ..واكول مستحيل اطلك مره ثانيه ...
  الشغل كله جان علية وبيتها كشف من جوة وصبح وعصر انظف والملابس ممنوع اغسلها بالغساله..
تكول ايدج ما بيها شى اغسلي بايدج..
و24 ساعة ولا ارتاح واذب روحي الساعة 12 هلكانه..
ومره عمي اخو بابا جان بايت يمنا  وكاعدين هو ورافد  يلعبون دومنه كعدت يمهم رافد كال .. 
سارة  اريد  مي ..
صار ..
كمت اجيبله مي شافتني عمتي..
  ها هم رجعنة ولج ميصير حرام ..
حرام اجيب مي لرجلي .. لو لعمي اخو ابويه ..
  يا عمه اني انصحج هذا عمج عيب غير تسمعين النصيحه ...
خنكتني العبره ونطيت ألمي الهم ..
رافد ..
نعم ..
عفية اريد باجر اروح لاهلي والله تعبت..
خلي  اكول لبابا ..
شلون يعني تكول لابوك ..
متفهميني بعدين افهمج اصعدي نامي ارتاحي .. 
صعدت نمت بفراشي وافكر بقسمتي نفس الحياة  الي شفتها شيفيد زوج يحب بس ما عنده كلمه كولي لماما اسئل بابا   واصبر نفسي واكول يجوز احترام بيناتهم زايد عادي اتحمل ما بيها شى..
وتمت موافقه ابوه انه اروح لاهلي بتت يمهم ليله وحدة وعمتي ما قبلت بعد ما اتفقت ويه بابا كم يوم يمها وكم يوم يم اهلي رجعت بقرارها وبقيت يمهم ارتاحيت حتى رافد حسيت الضحكة رجعتله بس يافرحه ما دامت ليله وحدة ورجعنا رجعت عمتي كالت جبتلكم فراش للكاع لان من اليوم راح تنامون بالهول باوعت على رجلي ردت يحجي كلمه ..
اي ها هية ..
بالهول يعني  اني وياه نومتنا يم اخوته.. 
اسمع رافد شوف حل شلون انام وي اخوتك..
مر على زواجنا 6 اشهر وما صار عندي شى بدينه نراجع اني ويا طلع ما بينا شى بس من الله تأخير ..
بقيت على هذا الحال شغل وتنظيف وعمتي شلون ما اشتغل ميعجبها  و كل يوم تاهمتني بواحد مرة ابنها وشى زوجها..
جان رافد شيحتاج اني وياه ومرة احتاج فلوس لان جماعه يطلبوه ويردون فلوسهم .. نطيته الذهب مالتي وكتله فك دينك ماريد احد يوكفلك بشي .. واني ميهمني الذهب المهم انت مرتاح ..
بيوم جنت انظف المطبخ واسمع رافد  يصيح..
  رحت اشوف ليش كاعد يصيح  ..
افتهمت انه اخوه رعد معطل جهاز DFD وكاطع الوايرات  ..
وجان جهاز الDfD  غالي سعره  وهسه نازل من دخلت للهول راسا امه ..
كالت .. ارتاحيتي سويتي المشكله بين ولدي ..
باوعت الها مستغربه..
  سويتي مشكله بين الاخوان ..
اني شعلية اني هسه طبيت ..
  اي اي  عيني غشمي نفسج بت نوال ..
من تحجي بصياح وغلط وهما بيتهم منا للشارع ما كو كراج..  اجا ابو رافد من الشارع  عليها..
كال ليش صيحين يامرة  مو منا الشارع.. عيني  هاي مرت ابنك اني شعليه سوت مشكله بين الاخوان وخلتهم يتمالخون..
وبدون ما يفتهم لزمني ابو رافد  وضربني  ويه الضرب يصيح مو اني تالي عمري تجي زعطوطة تفرق بين ولدي.. اصيح على رافد ولا يحرك ساكن مدنك راسه وساكت وضربني على راسي بحيث فقدت الوعي ومن صحيت الا اني نايمه بالمطبخ لان كرهوني جانت امهم من تحجي كلمه خلص هي الصدك ورافد كاعد يمي يبجي ..
لا تزعلين لخاطري اتحملي..
اريد اتحرك ما اكدر وجسمي  كله ازورك.. كتله مو على شى  اني راح اسكت بس لان من راح اروح لاهلي  واذا شافوني هيج صدك حتى انته متسلم هذا البيت يهده ابويه عليكم ومو خوف عليك أو على اهلك. لا بس اخاف على اخوتي لا يصير بيهم شى..
ضليت مااحجي وياهم وماباوع بوجه رافد وهو ثاني يوم من الصبح طلع  راح على جده وكاله على الي سواه ابوه بيه جد رافد جان كلش يحبة ويدافع عليه إذا احد اتعدى عليه ..
اجا جد رافد على ابو رافد ..
مو من حقك تضرب مرت ابنك ..
يابا تريد تخرب بين ولدي..
كله ماكو خراب اخوه واختلفوا وترجع خوتهم  بس انت طول عمرك هيج متريد تكسر كلمه مرتك وعلى حساب ولدك المهم ترضيها ..وحتى اذا سارة غلطت وديها لاهلها احسن مو تضربها ما من حقك ..
سكت ابو رافد كلشي ماحجى ..
وبعدين جده صاحني كلي اعتذري من عمج .. مو على بس بس علمود ما يصغر ابو رافد اعتذرت منه والدمعة بعيني..
كلي  بنيتي اني هم غلطان لا تزعلين اني هم مثل ابوج.. 
. بگلبي كلت  انت ابويه ولك ابويه لليوم هذا ما ضاربني وماد ايده عليه لو على اخواتي ..
بقيت مقهورة وخنگه بصدري  رافد الي حبيته ما عنده شخصيه..
صح هما امه وابوه ..
بس اني ماسويت شي غير المفروض بهيج مواقف يصير الي ظهر وسند كمت اتعمد أهمل العلاج مال الاطفال ومن يسئلوني على الموعد اكلهم يا نسيت واني مناسيه  بس ما اريد اربط روحي ويه ناس مؤذيه..
وكلت خل اشوف تاليها ليوين توصل الامور وبعدين اقرر لو اسوي طفل لو لا..
اخوه الجبير خطب وخطيبته هي اشترتله حلقة ذهب فاحتاج كال الها راح ابيع الحلقة مالتي شاسوي بيها البس فضه ..
كالته لا متبيعها واختلفت وياه ..
واجه يشكي يم اهله على انه خطيبتي متحبني ومتريد تساعدني راسا رافد كال ..
عبالك مثل سارة من كتلها محتاج كبل نطتني الذهب مو كل النسوان مثلها ..
راسا عمتي كالت من  عمى العماها لساره  هي باعته مو علمودك لان ما عاجبها وهي اصلا ماتحبك بس لان مطلقه ورادت تنستر بيك...
شنو يعني تنستر بيه ..
يعني تصير اله ساتر كدام الناس على سوالفها التعبانه ..
يوم يا سوالف  تقصدين ..
شاحجيلك ياابني بعيني شفتها ويه مهند ابن عمتك نايمه وياه ..
اني كتلها و بدون اي انذار حسبي الله عليج الله لا ينطيج  خافي الله ليش الكذب خافي الله ..
اني انهاريت وفشلت كلشي الا الشرف ..
راحت لزمت القران وحلفت وكالته وحق هذا القران شفت سارة ومهند نايمين سوه ..
رافد صدك لان امه حلفت على القران.. اجه عليه مثل الثور الهايج وكعد يضرب بيه حتى من الضرب كمت ما اكدر اوكف على طولي اجتي مي جرتني منة وشمرتني بالمطبخ وقفلت الباب..
اني كمت ادك الباب بكل قوتي ..
مي افتحي الباب اريد اطلع ما ابقة بهذا البيت بعد..
بقيت بالمطبخ كم ساعة وحدي وتعبت محد يفتحلي الباب ..
بعدها اجا رافد فتح الباب راسا طلعت بدون ما اباوع علية..
لحكني كلي اسف ظحكت عليه امي ضحكت عليه ..
  ولك يتهموني  اني ويه واحد غيرك وتضربني وبعدين تكولي اسف ابتعد عني رافد  اني بعد ما اصيرلك مره ..
ظل يتوسل واني واكفه..
زين كولي شنو الي غيرفكرتك هي كم ساعة ..
مو ماما كالتلي..
شكالت ..
كذبت عليك ..
شنوووو ..
امي رادتني اضربج وخلص ..
اني بدون شعور  ضحكت وكعدت بالكاع واني اضحك بصوت عالي..وابجي اتهسترت ..
كتله والله تكذب وتحلف بالقران امك عدها عادي .. انت  شنو من عائله رافد  وديني لاهلي..
ما اوديج بس يعرف خالي بعد ماترجعين  وبعد ما اشوفج ولج اموت اذا عفتيني..
  موت احسن  لعد اموت اني من العذاب..
صح اني جنت احبه بس الكرامه فوك كل شى..
رحت لاهلي زعلانه بس ما كلت شنو سبب الزعل..
كتلهم تعبت من عمتي ومشاكلها وبقيت اسبوع  زعلانه يم اهلي ..
للحكايه بقيه ..