لصمتي حكايه بقلم شيماء المشهداني

الجزءالاخير

#لصمتي_حكايه
بقلم ..الشيماء
القصه حقيقيه ..
.......الجزء العاشر والأخيررر .....
الناشربارق العراقي
مرت الايام  واني عايشه مرتاحه وجلال يعاملني بلطف وماكو اي مشاكل و ابد مااتغير .. شفت وياه دلال وحب وكل مرة تحب وتتمنى هذا الدلال  ...
وبيوم كعدت الصبح  جان عندي صداع قوي  كمت من فراشي لزمني دوران قوي  وجنت صدفه  يم اهلي ..
ماما كالت.. بنتي روحي للدكتورة لان  عندج اعراض حمل ..
رحت للمختبر حتى احلل وفعلا طلعت حامل ... فرحت بس مو الفرحه الي تفرحها بنت باول حملها ..
اتصلت بجلال ..
جلال اني  حامل..
بالخير عليج وان شاء الله تكومين بالسلامه وبالليل اجي اخذج..
من اجه ياخذني بالليل .. مشفت الفرحه بعيونه ..
جلال ..
ها حبيبتي ..
ما احس بيك فرحان ..
  سارة هذا مو اول طفل يصير عندي ومن الطبيعي اكون طبيعي  ..
يمكن .. صح كلامك ..
ضليت الطريق كله اني ساكته..
  شبيج سارة احجيلي شو ساكته ..
مابيه صداع قوي ..
اول مادخلت راح جلال لبيت اهله جان اول ما يدخل يروح على امه وابوه  يشوفهم شمحتاجين يبقى يمهم ساعة او اقل  ياله يطب البيت ..جانوا أهله طيبين كلش ومالهم شغل بيه ..
طبيت للبيت ولزمتني العبره و بجيت.. تذكرت رافد ..
تعبت  من التفكير بيه تمنيت  هذا الطفل منه حتى لو عايفني  بس احس شى منه يمي ..
بعدين تعوذت من الشيطان ربي سامحني بس مو بيدي هو أول فرحتي ..
كلت سارة هسه انتي حامل من جلال  والرجل يحاول بكل الطرق يرضيج ... بديت افكر  بجلال وأحبه كزوج   وهو صاين العشرة ومامقصر .
مرت الايام واني مرتاحه وحياتي ماشيه بهدوء وحسيت الدنيا ضحكتلي وكلت اي هاي هيه راح اعيش حياتي بسلام ..
وبيوم اجاني جلال..
سارة اريد اوديج لاهلج ..
ليش خير ...
مو عندي شغل بالمحافظات كم يوم وارجع  خاف اتاخر ويضل بالي عليج منو يحتار بيج اذا تعبتي امي وابويه كبار بالعمر ..
رحت لبيت اهلي وجلال يتصل بيه طبيعي كل يوم ويطمأن عليه او وضعه كما هو ماكو تغيير ..
كمل شغله واجا لبغداد جنت مشتاقتله جنت بهاي الفترة بشهر الرابع ..
اتصل بيه وكال مااجي عليج ابقي فترة يم اهلج لان زوجتي الاولى متدهورة صحتها ..
سلامتها ان شاءالله..

بقيت يم اهلي انتظره يجي عليه  ومرت اسبوعين ....
وبيوم اني نايمه ..جانت الساعه ب٣ الفجر .. دك تلفوني ..
باوعت جلال المتصل .. رديت
سترك ربي شكو جلال  ..
على كيفج غير تكولين  كلمه شلونك مشتاقتلك ..
خوفتني  خما  اكو شي طبعا اني مشتاقتلك بس استغربت لان ادري بيك هيج وقت نايم ..
لا بس اشتاقيت كلت اتصل بيج  متعرفين اشكد احبج وانتي الغاليه مالتي ..
حسيت عنده موضوع يريد يحجي بيه .. جلال صاير شي اكو شى  احجي من الاخير ..
سارة عندي طلب يمج ..ماريدج ترديني ..
احجي جلال .. اني الي اكدر عليه اسويه كول حبيبي ..
سارة نزلي الجنين.
شنوووووو..
  كتلج نزلي الطفل سارة حياتنة راح تنتهي اذا اجه هذا الطفل ..
جلال اني عليه 4 اشهر تعرف يعني شنو 4 اشهر يعني مو اسقاط احتمال يصير بيه شى وبعدين  هذا طفل حرام اكو  ناس تتمنى ريحته وانته تريد اجهظه .. نزلي وهذا ال عندي وبكيفج بعد..
سد التليفون بوجهي ضليت مختنگه وطار النوم من عيني  مانمت ابد وصليت الفجر ودعيت ربي يهديه ..
صار الصبح وجانت اختي موجوده ..
حجيت الها ..
كالت اتركيه فترة شلون تنزلين الطفل هاي روح ..واذا هو عنده اطفال انتي شنو مو من حقج اطفال تسوين ..
  عفته فترة بعدين هو اتصل بيه ..
اشو بعد ما رديتي ..
ليش اتصل الي يريدني يجيني ويتصل ..
ها يعني مترديني..
  مو هذا قصدي بس انته كتلي كلام قسيت  گلبي عليك..
سارة لا تخلين اسوي شى ميعجبج نزلي الطفل ..
شنو مايعحبني  شتريد تسوي سوي وتصايحت وياه .. وكلت لاهلي ودزو عليه حجو وياه ..
اجا على اهلي وكالوله هي تريد البنيه لان بيها بنيه ..  
خل تبقي الجنين بس اني ماابقى بحياتها  باوع عليه وكال لزمتيني من ايدي الي توجعني..
عافني وطلع زعلان لاتلفون ولا جيه واني هم مسالت عليه .. مرت اشهر واني يم اهلي ..
والدي كالي ..بنتي ساره انتي هسه بشهر الثامن اريد ارجعج لبيتج عسى ولعل يتغير رجلج عليج ..
قبلت اروح لبيته حتى اخذ جنسيته  وانسب الطفله اله ..
  رجعت لبيته بس هو جان ناوي يتعبني ويمللني عرف بيه بنيه ومن عرف هو ضاج كلش..
كال من تجيبين ذبيها بالمستشفى..
انت شبيك جلال  تحجي صدك نذب لحمنا بالشارع ..
زين انطيها لحد من اخوانج وتبقى كدام عينج واجيبلج  احسن بيت وصدكي ادللج دلال ..
  يحجي  وينطيني افكار واني عايفته يحجي بنتي ماانطيها لاي بشر .. دخلت بشهر التاسع وجانت حالتي الصحيه تعبانه فترة حملي جنت ابجي اهواي وما اكل ضعفت وصرت هزيله ..
  امي وابويه جهزوني جهاز الطفل كله حتى ما انقهر وتعبت نفسيتي  ..
امي كالت نسويلج عمليه لان اخاف اذا تجيبين طبيعي يصير بيج شى لان حتى النفس كوه اتنفس رحت اتفقت ويه الدكتورة وحددتلي موعد الولادة ورحت للمستشفى..
اخذني ابويه هو وامي  وزوجت اخويه عمر هم وكفت وياي .. وابويه دفع كل تكاليف المستشفى ..
هو اجه بس جاب جنسيته حتى كلمه حمدلله على السلامه ماسمعتها منه جنت خايفه واني بالبنج  واجيب طاري رافد وحجيت وي طبيب التخدير ..
عفيه دكتور مااريد احد يسمع الحجي الي احجي ..و سالني ...
ليش ..
كتله مشاكل بيني وبين زوجي ..
لا تهتمين ..
وفعلا الا صحيت بالافاقه  وطلعني طبيب التخدير وتشكرت منه .. سميتها لبنتي جوان .. هو ولا سال  شنو سميتها راح وماشفته  الا صار عمر جوان  شهرين اجا  هو و اخوه وكال لوالدي اريد نتفق  على الطلاك ..
ليش تطلك .. سأله والدي ..
لان بنتك  كسرت كلمتي  وما نزلت الطفل ..
ابويه .. كال .. اني اطلكها منك لان الي ميتحمل مسؤوليه بنته ويريد يموتها شلون أمن على بنتي عنده ..
هو ضل ساكت ولا نطق كلمه ..
اخوه  كال لاخويه عمر نريد البنيه بس نشوفها ..
جلال كال لاخوه .. شتسوي بيها ليش تشوفها  ميحتاج..
اخوه مااهتم اله  ..وكال ..
عمر  جيبها اريد اشوفها ..
  نطيتها لعمها حتى يشوفها وهي جانت نايمه ..
من شافها عمها نايمه بوسها ..أما ابوها جلال ماباوع بوجهها ..
بلغ اهلي أنه يريد يطلك لكن اني مارضيت اتنازل عن حقوقي وبصراحة مجان يهمني وجوده أو عدمه بحياتي لان الاب الي ميعترف بنته اني مااعترف بيه..
جان تغيير جلال غير طبيعي كلنا لاحظنا تغييره انصدمنا بيه لان طول فترة زواجنا ماسمعني كلمه ولا اختلفنا بيوم حتى زوجته الأولى جان مامقصر وياها وعايشين بدون مشاكل وحياتنا حلوة .. لكن يمكن السبب هو قلة الحظ مالكيت اي تفسير غير هذا ..
ضل جلال يدز ناس واقرباء  علمود اتنازل عن المتقدم والمتاخر .. وبدا يحجي عني كلام محلو حتى يمللني ..
مرة يسال هي ليش تختار اللون الوردي دائما يمكن  تسويلي سحر بيه ..
لو يكول تحلم هواي وتفز خايفه دائما .. راد بكل وسيله يطلع بيه عيوب وهي اصلا مو عيوب اللون الوردي كل بنيه تحبه ..والكوابيس تمر على كل انسان .. واخر شي دز علينا شيخ العشيرة مالتنا وحجى وياي ..
عمو عوفيه واتنازلي ..
عمو هي مو مساله  ماده لكن  ليش  كسرني اريد اكسرة ..
اتركيه واتنازلي والله ياخذ حقج منه ..  واجا علينا وجاب السيد وتم الطلاك والتصديق من المحكمه .. لكن السيد كال اله ..
شوف بنتك ..
شاسوي بيها مااريد اشوفها ..
يجوز من تشوفها تغير رايك ..
لا مااريد اشوفها ..
السيد كال ..جيبوا الطفله ..
نطيتها لاخويه يوديها من دخلت عليهم تباوع بالوجوه جان عمرها سنه ونص جانت دبدوبه وبيضه وشكارها يجنن جانت تشبهني واحلى مني بعد ..
بس شافته صرخت وانهزمت منه .. 
جنت اريد اسمع شنو راح يكوللها هو اب لازم يحن عليها ..
من صرخت وخافت .. جان ردة فعله هي الضحك ..
شفتوها تخاف مني انطوها لامها ..
هذا الموقف قهرني جدا بنته تخاف منه وهو مايحس ولا يكول متعرفني تخاف مني ..
وتم الطلاك .. 
  عمر بنتي حاليا ست سنوات وهو طول هاي السنين ما سال عنها ولا شافها ولا حتى هي تعرفه..
مرات هي تسالني ..
ماما اني هم عندي بابا مثل زوزي وحمودي  تقصد على اولاد اخوتي..
اي ماما عندج ..
لعد وينه ليش مايسال عني ..
  مسافر حبيبتي ..
اجاوبها وعيوني مغورگه وگلبي ينزف عليها .. والدي أو والدتي وفرولها كل شي ويحبوها مثلي واكثر ..
تزوجت من جلال  حتى احرك گلب رافد ..لكن حركت نفسي قبل اي احد ..
سامر تزوج مرتين بعدي وطلگ و ثبت انه مريض نفسيا ..
رافد اتزوج وعنده ولد .. ومشاكل مرته وي عمتي وزوجه رافد هزمتها لعمتي لان نفس طينتها قويه أو وكحه واقرباء ابو رافد تخاف تحجي وياها واستسلمت عمتي الها ..
اجتني فرص هواي للزواج لكن مستحيل اوافق وحاليا عمري ٢٧ سنه ..قررت اربي بنتي وتكون حياتي بس الها .. وفكرت ارجع ادرس خارجي واسوي شي لنفسي صح والدي أو والدتي ماقصروا وياي ومااجازيهم طول حياتي .. لكن لازم احقق شي بحياتي وأمن على مستقبل بنتي ..
رغم عمري صغير لكن حسيت روحي شفت كل انواع العذاب والحرمان ..
وبالنهاية اكتب لكل من يقرأ قصتي ..
فكروا مرارا قبل اختياركم لشريك الحياة وعيشوا حياتكم لاتفكرون بالزواج وانتو بعمر الورد الحياة طويله كدامكم عيشوا وشوفوا الدنيا واتعلموا من قساوتها وحلاوتها.. وحقكم لاتضيعوه وفضلوا نفسكم قبل غيركم لاترضون أن تكونون الضحيه دائما وغيركم يعيش على حساب حطامكم ..
بقيت وحيده اعيش الذكريات وبنتي تشاركني وي برائتها والعابها.. الندم مسيطر على حياتي لان اختياري كان خطأ يمكن اكول هذا نصيب ومرات اكول اني جبته لهذا النصيب وتمر ايام طويله عليه  و اني وحيدة الوحده مرة وقاسيه والصمت اصبح رفيقي  ... رغم أن خلف صمتي اقسى حكايا ..
.......وانتهت الحكايه ......
بقلم الشيماء ..