لصمتي حكايه بقلم شيماء المشهداني

الجزءالثالث

#لصمتي_حكايه
القصه حقيقيه ..
بقلم .. الشيماء..
الجزء الثالث ..
الناشربارق العراقي
طبعا رضى وياي  بعد ماكتله اني راح ابقى يم اهلي لان عزيمه اهلي قريبه ..وراح احجي لاهلي على كلشي اني تعبت انت المفروض تدللني وتخليني اميره بيتك .. وابقى يمهم ..
وباوع علية بس مبين علية ممصدكني .. 
براحتك لاتصدك بس اني تعبت ..
اجا باسني من راسي وكال ..
يمكن اني طوختها بس صعبة من زوج يسمع زوجتة تعيب علية وتنتقده كدام أهله ..
والله ماكو هيج شي اني احبك واموت عليك ..
باسني وضحك .. وفرحت اني ونمت بحظنه .. كعدت الصبح سبحت و تريكنا وغيرنا ملابسنا وطلعت جنت فرحانه بشوفة اهلي كلش مشتاقه الهم ..
واهلي اتلكونا وشافونا مرتاحين ..
سالتني امي .. ابوج يسال ويكول مرتاحه انتي شلونهم وياج ..
اي امي الحمدلله .. كلشي ماحجيت مثل ماواعدته ..
ورجعنابالليل وجنت فرحانه .. و نسيت الظيم الي شفتة..
لكن من رجعت رجعت ريمه لعادتها القديمه ورجعت المشاكل  نسوان اخوته جانو يحركوه عليه  ما اعرف ليش هالحقد  وهو يتأثر بيهم ويجيني يصرخ  ويضرب بيه ويسب ويكسر الغراض ..
جنت ما افكر اروح زعلانه ابد لان بس اروح زعلانه معناها بابا يطلگني منه  واكول اتحمل واتذكر عمتي اخت ابويه جانت مطلقه واي شي تصرف نسوان عمامي المطلقة والمطلقة ولو بيها خير جان احتوت زوجها وزوجها هج منها بسبب مشاكلها ..
ونورس اختي جانت بعدها مخطوبة مردت اهلي  يضوجون وتحملت المشاكل رغم كل يوم مشكله..
وبيوم اسمعهم يكولوله مرتك
متنظف واني البيت كله جنت انظفه واكول الشغل مايموت مراح انقص اذا اشتغلت  ..
واجاني يصيح ..
شبيك شصاير ..
انتي ليش مامنظفه ..
اصلا البيت كله عليه .. وتعال اكولك اني مرتك ليش تسمعلهم ومتسمعلي كولي خاف اني مو مرتك اني عدو الك ..
باوعت عليه هذا سد الباب واجاني ضربني ضرب ميتحمله بشر كانه
مدا يضرب مرة حتى الرجل ميتحمل هالضرب ..
خابرت اهلي واجتني امي اخذتني  وطلعت من بيته.. 
  وحجيت  لامي كلشي  بس بابا مجان هنا جان مسافر ..
ماما كالتلي اتحملي بنتي هاي العيال..   ماما اني اتحمل علمود شنو هو ميحبني  و اهله كارهيني ما اتحمل مااريدة بعد ...
بنتي شفتي بعينج شكد تحملت من العيال ..
امي بس على الاقل بابا ميتجاوز عليج ويحبج ..
ضلت امي مقهورة عليه ومحد يعرف بيه زعلانه بس امي ونورس ..
بعد  يومين اجه يرجعني وبابا اجا بس جان  ميعرف كلشي و امي منعتني اكوله شي .. لاتكبرين الموضوع ..
امي  كالتله اني مكلت لابوها ولا لاخوتها لان بس يعرفون متصير الك مرة .. وهالمرة سكتت وكلت احنا اهل لكن هاي اخر واول مرة اسكت ..
وهو ساكت بس يباوع ..
صاحت امي .. بنتي ساره غيري ملابسج وروحي وي زوجج ..
اي ماما .. 
  بدلت ورجعت وياه وهو ساكت واني ساكته الطريق كله طبينا للبيت وباوعت الوجوه كلها مكلوبه  كلشي ماحجيت صعدت لغرفتي نظفتها وعدلت الفراش وهو اجا بالليل نام ونطاني ظهرة واني مااهتميت اله  بس عبالك رجعت للسجن..
ضليت بفراشي اتگلب .. متمنيت ارجع اله لكن ماكسرت كلام امي وضليت افكر راح يتغير لو يبقى بمشاكله .. ونمت من التفكير والتعب ...
كعدت الصبح جان هو طالع .. ونزلت نظفت ..
.. وبدت المشاكل من جديد وبعد كاموا يزيدون حتى اطلع من بيتهم وحتى  اختي يضوجون منها ..
من طلع القرص مال الزفاف .. كعد هو وأهله يشوفوه ..
اخوه محمد كال .. بعد ماشاف اختي بالقرص واكفه على صفحه من طبوا ديهوسون ويزفونا ..
اكلج سارة شو اختج ضايجه خاف حاطه عينها على سامر ..
شنو هالكلام هذا اختي متباوع على اي بشر غير خطيبها النوب تباوع على رجلي وهي خطيبها ماقاصر ولد ابن عائله ومدللها والف بنيه تتمناه ليش تباوع على اي احد وهاي مو تربيتنا ..
  باوع عليه سامر ..
اخاف انتي وحدة من الالف الي يتمنون ..
شبيكم شكو هو لو هي عينها عليك لو اني عيني علي خطيبها ترى عيب هالكلام ..
عفتهم وصعدت لغرفتي..
طبعا اختي جانت احلى مني بعد حنطية على بياض وصاحبة عيون سودة ووجه مدور وطولها يخبل ملامحها جانت نازكة بشكل وهم جانت مامحجبه  حسيت سامر مستكثرها على مراد صديقه  انه  شلون  ياخذ وحدة من جمال واخلاق كامت اختي من تجيني امه متقبل نصعد لغرفتي اني وياها ..
اختي جانت تجيني لان من بعد المشكله  الاخيرة ميخليني سامر اروح لاهلي وكلش قلت  روحتي عليهم جانت تحن و تشتاقلي وتجيني ساعة او اقل كل شهر مرة
جانو نسوان حمايه على طول يكولولي اختج تغار منج مبين عليها لان انتي متزوجه وما ناقصج شي  وهي اكبر منج وبعدها مخطوبه وطالت خطبتها ..
احنا ماعدنا هاي الشغلات ماكو غيره بين الاخوات والأخوة كلنا نتمنى الخير لبعضنا ..
بس بداخلي  اكول  هي هاي هم عيشه حتى تغار اختي مني خليها الله لا يراويها هيج ايام مرة ..
جنت كلش احب اختي ودائما  اشكيلها حالي وتكولي ..
اصبري واتحملي..
وجنت كلش اسمع كلامها واتحمل ..  اخويه احمد  جان مسافر وسفره كان قبل زواجي وبعد مامر  على زواجي 4 اشهر تقريبا   رجع  احمد واني جنت كلش مشتاقة اله..
سامر ..
نعم ..
احمد اجا اريد اروح اشوفه ..
شيوديج وعلى شنو رايحه ..
ضليت اتوسل بيه لحد ماقبل كوة ..
او وداني لبيت اهلي..  بس بشرط ساعه ونرجع ..
بدلت وطلعت وياه وامه ونسوان اخوته يباوعون علينا ..
وصلت لبيت اهلي وتلكوني فرحانين وشفت احمد وضليت احجي وياه واهلي ملتمين ..
  وبعد ساعتين .. سامر كال ..
ياله تاخرنا ...
عفية شويه ... والله مشتاقه لاهلي ..
كلت ياله بسرعه ..
احمد كال .. سامر وين رايحين هسه اجيتو ..
والله عندي شغل ..
روح لشغلك عوفها لسارة اني اجيبها العصر..
شلون اعوفها ..
شنو شلون عوفها يمنا احنا اهلها واني اجيبها ..
ان شاءالله انتظرها .. طلع بعد ماسلم وبعيونه يريد ياكلني ..
ضلينا نسولف ونحجي ونورس وابويه وامي ..
   اخوية طلع  كال شويه وارجع حتى اودي ساره .. .. انتظرت اخويه مااجا صارت دنيا ليل واحنا بشارع ننتظر ..
بعدين اجا اخويه  الساعة 11 ..
ابويه .. ابني وين جنت ..
بابا صار انفجار ..
جان بذاك الوقت الانفجارات بس على الامريكان وسدوا الطريق وفتحوه ب١١ .. ومنع التجوال يصير ب١٢ يعني ميكدر يرجعني ويرجع ..
باوع عليه اخويه وكال .. اني باجر اوديج واعتذر من سامر ..
ضليت قلقه وخايفه من العواقب ..
نمت الفجر.. وكعدت تريكت وكلت لاخويه وديني .. وفعلا وداني ومن وصلنا للبيت ..
اخويه كال ..
شوفي منو موجود رجلج أو اخوته هم اسلم واتعذر عن البارحه ...
اي صار ..
بقى احمد  برة واكف بالباب  ودخلت اني لكيت بس حمويني موجودين كلهم  وسامر ماموجود كاعدين  بالهول ..
كتلهم اخوية احمد بالباب  يريد يسلم عليكم ..
احجي ولا اي واحد يرد عليه حتى من سلمت ماردوا السلام .. ولا كانه حجيت وياهم ..
ضليت محتارة شاكول لاحمد وهو واكف بالشمس محد يطلع عليك .. كلت خلي اكذب والله فشله ..
حمودي محد موجود بالبيت.. بس نسوان حمويني ..
زين سلميلي على سامر وعيالج .. وراح 
طبيت جوة وصعدت لغرفتي ..لكيت باب مقفوله..
  رحت لغرفتي لكيتها مقفولة صحت على اسراء مرت حمايه زينه وياي هاي الوحيدة بيهم   ..
  سامر نايم جوه وهو كال لحد يكعدني صار عصبي ويه اخوته  متحاجي ..  شلون هسة اريد اغير ملابسي ..
تعاي يمي بالغرفة ارتاحي ..
بقيت يم اسراء لحد الساعة 4 العصر
و كعد سامر فتح الباب ..
هلو حبيبي ..
باوع عليه  من فوك ليجوة
هلا هلا ها شرفتي وين جنتي ..
اشبيك شنو وين جنتي مو انت بنفسك وديتني لاهلي ..
اني مو كتلج .. للعصر وترجعين ليش متسمعين الكلام اشوكت تفهمين انتي شنو طينتج فهميني ..
والله مو قصدي حمودي اتاخر ومكدرت اجي بالليل اوووو .. بعدني احجي دفعني
وعافني وطلع..
بقى اسبوعين ميحجي وياي ..
بعدين اجيت يمه .. ولزمت ايده 
سامر .. انت ليش متحبني ليش تأذيني تريد تخسرني ..
جان نايم على الجرباية عدل كعدته وباوع عليه ..
  اشبيج شنو تخسرني ومتحبني  انتي دشوفين روحج ترى انتي هواي تغلطين بحقي ..
سامر اني ما متقصدة  اني احبك وما اقبل تزعل مني ..
شوفي اذا ترديني اصالحج تعوفين اهلج..
  شلون يعني اعوفهم ..
تنسين عندج اهل او ننفصل اختاري ..  ضليت ساكتة كلت هاي ساعة عصبية فترة ويرضى علية لان ما معقولة اترك اهلي ويخيرني بهيج خيار ..

للحكايه بقيه ..