لصمتي حكايه بقلم شيماء المشهداني

الجزءالثاني

#لصمتي_حكايه
القصه حقيقيه ..
بقلم.. الشيماء
الجزء الثاني ..
الناشربارق العراقي
رجعنا خبر الهم اتفظلوا يمنا ..
واجوي اهل سامر ..
طبعا ماغيرت شي من شكلي ولبست شي بسيط امي كالت ..
خل يشوفوج على بساطتج وانتي حلوة بدون مكياج ومتحتاجين تسريح للشعر.. جان شعري حلو طوله لنص ظهري تقريبا .. 
ولبست بدي احمر وتنورة كابوي كاحت لونها واختي خلت الي مكياج بسيط وفتحت شعري واهل سامر  تعجبوا عليه  تعلقت بسامر وبديت احبه وشى طبيعي اي بنية مراهقة تسمع كلام حلو وغزل تنعجب وتتاثر باول رجل يدخل حياتها..
وهو جان على طول يسمعني  كلام حلو ومدح و غزل ...  لكن اي شي مخلاني اختار حتى بدله الخطوبه هو اختارها..
واني كتله ..
اني عجبتني هاي البدله جان لونها احمر غامق حلو ..
كال لا اخذي هاي البدله .. لان الاحمر يجذب النظر .. واختار الي بدله لونها
وردي فاتح .. ومن عرف اريد اصبغ شعري ماقبل..
ليش عاجبني اصبغ .. 
انتي شعرج اشقر لونه مايحتاج ..
سمعت كلامه ومشت الامور مثل ماهو راد ..
تعجبت على روحي بحفله الخطوبه طلعت كلش جميله وفرق هواي بيني وبينه بس اني كلش حبيته وجان حلو بعيوني واول حب الي  .. وجان الكل فرحان اهلي واهله ..
  وبعد حفله الخطوبه بكم يوم نورس كالتلي باجر نروح لاهل مراد عزمونا كلنا .. واني مااهتميت للموضوع ورحت وياهم توقعت الكى سامر موجود كلت اكيد مراد راح يعزمه لان هما أصدقاء كلش .. او ولا اجا على بالي أنه سامر راح يزعل لان ماكتله على روحتي لبيت مراد بس هي صارت صدفه ..
   رحت لبيت مراد واحنا كاعدين كلنا بالصاله  وشفت هشام ماشال عينه مني  راح ياكلني بنظراته اني ضجت كلش ..
انتبه عليه مراد  وكال لنورس تعاي نورس انتي وساره  دخلو جوه قصدة  بغرفة البنات وكمت قبل نورس طبيت ونورس اجتي ورايه ..  اخته كالت لاتظوجين سارة ترى هو كلش حبج واتمناج من نصيبه  ومن انخطبتي اتاثر كلش..
مارديت عليها بس كتلها .. كلشي قسمه وغيرت الموضوع .. بقينا نسولف الى أن صار الغدة وتغدينا .. وبعدها اجا مراد وكال ..
سارة ..
ها مراد ..
سامر اجا ويريدج تعاي بالهول كاعد ..
استغربت شو وحده كاعد بالهول ليش مو يم اهلي ..
دخلت للهول .. ومراد سد الباب وراه
لكيت سامر وجهه احمر ومعصب ..
كتله شبيك سامر .. 
كال .. ترى انتي مخطوبه لرجال ..
  ليش هالكلام  ..
انتي ليش طالعة وبدون علمي شنو مو بعينج اني ..
لا صدكني توقعتك راح تجي وكلت انت مراح تمانع لان اني وي اهلي ... ومراد صديقك مو غريب عليك ..
وهشام الي جان رايدج خاف تصورين ماادري اني ..
  واني شنو علاقتي بهشام ..
  شلون ماالج علاقه  وجايه بالمكياج واللبس الراقي والشعر مفتوح..
اني كشخت لان كلت اكيد راح تجي
وانتو بنفس المنطقه واصدقاء ماتصورت مراح يعزمك ..
ضل زعلان وميباوع بوجهي وهو معصب كال ..
كومي كوليلهم لاهلج سامر راح يوصلنا للبيت ..
رحت على امي ..
ماما سامر  راح يوصلنا ..
سلمنا على أهل مراد وهو واكف بره ينتظر حتى مراد استغرب من تصرفه ..
سلم على امي واختي بدون ميباوع عليهم ..
الطريق كله مايحجي ويايه ونظراته شرار عليه ..
بقى سامر  اسبوع ميجي علينا واني كلش اتاثرت  تعودت علية بين يوم
ويوم اشوفه وابقى كاعده بالحديقة انتظرة يجي ..
الى ان بيوم  العصر اسمع الباب اندكت صوت رياجيل طبيت جوة بابا فتح الباب ..
طلع اخو سامر الجبير وسامر وياه ..
من شفت اخوه اجا توقعت يريد يفسخ الخطوبه ..
ضليت انتظر اريد اعرف شكو ..
اجا بابا .. كال ..
تعاي سارة .. روحي سلمي على خطيبج وحماج ...
كمت ورحت للصاله وسلمت عليهم
سامر جان مبين عليه بعده زعلان بس اخوه طبيعي سلم عليه وهو مبتسم ..  بابا كلي اكعدي بنتي ..
كعدت واني اباوع سامر ميباوع بوجهي واخوه يباوع على بابا ..
بابا سارة زواجج الاثنين الجاي أن شاء الله..
باوعت على سامر مستغربه الوضع ..
وكلت ... بابا ليش هالسرعه ماالحك اني ..
حمايه كال .. شنو نواقصج كمليها كدامج كم يوم احنا كلشي مكملين ..
وسلموا على ابويه وطلعوا ..
كلت لبابا .. بابا الوقت كدامي قليل ..
كال .. شتحتاجين اني وامج وياج مشي الأمور حبيبتي هما كلشي مكملين ..
ضليت اركض وخبصت البيت وامي ونورس وياي خبصتهم ..
وكملت بسرعه الله يسر لي  اموري ..
ورحت اشتريت  بدله للحنه لونها بنفسجي فاتح وتسريحتي كيرلي وشويه شلت  شعري صفح .. جنت اشويه سمنانه طلعت بعد احلى من حفله الخطوبه  وخلصت حفله  الحنه واني كلش تعبانه ..

و ثاني يوم العرس رحت للصالون اخو اسمه  محمد اجاني اخذني للصالون وسامر ماشفته من يوم العزيمه والزعل ..
ومن وصلت للصالون شفت ماسكة الورد محلوة كلت خلي ارجعها ..
ومحمد راح وياي ورجعتها .. جانت خالتي وياي نزلتها للصاالون ورحت اني وحمايه للمحل وبالطريق محمد حمايه يحجي حجي ما فهمت ليش هيج حجى بس جان مختصر كلامه أنه يريد يوصلي رسالة انه سامر الصغير   ومدلل وعدة تصرفات الكل مرات يستغرب عليها بس مثل ما كتلج هو لان الصغير مالتنه..
اني هزيتله براسي انه اني فاهمته شدايحجي ..
بس اني كلشي مفهمت عليه ..وليش هالكلام هذا مو وقته مو بيوم العرس..
رحت للصالون وكملت ورجعنا للبيت وصارت الزفه كمت ابجي وطلعت للباب بابا متحمل ما باوع بعيني باسني وكام يبجي.. وصارت حفله العرس بالبيت ومن خلصت زفوني لغرفتي وبعدين صعدوا للغرفه  كالو راح ياخذوني لبيت اخته لان ميريد احد يضوجه بدلت ملابسي ونزلت جوه دقايق واخذونا لبيت اخته..
جان حلو بيت أخته ومرتب .. طبيت الغرفه خايفه ..
بالبدايه جنت خجلانه كلش بس هو عرف شلون يخفف خجلي  وصرت زوجته والصبح رحت لعيالي تلكانا  اخوه يضحك ويكول بشروا ..
سامر  يضحك وتشاوروا  ودخلت واني خجلانه من كلامهم وهما يضحكون .. 
بقيت يم اهله اسولف ونحجي ونضحك خجلت  اصعد مباشره ..  وسامر صعد فوك للغرفة ثواني واسمع سامر كام يصيح سارررررة سارررة .. 
رحت ركض ها ها شبيك .. شصاير ..
كوليلي انتي طرشة ..
شبيك سامر  شكو..
تعالي ..
ها  شبيك خوفتني ليش تصيح ..
ليش الغرفة وصخة هيج..
هاي شبيك سامر  اني هسه دخلت للغرفة شوكت لحكت حتى  اوصخها..
تقصدين اني اجذب عليج.. 
  لا اني مكلت هيج لكن مو  اني الي هوستها لكن  المفروض الغرفة غرفة عرسان غير تترتب .. وتكون نظيفه ..
لا والله تردين يخدموج ..
اني مكلت يخدموني بس هذا المعروف غرفة العروس نظيفة ..
كام يصيح ويعيط علية ويكولي انتي ممرتبه الغرفه انتي مهمله ..
  واني بس ابجي ماعرف شاحجي وياه ..
نزلت جوة وكلت لمرت اخوه اريد غراض التنضيف..
اخذت الغراض وصعدت و نظفت الغرفة وسبحت ونمت و كعدت العصر ..وعلى صوت الباب ..
فتحتها ..
مرت اخوه .. هاج ساره ملابس سامر يكول خلي تكويهم ..
استغربت ليش زوجه اخوه تكولي ليش ماهو يطلب مني .. ليش هالتصرفات الغريبه .. 
بقى كاعد جوة لحد ماصارت الدنيا ليل
دخل الغرفه اي كلمه ماكال .. راسا نام ..
واني هم نمت وعفته .. وبقى  ويايه على هذا المنوال مايحجي  لحد رابع يوم من زواجنا اجا يدور على حاجته وصالحني  ..
ومشيت الأمور طبيعيه ..
وبعد اسبوع من زواجنا اني بالمطبخ ..
  ومرت اخوه وبنت اخوه نحجي وكالت بنت اخو ه  انتي ليش قبلتي بسامر ..
ماشفتي ماعرفتي مو اي وحده ترى تقبل بيه ..
   ليش شبي سامر ..
تحجين صدك سامر اشبي .. 
ما ناقصة شى حلو وخوش شاب والف بنية تتمنىاه ورجاءا بدون زعل ما احب احد يعيب على رجلي..
وعفتها وكمت .. وبالليل رجع سامر عصبي..
تلكيته..
شلونة حبيبي..
  انتي ليوين تردين توصلين احجيلي ..
شنو قصدك ..
ليش كاعدة يم مرت محمد وبنته
وتعيبين عليه كدامهم ..
اني ما معيبة عليك..
  لا معيبة وتكولين اني اخذته هيج .. 
سامر شنو الي جابرني احجي هيج و اني مو جبيرة علمود ارضه بواحد هيج  وبعدين اني حبيتك مكدرت اكول لبنت اخوك هي الي عيبت لان انت مراح تصدك بيه  واكيد راح تصدك بنت اخوك..   عافني ونزل جوة ضليت مقهورة ومصدومه من تصرفاتهم ليش هيج يسوون ..
هاي عود اني بعدني عروس وهيج يصير بية اني بطبيعتي مااحب المشاكل وكل الي اكدر اسويه  من احد يقهرني ابجي وبس هذا اخري..  فما حجيت وي بنت اخوه سكتت وسلمتها بيد الله .   وبعد كم يوم يله تصالحت وياه واني الي بادرت بالصلح توسلت بي ياله رضا  يتصالح وياي  مو على شى بس ما اريد الزعل واحنا بعدنا عرسان .. وهاي الفترة يكون هي احلى فترة نعيشها ..
للحكايه بقيه..