قصة جحيم تاونات. بالدرجة المغربية

الفقرة 18 والأخيرة

جات اللحظة الأخيرة ، وصلنا المكان المحدد ، لقيناه مكان كبير يمكن محطة تصفية الماء ولا منعرف، دايرين بيه الشجر و مصابح كبيرة ، والسيارات ، تسلتنا وكيبان ليك الحراس حدا الباب دايرين بيه ،شي 4 ، وانا كنشوف واحد نضربوه يفقد الوعي حتى لقيت تلاحت عليه أميمة والعجيب فالأمر تصدم وبقى غير كيشوف فيها وهي ذبحتو وتمى تصدمت حتى أنا على وحشية ديالها، قتلو الحراس آخرين ، دخلنا للداخل انا الاول مع عصابات ديالي ومساعد ديالي كيحذر فيا ، وشوية وصلنا لمكان المجلس ، أكيد كاين 7 ناس وكنعرفهوم ولكن تصدمت هادو 7 ناس كانو خدامين عند فرعاوني ، كيضحكو وقال واحد فيهم لباين فيهم زعيم ، قال جيتو واخيرا ، هز سلاح وقال لينا حطو سلاحكم ، تعجبت من الثقة ديالو كبيرة وهم قلال ويمكن آخرين مخبعين ، ولكن انا قلت العصابة ديالي يهزو سلاح ولكن شوية كنحس بسلاح فوق راسي والصدمة هي أن مول السلاح هو أميمة ، اه بصاح أميمة ... 
قالت ليا قليهم يحطو سلاح وكلشي حط السلاح ، ربطتني وربطات آخرين ،وخلاتني حتى تهدنت وبدات تعاود ليا على كلشي، وقالت ليا بلي الفرعاوني قتل ليها الوليدين ديالها باش خدا ليها حقها الورث وحط شي 2 ناس شارفين فدار العجزة زعمة وليديها وبلي مقدروش يربيوها وخلاوه هو يتصرف ولكن داك ناس عودو ليها كلشي ملي كان فعمرها 15 عام ،وملي كانت كتمشي كندا تعرفات على واحد طالب كان كيقرى معاها وهو ولد زعيم عصابة وهو لعونها فجميع شؤون مخبرات ، وكانت كتطيح جميع الاشخاص لكيعونو الفرعاوني وقتلت درقاوي حيث عرف السر ديالها ، وحتى ديمتري وجيمس عرفوه وقتلهم ، وقالت ليا انت دخلتي لحياتي وبغيتك ومقدرتش نقتلك ولكن انت كتشكل عليا خطار ، كنت باغي نعيش العذاب للفرعاوني ولكن انت أجلتي من العملية ، وخا انا شديت سوق المخدرات ورجعت كيقولو ليا x مجهول ولكن حاولت نكون حبيبتك ولعلك تبعد شوية ولكن انت دخلتي راسك فشي حاجة صعيبة عليك، انا عدبت الفرعاوني وخططت لكلشي وأكبر العصابات ومعرفوش حقيقة ديالي ،ولكن الحل الوحيد غدي نقتلك ، دخلو 5 ناس ملثمين وهما لكانو قتلو درقاوي وصحبي حمزة نفس الباس ، هبطت راسها وبدا سلاح كيتطلق كانو خطار فهادشي ودم كيطير فالسماء ، والصدمة هي ملي قتلت أفراد العصابة ديالها لكانو خدامين مع فرعاوني...
وشوية قالت ليهم هبطو راسكم وجبدت السلاح وتيرات فيهم داك ملثنين حتى هما قتلتهم . وقالت ليا دابا حتى حد معارف سر ديالي وبغيتي غير انت نشوف شنو ندير فيك
فكات ليا الحبل من يدي وهزات سلاح وحطتو فوق راسي ، بديت نشهد ولكن شي حد طلق قرطاسة جات فيدها كان شي حد من داك ملثمين لقتلتهوم وكاع ممات ، تيرات فيه وملي دورت راسها عندي لقاتني هزيت سلاح ومصوبو على جهة ديالها ، قالت ليا حطو ولا نتيري فيك ، ولكن انا مبغيتش نقتلها حاولت نحيد ليها مسدس ولكن هي طلقات على صدر ديالي ، ومحسيت براسي حتى طلقت رصاصة عليها وطاحت ونزلت عنقتها وقالت ليا بلا متبكي راني كنبغيك ، كنت كنتمنى تقتلني ومنقتلكش ، قالت ليا بغيت نعنقك اخير تعنيقة ، عنقتني وودعتني ، ماتت خرجت مسرع ركبت فطونبيل ومشيت للفيلا ديالي ، عيطت لطبيب بيطري كنعرفو ، وحيد ليا رصاصة من صدري وخا عيا ميحذر فيا انه غدي نموت الا ممشيتش لسبيطار ، ولكن انا عطيتو فلوس وقلت ليه باغي 12 ساعة نكتب شي حاجة فواحد دفتار ويعطيه للمحامي ديالي ، صافي قرر يساعدني وملي نكمل الكتابة نمشي معاه مستشفى ، سديت عليا باب ديال البيرو وكتبت هاد قصة كلها والا كنتي كتقراها فخصك تعرف أنني حاليا مايت وانا كنعودليك على حياتي كيفاش دوزتها وكيفاش ماتو الناس لكنبغيهوم والظلم لعيشتو ، والنهاية المؤلمة لعشتها ، انا ميت حاليا ولكن قصة ديالي كيفما قلت فاول سطر منها ، أقبح حاجة هي يكذبو قصة ديالك ، قبح الله الفقر لجعلني نعيش هاد الحياة ، والبنت لبغيتها وبغات تقتلني ، بقات ليا 2 ساعات ونموت وبغيت نموت على خاطري ، وداعا اخوتي وداعا أحبائي ...
النهاية. 
القصة تنقلات من عند الطبيب البيطري للقى بطل قصة ميت فالفيلا ديالو وهو عطاها للمحامي والمحامي عطاها للمحكمة باعتبارها اعتراف والقصة كتنشر فالمجموعات حتى وصلات لينا. 
هاد قصة ماشي حقيقية وإنما من نسج خيال خالد اتهيته ، وكنتمنى تكونو تمتعتو بالقرءة ديالها ، أحبكم اخوتي .