اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
الردالأوَّل:-
دي ولا تتسمي صاحبه ولا بيستي حتي دي شخصيه متتعاشرش اوعي تفكري انك وحيده وان محدش بيحبك وتحبطي نفسك وتقولي عايزه تموتي مهما كان ال حصل خلي عندك أمل لبكرا ابسطي نفسك بنفسك متخليش الدنيا تقف علي حد وبطلي عياط احنا في العيد و انزلي فرفشي وجيبي شوكولاته وابسطي نفسك
-Darkangel.
الردالثانـي:-
بصى يا حبيبتى الصحاب فيهم الحلو و الوحش ممكن انتى لحد دلوقتى قابلتى النوع الثانى بس كلنا مرينا بتجارب زى دى بالظبط كانه فيلم و بيتعاد قدامنا مرة و التانية و الثالثة انا مثلا كان عندى صحبتى فضلنا سوا سنين و سنين و سنين و صدقينى لما اقولك فوق العشر سنين كنا اخوات حرفيا بس حصل ايه فضلت صاحبها عليا مع انى يعلم ربنا طول عمرى بتمنالها الخير بس زى ما هى نسيتنى انا كمان محيتها من ذاكرتى انتى اقوى من كدا بكتير اقوى من مجرد بنت عملت نفسها صاحبتك و اتخلت عنك عشان واحد ملوش لازمة و صحابك اللى بيتريقوا اوعى تسمحيلهم ردى و وقفيهمم عند حدهم و اديهم على دماغهم بكلامك عرفيهم انتى مين و انهم ميفرقوش معاكى فى حاجة و افتكرى ان هيجى يوم و هتقابلى الصاحبة إللى بجد إللى تخاف عليكى كأنك جزء منها و مين عارف ما يمكن هى اصلا جمبك و انتى مش حاسة بسبب كل إللى بيحصل دا ... نصيحتى ليكى انتى قوية فأوعى تنسى دا
-Celeste.
الـردالثالـث:- (لااتقليكدة،لسةفيهردكمانبعدده😂)
يا رباه، بصي انتِ شكلك شخصيه جميله جدا💕. بصي يا حبيبتي...كون أن في واحده بتتعامل معاكي كده او حتى وصفتك بشئ زي ده، لا يطلق عليها اسم صديقه اصلا علشان نبقى "بيستي"، انتِ لازم تبقى أقوى من كده، ودي كانت أول حاجه. تاني حاجه بقى...ان انتِ صحابك إلى بيهزروا الهزار السخيف ده "زي ما هما مُعتقدين انه هزار"، انتِ مش لازم تتعاملي مع الأشكال دي اصلا، إلى هو معلش يعني، ايه الي يجبرك انك تتعاملي مع الناس دي، أوعي تخافي وتقولي ما انا معاهم علشان مبقاش لوحدي أو مهما كان هما الي فاضلين ليا، لو انتِ شايفه كده تبقى غلطانه. حبيبتي إلى تتريق عليكي أو تتعامل معاكي وحش عُمرك ما تتخذيها صديقه ابدا. اما بقى في موضوع انك معندكيش امل وانك عاوزه تموتي، كلنا بيجي علينا وقت ونفكر بالطريقه السلبيه دي، بس اوعي تفكري في يوم انك تعملي حاجه في نفسك. بصي يا حبيبتي... قربي من ربنا، ادعي كتير. تاني حاجه حاولي تقطعي علاقتك مع الناس الي اذيتك دي او شببتلك مشاكل نفسيه، حاولي وتعرفي على ناس احسن واجمل منهم، الدُنيا مش بتقف على حد، وان شاء الله ربنا يعوضك بأحسن من كل الشخصيات القذره دي. بجد اتمناك من كل قلبي السعاده، واتمنى من كل قلبي ان تكون رسالتي وصلتلك وممكن تفيدك بحاجه. اتمنى انك تطمنينا عليكي من وقت للتاني.
-Valkyrie.
الـردالـرابعوالآخيـر:-
بصي يا بنتي، هي كلمة تاخديها مني و توزنيها علي اي واحدة تسميها صاحبتك من هنا و رايح.. الصُحاب باقيـين علي بعض.. ولو مش باقيـين في وسط أتفه الظروف -زي الموقف اللي بتحكيه ده واللي أنا حرفياً مازِلت متعجبة منه الحقيقة- أومال في وقت الشـدة هتعملوا إيه!؟
إنتِ متخيلة موقفك عامل إزاي؟ باعتك عشان عيِّل اللي بينها و بينه صحوبيـة و حُب أهبل عشر سنين قدام هتسميه تجربـة!! اللي حصـل ده نجـاكي يا بنتي من حاجـات كتير كانت ممكن تحصـل، و حاولي تبعدي عن سِكِّة الارتباط دي احـنا لسة فيـن و فين عقبال مـا نبدأ كبنـات نفكَّر في حاجات زي دي. انتبهي لمُستقبلك و دراستـك و إعلـي بسقف طموحـك فوق ما تتخيلي، و سيبك من ده كـله.
تاني حاجة متسمحيش لحـد سواء صُحاب أو قرايـب يقلب من قيمتك قدام نفسك أبداً ولو حصـل كدة، يبقي إخلعي.. آه زي ما بقولك إخلعي.. أصل صُحاب إيه اللي يستخدمـوكي كعـامل تريـقة إنتِ نفسك بيبـان عليكي إنك بتضايقي منـها؟ ليـه .. هو انتم كصُحاب شغلتكم في حياة بعض انكم تشدُّوا حيل بعض و تقوِّموا بعض و تخففوا عبء الحيـاة علي بعض ولا تهرتلوا مع بعض ؟ -آسفة لو اللفظ جارح لكن دي الحقيقة المُرة اللي بشوفها في الناس حواليا-.
فكَّري فيها و إعقلي الدنيا كدة، إنتِ عليكي إيه من ده كله غير راحة بالِك.. ولو مش لقياها معاهم، يبقي ألف واحد يتمناكي.. و فعلاً يا حبيبتي ألف واحد يتمناكي و متشُكِّيس لحظة في حاجة غير كدة مادام انتِ شخصية كويسة و supportive و باقيـة علي الشخص اللي قدامك.
إوعي تستسلمي للمود اللي انتِ فيه ده عشان هيخلي الناس كلها تيجي عليكي و أي هفـوة تحصل هتأثر فيكي أضعافها زي ما بتقولي..! والله والله الحيـاة ما مبتقفش علي حد، وإلا مكنش ربنا خلقلنا نعمة النسـيان؟
طب أقولك علي حاجة.. خديها رسالة من ربنا. إحنـا لسة خارجين من شهر كريـم يعني اللي حصل ده وارد يكون استجـابة لدعوة حد بيخاف عليكي فدعالك يبعد عنك اي حد نيِّته شر ناحيـتك و جت فيها ..مسمعتيش المقولة اللي بتقول.. "دعوتُ الله أن يُهلِكَ عَدوِّي فمـاتَ صديقـي" ؟ مقدَّرة حجمها؟
سـاعات ربنا لمـا يلاقينا متمسكين أوي بحـد زيادة عن اللزوم رغم معرفتنـا كذا مرة إنه مش كويس، بيختار يخليـه يجرحنا عشـان نسيبه.
كلامـي ده مش علي صاحبتك أو صُحابك اللي بيتريقول دول و بس لاا.. كلامي ده تفتكريه من انهاردة لقدام لما تكبري علي مدار السنين و تقابلي لسـة صُحاب أشكال و ألوان و كُل واحد و له خـازوقه المُحترم ولا إيه؟ 😂
أياً كان، زي ما قولتلك الصُحاب باقيين علي بعض في الحلوة و المُرَّة، غير كِدة فــاكِس.
-Nirvana.
________________
كلامنا مش للبنـت بس، كلامنا لكل حد بيواجه مُشكلة شبهها تقريـباً.. الكومنتات دايماً مفتـوحة لأي حد خابـب هو كمان يسـاعد 💕.
و الأكونت جاهز لإستقبال مشكلاتكم أو استفسراتكم أي وقـت 💛.
و بكداااااعع خلصت حلقتنا انهاردة، نشوفكم الاسبوع الجاي مع حلقة جديدة من برنـامج قلبـاً و قالـباً.. 😂🙌🏻.
