حليمه💪

السطح

ب البدايه..
اتمنه تتفاعلون ويا القصه
وان شاء الله تعجبكم
......... ................
حليمه..  بنيه عمرهه ٢٣ سنه

ب ملامح انوثيه بس مو مثل باقي البنات
قويه ومثل ميكولون سباعيه
وماتشبه اي بنيه بعمره لا ب التصرفات ولا ب الافعال

تعيل عائلته المكونه من بنات ثنين
وامه جبيره العمر

هيه جبيره اهلهه.. طبعا
ابوهه متوفي..... وتاركلهم بيت ساكنين بيه
.....
تخبز وتخيط   .. وتحف..
سبع صنايع والبخت ضايع
...
بينما جانت اصفط الحطب فوك السطح حته تنزله
توجر بيه تنورهه
لخبز العصر
سمعت صياح وهوسه سطحهم مابيه ساتر
ماحسته اله ولد طفر عليهم
عدلت شيلته ولملمت روحه
احتار الولد وين ينطي عمره
جانو يركضون وراه الزلم ويطفرون من سطح لسطح حته يلزموهه
وصياح وخبصه
راد يطفر ع غير سطح وكضته
حليمه من ياخته
تعال انته يلمصيوب وين رايح...
انته من وين وين دارك قرارك.. جاي تطفر ع سطوح الوادم
كول عوايل..
ناس ب السطح هيه هيج صارت وكاله بدون بواب
.... ...............
الولد الي لزمته اسمه مهدي..
..................
مهدي // ولج هديني منين طلعتيلي انوب شقواتج جنج زلمه نجر بعدي عني خل افلت يابت الناس
حليمه// ها بت الناس يعني تعرف اكو ناس ساعه ٢اطفر شعدك
حرامي مطيرجي.. عدك طلابه.. شسالفتك ماهدك لحد ما الم الناس واشيعلهم ب الصياح والعياط يا عديم الشرف..

مهدي//شسالفتج ياعيني وخري ولله مامسوي شي اني جاركم بيت ابو نضال اذا تعرفين بيهم تره ولله خبزج يرد العافيه.. بس هديني رحمه لابوج العزيز عليج

حليمه// خبزي يرد العافيه اليوم انهي  عافيتك يلعاطل
........
شكلت حليمه دشداشته وطلعت البجامه الي لابسته جوه 😹

مهدي//وين اكو مره لابسه بجامه انتي زلمه اله شويه الله ياخذج
......  ......
طاحتله حليمه كتل ومن سمعت الزلم جايين
كلله مهدي عليج بعزيزج ساعديني يابن اقصد بت الحلال 😂😂
ضمته حليمه جوه السعف
.....
ومن اجو الزلم وكفتلهم بخشبه.  وصاحت هذا السطح مابي محط رجل للغريب

صاحو عليه حليمه خلينه نتعدهه لشوفين شي مشفتيه انتي وخواتج
صاحت بيهم.. . زلمه بيكم يخطي خطوه ع بيتي وشوفو حليمه الي تصيحوله بت شسوي
احنه حريم ولايه وماعدنه احد صح.. ومو عذر يصير بيتي مداس
..
..
تردون نعارك كولو ونشوف الوادم من تضربون حرمه يتيمه شيكولون عن شوارابكم

...
صاح عليه واحد منهم وكال فلك طرج مو بت لسانج شطوله
ياريت لو شايله شوي جمال مثل النسوان شسويتي
ذبيتي عمل

امشونه شباب هاي النسره متفكنه هسه
دارو وجههم الزلم وكلمن شافله درب
..... ................ ............................
ضلت حليمه واكفه.. دمعت عينه
باوعت لايدهه الي حركه التنور وشووهه منظرهه
واصابعهه المجرحات من لزمه الخيط..
وكالت بصوت عالي
(محد اختار حياته انولدت  هيج وراح اضل هيج طول العمر لا اني مره ولا اني محسوبه ع الزلم.. الحياه اخذت انوثتي ))
لان
عايشه يتيمه وحيده بركبتي بنات الناس تعيرني تنهش لحمي ماعدي ظهر ازامط بيه
لهذا لابسه بجامه جوه دشداشتي
سمعت يلغريب.. بدال متضحك علي..
اني ابيتي مستوره.. الدور ع الناس الي تتعرهه
................................................
طلع مهدي من جوه السعف
مشكوره اني اسف جرحتج
حليمه//عادي قبلك هواي جرحوني الجرح ع الجرح تكوم الجروح ميعورن.. تعودنه
مهدي// اني اسمي مهدي واعرفج حليمه امي تحمد بيج بس عمري مشايفج
حليمه// وهسه شفتني.. شنو سالفتك ليش خلگ الله تتراكض وراك..
مهدي// سالفه طويله اترخص ماريد احد ينتبه علينه مشكوره هواي واسف اذا ضوجتج لو حجيت عليج انتي احسن من عمامي عمي محد مثلج هيه كوه
كاله وطفر ع سطح الجيران الي بصف بيتهم 
من كاله وهو ضاحك 😂😂

هم حست حليمه هو جاي يهينهه او يقلد عليه بحجايته
.........
وصلنه لنهايه البارت

اذا عجبتكم الاحداث  كولو
تردون اكمل لو اغلس ع القصه
تره فد شي جديد احسن من سوالف الفصليه 😂 الي  مكررهه نفسه مليون مره