حليمه💪

اول يوم دراسي

بعد موافقه ام  حليمه.. انو اداوم بته ب محو الاميه
حضرت نفسه حليمه الصبح واخذته الابنيه الي تشتغل هناك وراحو

ومن  وصلو كلتله كعدي بهاي القاعه ضلت حليمه مرتبكه ومتعرف شلون تصرف
طبت وكالت السلام عليكم
ردن النسوان وعليكم هلا بيج خيه انتي الجديده
حليمه هزت راسهه وضحكن النسوان شمالج يبت تره كلنه نساوين المن المستحه

*سووله مكان وكعدت يم وحده عجوز اسمه ام چاسب
هاي اكبر مره ب الصف  😂😅 نسوان ولدهه يجيبنهه بحجه تتعلم ويخلصن منه بنفس الوكت ويا طالعه من الصف ويا مرجعيهه احفادهه للصف..

ومن دخل الاستاذ عليهن رتبن شيلهن وسكتن وحليمه ضلت صافنه
فاكه حلكه..
والنسوان// دخل استاذ مهدي دخل اششش سكتن بعد

مهدي// حياهنن وجان لازم عوده ضعيفه
سد بيهه حلك حليمه المفتوح
وكال حلوكه مفتوحه ماريد هذا يوم الاحد والاحد بدايه اسبوع
ماريد كل ساع استاذ عطشت لو استاذ اترخص بس  اشيل الجدر من ع النار

جدرج المفروض طابخته وساده باب بيتج وجايه مضبطه امورج
جهالجن ميجون كل ساع للصف احنه منلعب والي ميريد
يطلع من هسه لان احنه هم جاي نتعب

حليمه.. ضلت مصفنه وكامت وكالت هو انته جاوبه اني استاذ مهدي
حليمه انته

مهدي// اي اني واحنه بصف ممكن تكعدين حاليا ولتفشليني
من خلص الدرس راح مهدي وهيه ضلت كاعده
جانت تحس بضوجه نفس الشخص الي عبر ع سطحهم نفسه يدرسهه.. هذا الحظ لو الصدفه... 
.... ____________

احجيلكم شويه عن مهدي
مهدي ولد لا حلو ولا كلش موحلو  رجال عادي ومبيه اي ميزه وبادي عليه الثلاثين من عمرهه بس هو ناعم.. يعيش ويا امه وعدهه اخوان ثنين شهداء واخته نضال مزوجه ابن عمهه
امه مره جبيره بس متحكمه بكل شي
....._______________

الي نكدر نغيرهه نغيرهه بس اكو ناس ميحاولن يغيرون اي شي..
هذا عنوان يوم حليمه من داومت
حليمه مصره تتعلم حته لو مهدي هو الي يعلمهه حته لو هو نفسه هذا الانسان الي انتقدهه وضحك عليه