بارت 10
()
)(
(!(
()
)(
حين لـآ يكون من نصيبنآ {شيء آخترنآه} ! و بكل صدق أحببنآه ~ فإنه سيكون من نصيبنآ {شيء أجمل} ~ شيء آختآره آلله لنآ و طبع حبه في قلوبنا . . !
»«
«»
»«
»«
«»
وقفت السياره قريب من باب القاعه أخذت نفس وهي تحس بالخوف وقلبها يدق طبول اول مره تدخل هذي الاماكن
مسكت يدها سعدية تشجعها : لا تخافين !
من حقك تحضرين وتفرحين ببنات اخوك !
واتبعت كلامها بغمزه : يمكن تلاقي عريس لقطه
وبتحريص : انتبهي احجزي لي اخوه !
زفرت ساره بعدم الارتياح بداخلها ندم لأنها طاوعت سعديه
لوحت سعديه بيدها امام وجه ساره : وين سرحت يا ابو الشباب !
يلا انزلي بسرعه ساعه ونرجع لك
وبضحكه : انتبهي لا تتأخرين بعد 12 اخاف يزول أثر سحري ويعرفونك لما ترجعين لحقيقتك الشينه !
تدرين افكر اكنسل زياره خالتي وانزل أشبك واحد من هالمعازيم !
ناظرت ساره ام سعديه وهي تؤشر بيدينها تستعجلهم وابتسمت بدون نفس : الحمد لله انه امك ما تسمع ولا تتكلم كان انجنت لو تسمع سوالفك البايخه !
سعديه فتحت عيونها باستنكار : انا سوالفي بايخه !
والا انت المعقده وما تعرفين تتصرفين
صار لنا ساعه بالسياره خلصيني انقلعي بسرعه ...
فتحت لها الباب ودفتها : انزلي
وقفت ساره برا السياره وهي تشوف سياره الاجره تتحرك
وسعديه تطلع نفسها من الشباك بطريقه محرجه وتلوح بيدها وبصوت عالي : حظ سعيد يا ساندريلا
التفتت حولها ساره باحراج من تصرفها كان بعض الحريم داخلات
أخذت نفس عميق تحاول تهدي دقات قلبها ......
متردده بالدخول طرت لها فكره تجلس برا
تنتظر وما تدخل !
لكن بداخلها شيء يدفعها تروح وتبارك للبنات
وتشاركهن فرحتهن !
طالعت القاعه وهي تردد بنفسها اروح ما اروح
وبالاخير حسمت امرها وقررت تتوجه للقاعه
**
**
**
**
عزام
اليوم كان حوسه بمناسبة الزواج وخاصه انه المعاريس من اقارب ابوي
ولازم نكون موجودين
وقفت قريب من قاعه الحريم انتظر
جدتي ام راكان طالبيتني بالاسم !
ورافقني مناف الملقوف للي ذبحه الفضول
يعرف السالفه
مناف بتفكير : اذا السالفه ما فيها عروس اقص رقبتي !
تنرفزت : تدري اذا السالفه كذا صدق ناقصات عقل !
طلعوني من عند الرجال علشان ذي السالفه !!
مناف باستغراب : شوف ذيك الحرمه للي داخله
بدون ما اناظر : عيب عليك تناظر
قاطعني بتبرير : لا بس مشيتها ملفته للانتباه !
دفعني الفضول وناظرت وبدهشه ساره وش جابها !!
اعرف مشيتها ما احد يمشي بذي الطريقه غيرها !
معقول خالي نادر جاء ؟!
تركت مناف وتقدمت منها وناديتها بصوت متوجس : ساره !
ناظرتني وكانت متغطيه مو باين منها شيء ما ردت ولا بكلمه !
سألتها : وين خالي نادر ؟!
مع مين جايه !
حسيت بالاحراج وانا اشوفها تاركيتني ومتوجه للقاعه !
مو ساره !
سبحان الله نفس طريقه المشي ونفس الطول !
وحتى العبايه نفسها !
وش هالصدفه !
دف كتفي مناف بخفه : قلت لك ناظرها مو تروح تكلمها !
ناظرته وانا للحين مشوش انا متأكد إنها ساره !
**
**
**
**
داخل قاعة الحريم
اسيل تركت الرقص وتوجهت لخوله علشان تنزل ترقص معها !
تقدمت من خوله وهي تعدل فستانها القصير وبدلع : خوله تعالي نرقص !
حركت خوله شفتها تتكلم وعيونها على البنت
للي من اول ما دخلت لفتت انتباه الحاضرين : اسيل شوفي هالقمر !
اسيل فتحت فمها باندهاش : هذي ملاك !!
خوله صرفت نظرها عن البنت : قفلي حلقك فضحتينا مفهيه ترى حلقك وصل للارض !
اسيل غمضت عيونها بحالميه : لو اصير بجمالها واناقتها !
خوله بتخمين : اذا ما خاب ظني امي وجدتي ام راكان يحومن حولها لعزام !
شفت جدتي سلمت عليها وكلمتها وبعدها طلعت
اسيل بتنكيس : معقول هالملاك تقبل بعزام !،
دفتها خوله بغرور : يا بختها يوافق عليها!
اسيل وهي تتأملها: احس اني اعرفها من قبل !
خوله بتفكير : فيها شبه من .....
