بارت 3
وقفت قدام المرايه الصغيره ما تدري وش الحل
حتى تتخلص من معاناتها
مسكت شعرها مجدل طوله لنصف ظهرها
ناعم وش الفائده من جماله
وتعبت جدتها فيها
ما عندها الا تتخلص منه ما تبغى شعر
حتى البنات ما يتمسخرون عليها !!
والابله ما تضربها وتعاقبها !!
وام سعود تخليها تلعب مع عيشه !
وتريح جدتها من غسله وتمشيطه !
مسكت المقص وبدأت تقص بشكل عشوائي
تبغى تتخلص منه وترتاح
كانت تسقط خصلات شعرها على الارض بعشوائيه
بعد وقت كملت وناظرت نفسها بالمرايه
ونزلت نظرها للارض
شعرها منثور على الارض
نزلت على الارض تبغى تلمه وترجعه لشعرها
ما تدري كيف قصته كذا ؟!
لفت وجهها بخوف لما سمعت صوت جدتها على الباب :،ساره !
وش هذا ؟!
وش عملت بشعرك يا مجنونه؟!
اقتربت منها والشرار يطلع من عيونها
وقفها كلام ساره بنبره باكيه منكسره : ما عملت شيء ؟!
خلاص راح شعري
وطالعت جدتها والدموع على خدودها: خلاص الابله ما رح تضربني !!
وتخليني اجلس عند الزبالة !،
وما رح تتعبين لما تغسلي شعري وتمشطيه
وابتسمت بألم : كذا افضل
طالعتها وهي حاضنه شعرها وشكلها يكسر الخاطر
تقدمت وجلست على الارض : :وش اسم هذي الابلة ؟!
ساره وهي تمسح دموعها وصوت محبوح : ابله هدى
وقفت الجده بغضب وسحبت ساره من يدها : غبيه وهبله طول حياتك كذا !!
متى تستخدمين عقلك هذا ؟!
ما اقول الا الله يعيني عليك قومي معي اشوف
صرفه لشعرك هذا !
**
**
**
**
ناظرت أم سعيد : اكثر من كذا ما ينفع
معي
هزت ام سعيد راسها وهي تناظر ساره وشعرها طوله 1سم اقصر من شعر العيال : الله يعطيك العافية
ناظرت ساره نفسها بالمرايه وصارت تبكي
ام سعيد وقفت بغضب: تستاهلين
شوفي كيف خربتي شعرك ؟!
امشي قدامي اشوف امشي
طلعوا وساره تمسح دموعها : يمه متى يرجع شعري ؟!
ام سعيد بجمود : يبغى له وقت !
ساره بخيبه : كذا اصير مو حلوه !
والبنات يضحكن علي !
ام سعيد تتكلم بدون ما تناظرها :،انت حلوه بكل حالاتك
ابتسمت بطفوله : يعني انا الحين حلوه مثل عيشه ؟!
ام سعيد وقفت ونزلت لمستواها : انت احلى بنت بالعالم كله
توسعت ابتسامتها ساره بفرح ونسيت موضوع شعرها وطبعت قبله على خد جدتها : شكرا يا احلى ام بالدنيا
همست الجده بحزن والدموع بعيونها : الله يرحمك يا مها
وتابعت طريقها للبيت وقلبها يتمزق من الحزن على ابنتها للي فقدتها بيوم وليله
**
**
**
عائشه فتحت الباب وعقدت حواجبها باستغراب : مين انت ؟! وش تبغى ؟!
ساره ضحكت بطفوله : انا ساره يا دبه ما عرفتيني ؟!
عائشه فتحت عيونها بصدمه : ساره ؟!
ليه قصيت شعرك ؟!
دخلت ساره بابتسامة : على الموضه !
عائشه رفعت حاجب باستنكار : غبيه !
ساره هزت رأسها بضحكه طفوليه : جدتي قالت لي حلوه !
عائشه : الا قولي بشعه جوكر تقرفين وغبيه
وبغضب : ليه تقصينه ؟!
أكيد جدتك البخيله قصته حتى توفر مويه وشامبو
قاطعتها ساره وهي تهز راسها بالنفي : لا مو جدتي انا قصيته بنفسي
عائشة بتحقيق : وش قالت جدتك ؟!
أكيد ضربتك صح ؟!
ساره ابتسمت وهي تناظر نهى تطالعها باستغراب : لا ما ضربتني ما ادري وش صاير بالدنيا ؟!
واشرت لنهى بيدها : نهى
تقدمت نهى باستغراب : وين شعرك ؟!
عائشه عفست ملامحها وهي تناظر نهى : يعني وين شعرها اكيد قصته !
وش هالاسئله الغبيه ؟!
وبعدين وش دخلك فيها ؟!
نهى ضربت عائشة على رأسها : انت اخرسي
ما كلمتك !
عائشه هجمت عليها وضربتها بظهرها : الله يأخذك
بعدوا عن بعض لما سمعوا صراخ ابو سعود : نهى ،عائشه
تقدم منهم بنهر : صغار بعدكن ؟!
عائشه تخصرت : هي للي بدأت !
نهى : انت
قاطعهن : خلاص ولا كلمه
عائشه تتريق : كلمه ولا حرف
ابو سعود خزها بعيونه :عائشه
وسلط نظره على ساره : وانت يالمخبوله وين شعرك ؟!
ساره ضحكت بطفوله : راح
عائشه :،بابا ابغى اقص شعري مثلها
ابو سعود مط شفته : نعم ؟!
عائشه تعيد : اقص شعري مثلها علشان نصير مثل بعض
نهى : والله لأقول لماما عنك !
عائشه بنظرات ناريه لنهى : قولي لجد جد جد ابوي ما رح اخاف
ابو سعود : ما تخافين مني ؟!!
عائشه ابتسمت وناظرت ساره : قولي لبابا وش دائما اقول عنه بالمدرسه !
ساره هزت رأسها وناظرت ابو سعود : حرام دائما تقول تخاف انك تضربها لانك حمار وغبي
وتضرب مثل المتوحش
وبخيل و
ابو سعود مسك عائشه من اذنها :انا لازم اقص لسانك انا حمار ؟!
عائشه رفعت يدينها تشرح : لا مو قصدي انك حمار
قصدي انك تضربنا قبل ما تفهم السالفه مثل الحمار
وقلت غبي لانك حتى لو فهمناك السالفه ما تفهم
شد اذنها اكثر وبعدها تركها ما يدري وش يقول لها عقلها ضارب وما تعرف تتكلم مثل الناس
كم مره نبه عليها توازن كلامها بس ما في فائده
رح يستخدم اسلوب ثاني : اوكي يا عائشه
لانك ما تحترميني
ما رح اخذك معي الحين للالعاب
وخليك منطقه هنا
عائشه ببراءه : كذاب انا سمعتك الحين قلت رايح عند صديقك
حمر وجهه منها هذي البنت مستحيل تطلع معها بنتيجة : انا كذاب ؟!،
تعالي معي يا ساره رح اخذك معي للالعاب لوحدك
ساره ابتسمت بفرح : صدق ؟!
رفع حاجب بعدين نازلات تكذيب فيه : ايه صدق يلا تعالي
ساره بفرح : بس اقول لجدتي اول
ابو سعود وهو يشوف نظرات عائشه بين مصدق ومكذب طلع باتجاه الباب : يلا تعالي الحين نقول لها وبعدها نروح
هزت راسها وطلعت معه بفرح مو مصدقه نفسها واخيرا رح تروح للالعاب
ناظرت ابو سعود بعيون تلمع من الفرح تتمنى لو ابوها عايش وتروح معه
شعور جميل متأكده بقرار نفسها أبو سعود يبغى يعوضها عن ذيك المره
وصلوا باب بيتهم ناظرته بابتسامه : انادي جدتي علشان اقول لها
نزل خلفها وقبل ما تدخل مسك يدها : لا تكوني صدقتي يالخبله ؟!
تراني مو فاضي للبزران ادخلي عند جدتك
واذا سألتك عائشه عن الالعاب بتقولين لها انك رحتي معي
ويا ويلك اذا ما قلتي لها كذا
ما رح اخليك تلعبين معها فاهمه ؟!
ناظرته بخيبه بعد ما كسر احلامها : تكذب علي ؟!
ابو سعود ضحك باستخفاف : اه كذبت عليك يالمثاليه انت وصديقتك الخبله
وضحك ضحكه قصيره وتوجه للسيارة وغادر
المكان
واقفه تناظر السياره بصدمه ليه ضحك عليها ؟!
وش ينقصه لو اخذها معه ؟!
فتحت الباب وهي تحس الغصه بحلقها
دخلت البيت وجلست عند جدتها بهدوء
ام سعود ناظرتها بطرف عينها وللحين مقهوره على شعرها : علامك رجعت ؟!
هزت رأسها وبصوت خنقته العبره : مليت !
طالعتها بعدم تصديق تعرفها لو يطلع بيدها تنام عند عيشه ما قالت لا والحين تقول ملت !!
متأكده انه ام سعود طردتها كالعاده : بما انك ملانه قومي اعملي شيء اشربه
وقفت بطاعه وتوجهت للمطبخ بهدوء
جهزت الشاهي وتوجهت لجدتها حطته قدامها ورجعت جلست بهدوء
تناظر التلفاز مع جدتها اخذت نفس وسألت : يمه
ناظرتها ام سعود : نعم ؟!
ساره مو عارفه تصيغ السؤال : ابوي مثل عمي سعود
يعني
وسكتت مو عارفه توصل سؤالها
ام سعيد عفست ملامحها بقرف : ابوك العايب وش جابه على بالك ؟!
مطت شفتها ما تدري ليه لما تسألها عنه تقول نفس الكلام وما تجاوب ردت بصوت كله حنين لابوها : نفسي اشوفه
ام سعيد :،وش تبغين بالشوفه ؟!
الله لا يجيب ذيك الساعه للي وافقت على زواج مها منه
ساره مو فاهمه شيء : طيب كيف شكله ؟!
ام سعيد تقفل على الموضوع : قلت لك ما اتذكر شكله وانتهينا ؟!
قومي حلي واجباتك احسن لك من القرقره
وقفت بدون اعتراض ومن داخلها ضيق
ليه مو من حقها تعرف ابوها ؟!
عالاقل تشوف صوره له !
حتى امها ما تعرف شكلها !
بس وصفتها جدتها لها !
تتمنى تسأل جدتها عن اهل ابوها بس تخاف
من رد فعلها !
تحس نفسها تعيش بغموض ما تعرف شيء
**
**
**
**
في اليوم الثاني
ام سعيد والشرار يطلع من عيونها : ما رح اسكت
ما لها صلاحيه تضرب البنت وتحطها عند الزباله
المديره : خلينا نحل الموضوع بتفاهم
ام سعيد بغضب : ما في تفاهم !
شوفي البنت كيف عملت بنفسها حتى ما تضربها المعلمه !
صارت تكره تروح للمدرسه والسبب حضرتها
واشرت على الابله هدى
المديره اعطت هدى نظرات قويه وبعدها ناظرت
ام سعيد : حقك علينا وان شاء الله ما يتكرر
قاطعتها ام سعيد : انا الحين طالعه للوزاره ورح اشتكي عليها وهي تعرف انه الضرب ممنوع بالمدرسه
هدى وجهها احمر : بس ساره راسها
قاطعتها المديره : خلاص يا ابله هدى
وناظرت ام سعيد: خلاص امسحيها بوجهي
وبإذن الله ما رح يتكرر
ام سعيد : بشرط انها تعتذر لساره قدام البنات
عن طريقة تعاملها
المديره هزت رأسها بهدوء : وهذا للي راح يصير
بدون ما تقولين
المفروض يا ابله هدى تتصرفين تصرف ثاني
بدون اهانه الطالبات
ابتسمت ام سعيد بنصر مع انه بداخلها نفسها
تمسح فيها الارض
**
**
**
عائشه بابتسامة : كفو جدتك والله
مع اني ما احبها بس عجبتني
ساره بفرح : واخيرا ارتحت من هالشبح
صارت تبتسم لي كلما تشوفني
عائشه بتذكر : انقلعي يا دبه
البارحه رحتي للالعاب وتركتيني !
وبرطمت شفتها بزعل
ساره ناظرتها بخيبه : اي ألعاب ؟!
ابوك البخيل طلع كذاب !
عائشه بدهشه: قولي والله ؟!
ساره بقهر : وهددني اذا قلت لك يمنعني ألعب معك
عائشه بقهر : ويهدد بعد ؟!
تخيلي لما رجع يقول لي انك انبسطتي بالالعاب
وكل يوم رح يأخذك معه !!
ساره بطفوله : ابوووووك يالكذب
واليوم قلت لجدتي وضربتني تقول وش مطلعك
معه لوحدك !
عائشه رفعت حاجب : خايفه يخطفك ؟!
اصلا بابا قرفان شيء اسمه بنات
دوم يقول لو يطلع بيدي كان بعتكن وخلصت من ازعاجكن
ابتسمت ساره وما علقت
عائشه كملت بحماس : وش رأيك تتغدين عندنا ؟!
ابتسمت ساره للفكره وهزت راسها بالموافقة
**
**
**
**
دخلت عائشه البيت ومتحمسه :ماما ماما
دخلت الصاله وناظرت ابوها : ماما ماما
ابو سعود حط الجريده : وش فيه ؟!
عائشه طنشته وهي متحمسه : ماما ماما
طلعت ام سعود من المطبخ وتنشف يدينها : وش فيك ؟!
عائشه تتكلم بسرعه : وش طبختي ماما ؟!
رفعت ام سعود حاجب باستغراب : ليه تسألين ؟!
عائشه مستعجله : بسرعه احكي يا ماما
ام سعود : ما طبخت اليوم
قاطعتها عائشه بصرخه : لااااااااا
بسرعه ماما اطبخي عندنا ضيوف واعملي كبسه
بسرعه بسرعه
ام سعود باستغراب : مين الضيوف ؟!
ابو سعود وقف باهتمام : مين جاي ؟!
ام سعود تلبكت : والله ما بعرف
وضربت على جبهتها : حتى المجلس اليوم ما رتبته
وناظرت عائشه باهتمام : مين الضيوف ؟!
عائشه بفرح : عزمت ساره على الغداء
قطعت كلامها لما شافت نعال امها موجه لها وتفادت الضربه
ام سعود بغضب : قسم بالله ازنخ منك ما شفت
انقلعي انت وساره برا اشوف
ابو سعود: جايه تركضين ضيوف ضيوف ضيوف
وبالاخير
طلعت ام القمل ؟!
عائشه انحرجت واشرت لابوها بصوت منخفض : وطي صوتك بابا ساره برا الحين تسمعك !
ابو سعود بسخريه : لا ما اقدر خايفه على مشاعر
سوير الوسخه !
ليه من متى عندها احساس وكرامه؟!
تطردها من الباب تطلع لك من الشباك !
اقول انقلعي على غرفتك وقولي للقرده للي برا
تنقلع لجدتها
هذا الناقص والله !!
و رجع انسدح على الكنبة
ام سعود واقفه تناظر عائشه : تعالي خذي ساندويشه لها
عائشه بقهر واحراج من تصرف اهلها : ما ابغى
تفكرينها شحاده على بابك ؟!!
وتركتهم وطلعت لبرا
ناظرت الحوش ما شافت ساره انقهرت اكيد سمعت كلام ابوها
دخلت للبيت وبعصبيه : راحت بسببكم
ابو سعود بلامبالاه : بقلعتها
**
**
**
**
كانت واقفه تسمع عائشة وهي تقول لاهلها
عندهم ضيوف والبسمه على محياها
تنتظر عائشه تقول لها تتفضل
ابتسمت بطفوله وهي تتخيل ام سعود تطلع
وترحب فيها
وابو سعود يقول لها كل يوم تعالي تغدي عندنا
فتحت عيونها بصدمه من رد فعلهم !!
تذكرت جدتها ما استأذنت منها
طلعت من بيتهم وتحس بحلقها غصه
وتقنع عقلها الصغير يمكن ما معهم فلوس يعملوا غداء وانحرجوا منها !!
دخلت بيتهم وهي تحس بداخلها ضيقه!!
اخذت نفس قبل ما تتدخل على جدتها وتحس خاطرها مكسور
ام سعيد وهي تحط الغداء : علامك تأخرتي ؟!
يلا بسرعه غسلي وتعالي تغدي عملت لك كبسه
تقربت من جدتها وفتحت عيونها بصدمه : كبسه ؟!!
وركضت باتجاه المطبخ تغسل ونسيت سالفة
ابو سعود
جلست تتغدى وهي مو مصدقه دوم تسمع عائشة تقول امها طبخت كبسه
اول مره تذوقها مستغربه كيف جدتها عرفت تطبخها ؟!
ام سعيد هزتها من كتفها : ارفعي جسمك وكلي شوي شوي حنا مو بسباق
ساره هزت رأسها ورجعت تكمل أكل بنفس الطريقه
تخاف الاكل يختفي بأي وقت
**
**
**
ابو عزام طالع اسيل : انتبهي على اخوانك
اسيل تأففت: ليه ما اخذتهم امي عند جدتي؟!
ابو عزام كمل بدون ما يهتم لضجرها : قولي لعزام يرجع امك لاني مشغول
وطلع وتركها تتأفف
قاطعه رنين الجوال رد بهدوء :وعليكم السلام ......الحمد لله بخير ....والله يمكن اسبوع ما شفت خلف !! اكيد بالبر جواله مقفل .....والله ماادري هالانسان كيف يفكر ؟!! .......ان شاء الله مع السلامه
قفل الخط وهو مستغرب إلحاحه انه يكلم خلف
ما يدري وش سالفتهم ؟!!!
**
**
**
**
جالس قدام الحلال ويفكر كيف يجمع اكبر قدر من الفلوس
طلع جواله حتى يتصل وهو يفكر يبيع كم رأس من الغنم
عقد حواجبه لما شافه مقفل ؟!
شغله واول ما شغل رن جواله عقد حواجبه ورد بصوت خشن : هلا ......الحمد لله ...جوالي مقفل .....ايه طيب وش فيك ؟.......انا عند الحلال.........اليوم او باكر يمكن ارجع ما ادري ليه
.........نعم ؟!
اسمع مو فاضي لذي الخرابيط .........ما ابغى اسمع .....متى ما ماتت جدتها نروح نجيبها
وغير كذا ما عندي !...... بلا خلف بلا بطيخ .......روح انت انا بالنسبه لي ساحب يدي عن الموضوع .....ولا مستعد ارسل فلس واحد ما معي ......هذا انت قلت عرضنا على جدتها ورفضت خلاص بكيفها ........لا تقهرني بكلامك ..... يصير خير ......خلاص قلت لك افكر وارد عليك ....سلام
قفل الخط بغضب هذا للي ناقصه
وعلى طول اتصل يكمل شغله بالحلال
احسن له ....
تنظف بالحوش قاطعها طرق على الباب
تركت للي بيدها وبسرعه توجهت فتحت الباب وهي تبتسم كعادتها
عفس ملامحه باستغراب ولد لابس فستان تكلم مطنش المنظر : وين ام سعيد ؟!
ساره بابتسامة ناظرته : الحين اناديها لك
قاطعها بقرف : انت ؟!
ساره بطفوله توسعت ابتسامتها :-ايه انا ما عرفتني لاني قصيت شعري؟!
جدتي تقول لي شعري كذا حلو
وقالت اني احلى من عيشه
عفس ملامحه بانقراف : والمستأجرين للي برأسك وش صار فيهم ؟!
ساره فتحت عيونها بدهشه: كيف عرفت انه شعري فيه قمل؟!
تكلم بسخرية : يا حظي عن بعد الف كيلو تنشاف من كثرها مدرعمات
ناظرته ورفعت حاجب :بس
قاطعها بنرفزه : اشوف اعطيتك وجه !
انقلعي بسرعه نادي ام سعيد بسرعه
ساره ابتسمت بطاعة : ان شاء الله
دخلت ساره والتفت للخلف لما سمع صوت : هيه انت ؟!
قصدي لو سمحت
طالعها باستغراب: وش تبغين ؟!
عائشه مدت له الورقه : خذها وقعت منك ؟!
عقد حواجبه: مين قال انها وقعت مني ؟!!
عائشه ببراءه : نهى قالت لي
أخذها وفتحها وهو رافع حاجب
مرسوم قلب حب وسهمين مكتوب
نهى والسهم الثاني علامة استفهام
قرأ تحت القلب كلام حب وخرابيط
انصعق بنت بالعمر هذا تراسل ؟!
وهو يفكرها بريئه وصغيره على هالسوالف هذي
؟!
طلعت كل حركاتها مقصوده !!
يحس أصابه صداع مو قادر يستوعب !
رفع نظره وشافها واقفه تناظره وتبتسم
تقدم منها وقف عندها وهمس بحده : هذي رح أوصلها لأبوك يا قليلة الأدب !
فتحت عيونها بصدمه وخوف من رد فعله
وقبل ما تتكلم رمى الورقه بوجهها وبتوعد : لو تنعاد هالحركه
وقبل ما يكمل اخذت الورقه وهربت لداخل بيتهم
رجع وهو مقهور من حركتها
فعلا بنات ناقصات عقل !
وين أهلها عنها ؟!
عائشه رفعت حاجب : ليه رجعت الورقه ؟!
رفع حاجب بقرف كره هالحاره بزياده بعد حركه نهى فعلا بنات فقر رد بغضب : إنت أي ورقه تلاقينها تقولين انها لي ؟!
وش هالناس المتخلفه هذي ؟!
استغربت عائشه عصبيته
ضرب برجله باب البيت بعصبيه : خلصيني يا زفته !!
طلعت ساره وابتسمت وهي تحك راسها باحراج : نسيت أقول لك جدتي مو هنا
وابتسمت بغباء
ولع من حركتها مسك نفسه ما يخنقها ويطلعها جنازه هذا للي ناقصه ! ناس متخلفه ما تفهم !!
ناظرها بنظرات قاتله وغادر الحاره بسرعه
وهو حالف ما يرجع لهذي الحاره
**
**
**
**
دخلت البيت بسرعه لغرفتها وقطعت الورقه وقلبها يدق بخوف وهي تتخيل انه أعطاها لأبوها
صارت دموعها تنزل من الخوف
وقفت اسماء فوق راسها تناظرها : تخيلي لو أعطاها لأبوي !
قاطعتها نهى بقهر : انقلعي كله بسببك ورطتيني
أنا غبيه رديت عليك
وصارت تقضم اظافرها بخوف: أخاف يرجع يقول لأبوي !
أسماء باستبعاد: لا لا
وبعدين الورقه معك لا تخافين
نهى وقلبها للحين خايف : الله يأخذه ما يستحق
**
**
**
**
عزام بغضب : والله لو أموت ما أروح أجيب شيء !
ابو عزام وبيده فنجان القهوة : وش صاير ؟!
عزام بقهر : واقف ساعه وبالاخير طلعت مو بالبيت
تبغى تشتري روح إنت أنا مليت من هالحاره
وتركهم وطلع لغرفته
ام عزام : بعينك الله روح جيبهم إنت
ما ادري عنك لو تجيب من عند خلف أخوي
قاطعها : ما أبغى شغل العمال
شغل هالحرمه عاجبني وطيب وانت بنفسك قلت نفس كلامي
ام عزام هزت رأسها بالموافقه : صحيح والله
شغلها مرتب
ابو عزام : خلاص بأي فرصه أمر عليهم
