نصمت
لتسير حياتنا على ما يرام
فالأيام لم تعد كما كانت ( نقية)#
**
**
**
**
أم خالد مسحت على رأسها وهي تناظر ساره تحس بالندم لانها تركتها وراحت لآهلها بس كانت مضطره
ضميرها أنبها هذي يتيمه ما لها دخل بمشاكلها مع ام عمار
ما تدري كيف الحين حست انه هالبنت وحيده ما لها أحد
تحس قلبها يتقطع عليها وخاصه بعد ما رجعت ساره من بيت ابو راكان وهي ساكته سألتها باستغراب : وش فيك ساكته ؟!
ساره هزت رأسها بالرفض : ما في شيء !
ابتسمت لها : باكر رح نطلع للسوق مع بعض !
ساره ابتسمت بفرح وبتردد : بس باكر عند خالتي ام عمار
هزت كتوفها بلامبالاه : عادي !
وبعدين باكر أخوك نادر جاي !!
عقدت حواجبها : بس انا ما اعرفه ؟!
ام خالد تنهدت بتفكير : وش رأيك تسافرين معنا ؟!
وتعيشين عندنا على طول ؟!!
ساره استحت وهزت كتوفها : ما ادري،!!
ام خالد دخلت الفكره براسها : الحين أكلم محمد
ونشوف ؟!
هزت رأسها بالموافقه وبداخلها رافضه اذا سافرت ما رح تشوف عائشه !
ومع ذلك سكتت ما حبت ترفض وتزعل ام خالد !
بعد ربع ساعة رجعت ام خالد : أخوك موافق وعجبته الفكره !
و رح تيجي مع مهند بس نرتب امورك !
هزت رأسها بطاعه : ان شاء الله
**
**
**
**
في اليوم الثاني
ام عمار تناظر نادر وبداخلها سخريه صدق من قال خروف !
محمد ونادر خرفان مو زي حظها بخلف !
كان في حريم مو سائل عنها !!
ام محمد تناظر نادر : وش تشتغل الحين ؟!
نادر بكسل مستلقي على الكنبه : اشتغل سائق فرشه !!
وضحك بسخريه بصوت عالي !!
ناظرته ام عمار وبداخلها صدق سخيف!!
ام محمد ما عجبها رده : تتمسخر علي !!
زوجة نادر : الله يهديك يا خالتي سؤالك ما له معنى !
وش هالسؤال ؟!
انت تعرفين نادر ما يقدر يشتغل ظهره يوجعه !!
نادر بتأييد : وبعدين ليه أشتغل واتعب
وانا ما عندي عيال !
ما في غير انا وهالقمر وين ما نيجي نلاقي لقمة الأكل !
ام عمار بنفسها تحمد ربها خلف على الاقل يشتغل
مو مثل نادر !
ام محمد بقهر : ربي بلاني بعيال فاشلين !
شوف عيال ابو راكان شيء يرفع الرأس !!
ابتسم بسخريه : تبغين أصير مثلهم وأضيع عمري وانا اقرأ طلاسم !!!
الحين فكونا من هالسوالف البايخه
وين الغداء ؟!
ام محمد لوت بوزها : انتظر يشرف خلف !
جوري : بابا قال يا ويلكم تأكلون قبل ما ييجي !
نادر بضجر : ومتى يشرف ؟!
ام محمد بضيق خلق خزته بعيونها: اصبر
ليان تناظر ساعه الحائط : متى ترجع ساره ؟!
نادر ناظرها باستغراب : ساره أختي ؟!
جوري : ايه
نادر ناظر امه : وش قصتها هالبنت ؟!
سمعت انه ابوي متزوج ؟!
ام محمد بغضب من هالسالفه : الحمد لله انك تدري ؟!
داير خلف زوجتك ومو سائل عن أهلك !!
نسمع اخبارك من الناس،!!
متى تعقل وتصير مثل العالم والناس ؟!
زوجة نادر بترقيع : تعرفي يا خالتي نادر يشتغل باليوميه يعني لو فكرنا نزوركم ما رح يحصل فلوس !!
ام عمار رفعت حاجب : على اساس انه ما يشتغل ؟!
وكيف الحين جاي وتارك الشغل ؟!!
ابتسم نادر : طردوني من الشغل !
زوجة نادر ما عجبها رده وتكلمت بترقيع : قصده
هو ما عجبه الشغل وتركه !
نادر تكلم بلامبالاه : بقلعتهم والله لو يترجوني ما رجعت لهم !
هم للي خسروني !
انا اراويهم كيف يطردوني !
ام محمد مو داخل رأسها سوالفهم كل واحد يقول سالفة : والحين جالس بدون شغل !
زوجة نادر : رح نجلس هنا كم يوم وبعدها نرجع للقريه
نادر : ايه اشتريت بيت من الورث للي طلع لها
قاطعته ام محمد وهي ملخبطه : كيف قالت اميره انك رح تعيش هنا ؟!
نادر مط شفته بسخريه : ما لقيتي الا اميره تنقل لك الخبر ؟!
تراها تسمع السالفه بالمقلوب !!
وبعدين انا ما تعجبني العيشه هنا !
ابغى مكان كله هدوء وراحه !
لو تشوفين يمه المكان للي رح ننتقل له يجنن يريح البال !
جمال الطبيعه كله فيه !
دخل خلف ورد السلام وتكلم على طول وهو يسلم على نادر : بسرعه
جهزوا الاكل تراني ميت جوع !!
هزت رأسها ام محمد بخيبه من عيالها للي هم كل واحد بطنه !!
