أقدار~للكاتبة ضاقت أنفاسي

البارت الرابع~

بسم الله
**
**
**
بارت 4
صحيت بنشاط غير طبيعي وهي متشوقه للطلعه
غسلت وجهها ولبست بسرعه قبل ما تغير جدتها
رأيها !!
توجهت للمطبخ بابتسامة ورفعت حاجب باستغراب جدتها مو موجوده بالمطبخ!!
وبسرعه ركضت لغرفة جدتها وهي راسمه البسمه على محياها
طرقت الباب ودخلت وسرعان ما عفست ملامحها
وهي تشوفها نايمه!!
تقدمت منها وجلست عند فراشها وابتسمت وهي تهزها على الخفيف : يمه يمه
زفرت بضجر : يمه الحين رح نتأخر على الطلعه!
رجعت هزتها بأقوى : يمه يمه
استغربت ليه ما ترد عليها
مدت بوزها بطفوله ضحكت عليها الجده وما تبغى تأخذها للطلعه
حاست بوزها اكيد عيشه صارت طالعه!!
رجعت ناظرت جدتها نائمه بسلام : يمه يمه
تأخرنا !!
مسكت يدها الباردة ودب الرعب بقلبها : يمه ردي علي !!
زعلانه علي ؟!
خلاص توبه ما رح اقول لك اروح مع عيشه !!
بس قومي!
هزت يدها بقوه والدموع تلمع بعيونها : يمه وش فيك نايمه ؟!
طلعت من الغرفه باتجاه الباب ما تدري وش تعمل؟!
قررت تطلع للشارع تقول لعائشة
طلعت للشارع وشافت جارتهم بالشارع تبغى تطلع بالسياره ساره بصوت مخنوق : خالتي !
طالعتها الجاره قبل ما تركب : نعم ؟!
ساره بصوت مخنوق : جدتي ما ترد علي نائمه
مو قابله تصحى !!
ناظرت زوجها بشك :-اشوفها وما رح أتأخر،؟
هز رأسه بالموافقة بعد ما ناظر ساعته
**
**
**
ساره بعد ما دخلت الحرمه اشرت لجدتها : شوفيها ما ترد ؟!
اقتربت الجاره بخوف وقلبها يدق بقوه مسكت يد ام سعيد
وتركتها بسرعه وناظرت ساره بعيون دامعه
ساره ناظرت جارتهم : قولي لها تقوم
وعدتني نطلع اليوم ؟!
الجاره بصوت مخنوق : تعالي معي يا ساره !!
**
**
**
**
جالس مع أخوه مستانس ويتكلم عن الطلاب ونهفاتهم
قاطعه رنين جواله طالع رقم جارهم واستغرب هالاتصال رد بهدوء : السلام عليكم .....الحمد لله بخير.....لا والله مو بالبيت !! ........انا لله وانا إليه راجعون .....متى ......اليوم الصبح ......الله يرحمها .....وساره وين الحين ؟...... خلاص إن شاء الله رح اتصل فيه وأخبره .....مع السلامه ...
**
**
**
**
عائشه طول الطريق تعيد نفس السؤال : كيف ماتت يعني ؟!
ام سعود بضيق : خلاص يا عائشه ترى رفعتي ضغطي !
عائشه : يعني خلاص ما ترجع ؟!
نهى بضجر: وبعدين معك قلنا لك ما ترجع يحطونها بالقبر وما ترجع خلاص !
عائشه بحزن : ويدخل التراب بعيونها ؟!
ابو سعود بصوت متأثر : لا حول ولا قوة الا بالله
عائشه تكلم نفسها : وساره تعيش لوحدها ؟!
وناظرت امها بحماس : ماما خلاص انا رح اروح اعيش مع ساره مع بعضنا
قاطعها ابو سعود ما له نفس يسمع حرف : تقدرين يا عائشه تسكتين شوي ؟!
عائشه هزت رأسها وناظرت من الشباك تفكر بساره
وش تعمل الحين ؟!
**
**
**
**
ساره طالعت عائشة وابتسمت بحزن : قالوا لي ان شاء جدتي راحت الجنه !
وقالوا لي ما ابكي لأنها تزعل مني !!
وبغصه تابعت : بس انا ابغى جدتي ما اعرف اعيش بدونها !
عائشه بحماس: أحسن راحت علشان اجي اعيش عندك
واصير أمك
ساره عفست ملامحها : بس أمك قالت لي رح اروح مع
عائشه ناظرت حقيبه كبيره : ليه هذي الحقيبه؟!
قاطعهم ابو سعود وهو يدخل ويحمل الحقيبه :،يلا يا ساره
عائشه وكأنها مقروصه : وين رايحه ؟!
ابو سعود : عند اهلها !
عجلي يا ساره
هزت رأسها بطاعه ومشت بخطوه وقفت
لما حضنتها عائشة وهي تبكي : لا تروحين!
رح اصير امك انا واعطيك فلوس !
ابو سعود بضجر من عائشه :الحين وقت افلامك ؟!
يلا يا ساره !!
عائشه تركتها وهي تمسح دموعها : أحبك يا حياتي !
ابو سعود بدهشه : يا حبيبي !!
ساره ابتسمت والدموع بعيونها : رح ازورك
كل يوم
ابو سعود بسخريه : الظاهر كل يوم رح تبلط عندنا !
وبضجر يلا يا ساره !!
هزت رأسها وركضت باتجاه ابو سعود
عائشه بقهر من ابوها : كل شيء تتحكم فيه !!
هي حره ما تبغى تروح ؟!
ابو سعود طنشها وطلع مع ساره
وتوجه للسيارة للي تنتظرهم
وقفت ساره لما شافت رجال نزل من السياره
وسلم على ابو سعود
بعد ما حط الحقيبه بالسياره أشر لساره تيجي
تقدمت بابتسامه خجوله
ابو سعود بهدوء: سلمي
ساره بنفس النظرات الخجوله مدت يدها وسلمت
بهدوء
ناظرها وهو قرفان حاله بس سلم مجامله لابو سعود
**
**
**
من اول ما طلعت ما كلمها ولا كلمه ملامحه عابسه
قلبها انقبض منه وزادت دقات قلبها
لما صار يصرخ بالجوال : لاااا اعتبرني منسحب وما رح ابيع !
مثل ما اتفقت معك 10 رؤوس من الغنم ....
ناظرته وهو معصب ويصرخ بلعت ريقها
قفل الخط وبدأ يشتم ومعصب وحالته حاله
نزلت عيونها للارض بسرعه لما سمعت صرخته : علامك تناظرين ؟!
وما انتظر منها إجابه طلع جواله يكمل اتصالاته
تحس رأسها صار يوجعها من صراخه
لفت وجهها للشباك تناظر بصمت ...
**
**
**
ام عزام وهي تناظر أسيل : راح خالك خلف يجيبها !
اسيل ابتسمت : اليوم اتصلت بخوله تبغى تيجي وتشوفها !
ام عزام : الله يستر وما تصير مشاكل !!
اسيل : هي تدري عن وجودها يعني مو فجأة عرفت بوجودها !
قولي الحمد لله يومين ورح تسافر عند خالي محمد
ام عزام بقلة حيلة : الله يجيب للي فيه خير !
وابتسمت بتذكر : حتى عزام اليوم يبغى يطنش كم محاضره ويرجع بكير ويشوفها !
بس انا حلفت عليه ما يطنش محاضراته !
اسيل بملامح هاديه: الكل متشوق يشوفها
بابا وش قال عنها؟!
ام عزام : مو مهتم للموضوع كله !!
متنكد من البارحه بسبب الحرمه للي تبيعه جبنه
اسيل ابتسمت وما علقت
**
**
**
**
وقف باب البيت ونزل من السياره ونزل الحقيبه
واشر لها : ادخلي من هنا
ورجع للسياره وحرك وغادر المكان
ناظرته وهو طالع باستغراب كيف تركها لوحدها
بمكان ما تعرفه !!
تركت الحقيبه وتوجهت مكان ما اشر لها
وقفت عند الباب مدت رأسها بطفوله وناظرت للداخل
رجعلت للخلف خطوه وتذكرت كلام جدتها لازم تستأذن قبل ما تدخل اي مكان
طرقت على الباب بخفه وعقدت حواجبها باستغراب ما احد يرد عليها !
رجعت للخلف وهي تسمع صوت لعب بالبيت للي جنبه وبدون تفكير
توجهت له بسرعه
وقفت لما شافت حرمتين جالسات وحولهم بزران يلعبون
رسمت ابتسامه خجوله كالعاده : السلام عليكم
تسلطت النظرات كلها عليها
انحرجت من النظرات ونزلت نظرها للارض لثواني
رفعت نظرها على الحرمه للي ردت السلام : وعليكم السلام
وسألت الحرمه للي جالسه معها : معك فلوس نعطيها ؟!
هزت الحرمه رأسها بالرفض : مو حامله معي
قاطعتهم ساره بابتسامة : انا نزلني واحد هنا
وقال لي ادخل لذاك البيت بس ما فيه احد !!،
وقفت على حيلها بقهر : انت ساره ؟!
توسعت ابتسامتها ساره : ايه انا ساره !!
تقربت منها الحرمه الصغيره بتحقيق : وين خلف ؟!
ناظرتها ساره باستغراب ما تعرف احد بهذا الاسم ؟!
عدلت سؤالها : قصدي للي نزلك هنا ؟!
ساره : نزلني وراح !!
وبابتسامه :وين ألقى اهل البيت هذاك ؟!
وقفت الحرمه الكبيره بغضب وغادرت المكان !!
ساره ناظرت الحرمه الثانيه بضيق : اسفه ما قصدت ازعلها !!
ابتسمت الحرمه الثانيه ما عليك رح ترضى بعدين !هذي للي دخلت زوجة ابوك
فتحت ساره عيونها بصدمه هذي زوجة ابوها ؟!!!
ما تقدر توصفها !!
وبسؤال طفولي ما قدرت تكتمه : هذي عجوز كيف زوجة ابوي ؟!
ابتسمت الحرمه : لا تسمعك الحين !!
اعرفك بنفسي انا زوجة اخوك خلف للي وصلك الحين !
ساره همست بدهشه : اخوي !
ناظرت الاطفال للي حولها كانت تتخيل اخوانها بنفس عمرها او اكبر شوي !!
مو مقتنعه انه خلف أخوها ؟!!،
ناظرت زوجة خلف وهي تبتسم بسخريه للصغار وتنادي عليهم : تعالوا سلموا على عمتكم !!
عمار اقترب وناظرها بتقييم : تخسى تكون عمتي انا اكبر منها !!
ساره ابتسمت ببراءة : خلاص انت عمي لأنك اكبر!
جودي ناظرت ساره : انت غبيه ؟!
كيف يعني عمار يصير اخو بابا وانت اختنا ؟!
ليان ضحكت : شكلها غبيه
ام عمار ناظرت ساره : إلعبي مع العيال
وتركتهم وتوجهت للبيت
ساره بابتسامة خجوله : انا اسمي ساره !
عمار بكشره : وش نعمل لك؟!
نرقص ؟!
ساره بطفوله : لا لا ترقص علشاني
ليان : مو مصدق هذي عمتنا !
حنا اكبر منها !!
جودي بتحقيق: اي صف انت ؟!
ساره : بالصف الثاني
عمار : روحي إلعبي لوحدك ما نلعب مع بزران !
ليان : خليها تلعب معنا حرام
جودي بحماس : يلا نكمل لعب
وساره رح تكون الخدامه
عمار هز راسه : ايه يناسبها الدور
ابتسمت ساره بسعاده انهم سمحوا لها تلعب معهم !!
**
**
**
**
دخل البيت متحمس ينادي على امه : يمه يمه
طلعت ام عزام باستغراب: وش فيه ؟!
عزام : رحتي عند خالي خلف ؟!
ام عزام ابتسمت : لا والله
انتظر اختك خولة تيجي ونروح مع بعض
عزام بحماس : جدتي وش قالت لما شافتها ؟!
ام عزام ابتسمت : تقول ام عمار انها تركت المكان وهي معصبه !!
عزام ابتسم : تذكرت خيانة زوجها ههههه
خزته أم عزام : عيب استحي على وجهك
ابتسم وتوجه لغرفته
**
**
**
**
جالسه على الكنبه وماده البوز
جلس جنبها ابو سعود بعد ما قرص خدها : وش فيها الملسونه ساكته اليوم !!
نهى وهي تتمسخر على عائشه : كل هذا علشان سوسو ام القمل !
عائشه ناظرتها بنظرات معصبه : انت لا تتدخلين !!
ابو سعود ابتسم : لا الأمور متأزمه !!
عائشه بقهر من ابوها : ليه تخليهم يأخذونها ؟!
ابو سعود يسايرها : طيب لو خليتها وين تعيش ؟!
عائشه بتفكير طفولي : نجلس في بيتهم
وانا أصير أمها !
ابو سعود بابتسامة : من وين تجيبين فلوس ؟!!
عائشه : نشتغل انا وساره !
واعمل جبنه ولبنه وابيع حليب ويصير معي فلوس كثير
واشتري لساره فساتين وأكل كثير !!
نهى قرصتها : اصحي يا هبله تراك مجنونه
ابو سعود تمدد على الكنبه : اخخخخ الله يعيني عليك يا عش عش
عائشه وقفت بزعل : الله يعيني عليك شغل دخان
ركضت لما سمعت صرخته : بنت!!
**
**
**
عمار بفوقيه جالس على الكرسي: يا بطيخه يا بطيخه
ساره بابتسامه تقدمت منه : نعم سيدي!
عمار : انقلعي بسرعه جيبي لي قهوه !
ساره ببراءة : عيب الصغار يشربوا قهوه!
عمار بعصبيه : انقلعي بسرعه بلا قرقره
ليان وهي تحط رجل فوق رجل :انا ابغى عصير برتقال
جودي : انا ابغى نسكافيه وشوفي العيال اذا نايمين !
ليان تناظر ساره : وشوفي ولدي وش يعمل!!
بسرعه تحركي !
ساره بابتسامة : حاضر
ليان باعتراض:- لا بتقولي حاضر سيدتي
ساره بنفس الابتسامه : حاضر سيدتي
وبعدت كم خطوه وهي تمثل انها تجهز
بعدها توجهت لهم وهي تمد يدها وكأنها حامله صينيه : تفضلوا
سرعان ما قفزوا وهم يركضون باتجاه البيت
ناظرتهم ساره باستغراب ليه يركضون كذا ؟!
وش فيه؟!
ركضت خلفهم ولما وصلوا باب البيت
قبل ما يدخلون قاطعتهم صرخه مرعبه : تعالوا هنا ؟!
ناظروا خلفهم برعب وجههم مخطوف
تقدم بملامح معصبه : ليه ركضتم ؟ !
عمار بصوت يرتجف : ماما نادتنا !
رفع حاجب بعدم تصديق بس سلك له وبتذكر تقدم من جودي ومسكها من اذنها : كسرتي اليوم صحن !
رفعت رأسها تتدافع عن نفسها بس سرعان ما سكتت لما استقر كف ابوها على خدها وبصوت مرعب : وقسم بالله اكسر راسك المره الجايه !!
وبصوت عالي : انقلعوا للداخل اشوف
وخلال ثواني اختفوا من امامه
دخلوا غرفه جودي وليان لانها الاقرب
وتنهدوا براحه
وفجأه انسدح عمار وليان على الارض من الضحك
وساره واقفه تناظرهم باستغراب
جودي انقهرت منهم : تضحكوا بلا اسنان !
عمار وهو يضحك : لو شفتي شكلك تحفه ههههه
جودي جلست على السرير بقهر والدموع بعيونها : ترى البارحه طقك يا ليانووووو
وانت يا غبي الاسبوع الماضي طقك طق
سكتوا فجأة وناظروا ساره واقفه تناظر فيهم
عمار بعصبيه : جايه تتشمتين يا حيوانه !
ساره ابتسمت ببراءة : شفتكم تركضون وركضت معكم !!
جودي والدموع تنزل : انقلعوا براااا
ليان رمت نفسها على السرير : هذي غرفتي
مو طالعه
عمار تربع عالارض : وهذا بيت ابوي أجلس وين ما أبغى
جودي بقهر : جلس قرد على رأسك يا زفته
حرك حواجبه وهو يجاكرها .....
**
**
**
دخلت ام عمار الغرفه وناظرتهم : الحين يسمعكم ابوكم ويرجع يطقكم مره ثانيه
جودي مدت بوزها بزعل : شوفيهم يجاكرون فيني لانه بابا طقني !
ام عمار تكتفت : انا حذرتكم !
وبعدها ناظرت ساره : تعالي انزلي علشان تسلمين على أم عزام
ساره بطاعه : إن شاء الله
ليان مطت شفتها بسخريه : يقال إنها مهمه !!
جودي فكت شعرها الطويل تربطه من جديد : قال
وصرخت بوجع لما عمار شد شعرها : ماما شفيه !!!
أم عمار خزته: متى تترك حركاتك هذي ؟!
عمار بدون مبالاه : كيفي !!
جودي ناظرته بغيض : حيوان
ام عمار طلعت من الغرفه وهي تتكلم :،يلا يا ساره !
ابتسمت ساره وركضت خلفها ...
**
**
**
أم عزام ابتسمت على شكل خلف : نفسي اشوفك مروق ومبسوط !!
خلف وهو ينفث من الدخان : ما في شيء يخليك
مروق !
وهذي العله للي نشبت بحلقي !
أم عزام بعتاب: ما يصير تتكلم كذا ! هذي اختك !!
خلف اعتدل بجلسته : أبوي راح يجدد شبابه
هذا للي استفدنا منه !
وإلا رجال كبير وش يبغى بالزواج !!
وسبحان الله كانت القاضيه ما جلس شهرين إلا فارق الحياه ...
ام عزام ما عجبها كلامه : استحي على وجهك
هذا أبوك !!
خلف بقرف :،يا اختي قولي لي شيء واحد استفدته من زواج ابوي !!
إلا قولي مصروف زايد !
ووريثه تقاسم على الورثه !
غير منظرها للي يسد النفس!
وأشر على ساره وهي داخله
ابتسمت ساره بطفوله للموجودين واعتلت وجنتيها حمره : السلام عليكم
خلف باستهزاء : شرفت الأخت المنتظره !!
أم عزام ناظرت ساره بتأمل بشعر قصير كثير
وجهها نحيف يميل للبياض ملامحها حلوه
اول ما تناظرها تظنها ولد بسبب شعرها
لابسه فستان على طولها ما تعرف لونه الحقيقي
باهت من كثر الغسيل !!
ساره تقدمت منها بابتسامه بريئه ومدت يدها تسلم : كيفك خالتي !
للحين ام عزام مصدومه مدت يدها لها
ساره قربت وقبلت رأسها
وابتسمت لأم عزام : أنا ساره !
خلف وهو حاط يده تحت خده بسخريه : الحمد لله للي عرفتينا على اسمك !!
وحنا طول هالسنين وحنا نحاول نعرف اسمك
ساره ناظرته بابتسامتها البريئه : ليه ما سألتني كان خبرتك انه اسمي ساره !
ضحكت اسيل بصوت عالي على أسلوب خلف وعلى جواب ساره !
أم عزام أعطتها نظره لأنها تعرف أخوها ما يحب الضحك كذا
بلعت اسيل ضحكتها وهي تشوف نظرات خلف الناريه
ساره تقدمت من اسيل ومدت يدها : كيف حالك
سلمت اسيل برؤوس اصابعها قربت ساره تبوسها
بس منعتها يد اسيل : دخيلك كله ولا هالبوسه !
خلاص سلامك وصل !!
ساره ابتسمت لها وتوجهت لخلود وسلمت عليها
وقبلت رأسها
خلود وهي تناظرها بفوقيه كلمت خالها : من وين جبتوها هذي ؟!
خلف بدون نفس : جايه تسأليني كان سألتي ابوي
من اي مزبله لقاهم !
ساره ابتسمت لهم بهدوء وحبت تجلس جنب اسيل
وقبل ما تجلس قاطعتها اسيل : لا لا لا
روحي اجلسي بعيد عني !!
ناظرتها ساره باستغراب : والله قصيت شعري ما فيه قمل شوفي راح !!
اسيل عفست ملامحها بقرف : وقمل كمان !
يا حبيبي !!
يستر على عرضك ابعدي عني !!
خلود اشرت لها : اجلسي هناك
هزت رأسها بطاعه وجلست بهدوء وهي تناظرهم وتوزع ابتسامات
ام عزام تضايقت من تصرف بناتها وناظرت ام عمار : ترى عزام جاي !
ام عمار بابتسامه : البيت بيته يدخل
خلف ماسك جواله يطقطق عليه ومتحمس لشغله
بعد لحظات استأذن عزام ودخل وكله فضول يشوف الكائن للي دخل هالعائله بقوه !
دخل بابتسامه وسلم على خاله خلف
وقفت ساره بسعاده وهي تشوف عزام
تقدمت منه : كيف حالك ؟!
ناظرها وكأنه مو مستوعب فرك عيونه
ورجع ناظرها : انت ؟!
ابتسمت له : ايه انا ساره !
نسيتني ؟!
عزام بقرف : من وين انسى هالقمر المخسوف !
ابتسمت على كلامه بدون فهم المغزى : جدتي دوم كانت تقول لي اني احلى من القمر !
ام عزام باستغراب : من وين تعرفها ؟!
عزام وهو عافس ملامحه : تتذكرين لما كان ابوي يرسلني اشتري جبنه و لبن !
جدتها كانت تبيع
ام عزام عفست ملامحها بقرف : حسبي الله
وابو عزام يقول لي انهم ناس نظيفين !!
عزام ابتسم بشماته : كنت ابغى اقول لك بس خفت ابوي يزعل !
اسيل عفست ملامحها بقرف : حسبي الله عليك
ما لقيت الا ذول تشترون منهم !
كان قلت لي بالسر وانا مثل المشفوحه نازله اكل فيها
خوله ابتسمت : الحمد لله ما أكلت
خلف بشماته : خلي ابو عزام ينفعك !
حضرته مو عاجبه شغلنا !
ويروح يشتري من هالزباله
واشر بعيونه على ساره
ناظرتهم بهدوء وهم يتكلمون: جدتي الكل يحب شغلها كثير
وابتسمت بتذكر ما سلمت على عزام مدت يدها : نسيت أسلم عليك
دفها من طريقه وجلس : ترى مو ناقصني قرف
حلي عني
ام عزام ما عجبها تصرف عزام : تعالي يا ساره اجلسي عندي !!
ساره بفرح انها عبرتها وجلست جنبها
دخل سلمان وهو يركض : ماما ماما
ام عزام ابتسمت له : وش فيك ؟!
سلمان قبل ما يتكلم وقع نظره على ساره عفس ملامحه بغيره وهو يشوفها جالسه جنب امه : انت هنا ؟!
ام عزام : وش بغيت ؟!
سلمان رجع ناظر امه : ابغى اروح مع صديقي لل
قاطعه عزام بحزم : اذا عدت رجلك البوابه اكسرها !
اقعد وانطق مكانك احسن لك !!
سلمان بتمرد : كيفي !
وقف عزام على حيله وهو ناوي عليه
سرعان ما هرب سلمان للخارج وهو يتذمر ....
ام عزام ناظرت ساره : روحي إلعبي مع البنات
ساره بطاعه : ان شاء الله خالتي
طلعت ساره وهي تركض وتشعر بالسعاده
ام عزام : أمي بعدها معصبه ؟!
خلف بأسلوبه الجاف : وش دخلني انا ؟!
تزعل على ابوي الله يرحمه !
عزام : بعين الله
ام عمار : هذي اختك ولازم تتحملها !
خلف بضجر : حسستوني وكأني اخوها الوحيد !
لو انها اختك كان تغير كلامك !
ام عزام : الحمد لله انها مو اختي كان رميتها علي !! وبعدين ما في احد موجود هنا غيرك !
خلف بتفكير : افكر ارسلها لاميره!
ام عمار : اميره زوجت عيالها علشان تصفي راسها
مو ناقصها بزران !
خلف ابتسم بمكر : ما عليك انا أرتب الامور
وما رح اسكت مو اختي لوحدي !
اسيل باقتراح: طيب سفرها عند خالي محمد !
خلف بقهر: محمد تارك كل شيء فوق رأسي ومريح رأسه !
وقف عزام بخيبه كان متشوق يشوف البنت الجديده بس خاب ظنه لما شاف ساره: انا استأذن !
ام عمار : اجلس
عزام : عندي دراسه لفوق رأسي مره ثانيه
استأذن وطلع ...
**
**
**
**
ساره بفرح :نلعب مدرسه ؟!
سلمان اشر على نفسه : انا المدير !
عمار : انا السكرتير!
جودي :انا المعلمه!
ليان ابتسمت : انا المرشده !
ساره ابتسمت : انا
قاطعها سلمان بفوقيه : انت الفراشه تنظفين المدرسه !
ساره باعتراض : بس
عمار : مو عاجبك انقلعي
ساره ابتسمت حتى ما يطردوها : خلاص موافقه
سلمان وهو يجلس على الكرسي : غصب عنك
ويلا بسرعه اعملي شاهي للمعلمين !
ساره هزت رأسها : ان شاء الله
واقف بعيد شوي يناظرهم وهم يلعبون
وكيف يلعبون معها بفوقيه
وهي غبيه تلعب وتضحك معهم ومبسوطه !
عفس ملامحه بقرف وتوجه للبيت يكمل دراسه !!