بنات الخايبة..
علي البدر
البارت الثاني...
هاي ثلث تيام ما اجه للسوك هاذا وجه النحس خل اروح ادور عليه قبل لاتلزمه الشرطه هالفكر ابن الفكر...او الاحسن اروحله للمكبره وين يولي هوه ولو ظلمت الدنيه بس ميخالف تلاحك السالفه واضيعه عن العين....
بنص المكبره وبين هدوء الموته يتمشه مشاري رايح للكبر اللي ساكن بيه عزيز ابو الدوه والمبيدات....
شاف بنص المكبره جثث مطلعتها الجلاب واعظام متناثرة شاف دم وشاف فوانيس لهناك العاب شوية هناك لوحات مال كبور طايره بس هو متعود يجي لهنا ووصل للكبر الينام بيه عزيز...
طبعا الكبر عباره عن حفرة مكبرها عزيز وساكفها وحاط الاشياء البسيطه بداخلها وحاطلها تهوية......
دخل مشاري للغرفه مالكه عزيز وهنا كال بس لا لزموه الشرطه وانه لازم ابقه هنا لحد مايرجع....
وهو كاعد بغرفة عزيز سمع صوت يشبه اللطم وونين ودكات عالكاع هنا خاف مشاري وكال خل افهم شنو الفلم من بعيد ...مد راسه شافها مره ناثره شعرها وتكمز من كبر لكبر وتصيح وتلطم شوية اختفه الصوت .....واختفت المره...
طب عزيز وانصدم شافه كباله كاله شجابك مشاري ...
فكاله...اسمع عزيز لازم تضيع روحك الشرطه تدور عليك
ضحك عزيز وكاله وين اضيع روحي بعد هاي هالتشوف بنص المكبره...
لك غبي قصدي لاتطلع للسوك....
وبعدين شنو هاي المره التكمز خرعتني...
ضحك عزيز وكاله معقولة انت تخترع ...
لك احجي منو...
هاي حليمه الدلاله كتلت ابنها بليلة عرسه وتسودنت وهي مو من منطقتنه وهنا شكو كبر يطخ ببالها تحفره تدجج جثته وتذبهه بالزباله....ماشفت الجثث وانت جاي....
اي عزيز شفت زين وين تروح هسه اختفت....
هاي هم حالها من حالي عدها كبر تطب بيه تنام...
شتاكل شتشرب ....ها عزيز...
مشاري هاي احسن منك كله لحوم تشك الجثه تطلع الجبد تشويه وتاكله....
المهم عزيز اجانه شغل من ام سالم تعرفها...
اي اعرفها هاي النحسه ضاع زولها بس خوش تدفع ايدها دسمه.....
اي عزيز تريد عمل شعوذه ل٣ بنات وامهن والمقابل فلوس هواي ...
انا انطيتها عمل بس ماراح يشتغل الا لمن تدفع
اي خوش سويت .مشاري بس هيه تدفع ماتغلس...
.........
........
.........
كوثر وصادق اتفقوا يتزوجون وحددوا الخميس زواجهم واتفقوا من يوم الاثنين يكملون كلشي ..بلبدايه امها رفضت بس بعدين اقتنعت وكالت انه ليش اعطل قسمة بتي خاف يصير شي وبعدين اكل بروحي اظل ....الاحسن يعرسون واليريده الله يصير...وصادق خوش وليد لو شتكولين يمه تبارك....
ونعم الراي يايمه وانتي اكيد تريدين فرحتنه كلنه....
يمه تبارك ربي يحفظكم الله يبعد عيني .....
......
......
بهاي الاثناء عرفت ام سالم بالعرس فصار همها كله كوثر وكالت انتقم اول مره من هاي السعلوة بت الخايبة وبعدين اجيهن الباقيات....عله كيفي...
......
.....
حجي مشاري ...ياحجي مشاري.
هلا ام سالم شلونج
انه بخير انت شلونك ...
والله شكلج يم سالم المحل ماكو شغل هالايام وايجاره غالي وتشوفين السوك...
بعده مامكمل كالتله ام سالم اسكت اسكت ولا تتبجبج وهاك مشي حالك بذني ...وشمرت كدامه شدة فلوس شافهن مشاري عقله وكف....
كالها اامريني ياست الكل اليوم لبن العصفور احطه بيدج..
كالتله ...مشاري تعرف صادق بن نضال الراح يتزوج البومه بت البومه
كالها اي الخميس...
كالتله ومكيف بالخميس....هذا العرس اريده يخرب كون ينكلب الحب لكره وحقد وضغينه....
ام سالم خليها عليه وهاي المهمه انه اخلصها اليوم...
وره ماراحت ام سالم توجه مشاري لعزيز وكاله اريدك تخرب هذا الشي اوك......
تدلل مشاري بس لازم اجيب شي يلبسه صادق او يلامس جسمه.....
كاله مشاري هاك ذني فليسات مشي امورك وانت تصرف بس بخفيه لاتلزمك الشرطه.....
........
.......
.......
باقي يوم واحد عله العرس وجان صادق عايش احله اللحظات ويكول اخيرا راح التقي بكوثر روحي وعمري الله...
رن التلفون وكالمعتاد كوثر ...
حبيبتي مو مصدك باجر تجمعنه غرفه وحده وسرير واحد االلله احله شعور....
حبيبي صادق اعد اللحظات وره اللحظات حته تكون اميري وماخاف واني بين احضانك ...
سد التلفون وطلع عله صوت عزيز وهو يصيح دوة الجرذي دوة البك دوه الفار...
صاحله صادق حجي حجي تعال من رخصتك...
هلا عمي شمحتاج دوة بك دوة فار
لا حجي بس ذاك اليوم اخذنه منك دوه بك وعاشت ايدك ولا بكايه هسه .....
اي الحمد لله ...تامرني بشي عمي..
لا حجي مايامر عليك ظالم انت خاف محتاج شي تره انه اليوم فرحان وباجر عرسي اطلب شتريد وكول....
مبارك يبعد عمك تستاهل كل الخير بس عمي هالتشوف هدومي عتك وراكدات واريدلي دشيديشه وبلكت هالصدقه تدفع بلاء عنك...
كاله عمي تدري مالبس دشداشه بس قميص يفيدك....
بعد عمك مايرد الكريم الا البخيل....
......
.....
.....
هنا الاحسان اللي قدمه صادق العزيز الدجال ماجان يعرف راح يقلب حياته وينكلب ضده........
عزيز بدوره اخذ قطعه من القميص وكتب بيها تعويذته ولفها بعظم ميت وطمها بكبر محد يعرفه بس هوه...
......
......
.....
جان يوم الخميس يوم حلو بحياة كوثر كل اقاربها مجتمعين وامها واخواتها فرحانين وشافت صديقاتها يركصن وناثرات الشعر وهيه عايشه احلى لحظات عمرها ليش لا وهاي راح تلتقي بحبيب الروح وشنو من لقاء راح يكون ابدي راح تتزوج من صادق الروح....
..اجت امها وكالتلها يمه كوثر هسه تحولي من الهول لغرفتج وخلي البنات يركصن هنا وهسه تجي هاله تكعد يمج....
مشت كوثر هيه وامها للغرفه بس هنا صوت الهلاهل صار صراخ ضلت كوثر تسمع صراخ اي نعم ...
يمه يمه اني تخربطت شنو هالصوت...
يمه ماكو شي شبيج بهالاثناء عثرت كوثر بباب الغرفه وتناوشتها ايد امها كومتها وايد ام سالم اللي جانت كاعده بالغرفه وكالتلها صمله عله كلبج لازم تفكرين بالحب كومتها ومشت ...
طلعت ام سالم وبمكان مابيه احد اتصلت...
الو حجي مشاري سويت الكتلي عليه...رشيت المخاد بالمي الطيتنياه وماكتلي وين الشيشه اخليها ...
ها اوك اوك هسه احفرلها واطمها....
كال مشاري لعزيز ولك كملت الشغله والفلوس راح تطشر علينه....
يالله كومنه للعرس و نزف العريس الى مثواه الاخير.....
كعدت ام هاله تصلي وره مازفوا العريس ودخل لغرفته وره مااغلب الناس طشوا لاهاليهم ...جانت ساجده وتشكر الله ....وماكسر هالسجود وهالخشوع الا صراخ كوثر يمه يمه يمه الحكيني يمه تعالي ليه يمه هذا صادق بس وجه خنزير.....
له تابع لطفا
