بنات الخايبه
علي البدر
البارت الرابع
.......
......
تحققت تقريبا كل الامور الجانت ام سالم تريدها وكامت تشوف النتائج كدامها فبالنسبة الكوثر اللي جانت تنهرها وتراددها بالحجي هذيج هيه مجنونه ومخبله وبالنسبة لسالم وهاله فبدوا يمشون بأمرها....
ضحكت ام سالم بصوت عالي وكالت شوف مشاري اليحط راسه براسي هذا مصيره وانه ماطلع ام سالم الا اراويهم نجوم الظهر ذني البنات وامهن البومة الخايبة...
اني بالخدمه ام سالم وكل اللي تريدينه يجرالج بس كثري جياتج علينه تره هم نشتاقلج ...
ردت عليه ام سالم شوف مشاري جياتي لو مابيها دبكه ودسومه ماشتاقيتلي بس انت تلهث عالفلس...
....رجعت ام سالم لبيتها واول ماوصلت اتصل سالم وكالها يمه احنه قررنه ناجر البيت ونرجع يمج نعيش وهاي هاله تريد تحجي وياج ...
هله عمه شلونج..شخبارج مشتاقتلج...
هلا بهاله شوكت تجون ...
ان شاء الله باجر
اوك ...وسدت الخط بوجهها ...
.....
.....
.....
اجت هاله لامها وفهمتها انو هيه جانت مقصرة بحق ام سالم وهيه غلطانه من فرقتها وابعدت ابنها عنها وكالت الها يمه انه راح ارجع اعيش ببيت عمتي ام سالم...
ردت عليها امها...
ولج يثوله يغبيه نسيتي القهر والفكر الجنتي عايشه بيه والله ماخليج ترجعين لو عله كص ركبتي
....هنا ردت هاله عله امها وصدمتها وكالت لها يمه لاتخربين بيتي وخليج بعيدة عن حياتي اذا ماعاجبج تجيني براحتج بس انه قررت اعيش ببيت عمتي وياها وزوجي وعايلتي واذا تريدين تخربين بيتي ماراح اكولج اله الله يسامحج يايمه...
خلت هاله وطلعت وامها انصدمت وانبهرت من حجيها وصارت الدنية ظلمه بوجهها وعرفت انو بدت تفقد بناتها وحده وره وحده....
هنا اجتها بتها تبارك تصرخ يمه الحكي مصيبه سوده وطاحت عله روسنه كوثر كوثر....وتلهث
وج احجي تبارك شبيها اختج كوثر ...
يمه كوثر خانكه دموع اخت صادق وميته وهسه صادق يكول كوثر شاردة ومانندلها وين....
.....
.....
.....
اتصل صادق بام هاله وكالهاعمه وين انتي اطمني دموع تلاحكناها وهسه بالمستشفي مرعوبه وفاقدة بس كوثر ماهي واختفت ..
ها عمه صادق انه جايتكم للطبيب..
من طبت ام هاله للطبيب لكت ام صادق يم دموع وشافتها وجها ازرك واثار الاصابع بركبتها....
وينه صادق كزثر وينها دموع شلونها تسال وهي تبجي وتصيح
هدتها ام صادق وكالتلها صادق يدور عله كوثر ودموع زينه بس اهدي وتعوذي من الشيطان وصلي عله نبيج...
ردت ام هاله وكالت اللهم صل على محمد وال محمد شلون صارت خو مافاقده بعدهي...
ردت دموع لا خاله زينه الحمد لله..
سولفيلي خاله دموع شلون صار هالشي...
والله خاله ثلث تيام تخوف بيه كوثر وكلت لامي وكالت يمه كوثر اخيتج وديري بالج عليها...
جانت تجيني تخوفني بسجينه وامس جابتلي ثوبي كله منكعته بالدم واليوم خنكتني وماكدرت اتخلص منها وسويت روحي ميته فهيه شمرتني وشردت..
...
....
الظلام حل والليل بده وماكو خبر من كوثر اتصلت بيه ام هاله وكالتله وين انت يمه صادق..
كالها خاله ماخليت مكان ومحتار هسه جاي الكم للطبيب...
طب صادق وهو محتار شيسوي وين يلكه مرته ...هنا كالت ام هاله تذكروا شكال مراد ابو مرايه جان يصيح السحر بالمكبره يمه صادق نروح انه وياك هسه نشوفها...
خاله دنيه ليل وماعتقد تروح هجي مكان واذا هاي بس انه اروح انتي ابقي...
لايمه اروح وياك اشوف بتي وين ماوين...
.......
جانت الدنية ظلمه والمكبرة موحشه وام هاله من الخوف ماتكدر تلفظ ايه وحده وجان صادق شايل لايت وايده ترجف وهناك شافو نسوان اثنين يطفرن عله الكبور صاحت ام هاله كوثر ذيج كوثر ركضوا بين الكبور لكوها كوثر وتاكل بجبد مشوي مال ميت واللي جانت وياها حليمه الدلاله فحليمه شردت واختفت وكوثر وكفت وهي تضحك وفقدت عقلها بالكامل واديها كلها دم وحلكها كله دمه وملابسها مشككه وكفشتها منثوره شافتها امها وصرخت وطاحت مغمي عليها وسط الكبور....
....
....
ام هاله فقدت النطق وصار بيها شلل رباعي بعد ماوكعت بالمكبرة وحطوها على كرسي متحرك وتبارك جانت هي المسؤولة عنها والممتحنه بيها ومن كثرة البجي والهم عله امها جانت تبارك تشوف انو عيونها بدن يزغرن وضلت ماتشوف بيهن وجانت تعاتب الزمن اللي حول كوثر الملاك والحورية حولها لمجنونه مشمورة بالشماعية وتعاتب الزمن عله هاله اللي ماسالت ولا حته اجت لامها وشافتها وقررت تبارك تروح لهاله وتتعارك وياها ... وتحجيلها عن امها وشنو اللي صار بيها..
....
....
.....
سالم لابس وزرة مال تنظيف ويمسح بجام المطبخ ...وام سالم نايمه عالقنفة ومنكعه رجليها بمي وملح وهاله تنضف برجلين عمتها وتشيل الماي وتشربه وتبوس برجلين عمتها وملابسها مال خدامه وحالتها حاله وبتها مريم الزغيرم مشمورة وتبجي ومحد بحالها. ..
هذا هو المنظر اللي شافته تبارك يوم دخلت عله بيت ام سالم...وماحجت كلمه وظلت مصدومه وام سالم فهمت وشافت الصدمه بعيون تبارك فحبت تقهرها ...وصاحت بوجه هاله ولج جلبه اليوم تغسلين رجليه من غير ماتغنين ليش ...
ردت عليها هاله عمه عمه والله اسفه وباست رجلها وشربت من مي رجليها وغنتلها...
عمتي ياعمتي
روحي انتي ودنيتي....
لو مال بيه الزمن ... انتي روحي ودنيتي ..وتهز راسها وتغني وماهمها وجود تبارك...
هنا عرفت تبارك انو كل اليصير سببه هاي الحية السودة ام سالم وخافت تحجي خاف تحول سمها عليها ...ومفت كبال هذا المنظر وهيه مصدومه وصاحت...
(ياكسرتي وياحسرتي المامش مثلها..)...
طلعت من بيت ام سالم وهي تسمع اغاني هاله لعمتها وعمتها تضحك بخبث وزغل....
له تابع لطفا....
