بنات الخايبة
علي البدر
البارت الثالث...
.....
.....
صارت حياة صادق وكوثر جحيم فمن يوم العرس ولحد هسه الامور اوك بس من يريد يتقربلها بالفراش وينامون سوية تضل تصرخ وتملخ بروحها وتخرمش وجهها وصورته تنكلب خنزير كدامها وتطرده وتلم الدنية كلها وتجي ام صادق تهديها والبيت ينكلب ماساة واخت صادق المريضه تضل تصارخ.....
.....
.....
اجت تبارك لامها وكالتلها يمه صادق خابر...
اي يمه وشكال....
يمه نفس الشاي هم مصرخه البارحه وملخه روحها ومصيحه والامه ملتمه...
ربي دخيلك ربي شسويت انه ربي الكالي حل وانت حلال الشدد....
يمه تبارك تعالي نروح لختج نشوفها نشوفلنه سيد يقره عليها...
.....
.....
......
بليلة ظلمه والكمر غايب تلبسين اسود وتغسلين اديج بدم دجاجه تذبحينها بيدج وتاخذين العمل وتدفنينه وهذا الجيس تشمرينه ببيت سالم ابنج...وراح تشوفين شلون يصيرون تحت ايدج كلهم....ويسلم عليج حجي مشاري ويكول بخدمتج باي وقت...
سلملي عليه وكله باجر امرله يتدلل الحجي...
الله يسلمج حجيه...
...كملت ام سالم مهمة العمل الخسيس ووصلت العمل لبيت ابنها سالم بطريقتها وكعدت ببيتها تنتظر الاحداث ... وقررت تتصل بسالم وتشوف احواله وتساله عن مرته ...مو حنيه وطيبه طبعا لا وانما تريد تشوف وتجس التبض اتصلت ٤ مرات ماكو رد.....
كالت ايه اخذ راحتك وي بت الكرطه ايام وتصيرون بيدي مثل المحابس...
.....
وصلت ام هاله لبيت ام صادق وتلكتها ام صادق بالاهلا والترحيب ومن طيبة كلبها ماحسستها ان كوثر تعبانه وانما كالتلها هاي الامور تصير وتنحل لاتهتمين واني امها الثانية وهي صارت مثل بنتي ...
ردت عليها ام هاله الله يجازيج بالخير بس لازم ناخذها لطبيب لسيد يشوفها ...
اي ام هاله حاجيت صادق ابني وراح نروح للسيد مراد ابو مرايه ونشوفها شبيها...
دادة والله ماصدك بيهم ذوله لابو مرايه ولا غيره بس شسوي ماعندي غير حل.....
.....
....
....
نص ساعه تقريبا هي المسافه بالسيارة بين بيت ام صادق وبيت مراد ابو مرايه ..اللي كاعد ببيت طين بره المدينة ومنعزل بمنطقه شبه فارغه...
دخلت عليه كوثر وامها وام صادق وابنها وجانت كوثر حالتها موحشه الشعر طالع من العبايه والوجه مخرمش والنفسيه صفر ...جانت حالتها اول ايام تتازم بس من يتقربلها صادق اما هسه صار كلشي ببيت ام صادق يثير جنونها وتنجن ويصير بيها شيطان رجيم اذا شافت صادق...
الغرفة اللي دخلولها مالت مراد ابو مرايه هي رعب لحالها ...كاعد مراد بنص الغرفه ويمه ترمز بيه دكمه وكدامه كلاص ستيل وبصفه قران وغرفته معلكه بيها طلاسم وتعاويذ ...
مراد رجل سمين وكصير وملتحي وبكصته طبعه مال كصه واول ماشافه صادق شاور امه وكالها هاي لاتصدكينها تره جويه مال بتيته...
حجه مراد كالهم شسمها المريضه...
ردت امها اسمها كوثر ..
بتمن امها شسمها ..سالهم مراد...
اني امها اسمي سلوى...
جاب الكلاص الاستيل وكالها اتفلي هنا بنتي بالكلاص وحط عليه ورق مادري ماليش وكبس الكلاص وسده بيده وضل يرعص ويرجف ويصيح طرطووووش طرطووووش طرطوووش بيدك كلشي يحوش كوثر بت سلوى طرطوووووش
الصيحات والرعب والصراخ ورعشات مراد ابو مرايه خلت الكل يختلس من الخوف وجان مراد يصرخ ويدوس الدكمه البترمز ويصيح طرطوش كوثر بت سلمى طرطوووش العمل راح يطلع...
لحظات وانشمر مراد وهوه يصب عرك ويلهث وكال لم هاله شوفيه الكلاص شبيه...
خافت تمد ايدها عالكلاص لان ماظلت قطرة دم بيهم وحرك الكلاص صادق وطلعت منه لفيفه سوده زغيره وكالهم هذا السحر مسويته مره لبتكم وهسه راح تجي بتي وبيدها مرايه ونسالها وتجاوب...
طبت بنيه زغيره شعراتها عكش وملح وثوبها كشمير اكطم ومشرشب وماكوله ذياله من جوه واديها وجسمها مامار عليهم المي...
وكفت وره الستارة وبده يسالها ابوها.....
المريضه اسمها كوثر لو تماضر لو حياة لو نهله..
جاوبت بويه مرايتي تكول كوثر بت سلوى...
كالها احجي شتكول مرايتج...
كالت البت المراية تكول هاي البت حاطيلها سحر اسود والسحر هذا هو سبب حالتها وهو جيس اسود ...
خلصت ام مرايه ومشت وظل مراد يحجيلهم ويكلهم هذا السحر مايبطل ولايموت الا ينلكه وينحرك لو اله المسويه يحركه....
زين ماتعرف منو مسويه ..ساله صادق...
هنا ابو مرايه ضل يصرخ ويصيح ويجوعر بخهيمش بخهيمش عنووووووش ياشرباش المكبره بليل والناس ليل ...انتم تنامون وغيركم ماينام انتم تدفعون وهمه ياخذون بهشمش قطوووش شوعان ...
صادق وامه وزوجته وامها حسوا بالخوف والرهبه وماتمالكو نفسهم وطلعوا يركضون من الغرفه ووكفوا بعيد لحد مانتهى مراد من صياحه راح صادق انطاه فلوس تعبيته وشغله وحجه وياه كاله حجي مراد شنو لازم اسوي....
كاله كلما تجي الحاله لمرتك اخذها ونام يم الكبور هذا هو الحل وهناك مسويلكم العمل ....
ماقتنع صادق بالكلام ورجعوا لبيتهم وبنص الطريق ام هاله كالت اللي محيرني هاي البت ام الوصخ شلون عرفت وقرت بالمرايه...
ردت ام صادق والله داده مدري بس يمكن جانت تسمع الحجي ...
شلون تسمعه يا ام صادق الغرفه جانت مسدودة وبس صراخ...
هنا صاح صادق والله عرفت عن طريق الترمز لازم بيه سماعه ليش كل شوية يدوس الدكمه ويصيح....
هنا انصدموا وتعجبوا من حيل الدجالين وكالت ام هاله ذوله عايشين عله دم الفقير...
له تابع لطفا......
