صبح الحال وصبح وائل خارج للخدمة وصبحات فاتي على التخمال والتجفاف بحال العادة .
فوقت الغدا خرج واءل داير على راسو كاسكيطة كيتغدا مع صحابو ... طاح ليه فبالو الفايس وهوا يدخل بعت ليها مسج يكمل الهضرة ديال البارح اللي قطعاتها فيه فاتي فاش دخلات عليه لبيت النعاس ، هضرة تجبد هضرة ودخلو فركن التعارف .
واءل : ايوا شنو كديري فحياتك؟
رحاب : اوطيس دو ليغ ونتا
واءل : عندي اجونص دو فواتيغ
رحاب : صافي غير نرجع من السفر غادي نجي ناخد من عندك
طوموبيل .. كتكري بعدا؟
واءل : وي مرحبا
رحاب: صافي نشاء الله فاش نجي غادي نقصدك نيشان .. سيفط ليا العنوان
واءل : اوك ان شاء الله .. شفتك محاطة حتى صورة !
رحاب: مكنحطش تصاوري
واءل : وباش غنعرف راسي كنهضر مع بنت ولا ولد
رحاب : هههه نسيفط ليك صورتي
واءل : وباش غنعرف بللي هي نتي؟
رحاب : ديك الساعة شغلك هادتك ..بغيت نهضر اوديو نهضر اوديو تعرف بعدا باللي انا بنت
واءل : بيزار !
رحاب : شنو اللي عجب فهادشي؟
واءل : اول مرة نهضر مع بنت وتبدا تأكد ليا باللي هي بنت .. نوغمالمون البنات كاع مكيتسوقو لهادشي ... كيبقا الولد هو اللي تابعهم يتعرف عليهم ماشي هما اللي تابعينو
رحاب : بغيتي تقول تابعاك وكنبرهن ليك باللي بنت وكدا ياك
واءل : كتفهميني دغيا ... باينا غنتفاهمو 😉 ... جيني نيشان قولي شكون اللي مسيفطك
رحاب : 😱 والله اخويا مامسيفطني شي واحد ... شفتيني شديت معاك الخط وباغا نتعرف ليك قلتي هادي فراسها شي حاجة! عرفتي شنو صافي نسا .. .اوك باي مامولفاش نتبع بنادم انا ونبدا نفسر ليه شكون نكون وشكو مانكونش
سدات عليه فخطرة وسوبريماتو من ليزامي . بقا مصدوم وراسو ضارو . رجع كيقرا المساجات من اللول كيحاول يستنتج . فآخر المطاف قال كاين بنات هما كيجبدو الولد . كمل غداه وناض نسا الموضوع ورجع يكمل على شغالاتو .
لبسات فاتي قفطان راءع احمر موبرا ، اخيرا شافت وجهها فالمراية وطلقات شعرها وقادات المكياج ولبسات الطالون .. هادو طبعا حوايجها اللي ديما مخبييين مكيبانو غير من مناسبة لمناسبة . هي ماشي خايبة زوينة .. وزوينة بزاف .. وغير مسحة للوجه كتبان كتبري . لاكت مع الاسف مهملة لنفسها ومهملة بزاف ، ولو لا السبوع اللي معروضة ليه مكانتش غادي تقاد حالتها ولا تشوف فالمراية . دقو عليها الجيران وخرجات لقاتهم كاملات مجموعات .. ها اللي لابسة الاصفر ها الاخضر ها الموف والتكاحل و الروايح كتشاير ، طلعو كاملين بيهم جملة عند المرا لللي ولدات وتجمعو فالصالة لقا مرت الكوميسير سبقاتهم وجالسة لابسة قفطان كلاص وصاك فيديها وطالقة شعرها كاري زعر وكتبتاسم بالادب مكتجمع مع تاوحدة .. مكتتفيا تفرج فالعيالات اللي محزمات مع اللعبات وعاطيينها لتدوار لحريرة ... وحدة تنسيك فالاخرى تقول مكيجلسوش عليهم . انا فاتي غير كتفرج وضحك .
أنت تقرأ
بنت الحومة
Short Storyقصة جديدة كتهم أي بنت بالأخص القادمات على زواج ، قصة الكاتبة :ghazal trust ?
