سكتات فاطمة الزهراء مطولا كتسمع لكلام واءل .. حشمات جاوب وتقول قابلة نرجع .. والى هضرات غتقول ماقابلاش ودير فيعا عزة نفسي.. دورات وجهها للجنب جتى حسات بيدها كتباس ودارت شافتو كيلوس فيدها بشغف
واءل : غادي نرجعو ... انا مستحيل نعيش مع وحدة من غيرك ونتي مستحيل تعيشي مع واحد غيري... راحتي معاك كنلقاها .. وحتى نتي راحتك معايا كتلقايها
فاتي: والتقة كي غندير نرجعها؟
واءل : حلفت ليك ما تعاود ... ومع الوقت ترجعي تيقتك فيا . هادا جهدي وماعندي ما نقدم ليك باش تيقي فيا افاطمة الزهراء ... حلفت ليك بالله والله حسن من كلشي . تنهدات ساكنة وهوا يقول
واءل: غنمشي معاك تهزي حوايجك تديهم لدارك..
قاطعاتو : ماشي بهاد الطريقة اواءل ... خاصك ترجع ليا اعتباري قدام الناس اللي كلاو فلحمي حتى شبعو ... اللومة اللي رجعات ليا ... العاءلة اللي كتشوف فيا شوفة ناقصة بحال الى مجدامة ... الضحك اللي ضحكوه عليا .. واللي تزوجات كاعيط تشفا فيا .. سحاب ليك هادشي ساهل عليا ؟ مرضت بهضرة الناس وتقهرت ... وليت نحشم بحال الى درت شي جريمة ! ماتصورش وجههي اللي مرمدتي ليا فالتراب وصمعتي اللي طاحت للارض
واءل : اللي بغيتي نديرو ليك .. يكفي انني كنبغيك وغتعيشي معايا .. مايهمكش البشار .
فاتي : الى نتا عندك هادشي وايد ناقص انا راه مهم بزاااف بالنسبة ليا ولأي بنت هضرو فيا وطعنو فشرفها ... وخاص با يبغي بعدا هادي اول حاجة . منقدرش نرجع ليك بلا متيبغي با .. واخا هاكاك سخط الواليدين خايب والحاجة مكتكملش بلا رضاهم ... وشوف مك واش تبغي بعدا
واءل: مي والله عمرها قالت فيك شي كلمة خايبة ... ديما كانت تقول ليا ضيعتي بنت الناس وماتلقاش بحالها ... واخا باك خرج العيب مي ماعليش غنشوف معاها على قبل داركم اما عليك نتي مزالين كيدكروك بالخير لدابا
فاتي: المهم منك لبابا ... بغيتو هوا يعيط ليا ماشي انا نعيط ليه ... انا منقدرش نقول ليه نرجع ولا رجعت ولا شي حاجة ... هوا اللي يجي ويقنعني نرجع .
واءل : هضري مع ماماك شوفي شنو تقول ... ياك كتعاودي ليها كلشي ... وانا غنمشي دابا مع العصر نتسنى باك يخرج من الجامع ونهضر معاه ... غيبغي والى مابغاش غيبغي بزز منو
فاتي: بابا يقدر يبغي ... يقول الله ترجع ولا تبقا بايرة انا عااارفاه كي داير ... تجبدو حس الزواج يضحك تا لودنيه وينسا كاع اللي فات ... تجبد بيه الطلاق يكحال وجهو ويكرهك .
واءل : وراه عارفو واش علد توريني فيه .
خرجات عينيها : وماالك كتهضر هاكا!!! راه بابا هاداك!
واءل : !!! والو ماقلت وااالو .. الله يعمرها دار اش قلت ... صافي سمحي ليا لاللة
دورات وجهها زعفانة وهوا شاد فيديها كيرطب معاها ويراضيها حتى قربات العصر تأدن وناض رجعها بحالها للاوتيل ومشا هوا يتلقا باها . تاصلات بأمها تلقاها وشدات طاكسي قربات من المدينة تلقات امها وجلسات معاها فالقهوى كدخل وتخرج مقادراش تجبد الموضوع
أنت تقرأ
بنت الحومة
Короткий рассказقصة جديدة كتهم أي بنت بالأخص القادمات على زواج ، قصة الكاتبة :ghazal trust ?
