ليا ماشي ليها

البارت 2

مهم كيف قلت ليكم ف عمري 24 حاليا بلا خدمة ختكم عاطلة عن العمل و هادشي نضرا ل عقليتي الصعبة حيت انا مكنحملش شي حد يتحكم فيا ولا يخدمني عندو و يبدا يعطيني ف الاوامر نعقل اخر مرة خدمت فيها حيت كانو بزاااف ههه زعمة كيف ناس كالسة ف بيرو ديالي و كندير الحسابات ديال الشركة حيت تخصص ديال محاسبة وهو يجي عندي الشاف قاليا زربي يلاه ونتي كتخدمي بخاطرك حسابك مبرزة ف العمارية يلااه سربي راه خاصنا نكملو باش نحطو دوسي ل الضرائب مجاوبتوش بردت قلت مع راسي راه معصب حيت هاد العام الشركة كان عندها الخارج كتر من الداخل و الضرائب هلكوه و زيد tva و روينة ماشي لخاطرو مسكين انا مزال كنحسن ليه العون هي تبالي يدو فوق البيرو حطها بكل قوتو و غوت غوتة طرش ليا ودني الله يعطيه الغراق مزال ودني عاقلة على ديك الغوتة معرفت مالو تسيف وبدا يسب فينا كاملين لي خدامين عندو غا لي نساه و صافي واخا بالي انا منسا والو حيت تبارك الله عليه حافض و عندو تجربة ف سبان االخدامة ديالو كيخرج فيهم زعافو ولاكن جيت انا خرجت فيه داك شي كامل لي كيديرو ف ناس جمعت الوقفة و حطيت يد على جنبي و يد كنشالي بيها عرفتو الوقفة كيدايرا بحال دوك عارضات الازياء مين يديرو session de Photographie ولاكن انا كنت دايراها بحال دوك بنات السوق مين يبغيو يشنشفو شي وحدة معولا ختكم على خلاها اوا درت الوققة و بديت عليه جبد عطيه عطيتو ف جنابو علاش كيضور و شديت clavier ودرت supprimé للخدمة كاملة لي شهر وانا خدامة فيها و هزيت صاكي باغا نخرج باغا نبان ليوم عليهم الخدمة طارت و سالير باي باي مامشيت حتى نوضت روينة (متنساوش تقولو الجملة مع اللحن ديال الاغنية الله يخليكم مبغينا مشاكل مع الداودية تقولك سرقتيلي اغنيتي لي رفعات بالراية دلبلاد ههاها))

مهم هو جبتها في راسي من داك نهار ماخدمت ما شفتها سمعيتي في الارض محدش عاوز يشغلني يا لاهوييي ولاكن انا ختكوم هانياتون معندي موشكيل غي هو نgير ديال صحاب دار و صافي ما عليا انا منخدم مندير والو نبقى غي نوم و الراحة والاستراحة ..
مهم نكملو كيف قلت ليكم انا دابا بدون عمل ولاكن الحمد الله بخيير ممحتاجاش الخدمة عايشة لخروج سفر فلوس موجودين من ناحية العائلة الحمد الله بخير مكان حتى مشكل ولاكن المشكل لي عندي هو نبيل من نهار شفت كمارتو ما شفت نهار زين وليت بحال المحقق كونان غي لاحقاه و كنخبش و نبش موراه هو مسكين معارف والو اش كيوقع حيت اصلا مكيعرفينيش و مكيشوفنيش واخا نكون حداه و هاد شي كيهبلني وكيخليني نتسطا واش انا خايبة لهاد الدرجة كامل صحابو لي كيكونو معاه بغاو يتعرفو عليا الا هو ايمان دايالو العقل والقلب وعينيه حتى هوما
بغيتو تفهمو ياك تلفتكم مهم نبيل اول مرة شفتو هادي عامين شفتو ف شركة فين كنت خدامة كان صاحب شاف ماشي شاف لي حيحت عليه لا لي قبلو راه قلت ليكم خدمت بزاف الخدمات ركزو معايا ههه