ليا ماشي ليها

البارت 8

ام غزلان:: نوضي فيقي يلاه سلمي على خاتك ونتي عاطياها غ لنعاس يلاه غسلي كمارتك و بدلي لبسي حاجة نقية و حيدي ديك بيجاما ديال روسوم
غزلان:: انا كنت ناوية نوض بلا متسبقي العيب و هادي ماشي بيجامة ديال رسوم هادي مشيشة اماما شوفي شحال زوينة ويتك ويتك لعمررر
ام غزلان:: اويلي انا على شارفة عاد كتقوليها مشيشة مكانش شي مشة قدك يلا تكعدي عاونيني نوجدو لفطور لخالتك راه سولت عليك
غزلان:: تاكول فيه جغديد مالها مفطراش ف دارها مصبحا علينا اش بغاتلي تسول فيا
ام غزلان:: ششش اديك لفعة لكرطيطة راها تسمعك نوضي بلا هضرة يلاه
غزلان:: ها هي ناضت تفووو امتى يجي نبيل يخرجني من هاد دار تفوو كرهت بغيت نتزوج هي اهييي
ام غزلان:: اش كتقولي تزوجي يا ديك لحمارة لوكان راكي ب ولادك لي جا تهربيه حتى حد مبقا يبغي يجي يخطب فيك درتي شوهة كلشي عرفك مباغاش تزوجي غاتبقايلي هنا مقابلاني و عاطياها ل نعاس نتي غاتركبيلي سكر هادا عامك تالي يا اما تزوجي ولا سيري عند ختك فرنسا انا مقديتش عليك
غزلان:: ههه هاتي داك راس نبوسو ويتك ويتك على ماما لغزالة مين تعصب وا صافي ا عتيقة اصاحبتي مالك منرفزة كالم تواا متخفيشش على بنت عتيقة والله حتى نحمر ليك الوجه و نتزوج ب سيد رجال عن قريب اوا غا صبري وبلا معيور كل نهار
الام؛: احياني عليك يا لبوحاطية اوا غادي نشوفو راك قريب ديري 25 و مزال كتشرطي ابنتي راه بنادم كيكبر ماشي يصغار بغينا نشوفو ولادك قبل منموتو
غزلان:: اماما صافي لباس عليكم ان شاء الله غاتشوفو ولادي و ولاد ولادي اماما راه زواج ماشي لعب ولا غي نهار نشطحو فيه و نركبو العمارية و نتصورو لاا الزواج مسؤولية كبيرة و خاصني نختار راجل لي قاد يتحمل هاد المسؤولية و يكون راجل د بصح و يقدر يولد هاد لولاد لي باغا تشوفيهم و يربيهم احسن تربية و يكون اب متالي و رائع بحال بابا اوا نتي ختاريتي سيد رجال خليني حتى انا نختار منديرش كيما ختي الهام ها هي ليوم ف فرنسا مطلقة ب بنت و ولد مقادا تبقى فالغربة ما قادة ترجع وضيع ولادها لي كبرو و قراو تما وهاد شي حيت زربت و تزوجت واحد غ حيت لباس عليه يعني غيعيشها ف نعيم زواج ماشي فلوس زواج حب اولا و تفاهم و احترام مهم خليني ساكتة حسن حيت يبالي بحال دوختك
الام:: وا باااز درتيلي درس ف الفلسفة و مفهمت منك حتى زفتة خرجي خرجي عند خالتك خليناها بحدها

غزلان:: ههه مكلخة نتي خليني نخرج عند طاتي لي كتفهم هاد الفلسفة و كدور ديما عليها
الام:: غزلان ها سخط ابنتي خلي خالتك ف تيقار الى قاتلك شي حاجة سكتي راك عارفاها غ تهضر و صافي خليها تقول ما بغات
غزلان:: ماما راه كتزيد فييه تمشي تقابل بناتها وهي حاضباني امتى نتزوج واراجل هرباتولي بنتها اش بغاتلي
الام::صافي سكتي راه خالتك كتشوف فينا و الى قاتلك شي حاجة ديري راسك دمدومة مكتفهميش
غزلان:: اوووه طاتي ساسا مرحبا صباح الخير جيتي بحدك فين البنات
الخالة:: وي حبيبة سافا البنات مشاو يتقضاو الحوايح راك عارفة سوسن بنتي عرسها قرب العقوبة ليك اجي نتي امتى نفرحو بيك راك كبرتي
غزلان:: اوا طاطا مين طلق سوسن نتزوج راجلها ان شاء الله
الخالة:: اممم باقيا باسلة و ضحكك كيفك سوسن راجلها كيحماق عليها و عمرو يفكر يطلقها اوا ف عرسها لعبي خفيف و شوفيلك شي عريس راه راجل سوسن من شمال و نتي عارفة شماليين زين كيداير واحد ينسيك ف لي قبلو بصح راك ضعافيتي زيدي شوية باش فالعرس تباني غزالة مالك وليتي هاكاا
غزلان::ختك مكتوكلنيش داك شي علاش ضعافيت
الام:: هههه شفتي اختي غزلان شحال فيها ديال ضحك هاكا نهار كامل كتشد فينا عندنا سيكتور ف دار ههه
الخالة:: اوا بسيف حيت قلت ميدار لوكان كانت خدامة غادي تعمر وقتها و متلقاش وقت للضحك ياك اغزلان
غزلان:: طبيب مانع عليا نخدم(قبل منكل لجملة جاءتني قرصة ف رجيلاتي من تحت طابلة من يدي امي العزيزة الحنونة تعني انني كترت وزدت فيه وانا نبدل مسار جملتي لي كانت خارجة وصححتها من الى) طبيب قالي مخاصكش تبقاي مدة طويلة حدا شاشة ديال حاسوب عندي حساسية ف عيني داك شي علاش اني كالسة حيت خدمتي كلها ف pc
الخالة::اوا بقاي ف دار حسن متعماي راه لعنين هوما كلشي
غزلان::( فخاطري : واش غتحشمي ولا نوض ندير فيك شرع يديا حسابك نسيت اش دارت بنتك فيا شحال هادي ولاكن دعيتك لله نتي و بنتك)
الام:: غزلان نوضي جيبي ل خالتك عصير ف تلاجة عاد درتو يكون برد
(مشيت لكوزينة وبلا منحس بديت نبكي تفكرت هاد خالتي شريرة بنتها اش دارت فيا هادي 5 سنين كان يسكن حدا جدتي واحد الولد سميتو عماد كنا كامل بنات العائلة كنحماقو عليه ملي كنا صغار كنمشيو عند جدة غي باش نشوفوه و لعبو معاه عروسة عريس هه كنا كندابزو ديما عليه شكون تكون عروسة ديال عماد وهو دائما كان يختارني وكبرنا ولعبة تحولت لحقيقة وعماد بعد ما مشا المانيا ودار مستقبل رجع وخطبني كنت اسعد انسانة على وجه الارض ولاكن الفرحة مكملتش..