في ارض الغرام انت دولتي

35 والاخير

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

اسيد .. دفعت كرار عني بقوه ولزمته من قميصه بس الصدمه والرعب اتملكوني .. بحيث اريد اتنفس مااكدر .. بصوت متردد ومليان غضب ..

_لك شدتكول انت .. اشبيها امي؟!!

كرار .. اسيد راحت امي ولك ماتت.

اسيد .. شنو الشعور الي حسيته؟؟
شنو الوجع الي اعتراني؟!
شنو الغصه الي عصرت گلبي؟؟؟
لا لا هذا مو وجع هذا موت .. مدااحس بشي اصلاً .. العالم كله اتوقف بلحظه!
امي ماتت؟!!
مستحيل اكيد هذا كرار اتخبل .. الصبح اني يم امي ما بيها شييي .. شنوو ماتت؟!!
بكل ما املك من قوه رفعت ايدي ولزمت كرار من ياخته .. قربته مني وصيحت بوجهه بكل غضب .. احس الكلام يطلع من نص گلبي مو اللساني الي يحجي .. وعيوني احس نار اتجمعت بيها

_ شنو ماتت .. لك انت تخبلت .. شنو ماتت .. شنوووووووو مااااااتتتتتتتت.

كرار .. وهو يبجي لزم اسيد حظنه .. ولك اسيد خويه راحت وعافتنا .

اسيد .. كل ذريه بيه انهارت .. مثل الي انصعقت اديه الي لازم بيها كرار ارتخت!
هديته ودرت وجهي للبيت امشي واسحل بروحي بس اريد اوصل لـ امي...... !
اريد احضنها .. اريد اشم ريحتها .. ممعقوله اتعوفني امي بهالسهوله حتى بدون اوداع!
مشيت للبيت والمسافه صارت عليه دهر ... وصلت للباب وكفت .. الباب كان شبه مفتوح ، صوت البجي والصياح داخل البيت ترسوا اذني .. خليت ايدي ع الباب وصفنت .. لا اكدر ادخل .. ولا اكدر ادير ظهري واروح .. ماادري شسوي !
لحظات .. دقايق .. يمكن سنين مرت عليه واني واكف .. حسيت واحد لزمني من ورايه .. مااكدر التفت واشوف منو احس الزمن اتوقف بيه .. الى ان سمعت صوت كرار وهو يبجي ...

كرار .. اسيد !!

اسيد .. فتحت الباب ودخلت .. لكيت نسوان مااعرفهم منو .. او يمكن اعرفهم بس عقلي اتشوش ميفهم شي .. دخلت مثل التايه امشي بنصهم .. الى ان وصلت لامي .. !
كانت نايمه ع التخم ومغطيها حتى وجهى مغطي .. مشفتها .. اتقربت منها كعدت بالكاع ورفعت عن وجها الغطا..!!
لما شفت امي بهذا المنظر فقدت .. حظنتها وبقيت اصيح بإعلى صوت .. ردتها بس تكعد .. بس اتحاجيني .. بس اودعها ......ماكوووو ... راحت امي!
من اول ما اتوفى ابويه حسيت نفسي كبرت فجأه .. صرت رجال واني بعدني ولد صغير .. وهذا الشعور بقى ملازمني لحد اللحظه الي شفت امي بيها بهذا المنظر .. هنا حسيا نفسي طفل .. اي طفل ويريد حظن امه!
جرني اخويه كرار وعمي من يمها بالكوه وطلعوني بره!
مااعرف شصار بعدها واشلون خلصت ايام الفاتحه وانتهى العزا .. كنت بغير عالم اول مره احس بهيج كسره .. اول مره اعرف الام موتها يهد الحيل!
خلصت الفاتحه 3 ايام اني كاعد بالجادر مدخلت للبيت ولا ضكت الزاد عايش ع المي والجكاره .. بالكوه عمي وكرار يحجون عليه يلا اشرب استكان چاي واشويه خبزه!
لا اكل لا راحه جسمي كله نحلان مااكدر اوكف على رجلي .. والاعظم من هذا گلبي احسه ممرود ..
طبعاً اني بعد نسيت خالتي ايناس ونسيت كلشي .. بس بعدين عرفت انو خوالي سوولها فاتحه ابيت جدي اهل امي .. ومحد حاضر لا رجلها ولا حتى جهالها حاضرين الفاتحه!!
اخذت اجازه من الدوام بعد العزا وكعدت بالبيت بس حبست روحي بغرفتي الي بالمكتب .. مااريد اشوف احد ولا اريد احجي ويا احد .. حقيقي اتكئبت من الكل .. والي دمرني اكثر لما عرفت انو امي ماتت من سمعت بأختها ماتت !!
بالبدايه كالو سكته قلبيه صايره عدها واتوفت .. بس اخر يوم من خلصت الفاتحه وانجمعنا اني وعمامي وخوالي ببيتنا .. كعدنا حتى نعرف شنو السالفه ؟!