#القروية_و_الوحش
🌸مهيره
_١_
بزغ الفجر معلنا حلول يوم جديد على تلك القرية الوديعه المستلقية بهدوء بالقرب من النيل .... بأزقتها الطويلة الضيقه ومنازلها المبنيه بالطوب الاحمر ومعروشة بالزنك واخرى بالطوب الاخضر ومعروشة بالحصير.... كانت الابواب الحديدية القديمه مفتوحة على بعضها .... تجاوزت علاقة السكان الجيره وتحولت الى علاقات عائلية .... البساطه والطيبه هي اولى صفات اهل هذه القرية ..... والاشجار الخضراء الضخمه التي تعطي القرية طابعا فريدا وحدها التي تشهد على هذا .
استيقظت على اثر صوت والدها وهو يفتح الباب للذهاب للجامع .
انقلبت على ظهرها وظلت تراقب النجوم التي تلمع في السماء ....
لاحظت لمهيره تلمع بشدة .....
مهيره نجمة في السماء اطلقت عليها هذا الاسم مع جدتها في طفولتها .... اخبرتها جدتها ان مهيره تلمع بشدة لتنبه عشيرتهم بأن هنالك خطرا قريب ..... عل هنالك فيضان ..... ولكنهم ليسوا في فصل الخريف .
اغمضت عينيها وتمنت الا يحدث اي مكروه لها او لأحبتها .
استغفرت قبل تنهض من على سريرها .... عليها ان تعد الشاي واللقيمات لوالدها .
توجهت اولا ناحية الحمام ..... فرشت اسنانها ثم توضت وادت صلاتها ومن بعدها توجهت ناحية المطبخ ....
نظرا لان هنالك ازمة حالية في الغاز .... قامت بإشعال بعض الفحم .... ووضعت من فوقه الإناء الذي ستعد به الشاي .
ومن بعدها توجهت نحو الفناء الخلفي .... وقفت على اطراف اصابعها وهي تضع يدها على السور الطيني الفاصل بين منزلهم ومنزل الجيران ...
نادت بصوت خفيض : سيدة ..... يا سيدة .... يا بنت اعلك لسا م صحيتي .
جاءها صوت صديقتها التي كانت تقف بانتظارها : هيا يا يما واقفالك لي ربع ساعه مالك الليلة اتأخرتي
_ بري يا سيدة شفت مهيره لمعت
_ يا بنت انتي بتأمني بالخرافات دي?
_ والله يا سيدة كلام حبوبة النعمه في النقطه دي بالذات م بقع واطه .
_ كدي هاك ياختي حلة اللبن دا .... كلامك دا يوم بجننك ... تفي من خشمك ماف اي شي بيجي
تناولت "حلة اللبن " من صديقتها وعادت ادراجها .
🌸توتيل ..... اطلق والدها عليها هذا الاسم لولائه الشديد لمدينة كسلا التي تعلم بها وعمل بها استاذ لغة عربية للمرحلة الثانوية ....
لطالما مجد ذاك الجبل الشامخ الثابت منذ مئات السنين .... جاءت الى الدنيا بعد انتظار من والديها دام لثلاثة اعوام كانت الاولى والاخيره لهما فلم يرزقا بعدها بأي اطفال .
احسنا تربيتها ..... فكبرت جميلة وبأخلاق اجمل .
ورثت جمالها المؤصل من والدتها وورثت الحكمة وكرم الاخلاق من والدها .
امتازت ببشرة نقية بين السمراء والبيضاء ..... وجه بيضاوي بملامح ناعمه .... عينان متسعتان حولها رموش كثيفة تشابه عيون المها ...انف قصير حاد.... فم مكتنز .... وغمازاتان غائرتان بعمق في خديها .... شعرها كشعر الغجريات .... اسود لامع وطويل يصل الى نهاية خاصرتها .... امتازت بقوام طويل .... اذ ان طولها قد وصل المئة وسبعون سنتمتر ..... خصر ضامر وبطن مسطح وارداف ممتلئة .
كانت تحرص على الملابس التي تستر تفاصيلها المثيره .... فقد ربتها والدتها على الحشمه ..... اجل ... كانت محتشمه في ثيابها وكلامها .
اكملت عامها الثاني والعشرون قبل ثلاثة اشهر ...
كانت مثال للفتاة القروية التي تعشق الارض .... لطالما عظمت هذه الارض التي عاشت عليها منذ ولادتها .... تعشق ترابها ولا تتحمل اي مكروه يمسها او يمس اهلها .....
امتازت توتيل بذكائها وقوتها .... فهي ليست من نوع النساء الضعيفات.... تمردت على قواعد قريتها ورفضت الزواج من ابن عمها الذي يكبرها بخمسة اعوام .... لانها لا تحبه .... كان والدها دوبلماسيا جدا في تعامله معها ويحترم كل قراراتها ..... بعكس والدتها التي تتبع ملة النساء التقليديات اللاتي كل م يهمهن هو زواج بناتهن فحسب وتؤمن بالحب بعد الزواج .
الا وانها وبالرغم من هذا كانت تحب ابنتها حب جما .
استمتعت توتيل بصنع الشاي باللبن المقنن واللقيمات .
عندما وصل والدها رحبت به ووضعت امامه عدة الشاي وصحن اللقيمات .... كان هذا روتينها اليومي وبالرغم من انه روتين لم يبخل عليها والدها بكلمات الشكر والدعوات الصادقة .... امسك بيدها واجلسها بجانبه لتشرب معه الشاي وتناقشه في بعض مواضيعها .... قليلا حتى انضمت لهم الوالده .
ما ان انهوا الجلسة الرائعه حتى حملت توتيل " الصينيه "
وتوجهت الى المطبخ لتغسلها فورا ..... وبعدها توجهت نحو الحوش وقامت بكنسه .
انفتح باب المنزل لتدخل سيدة المبلمه بثوبها : هيااا توتيل
رمت مقشاشتها : بسم الله الرحمن الرحيم يا بت مالك .
فكت التوب من وشها : م سمعتي الخبر ?
_ خبر شنو ان شاء الله خير .
_ احمد جاي راجع من السيعودية ... قالو جاي يخطب .
ضحكت وهي بتكمل قشها : اها دايرة تكوني تبع البنوت المنتظراتنو .
لوت خشمها : بري يا يمه انا زاتي م دايراه .
_ سيدة 😏.... بتكضبي على منو يا بت امي .... مكسره فيه كسير اتلقيك ميته على جيتو
سيدة بضحكة محرجة : هيا بت م للدرجة دي ... عاد الحمدلله بقيتي اختو بالرضاعه ولا كان هسه فطانا كلنا .
_ حتى لو م اختو بالرضاعه م كنت بعرسو
_ لاقية نفسك سمحه عشان كدي بتفتري على الرجال 😏
_ م عشان كدي .... لكن انا عايزة اعرس لي زول اكون عايزاهو ..... اكون بدورو عشان حعيش معاه عمري كلو لو ربنا امد بالاجال .
_ غايتو لو بتحضري زي الوان كان اقولك دا من زي الوان.... لكن المصيبة م بتحضريها يا بت بتجيبي الكلام دا من وين ?
_ دا كلام منطقي ياختي .... ودا حق من حقوقك ف الدنيا دي .
_ اها وكان م لقيتي زول تحبيهو
_ ربنا كريم وقتها
_ غايتو عليك جنس فلسفة يا بت امي .... المهم .... الليلة عرس سعيدة جايا ?
_ اكيد جايا .... بالمره افرق شوية .
سيده بهمس : قال ليك زينب بنت خالتها زعلانه زعل دايرة تطق.... العريس ود اعمهن الاتنين .... وكانت دايراو ليها .... م شفتيها بقت عامله كيف لاقيتها امس المغربية في بيت العرس ..... بقت بيضااااا اظن لي انفسخت .... ووشها دا قدر الضربة شكلها بلعت ليها حبوب .
_ سيدة 😑.. القطيعه دي بتجيب اجلك مالك ومالا ... م ناقصين ذنوب .
جات إقبال ام توتيل وسلمت على سيدة سألتها : امك في ولا مرقت ???
_ لا لا قاعده
_خلاص انا ماشا اصبح عليها .
_ سمح
طلعت وقفلت الباب وراها .
توتيل خلصت قش ودخلت جوه لي بيتهم البتكون من اوضتين وبرنده وصالون للرجال وسيدة دخلت وراها
سيدة : توتيل ?
_ اها خير
_ نفسي في منقا خدرا من الشجر القريب من البحر .
_ بتتوحمي 🙂?
ضربتها في كتفها : اي بتوحم 😒... ارحكاكي معاي .
_ خلاص اضاير البيت اول شي 😂
( نوع توتيل الجنها نضافة ومضايرة دي اي ام سودانيه عايزة بتها تكون زيها 😂)
_ كويس انا زاتي بساعدك 😁.
ضايرو الاتنين البيت وبخرو ولفحو تيابهم وطلعو .
اول م مشو كدا شوية لاقاهم عباس .... دا ولد عم توتيل العايز يعرسها وهي مابياه.... النوع الشنبو لي جضمو داك وحااااااار سم .
اول م شافهم طلعو جاهم .
مشا يدو في شنبو : على وين آ بت العم ?
سيدة بخوف :ازيك آ عباس .
عاين ليها بطرف عينو : عال العال
توتيل عاينت ليه في عيونو : ماشا مشوار
_ اي وين يعني ?
_ جناين البحر
_ ودايرة شنو من جناين البحر ?
_ عايزة منقا يا عباس منقا 🙂
_ لا م تمشي البحر بجيبا ليك انا
_ لا شكرا م عايزاك تجيبا لي انا عايزة امشي البحر
سيدة وهي بتشد ليها يدها وبتقول ليها بهمس : توتيل ارح نرجع البيت خليت المنقا م دايراها 😢 ( كر علي )
_ حرم م بتمشي يا مرتي
_ عبااااس .... انا م مرتك ولا حكون في يوم مرتك عشان كدي الجمله دي م تقولها لي تاني ..... هسه انا ماشا عشان كدا زح من قدامي .
_ لي م عندك رجال تسمعي كلامهم .
_ يا الله الخلقت النااااااس ...... انت عايز مني شنو ياخ ? انا كل مره بمشي وامي وابوي عارفين تاني م تجي تصدعني عليك الله .
طبعا توتيل بتكره عباس دا كررررره العمى خصوصا انو بيتلايق فيها وبتعولق وهي م عايزاه بس هو م بفهم .
مسكت يد سيدة ومشت وخلتو واقف يعاين ليها ويبرم في شنبو ..... ضحك ضحكه كريهة وهو بقول : سمح آ بت العم .... بس مصيرك تكوني مرتي وام العيال في يوم .
سيدة من الخوف شغالة كلها ترجف : هيا توتيل هسه كان قطع فيك كف .
_ لي يقطع فيني كف وبي صفتو منو ? والله الا اقطع ليه يدو كلو ولا الحقارة .... بنت الطيب ماف زول بقل ادبو عليها .
_ والله يا توتيل مسكتني رجافة 😭
ضحكت وهي بتقول ليها : ها الخوافه امشي ساي ماف شي عباس وطار مننا .
مشو الجناين القريبة من البحر و وقفو قدام شجرة منقا كبيييييييره .
سيدة : كان ننادي معانا واحد من الشفع عشان يجي يطلع لينا .
توتيل ضحكت بشقاوة وهي بتتلفت حولينها : طالما اني موجوده ماف حاجة للشفع .
لمن اتأكدت انو ماف اي زول ملصت توبها ...... كانت لابسة ليها قميص عادي وفجأة اتشعلقت في الشجره .
سيدة ختت يدها في خدها : يا بت انزلي م يكون عباس متابعنا يجي يلقاك بمنظرك دا بقتلنا يا توتيل 😭
_ اسكتي خليني اجيب ليك المنقة الخدرا المرقتيني عشانا
(سيدة مثال للصحبة الخوافة وبتتجرس من اي شي 😂)
في الجهة التانيه من الجنينه كان ماشين شابين ... واحد ساكت والتاني بتكلم بي سرعه : جدك الوصية بتاعتو واضحه م عايزة ليها اتنين تلاته .... ودا الحل الوحيد عشان تكون وريث رسمي .
_ م قادر اصدق انو عمل كدا
_ دا في نظرو الحل الوحيد عشان تكون ملتزم
عاين ليه بغيظ : كان في ستمية حل غير دا .... واعتقد انا في شغلي م مقصر ابدا ..... اما بالنسبة لحياتي ف دا شي شخصي وشي راجع لي انا براي .
_ ميكال .... الحصل حصل .... هسه بس المطلوب وصية جدك تتنفذ و ....
قطع كلامو لمن المعاه اشر ليه عشان يسكت ...... سكت وعاين على الاتجاه البعاين فيه صحبو .
شاف بنت اجمل من جميلة طالعه في شجره .... بي قميص عاملا زي الطفله... والهواء اتكفل بي انو يفك ربطة شعرها .
حسا نفسو كأنو في فيلم .
عاين لي صحبو ... لقاه بعاين ليها ببرود وفي ابتسامه صغيره في خشمو ... م قدر يفمها
كأنو مستنيها تقع .
رجع يعاين للبت ... بقت بترمي في المنقا في الارض وصحبتها بتلمها في توبها ... لحدي م في النهاية وقفت بقت بتعاين بعيد .
سيدة : يا بنت مالك انزلي خلاص
_ سيدة .... شايفة لي كراكات وعربات واقفة بعيد
_ كراكات شنو ?
_ الكراكات الواحده .... ياربي في شنو ?
_ اكون عايزين يحفرو شي او كدا .
ظهر القلق في وش توتيل وهي بتنزل تحت وتلم شعرها وبعدها لبست توبها بسرعه : قلبي م مطمن ارح نرجع سريع
مسكتها من يدها وطلعو على جهة بيتوهم وم انتبهو للشابين الكانو متابعنهم من البداية .
_ ميكال ... القرية شكلو كدا بناتها قاطعاااااات من السماحه.
_ قاطعات ولا ما قاطعات مصيرهم كلهم يتكشو .
واتوجهو على الناحيه التوتيل شافت فيها العربات .
مشو حكاية 10 دقايق وصلو بيوتهم الجو كان مغيم والهواء باااارد وحلو ....
دخلو البيت ومشو على جهة المطبخ ... سيدة ختت المنقا في سبت وعاينت لي توتيل : الملح وين خليني اقطعها .
اشرت ليها بي يدها عليه من دون م تتكلم .
سيدة جرت ليها بمبر وبقت بتقطع وتوتيل اتكلت على الحيطه وبقت بتعاين ليها .... فجأة سمعو ليك صوت رجه وجوطه بره .
سيدة الصحن وقع منها .... وختت يدها في قلبها : سجمي .... م تكون حبوبة ام الحسن ماتت .
جرو الاتنين وطلعو برا لقو رجال الحلة واقفين ليهم مع زول وهايجين .... توتيل اتخلعت لمن شافت الكراكات والعرباات الشافتها قبل شوية واقفة .
مشت على جهة واحدة من النسوان وسألتها : في شنو ?
_ بري يا توتيل يا بنتي علمي علمك .
توتيل شافت ابوها واقف وبتكلم ليه مع شاب .... وظاهر فيه الانفعال .
الطيب ( ابو توتيل ) : كيف يعني نمرق من بيوتنا عشان تكسروها ? انت اسمك منو ?
_ انا اسمي وائل .... وانا جيت وريتكم بالحسنه ... عشان الارض دي كللللها لحدي الجناين الهناك دي م حقتكم بقت
_ يا ولدي الكلام دا م منطقي .... عايزين الناس تطلع وين من بيوتها العمرت فيها بالسنين ? وكيف الارض م حقتنا ? كان م حقتنا حقت منو ?
_ شنو المامنطقي بالضبط ? انا المطلوب مني اني اجي اوريكم ..... لو صحي الارض دي حقتكم جيبو اي شهادة تثبت بي كدا .... الارض حاليا ملك السيد ميكال ياسر عبد العظيم .... حيعمل فيها مشروع زراعي ومشتريها بي الاف الدولاراااات مش جنيهات دولارات يا استاذ ..... على العموم الكراكات دي حتقيف لي اسبوع ودي مهلة كافية جدا تشوف ليكم مكان ترحلو فيه .... او م عايز اوريك الحيحصل شنو لانو م حيسرك .
الطيب سكت بلا حول ولا قوة منو وبقا بعاين لي وائل بعدم تصديق ..... جاهو صوت بيعرفو كويس .... كان صوت توتيل قبل عليها .... لقاها واقفة وشايلة ليها حجار في يدها ..... قالت ليه بصوت عالي : امشي قول لي سيدك دا م طالعين .... والارض دي هلتنا احنا ..... سواء دفع دولارات او غيرو ..... واطلعو انتو وكراكاتكم دي من هنا لا اهلا ولا سهلا يلا .
وائل عاين ليها واتذكر انها البنت الشافوها ف الشجره : انا هنا بتكلم مع الرجال يا انسه لو سمحتي م تدخلي .
خلص جملتو دي بس فجأة يحس ليك بالحجر في جبهتو للللللب 😂
ظهرت الشراسة في وشها : وبنات الرجال برضو ليهم كلام معاك .
وفنت الحجر التاني جا طاير في قزاز العربية شققو كلو .
الشفع والوليدات الواقفين معاها عجبتهم الحركه وكلهم لقطو ليهم حجار .... وانهالت الحجاره بغزارة وقسوة على العربات ..... لي درجة اتحركو كلهم بي سرعه .... و وائل ركب عربيتو ولحقهم .
( حربية يا توتيل حربية حربية حربية )
الناس كلها بقت بتعاين لي توتيل المشت على ابوها : ابوي .... م حنطلع ليهم مش ? م بنمرق ونخلي بيوتنا دي ليهم بعد السنين دي كلها .
لاول مرة ابوها م يرد عليها ..... سكت منها وقال للناس : خلاص ارجعو بيوتكم .... وفعلا النساوين كلهم دخلو .
ختا يدو في كتف بنتو : انتي برضو ادخلي .
م اتناقشت معاهو طوالي دخلت وعقلها بيودي ويجيب .... فضلو الرجال بس في الشارع .... وجوا عند النسوان الاشاعات والكلام الكضب بدا يطلع .
الرجال مشو الديوان حقهم البجتمعو فيهو .
الطيب : الناس ديل انا متأكد حيرجعو تاني .... م حيخلونا .
عباس : عمي لكن الارض دي م حقتهم
_ شنو البثبت ? ديل ناس شهادات بحث .... واحنا م عندنا .... وبعدين قال ليك مشترينها ..... انا متأكد حيجونا راجعين .
__________________________
علت نبرة صوتو بغضب : نعم ? بنت ? بنت تطردكم انتو كلكم ? م بتخجلو من نفسكم ?
وائل : فلقونا بالحجار .
كان خاتي يدو في جبهتو .... ميكال مشا عليه وزحا يدو من جبهتو وشاف الجرح العميق : خليك ضاغط على الجرح لحدي م نشوف ليك اي مستشفى ..... اما الجماعه ديل فسيبهم علي .
مشو اقرب مدينه من القرية وودو وائل المستشفى وخيطو ليه الجرح ....
الساعه كانت 2 ضهر لمن صوت عربات الشرطه وصل لي اهل القرية .... وتاني الناس كلللها اتلمت .
اتخيلو بس جو عشان يقبضو على توتيل عشان فلقت وائل .
ابوها وقف ليهم : هي م عملت شي يا حضرة الضابط دا انا ... انا الفلقت الولد .
الضابط كان بتكلم بي فظاظة : طالما اعترفت
بنفسك خلاص... اشر لي العسكري عشان يرفعو .
وفعلا رفعوه .
وخلا الناس مهجومه ومخلوعه .
توتيل بكت جنس بكاء على ابوها وبقو بطمنو فيها على انو حيطلعوه .
عباس : شفتي يا بت العم ? شفتي ? شفتي عملتي فينا شنو ? ابوك انسجن بي سببك اتي دي
قالت ليه وهي بتبكي بي حرقة : عباس .... اختاني يا عباس هسه .... م ناقصة اسمع صوتك دا .
قال ليها بغضب : لمضاتك وطولة لسانك ديل بطيرهم ليك لمن اعرسك .
_ والله كان انطبقت السماء على الارض وبقيت انت اخر راجل في الدينا دي م اعرسك يا عباس .... حرمان علي حرم مكه على الكفار .
رفع يدو وكان داير يديها كف ..... لكن امها مسكت ليه يدو : عباس ...... داير تضرب بنتي وقدامي يا عباس ? لقيت ابوها ساقوه طوالي عايز تدقها ..... م كان ولا حيكون البمد يدو على بنت الطيب .... بقطعها ليك يدك دي يا عباس اوعااااا تمدها على بتي .
الناس بدو يهدو فيهم ويقولو ليهم انعلو الشيطان خشا بينكم ....
شوية كدا الكراكات رجعت تاني ....
الشرطي الجا معاهم قال ليهم بأسلوب يخلو من الذوق : هوي معاكم تلاته ايام طلعتو خلاص م طلعتو البيوت بتتكسر يعني بتتكسر ..... وقت م مرقتو بالذوق استحملو .
عباس : لكن هسه قالو لينا قدامكم اسبوع
_ والله المالك قرر كدا ..... انو عايزكم تخلو المكان في ظرف 3 ايام بس .... الارض ارضو وبقروشو ماف زول بقدر يتكلم .
اهل القرية كلهم بقو مبلمين وساكتين .... م عارفين يعملو شنو .
توتيل انتظرت الناس كلها بعد خشت وكمية كدا من الرجال مشو على ابوها في القسم .... ساقت سيدة و ولد من الاولاد .
ومشت لي ناس الكراكات وسألتهم من الزول الاشترا الارض دي .... طبعا كلهم اتلبشو لمن شافو وشها .... اتلبشو من سماحتها واتلبشو عشان عرفو انها دي هي الفلقتهم 😂 .
واحد بس وراها انو اسمو ميكال وانو رجع الخرطوم .
سيدة وهي بتشد على يدها : توتيل الله يرضى عليك خلينا نرجع .... اهلنا كان عرفونا بقتلونا ....
توتيل : سيدة .... ميكال دا لازم نوصل ليهو .
_ واها كان وصلنا ليهو حنعمل شنو مثلا .
_ انا بتكلم معاهو ... بقنعو .... بقنعو بي انو م مفروض يطلعنا
_ توتيل كدي نرجع البيت اول شي ونكمل كلامنا هناك النبي فيك خلينا نرجع .
_ ماف وقت يا سيدة قال قدامنا 3 ايام بس .... لازم نوصل ليه ولا عايزة تبيتي في الشارع ?
فجأة سيدة بقت بتبكي : يا الله دي بلوة شنو الوقعت فينا دي لا حولا ولا قوة الا بالله .
_ م تبكي يا سيدة .... م تبكي .... الله في ... والله فوق كل ظالم .... ان شاء الله م بحصل شي .
رجعو التلاته على بيوتهم .... والليل حل وماف زول غمضت ليه عين .... توتيل تعاين لي سرير ابوها وتبكي قدرتها كانت خاتا راسا في حجر امها .
لحدي م الفجر طلع .....
وصحو بخبر نهائي م حلو ..... الطيب لصقو فيه كم تهمة .... وهو برييييئ وحتتعمل ليه محاكمه .... طبعا دا كلو مغصة ليهم بس .... احساس م تلعبو من الكبار ... وللأسف حالتو الصحية فجأة اتدهورت واضطرو يودوه المستشفى .
توتيل وامها وسيدة وعباس مشو ليه في المستشفى ...... كان تعبان شديد والسكري بتاعو مرتفع شديد .
الدكتور : صراحة لازم يتحول لي مستشفى في الخرطوم .... لانو هنا ماف اي امكانيات لي علاجو ..... والعلاج شوية مكلف هناك.
عباس : يعني محتاجين كم يا دكتور ?
_ والله محتاج يرقد عناية ودي اليوم بي مبلغ وقدرو يعني محتاجين قرابة ال30 مليون عشان تكفيكم الكم يوم ديل
كان المبلغ كبير بالنسبة ليهم وهم ناس على قدر حالهم .
عباس لي اقبال : الله يشفيك يا عمي ..... كل زول حيدفع البقدر عليهو وان شاء الله ماف عوجه بتجيه .
اقبال : حتى لو دفعو 30 مليون دي نرجعها ليهم كيف بعدين ? القروش دي كتيرة شديد .... غايتو الحمدلله على كل حال .
عاينت للدكتور : ممكن ادخل اشوفو يا دكتور ?
الدكتور : اتفضلي لكن حاولي بقدر الامكان م تزعجي .
_ طيب .
دخلت وسابت سيدة وتوتيل وعباس وراها .
عباس : ان شاء الله مبسوطه يا توتيل دا كلو بسببك .
_ كويس يا عباس .... كلو بسببي تاني في شي ? عليك النبي انا تعبانه .... اختاني ياخ .
سيدة وهي بتطبطب عليها : تعالي يا توتيل نشوف لينا مكان نقعد فيه.
طلعو برا ...... توتيل دموعها جرت : سيدة ابوي بضيع مننا يا سيدة القروش دي نجيبها من وين ?
_ الله كريم يا اختي فوضي امرك لله .
غطت وشها بيدينها ودنقرت راسا .... وفضلت على الحالة دي لوقت طويل قبل م ترفع راسها : انا لازم اوصل ليه لازم
_ منو ?
_ ميكال دا
_ هي تلقي وين يا توتيل وتسافريلو كيف ومنو البخليك ?
_ بلقاهو بعرفو شغال وين وبمشي ليه .... وعشان اسافر انتي حتساعديني
_ واي يا توتيل وكان انكشفتي ? عباس بضبحك شخخخخ
_ احححححي يا سيدة الوجعه وجعتي انا ..... والوقع فيها ابوي انا 💔.... عباس البو ان شاء الله م خايفة منو .
_ انتي بتفكري في شنو يا توتيل .
_ بوريك بس اول شي توعديني انك حتساعديني
_ طيب بوعدك
توتيل رجعت لي امها : امي ... انا وسيدة حنرجع حيرجعنا عباس وبجي راجعه وبجيب ليك معاي كم هدم كدا
_ كويس يا بنتي امشي الله يغطي عليك .
رجعو بيتوهم .... توتيل ودعت سيدة بعد م شالت ليها شنطتين ... شنطه ختت فيها حاجات امها ومعاها قروش ... والشنطه التانيه ختت فيها جزلانها وشوية قروش كدا .... ولبست ليها عباية وطلعت .... عباس رجعها المستشفى لي امها وعملت نفسها حتقعد معاها ..... استنتو لحدي م فات وجرت على موقف البصات .. اشترت ليها تذكرة للخرطوم وركبت ....
قعدت على جهة الشباك واول م البص اتحرك دموعها جرت وهي بتفكر في حالهم الاتقلب فجأة .... وابوها التعبان واحتمال يضيع من يدهم وم عندهم حتى حق علاجو .
كانت خايفة من المجهول الحيواجها في مدينة الخرطوم ...
لحسن حظها انها قرت الجامعه فيها .... وكانت عارفة المواصلات كويس .
اول م وصلت الميناء .... فتحت شنطتها وطلعت الورقة المكتوب فيها العنوان الحتلاقي فيه ميكال دا .
___________________________
في مكان تااااااني خالص .
في مكتب فخم جدا وعصري ..... قعد وائل ف الكنبه وراسو ملفوف بي شاش وهو بعاين لي مديرو القاعد على طرف المكتب وبيتكلم : الله يرحمك يا جدي لكن العملتها فيني م حصلت .
_ ميكال لازم تسرع قدامك شهر بس والا سيف ولد عمك هو الحيمسك الادارة بدلك .
ختا يدو في جبهتو وهو بيهز في راسو بعدم استيعاب : ياخ انا م عايز اعرس .... م عايز احصر حياتي في بيت ومرا ... عايز اعيش حياتي كدا .... free .... اجي القى جدي كاتب في وصيتو انو انا لازم اتزوج خلال شهر وزواجي م يكون اقل من سنه عشان اقدر امسك ادارة الشركه دي .
وائل وهو ببلع ريقو : شايفك م مسؤول ودي الطريقة الوحيده عشان تكون قدر المسؤولية .... وبعدين يا ميكال يعني انتي ماشاء الله قفلت 33 سنه تاني شنو ? عرس ساي وربنا يبارك فيك وتنتهي القصة دي
_ انا لو عرست حطلقها طوالي بعد السنه دي .... وحديها قروش .... وعفى الله عما سلب انا اكون مسكت الادارة وهي طلعت ليها بقروش تأمن ليها مستقبلها .
_ اللهم بس تعرس هسه .
مسح وشو بيدو : هسه القى لي عروس وين
_ حاول اتذكر واحدة من البنات الكنت مرتبط بيهم .
_ تصدق لو قلت ليك اسمائهم زاتا م متذكره.
وائل بي تأفأف : حتتذكر اسمائهم كيف اذا كنت اسبوعيا بتكون عندك علاقة بواحده جديدة 🙂.
هز كتفو : بي حقي
_ اوكي يا معلم وهسه بحقك لم ليك في عروس
_ ياربي القاها وين وبعدين حتوافق لو عرفت اني حطلقها بعد سنه
_ م تكلمها بالنقطه دي
_ لا لازم تكون عارفة عشان م تتعلق بي وبعدين تتخلع وتتبكى لي وحركات النسوان دي
_ م بتبكي عليك الا البتحبك
_ هه 😏... ديل عندهم قدرة رهيبة على الغش دموع التماسيح دي اسهل شي عندهم
وائل وهو بهز راسو : راسي دا لااافي
_ عاين انت ارجع بيتك بعد دا احسن ترتاح شوية من الحجر الجا ف راسك دا .
_ م تذكرني عليك الله بنت اللذينه الفلقتني دي .... تخيل دي نفس البنت اللقيناها معلقة ف الشجره ?
ميكال : ظاهر عليها ف وشها انها م هينه ... لكن يلا كلها يومين ويترمو ف الشارع زي الكلاب .
في اللحظات دي توتيل وصلت الموقع حق الشركه ...
وقفت بي دهشة قدام المبنى الزجاجي الضخم وقرت الاسم (عبد العظيم الشرقي للإستثمارات )
بي حركه غير ارادية كرفست الورقه ومشت على الباب الزجاجي ... لكن وقفت بصوت واحد من افراد الامن : يا استاذة على وين ?
بلعت ريقها قبل م تقول : عايزة اقابل ميكال
_ عندك موعد مسبق ?
_ لا
_ اسف م بقدر ادخلك
قالت ليه بترجي : عليك الله .... عليك الله لازم اقابلو الموضوع طارئ وضروري .
_ يا استاذة قلت ليك ماف طريقة تقابليه بيها انتهى الكلام بالله عليك الله امشي من هنا .
لا اراديا الدموع رقرقت في عيونها لمن حست بالاهانه لكن مسكت نفسها عشان م تبكي : يا اخ عليك الله ساعدني بس اشوفو واوعدك حمشي طوالي
_ عايني يا بنت الناس لو م مشيتي من هنا والله اضرب لي ناس الشرطه يجو ارفعوك ..... اتفكفكي ياخي م توجعي لينا راسنا .
_ عاينت ليه بي انكسار ... وفجأة لفت نظرها وائل الجا طالع ..... اتناست انها عملت فيه شنو ونادتو بصوت عالي يا استاذ يا استاذ .... اتلفت عليها ... اول م شافها بحركة لا ارادية ختا يدو في راسو : انتي تاني ?
السكيورتي : طلبت منها تمشي حضرتك بس ابت .
وائل : عايزة شنو ?
قالت ليه بي اصرار : عايزة اقابل ميكال
_ قصدك السيد ميكال ?
اتمالكت اعصابها وهي بتهز ليه راسها .... كانت عايزة تقول ليه سيد عليك انت لكن بلعتها.
عاين ليها من فوق لي تحت وقال ليها تعالي وراي .
حمدت ربنا وهي بتمشي بي وراه قبل م تعاين لبتاع السكيورتي بنظرة انتصار.
Cut 🙊
نشوف بكره حيحصل شنو
نهاية الحلقة الاولى
