#القروية_والوحش9
الطيب ابو توتيل صحا من نومتو بصوت توتيل وامها.... اول م شاف بنتو البحبها وشو نور من الفرحه واللون الباهت الكان فيه زح 💜.
مشت ليه وهي مبتسمه...مسكت يدو وباستها ليه.... وهو بيدو التانيه مسح على راسها.
_ كيفك يا ابوي ان شاء الله طيب
_ طيب بشوفتك يا بتي.
اتحول ببصرو للشاب الواقف جمب الباب : اتفضل اقعد يا ابني.
ميكال جا عليه : سلامتك يا حاج
_ الله يسلمك ان شاء الله.
اقبال( ام توتيل ) سلمت عليه.
قعد شوية واستأذن منهم وطلع بره.
توتيل كانت قاعده ف السرير جمب ابوها.
اقبال : يا بتي انقطعتي الكم يوم ديل وين ؟
_ والله يا امي م كنت عارفة ليكم درب 😣 ميكاال م وراني انتو ف ياتو مستشفى
_ عاذراكم يا بتي انتو ف النهاية عرسان.... اها وريني هو كيف زول كويس ونسابتك كيف ؟
_ الحمدلله ناس طيبين وكويسين وهو زاتو زول كويس شديد.
_ الحمدلله يا بتي الله اداك على قدر نيتك.
_ الحمدلله 💔... وانتي يا امي الايام دي قضيتيها كلها ف المستشفى.
_ اي يا بتي... وزاتو خلاص ابوك قرب يبقى كويس ماشي كويس ف العلاجات م بناخد وقت طويل ونرجع البلد تاني....
_ ان شاء الله ربنا يقومو بالسلامه.
قعدت وقت طويل اتكلمت مع امها واتونست معاها لحدي م نبهوهم انو وقت الزيارات انتهى.... توتيل ودعتهم وطلعت برا.
ميكال كان قاعد ف العربية.... وعيونو مركزة مع الطفل الصغير الهزيل الشايل مناديل وبحاول يبيع فيها.... كان مركز معاو لدرجة م انتبه لتوتيل الفتحت الباب وركبت.
بعد شوية انتبه من شرودو وعاين ليها.
كانت منزلة عيونها وقالت ليه : شكرا.
اتحرك وهو بقول : على ؟
_ لانك جبتني لي امي وابوي
_ اهااا.... لا العفو.... بس انا جبتك ليهم عشان تاني م حتشوفيهم
_ ن نعم ؟ كيفن م حشوفهم ؟
_ م قادر اشرح ليك المهم بس تاني م حتشوفيهم عشان م تقعدي تبريني ف الدخله والطلعه بي بدور اشوف اهلي .
سكتت شوية : يا ميكال
_ اها
_ عاين.... بما انو انا وانت اصلا كدا كدا زواجنا على ورق وانت عايزو عسان يوصلك لي شي وتقريبا كدا وصلتو فشنو رايك انو تخليني امشي.
_ كيف يعني
_ يعني انا ارجع لي اهلي وانت على اساس انك مسافر وانا جيت اهلي وبس.
_ بالمناسبة زواجي منك دا م عشان اوصل بيه للعايزو وبس ... لا كمان عشان اسكت بيه الناس الحشريين وحبوبتي.... ف طلبك مرفوض و اياك تقترحي علي طلب زي دا تاني.
_ لكن انا ابوي عيان ومحتاج لي هو وامي
هز كتافو : اها وانا مالي ؟ دخلي شنو ف النقطه دي.... دا م شي بيهمني كتير.... كلها كم شهر وتمشي ليهم وتشبعي منهم
كانت بتعاين ليه بذهول وهو بينطق بكلماتو القاسية : حسبي الله ونعم الوكيل.... انت لي كدا ؟؟؟؟ لي بتعمل كدا وبتستفيد شنو لمن ترمي كلامك البسم البدن دا
_ والله دا انا كدا واسلوبي كدا فتتقبليه م تتقبليه دي مشكلتك.
_ ربنا يكمل السنه دي سريع ويرحمني منك ومن لسانك.... خسارة الاسم فيك... ميكال دا اسم ملاك مذكور ف القرآن لكن انت اعوذ بالله اسوأ من الشيطان.
ضحك بصوت عالي : اوكي تمام.
فضلو ساكتين الاتنين لحد م وصلو.
توتيل طلعت فوق طوالي غيرت هدومها وقعدت ف الكنبه.... كانت زعلانه شديد من مطاعنات ماما عشه بجهة ومن تصرفات ميكال بجهة.
التعب اخد حقو منها وغفت.
صحت بصوت الباب بدق... مشت بسرعه وفتحتو لقتها لجين.
لجين : صحيتك من النوم شكلو 😅
_ لا عادي ولا يهمك
_ الغداء جاهز انزلي
_ لا لا انا م جعانه
_ لا والله مستحيل تكوني م جعانه 🙁... عليك الله ارح
_ والله العظيم م جعانه... اكلت اصلا
_اكلتي ؟ اكلتي وين ؟
_ آ آ ميكال وداني محل واكلت
_ مممم خيانات وكدا 😂
_ اي 😂😂😂😂
_ عايزة اقول ليك شي
_ اتفضلي
_ مممممم... م تزعلي من كلام ماما عشه القبيل والله هي طيبه شديد بس بتجدع الكلام ساي من دون م تخلي بالها.
_ حصل خير 😊
_ م تزعلي طيب ؟؟؟
_ لا لا ماف اي زعل
_ بالمناسبة انا مسافره بورتسودان بكره الفجر
_ ربنا يوصلك بالسلامه ان شاء الله.
_ الله يسلمك حبيبتي 😍
_ وحترجعي متين ؟
_ حاخد شهر
توتيل جواها حست بالحزن عشان هي حتمشي تخليها... من م جات هنا ماف زول مهتم بيها ومحترمها زي لجين.
_ استمتعي 😍
_ ان شاء الله وانتي برضو استمتعي بالهني مون حقك 😂
_ ان شاء الله 😂
_ يلا م اعطلك.... عن اذنك
_ اتفضلي
وطلعت من شقتها وتوتيل قفلت بابها ورجعت لكنبتها.
فجأة الملل الذي لا يطاق حاصرها من كل جهة 😢.... فتحت التلفزيون وبقت بتتفرج.
لجين نزلت تحت للقاعدين ف السفره عشان ياكلو.
ماما عشه : اها وينا المحروسة 😒
_ قالت اكلت.
_ اكلت وين ان شاء الله ؟
_ مع ميكال
ميكال عاين ليها ببرود كان مستغرب لكن مبيعرفش يعبر بملامح وشو 😁
_ ممممممممممممم... خلاص اقعدي اكلي.
قعدت وبدو ياكلو.... بعدها ميكال طلع فوق اوضتو.
لقاها قاعده وبتحضر.
قال ليها وهو بيطلع ف ساعتو : قلتي اكلتي معاي!
عاينت ليه وم ردت.
اتوجه ناحية التلفزيون وقفلو : قلت ليك وم حكرر كلامي تاني حركات تجوعي نفسك وكدا دي م تعمليها لي هنا.... رب بعد تكملي سنتك اعملي العايزاه ف نفسك
غطت وشها بيدينها بلا مبالاة : وانا م جعانه.... وم عايزة اكل في مشكله ؟؟؟؟ لو سمحت خليني ف حالي
ابتسم باستهتار : اخر مره قلتي لي فيها كلام زي دا صوت بطنك وصل الشارع..... بطلي الدور الداخله فيه دا اتلقيك ميته من الجوع حركات البنات دي انا بعرفها.... ع العموم انا جبت ليك اكل حتلقيه ف المطبخ.
دخل شال ليه هدوم ومشا على الحمام.
توتيل حلفت ستين يمين كان تاكل شي منهم... قامت فتحت التلفزيون تاني وفضلت قاعده.
صوت تلفون ميكال علا... وميكال محكر ف الحمام والتلفون يشييييل ويضرب ويشششششل ويضرب.
توتيل ولا هوبت نحوه.
بعد مسافه كدا هو جا طالع من الحمام.... مشا على التلفون الكان لسا بيضرب ورد : الو
شوية نبرت صوتو اتغيرت : نعم ؟ شنو ؟
توتيل بقت مركزة معاه وبتعاين ليه.
_ اهدا اههههدا م تخاف اوكي تمام تمام انا هسه بوصلها.... اوكي تمام انت بس تعال المستشفى...ياخ م تخاف قلت ليك خلاص مع السلامه.
بلعت ريقها وهي بتقول ليه لا اراديا : في شنو ؟
شال مفاتيحو بسرعه : زوجة وائل بتولد وهو بعيد شديد من البيت... وهي ماف زول معاها.
_ ممكن اجي معاك ؟
_ اوكي بس اطلعي سريع.
لبست العباية الكانت لابساها وجرت بوراه.
ركبو العربية وقبل م يتحرك قال ليها : اربطي حزام الامان.
بقت بتتلفت تربطو من وين.
هز راسو وانحنى عليها..... كتمت انفاسها وهي بترجع بي ضهرها لورا عشان م يلمسها... ربطو ليها سريع واتحرك.
كان سايق بسرعه وبيتخطى ف العربات وعمال يشتم ف اي زول يعارض ليه 😂🙊.
وهي بس بالعه لسانها..... عاينت لي جنبة وشو.... كانت ملامحو بتعكس كمية من البرود الرهيب.
قبل عليها وهي طوالي رجعت بي بصرها قدامها 😂( توتيل تسترق النظرات 😂)
لحدي م ف النهاية وصل العمارة الساكن فيها وائل.
نزل بي سرعه وتوتيل نزلت بوراه.
وصل لحدي الطابق التالت وبقا بيضرب ف الجرس.
توتيل : هي كيف حتقدر تفتح الباب ؟
لثواني بدرت لي ميكال انو هي قاعده في سريرها وبتتوجع وبتبكي وم قادرة تقوم...وف الحالة دي الا يكسر الباب.
بس م الساعه التفتح ليهم الباب.
كانت لابسة ليها جلابية خليجيه انيقة وديك يا الحنه والتسريحه و الطرحه والمكيب الخفيف وشايلة شنطة حاجات البيبي.
توتيل وميكال بقو بعاينو ليها كدا : 😳
ابتسمت وهي بتقول ليهم : والله العظييييم انا كويسة وعارفة وائل حيكون قلقكم علي.... بس انا ضربت ليه لمن حسيت بي رفسات كدا وهو اتخلع وبقا ملبوش وقال لي حتولدي هسه معناها وانا حضرب لي ميكال يجيك وم اداني فرصة زاتو اتم ليه كلامي.
ميكال وهو بشيل انفاسو : وائل حسسني انك شوية وحتموتي نفسو قايم ويكورك قدرتو
_ معليش يا ميكال انت عارفو براك 😂.
ظهرت ملامح الم ف وشها وتاني زحت: خلاص بس وقت وصلتوني ودوني المستشفى... عشان دكتورتي قالت اجي.
ميكال : طيب يلا.
توتيل شالت منها الشنطه وساعدتها تنزل السلم.
ركبت ورا وتوتيل ركبت قدام وميكال اتوجه على المستشفى.
رضا( زوجة وائل) : ميكال.... بس معليش ممكن تسرع ؟
ميكال وهو بعاين ليها بالمراية :مالك ؟
_ بقت واجعاني شديد.... اسرع عليك الله 😭.
_ طيب طيب امسكي نفسك.
داس بنزين وفلاااا بيهم.
وصلو المستشفى وهنا زولتنا خلاص حالتها بقت صعبه.... وشها بقا شاحب وشفايفها بقت جافه وعيونها بقت واقعه.
قعدوها ف كرسي نقال وجرو بيها على غرفة التوليد.
ميكال وتوتيل فضلو قاعدين برا ف الاستقبال.
شوية كدا جاهم وائل مفحط لمن اتزحلق في السراميك.
ميكال : اهدا.... دخلوها غرفة التوليد اقعد من دون ولا كلمه ومتفهم اي شي انا 🙂
وائل وهو بشيل ف انفاسو : تعبت ؟
_ لا لا مرتك شجاعه م جرسه زيك.
توتيل : ربنا يطمنك عليها
_ امين يارب امين امين امين.
فضل يتحرك ماشي وجاي.... جاي وماشي.
ميكال قام وجا قعدو ف الكرسي : اهدا ممكن ؟
_ يا ميكال عشان انت م في مكاني ياخ.
_ طيب برضو اهدا البتعمل فيه دا م حيعمل شي استكين لحدي م طفلك يطلع.
_ طيب بحاول.
قال جملتو وهو بقيف على حيلو ورجع للحركه حقت يمشي ويجي تاني 😂.
مضى الوقت زي السنين الطويلة بالنسبة ليهم لحدي م جات الممرضة وهي شايلة البيبي وبتقول ليهم : مبروك عليكم الولد.
وائل وهو بعاين لي ميكال : ولدي انا ؟ انا بقيت ابو ؟
ميكال بي ابتسامه : اي بقيت ابو شيل ولدك
شال ولدو وهو بقاوم ف دموع الفرح العايزة تنزل وف النهاية غلبتو: هي... ازيك يا صغير 😍
قرب عليه وسما وكبر في اضانو
توتيل : الف مبروك يتربى ف عزكم ان شاء الله
_ الله يبارك فيك 💜.
ميكال مشا سبابتو ف خد البيبي الناعم : حتسميه منو ؟
_ حسميه على اخوي
_ ياتو واحد ف اخوانك
_ انت
_ حتسميه ميكال ؟
_ اي
ظهرت ابتسامه صادقة في وشو وهو بعاين لي وائل وبعدها اتحول بنظراتو للطفل وقرب منو وهمس ليه : نورت ياااا.... ميكال ان شاء الله تطلع احسن مني بي كتير.
لاحظ للابتسامه الطفولية المرسومه ف وش توتيل وهي بتعاين لي ميكال الصغير.
زي ابتسامة طفل صغير بعاين لي اخوه الجديد.
وائل : عن اذنكم انا حادخل لي رضا
قالو ليه الاتنين ف وقت واحد : اتفضل
وائل دخل بي ولدو لي مرتو وميكال وتوتيل فضلو بره..... اخدو وقت وبعدها دخلو لي رضا وباركو ليها.
قعدو معاهم لوقت لحدي م رضا طلعوها للبيت... وائل وميكال قعدو بره وتوتيل ساعدت رضا ورتبت ليها حاجات طفلها وعملت ليها اي شي هي عايزاه.
رضا : شكرا جزيلا ليك يا توتيل م عارفة من دونك كنت حاعمل شنو...انا اهلي معظمهم بره السودان والقاعدين بعيدين مني شديد عشان كدا م لقيت زول معاي.
_ العفو ياخ م تشكريني دا واجبي ولو احتجتي اي شي اضربي لي.
_ ماما بتوصل بكره ان شاء الله... عايزاك تجي عشان تشوفك لاني ححكي ليها بالعملتيه لي
_ ربنا يوصلها بالسلامه 😂.... خلاص طيب ان شاء الله بجيك.
المهم بعدها بوقت رجعو على البيت.
توتيل كانت طالعه السلم قدام ميكال فجأة حست الارض مهوية بيها وحاسا بدوخه شديدة وبطنها لافه زي الزول البدور شديد بعدها بحس بي لفه في راسو وبطنو.
مسكت ف يد الدرابزين حق السلم قوي عشان م تقع... وختت يدها ف راسها وبقت بتحاول تشيل ف انفاسها براحه براحه.
بس تاني طاقتها خارت وبقت م قادرة تقيف.... وهوت بجسمها لي ورا وهي م واعيه لنفسها.
ميكال كان اسرع منها واتلقاها قبل م جسمها يقع على السلم.
جرا راسها لورا وعاين لملامح وشها الشاحب.
هز راسو بغيظ وشالها بين يدينو وطلع بيها فوق وبي سرعه عشان ماف زول يشوفها ف الحاله دي.
قعدها ف اقرب كنبه وجاب صحن بتاع جبنه وبقا بيدخلها ليها ف خشمها بي لطف.
بعدها عمل ليها موية ملح بي سكر وسقاها ليها.
وشالها ختاها ف السرير وطلع ليها جزمتها وعبايتها وغطاها عشان م تبرد.
حيلها شد شوية.... جاب ليها صينية الاكل وعصير وختاهم قدامها وقال ليها بنبرة قاسية من دون مراعاة للحال الهي فيها هسه : قلت ليكي حركات الجوع دي م بتنفع هندا هسه هبطي.... اهتمي بنفسك ف السنه دي وللمره التانيه بعد م تخلص السنه دي ان شاء الله تقتلي نفسك م بهمني كتير.... لو حصل ليك شي زي دا تاني م تلومي الا نفسك...حركات الاطفال المدلعين دي بالله م تعمليها معاي 😒.... المره الجاية حخليك ف مكانك وامشي😒.... وبالمناسبة بعد بكره حنسافر ابقي جهزي شنطتك.... طلع وقفل الباب وراهو بقوة عكست مزاجو الحالي وخلاها وهي ف حالة يرثى لها.
نهاية الحلقة التاسعه
والله يا جماعه كان نفسي اكتب حلقة اطول
