#القروية_والوحش19
#قبل_الاخيره
🌸 انتحار اجباري
ميكال طلع فوق لي شقتو... استحم وغير هدومو....مشا رقد ف سريرو وهو بيفكر في موضوع العرس.
سمع صوت الباب فتح... عاين ليها وهي داخله.
استغربت لمن لقتو قعد وناداها.... مشت عليه بهدوء...اشر ليها على السرير جمبو دخل لي جوه شوية.
قعدت محل اشر ليها.
نظراتو كان دافية.... مدا يدو ناحية التوب المحجبه بيه راسها... جراهو ليها بلطف وهو بقول ليها بصوتو الخشن : احنا تقريبا اتجاوزنا المرحلة حقت تكوني مححبه قدامي دي صح ؟
ابتسمت بهدوء وهي بتزح خصلة من شعرها لي ورا.... شكلها كان كيوت 😭.... خصوصا مع غمازاتها البتظهر من اقل شي 😣🔥.
قلبها عمل فحفحفحفحفحفحفح لمن صوابعو اخترقت صوابعها 🔥.... وبي طريقه تلقائية باس يدها : شكرا
عاينت ليه باستغراب : على شنو ؟
ملامح وشها اتغيرت لمن قال ليها بابتسامه خبيثه : على يوم امس... تحبي نعيدو تاني ؟ ( تف )
جرت يدها منو ووقفت على حيلها وهي بترفع توبها ف راسها بطريقة خلتو يضحك بصوت عالي.
مسك طرف توبها بي حقارة : اقعدي
قعدت بعيد منو.... ختا يدينو ورا راسو : وشكرا تاني
_ اها وتاني على شنو 😒
_ عشان كنتي سبب في انو مزاج جوري يتغير 180 درجه.
_ بخصوص جوري.... اختكم دي محتاجه ليكم
_ كيف ؟
_ يعني انتو كلكم منشغلين عنها.... محتاجه زول معاها... يصاحبها... يتكلم معاها يشوف مشاكلها شنو.
_ مشاكل شنو كمان... الحمدلله م عندها اي مشاااكل
_ انت عرفت كيف ؟ م تحكم انو هي بتاكل وبتشرب وقارية جامعه معناها اني هي مبسوطه وفله.... حسسوها شوية بالامان...هي محتاجه عطفكم.
قال ليها بنبرة جادة وهو بيفكر : طيب تنصحيني بشنو ؟
_ ممممممممم 🤔... اطلع معاها واتكلم معاها واتونس وضحكها.
_ المشكله انا زاتو وقتي معظمو مليان ولو لقيت فرصة برتاح فيها.
_ اهم الشغل ولا اختك ؟
_ الاتنين مهمين.... الشغل من دونو انا حعيشهم كيف ؟ بعدين دي مسؤولية وامانه كبيره ف رقبتي.
_ طيب اخرب الروتين شوية.... مرة واحدة م حتخليك تعلن عن افلاسك... جرب بس
_ اطلع اوديها وين لكن ؟
_ بتسألني انا ف دي ؟ 😑
_ خلاص طيب بشوف لي حل
_ كويس 😊
_ عن اذنك ممكن تطفي النور عشان عايز انوم
_ سمح
قامت طفت النور ومشت بره.
شالت التلفون حقها وضربت للرقم حق ماجد..... ف البداية م رد عليها.... شوية تانيين رجع ليها.
_ الو
_ ماجد ؟
_ ايوه منو معاي ؟
_ انا توتيل زوجة ميكال اخو جوري.
الولد سكت( هرررررش)
بادرت هي بالكلام : لو سمحت عايزاك ف موضوع مهم لو فاضي.
_ اي فاضي.
_ بخصوص جويرية
_ طيب ممكن نتقابل ف مكان عشان نقدر نتكلم لانو الموضوع دا بالذات م حينفع فيه التلفون
اترددت لمسافه قبل م تقول ليه : خلاص طيب.
_ حددي الوقت
_ انا فاضية ف اي وقت اختار انت
_ طيب خلاص ممكن بكره زي الساعه 11.... ف كافيه........
_ تمام لي بكره
___________________________________________
صباح اليوم التالي :
ظهرت الفرحه ف وش ماما عشه بطريقة رهيبة : خبر السروووووور يا ميكال خبر السرووووور.... قلت لي حتعرس ؟ وكمان نور ؟ الف حمد و شكر ليك يارب .... واها حددتو متين ؟
قال ليها ببرودو المعتاد : اسبوع
_ اسبوع بكفي ؟
_ ويوفي كمان.
_ خلاص حتمشي تتقدم متين ؟
_ بكره
_ والما بتتسمى كلمتها ولا لسا ؟
_ لسا
_ كان مره تفتح خشمها.... حلااااالك يا ولدي وشرع ربنا الحلل 4.... وهي غارت وين من الصباح م شايفاها.
_ م عارفها
_ مالك قال بترد علي كلمه ورد غطاها كدا ؟ وبعدين م عارف مرتك وين ؟ 😒
_ بتكون مع لجين
ف اللحظات دي طوالي لجين جات وكانت بتتكلم ف التلفون... خلصت مكالمتها وقفلت.
ميكال : وين توتيل ؟
_ طلعت تقابل صحبتها
ماما عشه : دي صحبة شنو دي كمان البقابلوها الجمعه دي ؟ وظهرت فجأة كدا من وين ؟ وبعدين مالا قال يعني م بتستأذن من راجلا ؟ ولا هي سايبة
ميكال : م ورتك المحل وين ؟
_ لا.
_ طيب طلعت من متين ؟
_ يعني قبل ساعتين كدا.
_ مشت بشنو
_ خلتني اطلب ليها ترحال.
_ طيب اديني رقم بتاع الترحال.
ادتو الرقم وهو طلع.
لجين : هسه يا ماما عشه ف داعي تشعللي النيران ؟
_ يا بت نيران شنو كمان ؟ 😒.... كيف يعني تطلع من دون م تكلم راجلها.... خليه ان شاء الله يلطشها زاتو
_ بهيمه هي عشان يلطشها ؟
_ لجين 😒 م تتراددي معاي ف الكلام وانطمي... وبعدين ي السمحه اخوك وراك انو حيدبل ؟
_ يدبل ؟ كيف يعني يدبل ؟
_ يعني يجيب التانيه
ظهرت الصدمة ف وشها : كيف.... هو متين اصلا عرسها يا ماما عشه ؟
_ يا بت حقو الشرعي
_ شرعي شنو الماسكين بيها طرف المواضيع دي ؟ الشرع دا بس بتعرفوه في تحليلو للاربعه وم بتعرفو ف باقي الحاجات ؟ دا شنو القرف دا.
ماما عشه بي لوية بوز : هدااااك ليه امشي كلميه م تقولي لي انا الكلام دا.
_ اكيد انتي حيكون عندك يد ف الموضوع اصلا بتكرهيها وهي م اذتك
مسكت طرف توبها بطريقة مستفزة : بررررية.... اخوك برااااه قرر كدا... يلا م تتفشي فيني انا امشي ليه هو.
لجين قامت بغضب وطلعت فوق.
ميكال كان بيضرب لي توتيل كتير لكن م ردت عليه.... وهو دا اكتر شي بيكرهو يكون قلقان ويضرب لي زول كتير وم يرد عليه.
هنااااااك توتيل كانت قاعده مع ماجد.... ختت يدينها ف طرف التربيزة : طبعا انت لو كنت ف مكان ميكال ونفس موقفو ردت فعلك حتكون كدا صح ؟
_ انا م لايمو ف النقطه دي
_طيب لو انت عايز جويرية وبتحبها بالجد تعال اتقدم ليها
_ لكن... لكن انا لسا م كونت نفسي كويس بعد كم شهر يادوب حتن اتخرج
_ بالعندك تعال.... المهم بس تحسسهم انك بالجد عايزها.... وم تضرب ليها كتير لانو هي م حترد عليك... لانو ميكال حذرها من انها تتكلم معاك مهما حصل وهي م عايزاه يزعل منها تاني.
_ طيب يا توتيل انا حسمع نصيحتك وربنا يكتب الخير
_ ان شاء الله يارب.... انا حارجع بعد دا عشان اتأخرت
_ طيب اوصلك ؟
_ لا لا شكرا... برجع براي... يلا عن اذنك.
_ اتفضلي
فتحت شنطتها عشان تطلع التلفون وتشوف الساعه كم.... لقت 5 missed call من ميكال.
بلعت ريقها وكانت عايزة ترجع ليه لكن شافت العربية المابتغباها.
وقف قدام المحل ونزل القزاز.
وقفت لثواني قبل م تتحرك عليه وهي بتصلح ف حجابها.
فتحت الباب وركبت : اسمعيني كويس انا كرهتي ف الدنيا الوحدة تطلع من دون م تستأذن او تتكلم تقول انا طالعه... م بمنعك تطلعي لكن وريني قبل م تطلعي... عشان لو حصل اي شي او اتأخرتي اعرفك انتي وين.
_ انا اسفه بس
قطع كلامها لمن شاف ماجد طالع.... وبقا بعاين ليه وبعاين ليها : انتي جيتي هنا لي اصلا ؟
_ ك.... كان عندي موضوع مهم و
_ موضوع شنو دا ؟
_..............
_انتي كنتي قاعده مع الولد دا ؟
اشر على ماجد الاتحرك بعربيتو
حست انها وقعت ف كارثه 😭
بلعت ريقها بصعوبة : ا اي
سكت وهو بعاين ليها بنظرات م مطمنه.
ضرب الدريكسون بيدينو وهو بعلي صوتو : يعني طالعه من الصباح وبتقولي ماشا تقابلي صحبتك عشان دا ؟؟؟ وبعدين عايزة منو شنو ؟
_ انا جيتو بخصوص موضوع جوري.
_ وانتي مالك ومالو ومال جوري ؟ م تمثلي انك سفيرة السلام وخليك ف حالك.... وم تدخلي ف مواضيع زي دي.... والموضوع دا انا قفلت فايلو خلاص.
_ ميكال.... اول شي صوتك دا اياك تعلي علي تاني.... انا سكت كتير واتقاضيت عن حاجات كتيره... وانا م طفله ولا شافعه وبعرف نفسي بعمل في شنو... تمام ؟ فبطل البتعمل فيه دا.
_ اسمعي هنا... صوتي اعليه عليك وعلى اي زول يتعدى حدودو
_ اووووف... ياخ مع نفسك
_ دا ادبك ؟
_ اي ادبي.... وتاني لو سمحت ادبي وتربيتي واهلي ديل خط احمر ليك زي م انت عندك حدود انا كمان عندي حدود.... وم تتجاوزها.... والموضوع دا حارقك شديد عشان انت م عندك اهل صح ؟
( اتكلم وانت غضبان او معصب وحتقول كلام تندم عليه ليوم مماتك... عشان كدا امسكو نفسكم وقت الغضب وم تقولو اي كلام )
_ نعم ؟ انتي قصدك شنو ؟ ومنو اساسا الجاب سيرة اهلك.
بلعت ريقها وضربات قلبها زادت.... م عرفت دا شنو القالتو دا.
_ اسفة م
قاطعها وهو بيضحك : قصدك عشان امي وابوي متوفيين ؟
_ لا والله م قصدي شي
_ م تخربي المكان البديت اختو ليك
_ طيب وانت برضو م تخرب المكان الخاتاهو ليك
_ م حيتخرب
_ لي
_ عشان انتي بتحبيني.
_ يا سلام ؟ منو القال ليك بحبك ؟
ابتسم بسخافه : لو م بتحبيني م حتخليني اهوب ناحيتك.
_ هه عشان الحصل دا خلاص بقيت بحبك يعني ؟ م تعيش على الوهم دا بالله
_ اخر كلامك ؟
_ اي... م بحبك ولا شي وكلها كم شهر وحمشي منك
_ اوكي تمام... خليك قدر كلامك
_ اساسا
_ بالمناسبة انا حتزوج الاسبوع الجاي من نور اعتقد بتعرفيها.... المهم انتي بالذات اهم زول ولازم تحضري مراسم الزواج.
عاينت ليه بدهشة حاولت تخفيها بقوة لكن م قدرت ووشها بقا اصفر.
ف اللحظات دي هو حرك العربية.
هزت راسها عشان تستوعب... وقالت ليه بنبرة متصنعه خبت بي وراها كمية من المشاعر الحزينه والمتفاجأة : بالجد ؟ مبروك ليك وربنا يتم ليك على خير.... ب بعدين اصلا هي اولى مني... ويا زول لو عايزني اجي ازغرد ليك عديل بجي.
قال ليها بنبرة عدم اهتمام : كويس.
قبلت قدامها وبقت بتعاين للطريق بشرود 💔.... الخبر احزنها شديد و وجعها وبالذات الطريقة الزف بيها الخبر ليها.
حست بي تحطم جواها.... وندمت على الجملة الاتسرعت وقالتها ليه.... ونفيها الشديد لي حبها ليه.... وحست بالغيرة الخانقه لمن اتذكرت انو نور حتشيلو منها....مع انها شايفاها اولى منها بكتير... خصوصا انو وجدان مفهماها انو نور حبيبتو وحصلت مشاكل خلتو يعرسها هي.
ختت يدها في قلبها البدت ضرباتو تزيد وزفرت انفاسها بي ضيق شديد.... كانت حاسا بالعربية دي كانها صندوق صغير... صغير شديد ومدخلنها جواه بالقوة 💔.
اي واحد فيهم سكت من التاني... لحدي م وصلها البيت.
لاحظت ليه نزل طوالي وخلاها.... م زي زمان بينتظرها تنزل اول شي حتن يمشي معاها.
كان على مسافة لمن هي قفلت الباب وهو من بعيد امن العربية.
مشت بي خطوات بطيئة.... اتجاوزت ماما عشه القاعدة ف الصالة وعايزة تبدا تتكلم وتقول كلامها الزي السم وهي م ناقصه.
طلعت اوضتها وقفلت الباب بهدوء.
مشت غيرت هدومها وجات رقدت...
كانت منكمشة على نفسها بطريقة بتوحي ليك انها بتبحث عن الامان 💔.
الدموع بدت تلمع في عينها...
مسحت دموعها بسرعه لمن الباب دق... قامت وفتحتو.... لقتها لجين : توتيل اتأخرتي لي ؟ والحصل شنو ؟ طبعا م قدرت اقول ليهم مشت تقابل ماجد اكتفيت ليهم بي انك مشيتي عشان صحبتك.
_ عاذراك انتي م كنتي عايزة تحصل لي مشكله... لكن على كل حال حصلت.... لاقيت ماجد ونصحتو انو م يتصل لي جوري ويجي البيت يتقدم ليها ويخطبها بالعندو... ولمن طلعت لقيت ميكال ف وشي وشاف ماجد وم عايزة احكي ليك بالباقي 💔
_ م يكون شاكلك... وهو اسلوبو مستفز بطلع الزول من طورو.
_ اي شاكلني وانا مديت لساني شديد وقلت كلام م كان مفروض اقولو.
_ لا حول ولا قوة الا بالله.
_ ادخلي خلينا نقعد.
_ اوكي... طيب
مشت قدامها وقعدو ف الصالة...
توتيل حست بي نظرات لجين ومن ململتها ف الكرسي عرفت انها حتكون سمعت بموضوع زواج ميكال.
وفعلا شوية ولجين اتكلمت : توتيل ؟
_ اي
_ انتي ميكال وراك ؟
_ بي انو حيتزوج ؟
_ وراك يعني
_ اي وراني.
_واها حتعملي شنو ؟
_ م حعمل شي... دا حقو وشي راجع ليه
_ يعني عايزة تفهميني انك م زعلانه ؟
توتيل بي ابتسامه : اي
_ م تكابري.... ماف مره بتعرف انو راجلها حيعرس فيها وبتكون م زعلانه.
_ لي ازعل ؟ هو عايز كدا... اهم شي راحتو
_ انا حتكلم معاه
_ اووووعك يا لجين... م عافية ليك كان اتكلمتي معاه او قلتي ليه م تتزوج او كدا
_ لكن ياخ يراعي شوية انك لسا عروس
_ دا كلو م مهم.... وارجع واقول ليك راحتو بس انا م لي دعوه بيه.
لجين وهي بتشيل نفس عميق : غايتو بس ربنا يستر.... لكن يا توتيل عايزاك تقشري قشره وتتظبطي شديد لي عرسو دا
_ ان شاء الله.
_ لو احتجتي اي شي انا موجودة طيب ؟
_ م بتقصري 💜
___________________
بي هناك ميكال اول م دخل مشا لي اوضة جويرية.... اتخلعت لمن شافتو.
كان واقف قدام الباب.... م سلم عليها ولا اي شي... بس قال ليها بصوتو الخشن : انتي خليتي توتيل تمشي تقابل الولد الكنتي معاه ؟
جوري بخلعه : انا ؟ ابدا والله م حصل
_ جويرية
_ نعم ؟
_ لو عرفت بالغلط انك رجعتي للولد دا تاني م عايز اوريك حيحصل ليكم الاتنين شنو فاهمه ؟
_ لكن انا من اخر مره ديك وتاني خلاص... لا شافني لا شفتو وعلى قدر وعدي
_ المهم انا وريتك للمعلومية ولا عذر لمن انذر.
مشا خلاها... وهي بقت بتفكر ياربي توتيل عملت شنو ؟
جواهر كانت راقدة ف سريرها وخاتا كتاب جمبها وبتتكلم مع خطيبها.... الباب دق... قفلت التلفون ومشت فتحتو... لقتا ماما عشه 😑.
الكانت السعادة ظاهره ف وشها.
جواهر : ان شاء الله خير.... مبسوطه كدا مالك 😂
_ خبر السرور يا بتي
_ اها بشري
_ ميكال اخوك داير يعرس
_ شنو ؟ يعرس
_ اااااي.... والعبيطه المتخلفه بت القرية دي حيدبلو فيها.
جواهر قعدت ف السرير : وفجأة كدا قرر انو عايز يعرس فيها يعني ؟ وحيعرس منو ؟ وعرسو عن قناعه ف نفسو ولا من كلامك ؟
_ اي فجأة قرر... وعن قناااااااعه تامه ومن نفسو هو وانا م لي ااااي دخل ف الموضوع دا.... وبخصوص حيعرس منو حيعرس نور البت القلت ليك عليها.
_ نور ؟
_ اي مالا
_ م فيها شي... لكن م عارفة حاسا بيها النوع القاهر داك
_ يا بت هوي قاهر شنو استهدي بالله... البت حلاتا رايقة ورزينه والمهم بت من هنا.
_ غايتو ربنا يسعدو... وحيعمل عرسو متين
_ يموت ف السرعه 😂.... بكره ماشين نتقدم... وبعد اسبوع بس العرس ان شاء الله.
_ ايوااا... واها هي زاتا عرفت ؟
_ بري م عارفاها لكن وااااشماتي فيها 😂.... ولجين اختك الوسخه هاجت وماجت فيني
_ اي م عشان صحبتها م بترضى فيها.
_ اتلقيها زي م لفت للولد دا راسو واقنعتو يعرسها... لفت لي لجين راسها.
_ كلو جايز.
_ المهم انا هسه جيت اكلمك عشان تجهزي نفسك بكره الساعه 7 حنكون معاهم
_ ان شاء الله.
____________________
توتيل ولجين وهم قاعدين الباب دق... افتكروه ميكال... ولجين كانت حتطلع لكن لقوها جوري.
جات داخله بي تردد... كانت اول مره ليها تدخل شقة توتيل.
قعدت معاهم وعاينت لي توتيل بنظرات مستفسره : توتيل حصل شنو الليلة ؟ ميكال قبل شوية جاني قال لي انتي خليتي توتيل تمشي تقابل ماجد ؟ وقلت ليه لا.... انتي بالجد قابلتيه ؟
_ اي
_ لكن انتي م فهمتيني انك حتقابليه.... وقابلتيه لي اصلا ؟
_ قابلتو عشان اقول ليه يجيك بي باب البيت ويتقدم وم يفضل بس يتصل بيك ولا يحاول يقابلك ف الكلية.
_ وااااي م قادرة اصدق... وميكال جا شافكم وانتو قاعدين
_ لا ميكال جا لمن انا طلعت... وبس لمحو وهو طالع من المحل.
_ واكيد اتشاكل معاك صح
_ اي
_ يعني دخلتي نفسك ف مشكله بسببي ؟
_ انتي م ليك دخل... وم تفكري ف الموضوع... المهم ربنا عالم بما ف الصدور.
_ ربنا يستر.
_ ان شاء الله
بي نهاية اليوم دا.... انتشر ف البيت خبر زواج ميكال.... وكان نوعا ما مفاجئة... وطبعا ناس فرحو شديد زي ماما عشه ووجدان وسيف لانو كدا ف فهمو نور حتبقيه خاتم ف صباعها وحتسيرو ليهم زي م عايزين.... وكدا عندو امل كبير انو ياخد مكانو ف الادارة... وماما عشه فرحانه وشمتانه... وجواهر نوعا م فرحت... لكن برضو م كانت مقتنعه بنور شديد كدا.
اما مشاعر الاستنكار والزعل كانت تبع الثلاتي لجين وجويرية ويوسف.
طبعا لجين كانت نفسها تتكلم معاه بالرغم من انها كانت خايفة من ردة فعلو الحيعملها ليها.... لانها عارفاه م بيحب زول يدخل ليه ف امور حياتو.... وف نفس الوقت توتيل قالت ليها م عافيه ليك لو اتكلمتي معاه ف الموضوع دا.... اما جوري ويوسف فعارفين انهم حتالة البيت ولو قالو اي كلام م حياخد بيه وم حيهتم بيه اصلا.
اليوم عدا.... وتوتيل كانت طول الليل بتبكي.... حست بيه اخر الليل وهو بيرقد ف السرير الجمبها.
بس لا اتكلم معاها لا اتكلمت معاه.... وكانت نفسها لو تعتذر ليه عن الاهانه البدرت منها بدون قصد في لحظة غضب مفاجئة وعارمه.
صباح اليوم التالي :
صحت قرابة الساعه 10 وهو كان مافيش...
حست بي حزن لانها فوتت صلاة الصبح.... دخلت استحمت واتوضت ودعت ربنا يسامحها على تقصيرها حق الليلة وانو يسهل عليها ويساعدها ويقويها ف الفتره دي.
جات نازلة تحت وبس لاقتها ليك ماما عشه ف وشها.... ابتسمت بشماته واااااضحه : م عجبني ليك الضره الجايبنها ليك يا بتي.
_ لي م يعجبك لي ؟ انا ف نفسي عاجبني ليهو... الله يسعدو ويبسطو.
_ غايتو الجاياك سممممحه شكلها حتكسحك 😂
_ لو هي سمحه... انا كمان سمحه خلقه واخلاق 😊🔥... المهم بس ينبسط معاها وتسترو
_ اكيد حتسترو م تشيلي هم ف دي.... هسه اهمممم شي حتحضري العرس ؟
_ كييييف ؟؟؟؟ احضر وازغرد ليه واجرتقو بيدي كمان لو عايز.
ماما عشه اتغاظت من برودها لانها كانت عايزاها تتحرق🔥 وتغيظها.
_ عامله نفسك م هاميك يعني ولا شنو 😂... اتلقي المغصة شرطتك
_ والله هاميني وشديد كمان عشان كدا ماشا الكوفير اتحنن عاد الفرحه بتجي كم مره ف السنه .... مغصة شنو دي الشارطاني 😂😂😂😂.... الا كان الفنان الجايبنو طلع ماسورة وم بيعرف يهجج ويخلينا نرقص وننبسط هنا يادوب المغصه حتقتلني 😂.... عن اذنك وراي حاجات عايزة اجهزها 😚.
الدنيا دي مرات لمن تعصر عليك بتديك دروس سمحه كدا... ومن الدروس الاخدتها توتيل انها بقت بتعرف ترد لي ماما عشه دي.
توتيل اول م اتجاوزتها ونزلت ف السلم دموعها طوالي نزلت... لانو بغض النظر عن اي شي الكلام وجعها 💔.
مسحت دموعها وتابعت مشيها.
فوق ف الشقة وجدان كانت قاعدة ف البلكونه وفرحااااانه وبتتكلم مع نور : غايتو توتيل لمن تعرف وووووب 😂.... امووووت واشوف شكلها حيكون بعدين كيف 😂.
_ بركه ان شاء الله تموت زاتو
_ هي يا العروس م تدعي هوينا من العواليق بالله 😂... خلينا ف مواضيعنا المهمه... اها وريني حتتحبسي الاسبوع دا كيف
_ اصلا لوني نضيف بس حنزل دخان وعروكات بي سرعه كدا واعمل حمام مغربي وفيشل.
_ اها كويس.... خلاص حنتك علي 😌.... بعرف لي كوفير كدا فيه حنانات رهيبااااااات يدهم تتلف بالحرير زي م يقولو.
_ طيب... اها وريني هسه بعدين انتي حتجي معاهم ؟
_ طبببعا لازم اجي.
_ كويس 😂... بس ما م عارفة البس شنو ؟
_ الفستان الوصفتو ليك بس البسي وبي مكياج بسيط وخلاص
_ طيب
_ ربنا يسهل ليك ان شاء الله
_ ان شااااااء الله يا وجدان.
______________________________
توتيل مشت اتجاه الاشجار الورا البيت... لقت زولنا يوسف قاااعد.
اول م شافها قال ليها بصوتو العالي : تواااااتل.
ابتسمت ليه وهي بتمشي ناحيتو : صباح الخير
_ صباح النور 😍...تعالي اوريك دا 😌
_ عايز توريني شنو ؟ 😂
_ انتي بس تعالي 😌
_ طيب ارح ابهرني 😂.
فتح الباب الخلفي.
كان ف مدرجات نازلة لي تحت وبعديها في زي ارض محروثة وهناك النيل
توتيل : يا الله دا شنو المنظر الجميل دا 😍🔥
_ حلو صح 😌
_ شديد والله تبارك الرحمن
اتلفت واتمحرك ف قعدتو كدا 😂... قبل م يقول ليها : معليش على الحيحصل
_ شنو الحيحصل ؟
_ زواج ميكال
ضحكت بصوت عالي : اجي يا المعلشة ؟ عادي الموضوع على فكره انا متقبلاه
يوسف وهو بيهش ذبابة من جمبو : يعني اتناقشتو وكدا ؟
_ اي
_ كان تزعلي وتحردي عشان يراضيك
_ م عايزة رضوتو
_ والله وبي كل صراحة لو لف الكون كلو م حيلاقي واحدة زيك
ضحكت وهي بتعاين لي تيار الموية المتحرك بي سرعه.
يوسف وهو بيهش الذبابة تاني : انا ممكن اديك كورسات ف برودة الدم وجمود الاعصاب عشان بعدين م تنهاري.
_ يا ولد انهار من شنو 😂
م خلصت جملتها من صوتو العالي وهو بيكورك : يا ضباااااانه يا بت الضباااااانه ياااااخ طيري من وششششششي ياخي ... مرضعنك ملاح ويكه انتي ياخ م تطللللعي زيتي 😡
شال انفاسو وقال لي توتيل : اها كنا وين 😌
هزت راسها وهي كاتمه ضحكه قوية : انك تديني كورسات في برود الدم وجمود الاعصاب...لكن شايفاك اولى بيه انت 😂😂😂
_ اديك نصيحه غاليه
_ اها 😍
_ اوعك تزعلي في يوم عشان زول م قدرك.
( يا اخوانا يوسف دا بقول كلام زي الفل 🌸)
_ شكرا على النصيحه 💜... لكن برضو يا يوسف م نظلم ميكال.... للمعلومية نور حبيبتو قبليني 😊👌.... وكونو انو يرجع يعرسها هسه دا م شي مزعلني.
_ ربنا عارف بالجوارح.... وعارف ميكال عمل كدا ليه... المهم بس هسه انك تكوني مبسوطه وربنا يسعدكم الاتنين
_ ويسعدك انت كمان يارب 😍.
مرة اليوم والساعه 7 ماما عشه ووجدان وجواهر وسيف و وائل وميكال كانو ف بيت ناس نور.
طبعا نور اخوانها كلهم اصغر منها... اقترحو يعقدو طوالي... فعقدو.... ونور عايزة تموت من الفرح.... بس الشي الزعلها انو لمن جات تسلم ميكال م عاين ليها اصلا... بالرغم من انها كانت متأنقه جدا وقاشره.... بس كانها مخفية وم شايفها.
ميكال من اليوم داك خشمو م فتحو مع توتيل وبقا مشغول مع شغلو وبيرجع البيت متأخر.... م بتحس بيه الا وهو رقد ف السرير ونام وصباح اليوم التاني يمرق شغلو.
وجااااء اليوم المنتظر... يوم زفاف نور لي ميكال.... نور ف الاسبوع دا الشمس م بتشوفها اتظبطت شديد.... وحجزت فستانها وحاجاتها واي شي كان خلاص جاهز... كانت الساعه 9 لمن جاتها وجدان عشان تسوقها الكوفير...عشان يحننوها.
ركبت العربية ووجدان مركبة بتها لولو مع الفلبينيه بورا.
اول شي وقفت بيها في كويكلي شالت ميلك شيك ظااابط و يشيلو ويتونسو ف الطريق لحدي م وصلو.
وجدان وهي بتلكز نور : عايني عايني دي م دعاء الكانت معانا ف الجامعه ؟
_ دعاء منو ؟
_ البت العامله نفسها ماف زول زيها ديك
_ ايوااا دعاء اتذكرتها... وينا ؟
_ هديك ليها البتحنن دي
_ بقت حنانه ؟
_شكلو... ارحكاكي ليها.
دعاء رفعت راسها بعد م رمت كيس الحنه حقت الصبغه الخلصت منها هسه .
وجدان : معقوووولة ؟ دعاء مجدي ؟
وحضنتها بمشاعر زايفة : وين انتي يا زولة تاني م شفناك
عاينت ليها شوية زي العايزة تتذكرها وتاني ابتسمت وهي بتقول : ازيك يا وجدان .
_ والله الحمدلله بخير يا دعاء... انتي شغالة هنا ولا شنو ؟
_ اي شغاله هنا
_ المحل حقك ؟
_ لا لا بس بحنن وكدا
_ ايواااا.... واها عرستي ولا لسا ؟
_ لسا والله ربنا م كتب نصيب
_ طبعا انا عرست وولدت كمان... هنديك لي بتي لولو الشايلاها الفلبينيه دي.
_ ماشاء الله ربنا يحفظها
_ دي نور متذكراها ؟
_ اي نور كانت صحبتك
_ ولسا صحبتي... طبعا الليلة عرسها قلت اجيبها تتحنن هنا.
_ ربنا يتم ليها على خير يارب
_ ان شااااء الله حبيبتي... لازم تحننيها انتي دي بي يدك
_ جدا م عندك اي مشكله.
نور سلمت على دعاء وقعدت ليها عشان تحننها.
طبعا وجدان كانت بتتكلم بطريقة افترا ومطاعنات مقصودة لي دعاء.... عندها معاها case من ايام الجامعه عشان كانت اسمح واحدة ف الكلية واشطر واحدة والناس مركزة معاها فوجدان ونور كانو بغيرو منها.
وجدان : وانتي ياختي الجابرك على الشغل دا شنو ؟
_ والله شغل حلال ودخل اضافي.
_ ايواااا.... لكن كر علي يا دعاء سماحتك الزمان ديك راحت وضعفتي شدييييد يا يمه
دعاء اكتفت بي ابتسامه منكسره.
وجدان متابعه : بتعرفي ناس الشرقي ؟
_ في زول م بعرفهم ؟
_ بس ياهو زوجي ولدهم... وزوج نور ود عم زوجي طوااالي.
_ ايوااا
طبعا دي بتحصل ف الواقع كتير تلقى الواحدة تطاعن ف بنات حواء عشان عرست 😂... طبعا انجاز رهيب بالنسبة ليها.... وتلقاها ف الدخله والطلعه راجلي فعل وترك وعمل وقال وسوا وووووووو.... حاجات كدا تحسسك بالشفقة عليها 😂.
نور : انا كنت فاكراك حتعرسي اول واحدة فينا صراحة بي الجكس الكنتي لاماه حوالينك ايام الجامعه.
دعاء : ربنا لسا م كتب نصيب.
_ اها و اشتغلتي شنو بعد التخريج.... طبعا انا طوالي عينوني في عبد العظيم الشرقي للمقاولات.
_ والله اشتغلت في كم شركه كدا وبعدها ابوي مرض ووقف شغل فلقيت نفسي بقيت بصرف على البيت وعلى اخواني عشان كدا محتاجه اكتر من شغل.... شغالة في شركة اسمنت دوامي من 8 لي 5.... من 6 لي 10 عندي دوام شغل في سوبر ماركت.... يوم السبت ماخدة اجازة من الشغلين وياهو شغالة ف الكوفير هنا لحدي المغرب.
_ ايواااا... ربنا يوفقك
_ تسلمي.
وجدان : لكن يا بت اول زول يتقدم ليك وافقي طوااالي... العرس ستره وماف احلى منو.... بالذات لو وقعتي ليك ف راجل زي راجلي كدا 😍.... غايتو سيف راجلي الصلاة على النبي.... اي شي جايبو لي بالكوووووم والردوم.... الدهب والميكب والتياب والاكسسري... والسفر... كلللل اجازة لااااازم نسافر...
_ ربنا يبارك ويزيد ان شاء الله
_ ان شاااء الله... وعقبالك الله يديك زيو.
قالت جملتها وهي بتعاين لنور وبتبتسم احساس بتطاعن ف دعاء.
طبعا م عايزة اوصف ليكم شعور البت وهم بتعولقو ليها كدا.
ونصيحه مني ليكم يا جماعه لمن الله يديك نعمه داري عليها واحمدو عليها عشان تتبارك ليك وتستمر... لكن ربنا م برزقك لو رزقو بتستخدمو ف جرح قلوب عبادو... وناس ف حالهم وم سألوك ولا اذوك 💔.
المهم مضت الساعات وحنت الفقر المابتتسمى نشفت... مشت غسلتها.... وبعدها بدت تجهز نفسها للزفاف.
________________________________
الساعه 10م :
في حديقة واحد من الفنادق الفخمه كان حفل الزفاف.
الزينه كانت جميلة وهادئة.
والكراسي والترابيز منظمه جددددا.... واي شي فلة شمعه منورة.
بدا وفد الضيوف والمعازيم يوصلو.... ووجدان واقفة ف العرس كانو عرس اختها.
كم دقيقة الانوار بقت هادئة استعداد لدخول العروس.
كانت حلوة وفستانها جميل... بس لانها دااايما الاربعه وعشرين ساعه ممكيجه م كان فيها شي غريب او جديد.... الانوار كلها اتسلطت على ميكال.... ببدلتو الانيقة السوداء.
ماما عشه تزغرررررد قدرتها ومبسوووووطه... والعجب نوووور شي تاني الفرح ظااااااااهر ف وشها شوووية وتطير عديل.
دخلو بصوت انغام الكمااااان 💜.
والناس كلها بتعاين وتتكلم.
بعد الدخله اللطيفة دي الحفلة بدت... ميكال قعد شوية معاها ف الكوشة وتاني طلع.
في اللحظات دي وصلو الششششلة 😍.
توتيل ولجين وجويرية ويوسف 😍
طبعا جو قاشرين ومظبطين لكن توتيل حكاااااااية خلت الناس كلها تنسى العروس وتركز معاها هي براااااها 😍.
كانت قاشرة بتوب حرير تركوازي مشغول من تحت على شكل حلقات دهبية.... يسو كدي فيها 👋.
ومعاه بودي بلون التوب.... ودااااك يا الحجاب... وشبط ظريييف كدا تركوازي.... وحنتها اسمح من حنة العروس.... ولابسة الدهب وحاجه ببسم الله ماشاء الله.
اول م جات طوالي مشت على الفنان بشرت ليه وكان معاها يوسف والابتسامه م فارقتها... وبدو النسوان يتكلمو... هسه دي بيعرسو فيها ؟ صحي الرجال م بملا عينهم الا التراب.
وواحدات عجبتهم حركتها وتانيات اشفقو عليها... طبعا نور كانت فاكراها م حتجي... والنار ولعت فيها لمن شافتها.
وجدان وامها بقو بهدو فيها وبقولو ليها م تخليها تخرب ليك ليلتك.
توتيل بعد جبجبت زيييين مشت قعدت ف التربيزة مع ناسها 💕.
نور قامت ترقص مع اهلها والناس.... وميكال تاني م دخل زاتو.
كانت حفلة جميلة شديد... لكن م بالنسبة لي نور ووجدان وامها لانو توتيل وحركتها وانتباه الناس معاها مسخ عليهم كل شي.
بعد الحفلة جا وقت الجرتق.... ميكال دخل للجرتق.
هنا توتيل المنظر كان شوية مؤلم بالنسبة ليها... احساس خاتين القرمصيص فيهم.... وبقو بشربو ف بعض ف اللبن... ونور تشيل وتترمش وتغرود ف عيونها.... عايزة تغيظ توتيل.
اول م ادوه الريحه البرشها ف البناات دي.... علت صوت زغرودة طوييييلة وعالية... ميكال رفع عينو لقاها توتيل.
اتبادلو النظرات لثواني وهو رجع بعدها و قعد جمب نور تاني... كانو عايز يغيظها 😭💔.
خلص الجرتق... والناس بدت تطلع.
ميكال ساق نور ومشا... وخل توتيل و قلبها بينزف من الغيره 💔.
اما هي ركبت مع جماعتها وفضلو كلهم ساكتين لحدي م وصلو البيت لانهم كانو حاسين بيها منكسره وبتكابر.
ميكال ونور مشو واحد من الفنادق الفخمه ودخلو... طبعا فلانه عايشة دور انها عروسة شديد واحساس حتلقى ورود مرمية ف الارض ويشيلها ويلف بيها وحنك الهنود دا 😂.
كان حاجز سويت.... قعدت ف طرف السرير وهي مدنقره راسها بحياء( صراحة الدور م لايق عليك )
اتكل على الباب بضهرو وكان بعاين ليها : نور
رفعت عيونها ببطئ : اي حبيبي
_ اسمعيني كويس.... لو عرفت بالغلط بس انك حاولتي تستظرفي وتغيظي توتيل او ترمي ليها كلام م حيحصل خير.
طبعا بس اتخيلو ردة فعلها 😂💔.
قالت ليه باستغراب : ياخ شنو توتيل توتيل فيني... حتى يوم عرسي م عايز تفرحني وتبعد من سيرتها.
_ م حبعد من سيرتها وحتسمعي اسمها كتير... المهم انا حذرتك.... احترامك ليها هو احترام لي غير كدا حتزعلي مني و ثم ثانيا م تعيشي دور العروسات انتي اساسا حامل... عشان كدا استكيني شوية... يلا تصبحي على خير.
مشا خلاها وبطنها طامه عديييييل 😂😂😂😂.
نمشي لي توتيل بتنا السمحه العفيفة 👋😍
طبعا كانت مكسورة كدا... وماف شي بيوصف شعور واحدة بتحب واحد وتحس بيه بقا م عندو ليها شي ومكتفي بغيرها💔.
طلعت دهبها وفكت توبها وملصت الحجاب.... جابت مناديل الميكب.... ازالت المكياج ودخلت الحمام استحمت.... لبست ليها قميص وفكت شعرها وقعدت ف السرير... ضمت رجولها عليها وهي بتحرر دموعها الكاتماها ليها كم يوم خصوصا مع تغير ميكال عليها... والدموع حقت الغيره الوجعت قلبها.... بكت لي وقت طويل.... وبعدها جرت مخدتها ونامت.
صحت بصوت الاذان.... كانت بين صاحية ونايمه.... حست بيد ماشا ف شعرها.... مع انها كانت م واعيه بما فيه الكفاية لكن متأكدة ومية ف المية انو دا هو... لو عيونها بتكذب قلبها م بكذب... وريحتو الادت المكان عبق خاص حسستها بأمان غريب.
حست بيه بينحني عليها وبيطبع قبلة فيها كمية من الحنيه ف راسها.... حست بيه بيجر البطانيه وبيغطي ليها جسمها المكشوف للبرد.
كانو خدرها... لقت نفسها نامت تاني.
في نومها الشبه خفيف وهي م عارفة هي ف السما ولا ف الارض كانت سامعه صوت تلاوة عذبة بصوت هادئ... صوتو هو💜... البتقدر تميزو ولو كانت في مكان مزعج وفيه كمية من الاصوات.
الساعه 10 بالصباح
نور صحت من النوم طبعا ميكال امس م نام معاها ف نفس المكان.
قامت اتسوكت واستحمت وفكت شعرها وظبطتو.... عملت ميكب خفيف ولبست ليها شورت حق جينز ومعاه بلوزة بيضا وشبشب فرو ابيض... واتبخبخت بالعطر وطلعت على اوضتو.
دقت باب اوضتو ودخلت.... لثواني حست بي احباط قاتل لمن لقتو مافيش.... مشت على الحمام عشان تطمن نفسها انو لسا قاعد بس م لقتو 💔.
رجعت جارة اذيال الخيبه زي م يقولو.
فتحت تلفونها لقتو مرسل ليها رسالة الساعه 4 فجر : انا رجعت البيت.... كنت عايز اكلمك لقيتك نايمه... بكره لمن تصحى كلميني وحرسل السواق يجي يجيبك.
رمت التلفون ف السرير بغيظ وهي مستهجنه طريقة تعاملو معاها.... خصوصا ايامها الاولى معاه.
مشت غيرت هدومها وقشرت بفستان رهيييب وخلت شعرها مفكوك ولبست شبط انيق.
وضربت ليه : الو ي ميكال
_ اهلا
_ خلي السواق يجيني
_ اوكي.
قفل الخط.
نور : كويس ي ميكال... كويييس انا وانت والزمن طويل.
بعد نص ساعة السواق وصلها.... كلمت وجدان انها جاية.
توتيل فتحت عيونها... وطوالي قعدت ف السرير بي خلعه... الشافتو قبيل حلم ولا حقيقة... م كان ف اي اثر ليه في الاوضه.
صوت الزغاريد خلاها تطلع من الاوضه.... وقفت جمب الباب وهي بتسمع صوت ماما عشه : الصلاااااة على النبي يا عروسة نوررررتي وشرفتي يا ست الكل.
وتاني جا صوت زغرودة عااااااالية.... ودي طبعا اللي م بتتسمى وجدان.
باب اوضتها دق.
فتحت الباب... جوها لجين وجوري منكشحين توووشك.
لجين : امشي استحمي والبسي ليك دراعة سرعه.
_ لي ؟
جوري : عشان تستقبلي الشلابه بعين قوية
ضحكت : ياخ مالي ومالها.
لجين : لا لا لازم تجي.
لزتها لي جوه : يلا سريع سريع امشي
( اللهم حموات زي لجين وجوري 😁)
جرت استحمت واتسوكت وجات صلت... واختارو ليها الدراعه.... كانت عايزة تطلع ليها طرحه لكن اصرو عليها تفك شعرها... وطمنوها انو سيف طلع شغلو ويوسف مشا الجامعه.
فكت شعرها وجابتو بالجمبه وعملت روج بمبي خفيف واتكحلت.
جوري : احنا حننزل وانتي الحقينا بعد شوية كدا... عشان م تكون واضحه.
_ كويس
انتظرت شوية وحصلتهم... كلهم رفعو راسهم وعاينو ليها وهي نازلة 💕💕💕💕💕.
كان جمالها غريب... نور برضو جميلة بس توتيل جمالها عميق كدا يا اخوانا... البت لمن تكون رزينه وعندها حياء ومهذبة جمالها بيضاعف اكتر واكتر واكتر 💜🌸.
نور و وجدان عاينو لبعض بنظرات ذات مغذى.
ماما عشه : تعالي يا توتيل سلمي على نور جمال الحور 😍.
توتيل جات سلمت عليها.... وطبعا ديك بتسلم بطرف يدها.
قعدت ف كرسي براها وجوري ولجين يعاينو زي الكدايس 😂.
ماما عشه : ان شاء الله يا نور يا بتي تجيبي لينا الولد اليشيل اسم ميكال الشرقي ويكون الوريث
نور وهي بتعاين لي ميكال بدلال : ان شاء الله يا ماما عشه... اجيب لي حبيبي ولد بشبهو كدا.
جوري : so what يعني لو ولد او بت ماف فرق بينهم.
ردت فعل ميكال.... وجعت توتيل جووووووه قلبها لمن نفسها قام.... مسك يد نور وباسها ليها وهو بعاين ف عيونها : كلام جوري صح بت او ولد م فرق.... كلو نعمه من ربنا.
بعد م نزل يدها عاين لي توتيل وابتسم بي استفزاز 😭😭😭😭😭😭😭😭.
توتيل عاينت للارضية وحست دموعها شوية وحتفضحها.
لجين وجوري كانو بعاينو ليها لانو حسو بيها زعلت من حركتو 💔.
نور زاتها اتفاحأت واتخلعت م توقعتو يعمل كدا.
توتيل كانت ساكته طول القعدة وم مشاركه ف الكلام والونسه الحاصلة.... كانت بتعاين للارض بشرود وتسرح وتاني تنتبه لي كلامهم بس بدون مشاركه.
ف قعدتهم دي شربو قهوة وهي م شربت.... لحدي م لجين طلبت منها تطلع معاها فوق لانو بقت بعد دا لافته للانظار بهدوءها الشديد.
اول م طلعت فوق معاها بقت بتبكي 😭.
ولجين بتهدي فيها.... وبتقول ليها هو اكيد باس يدها عشان يغيظك م تشتغلي بيه.
مشت جابت ليها عصير وبقت بتونس فيها لحدي م مزاجها شبه اتعدل.... مرت الايام.... وميكال م بجي لي توتيل ولا حتى بيتكلم معاها بس بعاين ليها من بعيد..... وطبعا هي اشتاقت ليه شديد 💔.... واشتاقت لي لئامتو ديك البيعملها ليها وضحكاتو الساخره.
كان بيتعمد قدامها يظهر اهتمامو بي نور ويحضنها ويبوس يدينها وراسها وبينجح ف زعزعة مشاعرها وانكسارها.
في صباح يوم :
كانت قاعدة بره مع لجين وجوري.... لمن جا طالع وهو لابس بدلة سوداء تقول يا انا 😭.
دقنو بقا مهمل واداهو منظر جذاب وقوي.
جا السواق وشال شنطتو وطلع.
جوري : على وين ؟
قعد ف الكرسي وعاين لي توتيل وبعدها رد على اختو : انا مسافر الجزيرة عندي شغل.... 3 ايام وبرجع ان شاء الله.
لجين : ربنا يكتب ليك السلامه.
_ الله يسلمك.
لبس نضارتو وطلع.
توتيل تابعتو بي انظارها لحدي م اختفى 💔.... كان نفسها لو يقعد شوية وتتأمل ملامحو قبل م يمشي.
فجأة حست بي طماااام كدا رهيب.... خلاها تجري بعيد اتجاه المغسلة البي ورا.
استفرغت بي قوة.... حست بعدها بدوخه خلتها تطلع فوق عشان ترتاح.
نامت وصحت كانت الساعه 3 ضهر.... نزلت تحت لقت عاملين قعدت قهوة.... م عرفت لي حست بالسعادة الرهيبة وهي بتشوف فنجان القهوة.
مسكتو بيدها وبقت بتستنشق في ريحة القهوة بي تلذذ عجيب....
وجدان كانت مركزة مع تصرفاتها وبدت تشك انو في شي.
وطبعا الفطره الخاتيها ربنا جوا كل انثى بتخليها تعرف وتحس انو جواها ف روح عايزة تنمو.
م استعبدت ابدا الفكره حقت انها تكون حامل.
اتفاجأت بوجدان بتقعد جمبها : توته
_ اي ي وجدان
_ مالك حبيبتي بتشمي ف القهوة كدا 😂
_ عادي ريحتها عحبتني
_ لا لا شكلك كدا حامل
_ حامل ؟ لا لا م للدرجه دي
_ تعالي معاي عندي اختبار الحمل شوفي واتأكدي
_ دا بيهمك ف شي ؟
وجدان وهي بتحاول تتجاوز الاحراج : اكيد بيهمني يا توتيل... انتي م عارفة الخطه البيحبك فيها ميكال
_ خطة شنو ؟
_ ميكال عايزك تحملي.... وبعدها حيشيل البيبي و
_ كملي
_ ويطلقك ويبعدك منو
_ الكلام دا جبتيه من وين ؟
_ م تنسي انو حبيبتو ومرتو صحبتي الانتيم... كدي تعالي فوق خلينا نتأكد
قامت معاها بي تردد وهي ادتها الجهاز.... طبقت الطريقة واستنو لي وقت لحدي م ظهر خطين حمر دلالة على انها حامل.
وجدان : انتي حامل يا توتيل غايتو الله يحفظ حملك من الشر.
م ردت عليها ونزلت بي سرعه لي شقتها وكلام وجدان بيزن ف راسها.... ميكال حيقلع ولدها منها معقول 💔.... م عرفت تفرح ولا تحزن.
نور طلعت لي وجدان لانها ضربت ليها وقالت ليها تعالي.
نور : ف شنو جايباني على ملا وشي ؟؟؟
_ توتيييييل حامل يا ماما.... وانتي عيشي على وهمتك
_ حامل ؟ كيف يعني حامل ؟
_ كدا... يعني ولد ميكال ف بطنها ولدو بالجد م كذب.... وم عايزة اوريك لو ميكال عرف حيحصل شنو.... حيمحيك من ذاااكرتو وهي حتكون ام طفلو الاول.
نور بي عصبية وهي بتبكي : لكن لي انا بيحصل لي كدا ؟ لي هي ؟ ي الله هي احسن مني بشنو ؟ لي هي تكون حامل منو ؟
_ خلاص اتلهي ياخ خليني افكر
_ حتعملي شنو يعني ؟ خلاص انا حقي راح
وجدان بي خبث : لا م راح ولسا ممكن ننهي الموضوع دا.
_ كيف
_ خليها علي.... حخليها تجهض عديل وبفضيحه
نور بي خوف : لكن يا وجدان لو كشفونا
_ ماف زول حيكشفنا
_ والله ميكال لو عرف بضبحنا
_ قلت ليك م بيعرف.... يا اما تخليني اعمل الفي بالي ولا خمي وصري
_ خلاص طيب اعملي العايزاه.
_ اول شي امشي اعملي عصير فراولة باللبن تقييييل وبارد 3 كبايات.
_ بتخططي لشنو انتي ؟
_ م تسألي كتير وامشي
_ طيب.
الساعه 7 مساء :
توتيل فتحت واتسبها لمن سمعت صوت نغمة الرسايل.
لقت رسالة من لجين : توتيل تعالي لي ف كوفير...... وجيبي لي معاك 200 جنيه 😭 قطعت... وسريع م تتأخري
توتيل ردت ليها : طيب الموقع وين
وصفتو ليها.
توتيل مشت غير هدومها لبست عباية خليجيه بنفسجية ناعمه وانيقة ونزلت... ماما عشه عاينت ليها بطرف عينها وهي بتقول : غاب اب شنب لعب اب ضنب.
اتجاوزت كلامها وتابعت مشيها.... لقت يوسف ورتو.... وخلتو يسوقها..... ورتو الوصف... ووقف بيها قدام العماره.
يوسف : اجيك متين ؟
_ لمن اضرب ليك تعال
_ طيب.
طلعت للطابق التاني.... الشقه الوصفتها لجين.... ضربت الجرس.... فتحت ليها مره.... دخلت وراها وهي بتعاين للكوفير الفخم.
لكن فجأة حست ف شي غلط لمن سمعت الباب بيتقفل بي سرعه وصوت مفتاح بيلف.
قبلت وراها اتفاجأت بي شاب واقف ومتكل على الباب.... قبلت قدامها واتافاجأت بي 4 شباب تانيين.... حست قلبها وقف وبقت بتعاين ليهم بي رعب وهي بتقول ليهم : انتو منو ؟ وعايزين شنو ؟
وبدت تنادي على لجين بصوت عالي..... المره ضحكت : حبيبه ماف واحدة هنا اسمها لجين.
الشباب الخمسه نظراتهم كانت شهوانيه ومقرفه.... توتيل انتبهت للكزلك الحاد حق الفواكه المختوت.... شالتو بسرعه وبقت بتعاين ليهم.
واحد من الاولاد : ختي الكزلك دا يا شاطره عشان م تجرحي نفسك.... العايزنو منك حنشيلو رجالة.... عشان كدا ارمي الشي دا.
عرفت هم بيرمو لشنو.... وكان اهون ليها الموت من انو واحد فيهم يشوف بس شعرها.
يوسف بعد م مشى لاحظ لي تلفونها الخلتو ف الكرسي : توتيل الغبيانه نست التلفون 😑.
رجع ليها تاني.
توتيل انفاسها كانت قايمه وهي بتعاين ليهم وهم بقربو منها.... كانهم ذئاب جعانه.
عاينت لي بطن يدها.... ظهر الخوف ف وشها وهي بتقول : يا الله سامحني.... اشهد ان لا اله الا الله.
ظهرت الدهشة في وجوه الشباب.... وبعدها الدهشه اتحولت لي رعب لمن توتيل عصرت الكزلك الحاد ف شريانها الفي يدها وقطعتو.... وم اكتفت بي كدا نفس الحركة عملتها ف شريان يدها التاني.... عملت الحركة دي بي سرعه رهيبة... وبدا الدم يسيل بغزارة من مرفقيها.... صوت ارتطام جسمها بالارض كان كافي عشان الاولاد يفتحو باب الشقه ويجرو بسرعه.
الوقت الهم فتحو الباب وجرو فيه يوسف كان واقف ف السلم... استغرب من الحاصل حتى الاولاد لمن شافوه م وقفو..... مشا ناحية الشقة بتردد واتفاجأ بالمنظر البشع.... الدم المالي المكان وتوتيل الواقعه ف الارض.
نهاية الحلقة التاسعة عشر
