#القروية_والوحش14
🌸
وائل وصلهم الفجر....
ميكال شال الشنط ودخل وهي دخلت وراه.
طبعا م كان موري اي زول انو هم جايين غير وائل.
توتيل كانت تعبانه شديد اما هو دخل الحمام اخد ليه دش... وجا طالع.... اتوسد مخدتو ونام وهي كانت على ضهرو نايمه نوم عمييييق لدرجة انها م حست بيه.
صحت لمن حست بمداعبة اشعة الشمس لعيونها.... عاينت للساعه كانت 10.
وفرق من لمن تصحا ف سفينه وتصحا ف البيت 😭.
كانت نايمه براها.... قعدت ف السرير عشان تستوعب هي وين.... في شي شداها لمخدة ميكال.... دنقرت عليها وبدت تستنشق في ريحتها 🌸.
حست نفسها انها عايزة تحضنها.... لكن اتنازلت وهي بتقول لنفسها دي شنو العوارة دي يا توتيل.
قامت على الحمام عشان تاخد ليها دش منعشششش كدا.
مشت بعدها قعدت قدام التسريحه و فكت شعرها وبدت تسرح فيه.
فجأة باب الاوضة اتفتح وجا ميكال داخل... كان لابس هدوم رسمية وظاهر انو ماشي على شغلو.... عاين ليها.... وهي بادلتو النظرات بالمراية.... كان بتكلم في التلفون.
مشا قعد ف الكنبه وبقا مكمل في كلامو.
وتاني قام وطلع خلاها.
لبست ليها فستان ظريف كدا واتحجبت ونزلت تحت.
لقتو قاعد جمب ماما عشه ومعاهو اخواتو.
ماما عشه اول م شافتها قالت ليها : حمدلله ع السلامه
_ الله يسلمك
_ اها ان شاء الله استمتعتي.
_ اكيد
جوري : ميكال عايزة الصووور 😍.
ميكال : طيب
ماما عشه : انت يا ولدي ماف داعي تمشي الليلة طوالي ارتاح شوية.
_ ماف طريقة في مشاكل حصلت.
_ اججججججي مشاكل شنو ؟
_ م تزعجي نفسك بيها.
_ مممممممممم
كتفت يدينها وعاينت لي توتيل : اها يا بنتي انجزي سريع جيبي لينا لي شافع نلعبو قبل م نموت.
( من الحاجات السخيفة جدا جدا جدا وم فيها اي احترام او ذوق في مجتمعنا السوداني انو الناس تتحشر في حياة اتنين وتفضل تسألهم اها م عايزين تبقو 3.... م عايزين تجيبو ليكم طفل يملا ليكم دنيتكم ؟ اسئلة سخيفة جدا وجارحة ومحرجه يا ريت نرتقي شوية ونعرف حدودنا ونحترم حياة الناس الشخصية)
توتيل بلعت ريقها وحست بي احراج.... ابتسمت ابتسامه صغيره وهي بتقول بي صوت منخفض : ان شاء الله.
ميكال : انا اقوم بعد دا
_ اتفضل يا وليدي ربنا يحفظك ويغطي عليك ان شاء الله.
ميكال طلع على الشغل.
وتوتيل بقت قاعدة وسط الفظيعات ديل.
ماما عشه : اها وريني مشيتو ياتو بلد
_ والله مشينا كم بلد.... ايطاليا وتركيا واليونان
لوت بوزها بي تكبر : مشششششم... عاد الله يخلي ميكال كان م هو م كان شفتي المطار.
ابتسمت ابتسامه غطت بيها النار الولعت جواها من الكلام : ربنا كاتبها لي سواء مع ميكال او غيرو 😊
جواهر ضحكت ضحكة رقيعه سخيفه ظهر الاستنكار فيها.
ماما عشه : اها وريني يا بنيه انتي قارية شنو... ولا جاهله ؟
_ انا قارية لغه صينيه
_ مممممممممممممم.... ولغة صينية دي حقت شنو ياختي وبتشغلك شنو ؟
_ مترجمه.
_ ايوااااا.
وقفت علي حيلها وهي بتعاين لي بنات ولدها : جوري و جواهر تعالوا اوضتي عايزاكم في موضوع.
وطوالي قامو منها ومشو وخلوها الله وروحها💔
كل احساس سيئ ف الدنيا انتابها ف اللحظات دي.
سمعت صوت وراها : هي حمدلله على السلامه
قبلت لقتها وجدان
جات عليها وحضتنها بحب زاااائف : كيفك حبيبتي 😍 ماشاء الله السفره الحلوة ظهرت ف وشك.
توتيل ابتسمت لبها : الله يسلمك.
_والله الا تطلعي معاي شقتي ونشرب لينا قهوة سوا.
_ طيب ارح.
طلعو الاتنين وقعدو ف البلكونه.
وجدان : اها احكي لي التفاصيل 😍
_ والله سفره حلوة شديييييد وممتعه.
_ ماشاء الله 🔥.... دقايق اجيب القهوة واجي
اتعمدت تخلي تلفونها الفيه صورة نور خلفية فاتح.
جاتها راجعه بعد كم دقيقة وهي شايلة فناجين القهوة.
وبدو يشربو.
توتيل : انتي الفي تلفونك دي منو ؟
وجدان وهي بترفع تلفونها : دي ؟
_ اي
_ دي نور
_ صحبتك ؟
_ روحي عدييييل.... صحبتي شديد.... و.... وكانت حبيبة ميكال لي كمممم سنه وكان بحبها شديد ومتعلق بيها وهي كمان
_ و لي م اتزوجوا ؟
_ حصل بيناتهم خلاف وطوالي ميكال اتزوجك انتي.... لكن مصيرهم يرجعو لبعض وياااا اطلقتي يا جاتك ضره.
ضحكت ف كلامها كانو كلام جميل.
توتيل : يعني انا سبب في فراقهم ؟
_ بري والله ياختي م عارفة انتي سبب ولا لا.... اه اه انسينا منهم هسه خلينا في القهوة اشربي اشربي واديني رايك 😍.
توتيل رشفت منها : الله حلوة والله 💜
_ تحلى ايامك يا عروستنا.
ظهر ابتسامتها الشيطانيه وهي بتعاين لي توتيل البتشرب.
_________________________________
هناك ف مكاتب ناس ميكال :
نور جات داخله وهي شايلة ليها كومة ملفات ف يدها.... ابتسمت لمن شافتو قاعد ف كرسيه : نورت المكان يا ميكال
رجع بي كرسيه لورا وهو بعاين ليها : بي نورك.
ختت الملفات ف التربيزة الزجاجية القدامها.
_ اها عروستك كيف
_ كويسة الحمدلله
_ ممممممم الحمدلله.
_ وانتي كيفك ؟
_ تفتكر حكون كيف بعد م شفتك عرست وسافرت 💔
ضحك : انتي لسا مصره على كلامك دا ؟ طيب اذا عايزاني اتزوجك حتزوجك لكن اطلع مع العايزها.... واصاحب العايزها....
وارتبط بي اي واحدة من دون م تتكلمي او تزعلي..... و م حجي البيت بدري وحعمل حاجات كتيره م حترضيك بتقبلي بالحياة دي ؟
_ يعني انت هسه عامل كدا لي توتيل ولا زفتين دي ؟
_ اسمها توتيل لو سمحتي وهي حاليا حرم ميكال الشرقي فما تقولي زفتين دي تاني.... وارتاحي زواجي معاها مصيرو ينتهي.
قالت ليه بي فرحه : بالجد 😍
_ انتي عارفاني كويس..... على كل حال خلينا نقفل المواضيع الجانبية دي وخلينا ف شغلنا افضل.
_ اوكي طيب.
قام من كرسيه واتحرك ناحية الباب : وائل جا ؟
_ اي جا
كان طالع لكن وقف بي صوتها
_ ميكال
قبل عليها : نعم ؟
جات عليه بخطوات جريئة حاصرتو بيدينها وختت راسها ف صدرو وهي بتقول ليه : اشتقت ليك شديد والله.
اتوقعت ردة فعلو تكون عاطفية.... لكن اتفاجأت بيه بيزحها بي خفه منو : نور.... دا م مكانو.... محل الشغل للشغل وبس.... يا ريت تحترمي مكان شغلك شوية
صلح قميصو وطلع وخلاها وهي بتعاين ليه بي زعل.... طبعا هي اتعودت معاه على كل شي.... وادتو فيها فرصة.... كانت بتنفذ ليه كل طلباتو لي درجة احيانا كانت بتسافر معاه وهي مفهمة اهلها انها مسافره تبع الشغل.... ودا كلو تحت مسمى انا بحبو وم عايزة اخسرو....
والحب يا اخوانا كان اتجاوز مرحلة الاحترام والحدود والتضحية المنطقية فبيبقى شي مقرف وبياخد منحنى تاني..... ومستحيل يستمر.
بالرغم من الحقد الجواها لي توتيل الا انو خف شووووووية لمن قال ليها انا اصلا م حستمر معاها...
توتيل بعد م خلصت من قعدتها مع وجدان نزلت تحت.... احساس تتجول وتشوف المكان كيف.
كانت كل م تجي مارة بأحواض زهور 🌷🌼🌻🌹تدنقر وتشمها وتلمسها بي استمتاع وتمشي للبعدها على هذا المنوال لحد م حصلت ورا البيت....
لقت مجموعه حقت اشجار ووراها ف الباب البيطلع على البحر.
حست بي حركة من بين الاشجار....
دققت شوية بس عينها م تشوف ليك الا ولد جا واقع ليك من واحدة من الاشجار لتتتتت في الواطه لمن عيونها طلعت من مكانها من الخلعه.
كان واقع على ضهرو.... جاتو جارية بسرعه : انت كويس ؟
قال ليها بلئامة : وانتي مالك ومالي.
اتراجعت لي ورا وهي بتعاين ليه.... اما هو قام على حيلو وكان خاتي يدو في ضهرو اول م شافها نطر عويناتو وبقا بعاين ليها.
توتيل : هي مالك ف شنو
_ انتي قبل شوية قلتي لي شنو ؟
_ قلت ليك انت كويس
_ والله العظيم كنت م كويس بس بعد م شفتك بقيت كويس 😍.... شاردة من ياتو جنه انتي 😍.
توتيل : اجي 😯
_ انتي منو عليك الله 😍... خليني اخمن انتي واحدة من صحبات جوري صح 😍
_ لا انا... انا زوجة ميكال.
ختا يدو ف راسو : ميكال يا معلييييييييييييييييم.... انا عارفو.... عارفو ياخ م حيجيب شي اي كلام 😍🔥.... اعرفك علي.... انا يوسف الشرقي.... ود عم ميكال( اخو سيف) سنه اولى جامعه وانتي 😍
_ انا توتيل
_ احلى توتيل دي ولا شنو يا اخواني 😍
بقت بتعاين ليه باستغراب قبل م تستأنف كلامها : وانت الرماك من فوق شنو ؟
_ رماني القدر والله 😍🔥
_ لا بالجد
_ احلى بالجد دي ولا شنو يا اخوااااانا 😍🔥( رقاد 😂😂😂😂) صراحة طلعت اشوف عش طيره مبيضه وبعدها م عارف حصل شنو ووقعت.
_ اهااااا
_ احلى اهااا دي ولا انا بتهيأ لي 😍🔥
ضحكت من اسلوب كلامو : وانت وين م حصل يوم شفتك.
_ انا والوالدة كنا مسافرين ف رحلة علاجيه كدا واهو رجعنا 😍.... اه نسيت.... مبروك ليكم
_ الله يبارك فيك
_ كدي يا تواتل
_ توتيل
_ اي توتيل.... م عندك اخوات شبهك كدا 😍🔥
ابتسمت : لا انا وحيده
_ خلاص بنات عم بنات خال اي شي
_ طيب بشوف ليك 😂
_ انا جادي على فكره
_ عمرك كم انت لمن بتفتش ف العروس.
_ 19 سنه وم تقولي لي شافع وبتاع.
_ العمر كلو
_ تسلمي ياخ 😍🔥🔥🔥🔥🔥🔥🔥🔥
فجأة بس توتيل تحس ليك بالناااااار ف معدتها لمن الوقفة غلبتها.
اتراجعت لي ورا : عن اذنك
_ اتفضلي 😍
مشت بي سرعه على فوق.... كانت خاتا يدها ف خشمها وعندها احساس انها حترجع.
وهي طالعه السلم لقوها ماما عشه وجواهر.
م وقفت ليهم وتابعت مشيها.
جواهر : دي مالا كمان
_ اججججي تكون حامل ؟
_ حامل شنو يا ماما عشه انتي كمان
_ يا بت عاينيها ياها حركات الحوامل.
_ وانتي فرحانه كدا لي ؟ كان طلعت حامل دي كارثه... كدا م حنقدر نطلعها من البيت دا
_ هههههههاااااي لا يا بتي.... المواضيع دي انا عندي فيها خبره.... بنشيل ولد ولدنا وهي بنكشها زي الماحصل شي.
توتيل اول م دخلت قفلت باب الاوضة وجرت على الحمام وبقت بترجع بي قوة لمن دموعها نزززلت.
بعد م خلصت غسلت يدينها ووشها نضيف ومشت قعدت ف الكنبه ومعدتها كانت مؤلمااااها شديد.
انكمشت على نفسها وبقت بتستغفر ودموعها نازلة الالم كان لا يطاق... وم عارفة سببو شنو.
قامت بي تعب ورقدت ف السرير عشان ترتاح اكتر.
شوية باب الاوضة اتفتح.
سرت رعشة ف جسمها لمن سمعت صوتو : في شنو ؟
فتحت عيونها ولقتو ماسك مقبض الباب وبعاين ليها.
وشها كان شااااااحب وتحت عيونها احمر.
ابتسمت ابتسامه متصنعه : م.... ماف شي
قرب منها : انتي متأكدة انو ماف شي.
خت يدو لا اراديا ف جبهتها.... لقاها مسخنه: انتي شكلك تعبانه.... حاوديك المستشفى.
_ لا لا ماف داعي شوية وببقى كويسة.
_انا م طلبت رايك.... قومي.
مسك يدها وقومها....
كانت بتمشي بصعوبة شديد وحاسا انو عيونها م قادرة تفتحها كويس.
ميكال : امشي سريع م تضطريني اشيلك مع لونك الماشي شاحب اكتر دا وبتقولي لي ماف شي وحبقى كويسة😒.
كانت متكلة على درابزين السلم لحدي م نزلو تحت وركبو العربية واتحرك بيها على المستشفى.
نهاية الحلقة الرابعۃ عشر
