حكم العادات

البارت7/8

#بحكم العادات
البارت السابع

ل وردالعامري

بهل اثنااء شفت ابويه طب للطرمه ركضت ادور ع شخاطه عيوني غوشت من الخوف دخل ابوي شافني ركض
-اشطلعج انتي ولج ريحتيش هاي ولج نفط بت الكلب تردين اتحطين راسي بطين يكولون حركت نفسها
-يابه ماريد اروح فصليه يابه ابوس ايدك يابه
-ولج بت الكلب واخوج ماعندج كلب ع اخوج
-يابه اني هم بنتك شلون يطيك كلبك عليه
-بنتي بس موبغلاته لج ابني رجال ايشيلني باجر من اكبر اسمي ميندثر ويموت من اموت اكو من يحي اسمي سمعي حنين والله ثم. والله حته لوتحركين نفسج لالا لوتموتين اوديج انتي وميته الهم حته يطلع
-سحلني سحل من شعري وذبني بالحمام وطبب امي كالها غسليلها الي ع جسمهه وطلعي حسابج بعدين
امي تلطم وتغسلي اني بس دموعي ماكو حل غيرهن طلعتني امي وجرني اني وامي ابويه وحطنه بالهول وبصونده يضربني ويضرب امي ايكولها شلون تعوفيها كتلج ع راسها توكفين واني يضربني ويكولي غصبا عنج ترحين لو يكولولي ماتت مو مهم لمهم رجال البيت يطلع
رجع حبسني احس جسمي كله يحركني ياربي ليش يعني لان هوه ولد واني بنيه ياربي شنو لفرق هوه بشر واني بشر الليل كله منمته احس جسمي يحركني ويوجعني اخرشي حسيت جسمي نحل ونمت اني اكل مماكله هذا ليوم لرابع جسمي كله يرجف طبب ابويه الاكل مكدرت مديت ايدي ع اكل حطيت لكمه بحلكي والثانيه نزلن دموعي هيج رخيصه امام نفسي اني استسلمت وده اكل دفعت الاكل شربت لمي ورجعت تمددت مر ليوم كله اني بفراشي متحركت ثاني يوم فات حط ماعون لريوك وطلع فاتت فتره وجاب الغده شاف ياماعون الي يجيبه ايشيله مثل ماهوه طلع ورجع بيده صونده اني كمت بسرعه يابه لاتضربني فدوه جسمي كله يون علي
-اتسممي اتسممي بت الكلب مسويه اضراب ع اكل ولج لوتصيرين جلد ع عضم بس خل ايوافق ع طلعت اخوج والله لواعرف الم عضامج واحطهن بجيس واوديج اكلي
-شال الصونده ده يضربني جريت الاكل واكلت ايصيح بسرعه كمت اكل لكمه وره لكمه عيوني غوشت من لدموع حسره خانكه صدري غصيت بالاكل شربت مي وهوه يصيح سم سم كملي اكلج فضيني العشه جابه نفس الشي كرهت نفسي الي من لخوف تنفذ اخاف منه اخاف من الصونده الي تنام بضهري ثاني يوم طبن امي واختي وهوه وراهن صاح حضرنهه
يعني شنو هذاهوه حيسوي الي يريده وبس
حنان: خيتي هذي قسمتج يجوز يطلع ابن اوادم وشتردين بعد ببغداد يسكنج
حنين: خايبه كاتلين مرته وابنه شتردوه وياي هيج رخيصه عدكم انه
الام: حنين لاتوجعين كلبي شلفرق يمسودنه اهنا عايشه ع ضرب والاهانه وماتكدرين تحجين شي خايبه لرجال يختلف تكدرين تقشمريه تخليه يحبج بعد مايمد ايده عليج بس ابوج واخوج شلون تقشمرينهم
حنين: جان قشمرتي انتي ابوي
الام: انه مسودنه لاتصيرين مثلي انتي حنان يمه انه كلبي واجعني واختج تلح يمه انتي وياها انا طالعه
حنان: كلام امج صح
حنين: ومادامه صح ليش كل يوم كاتلج مرتضى
حنان :بوياي من لسانج ياحنين خايبه والله ايحن علي بس اووف امه وخواته ايدفعنه علي بس يجي يصالحني ويتعذرلي
حنين: بعد الكتل يعني وطيحان الحظ
حنان: حنين ع قليل يعتذر منو اعتذر ابوج وله اخوج انه ازوجت صغيره صح بس جان ابوج كل يوم ايحطني ويكتلني اخوج جان بعده بالابتدائي ابوج مدلله جان يتحجج حجج علي ياجواريبي ياقلمي ويحطني ابوج يزوعني العافيه شفرق عن ابوج الفرق انه يجي يطيب خاطري حته لو كلشي بيه من يجي ويكول حكج علي ويبوس راسي والله جن روحي ردتلي
حنين: كافي حنان ابوس ايدج ساعديني 
حنان: مالج مهرب حنين والي شاغله بالج بيه خلص راح يتزوج
حنين: شتحجين انتي
حنان: خطب بت خالته وامه جت عزمت امج
-جذابه
-مشكوره امج. موجوده ومرت عمه صديقتي وجارتي اذا تردين اجيبهاالج وسمعي منهه
-مستحيل
-شنو لمستحيل مرتين اجه وابوج مانطاه شتردين
-كالي انتضرج لعمر كله
-ههههه كالج يخيتي اللسان مابيه عضم كلشي يكول من اول ماطلعت امه من يمنه رايحه خاطبه بنت خالته وعقد عليها وقبل 3اسابيع خطب
-اكيد سمع اني حروح فصليه
-هههههه خيتي محد ايعرف ابوج كال اخوج سافر وامج لاتطب ولاتطلع ولا احد يجينه من الجيران منين يعرف ومن جتي امه تعزم امج  امج كالتلها انج حتمشين لبغداد جتج قسمه هناك انسي يختي وارضي بقسمتج
حنين: ياقسمه هاي موقسمه هاي جبر انتو تشمروني بنار علمود كريم
حنان: حنين رغم كلشي سواه وياج وياي كريم اذا طببوه من هل باب محمل بصنوك خشب ترتاحين
ليش سكتي
-مانكر محروك كلبي عليه بس
-بس تردين هوه يطلع ويعيش  وانتي ماترحين فصليه وتزوجين حمزه لالا بما ان حمزه راح يتزوج تنتضرين قسمتج هنا
مايصير حنين لازم اكو واحد ايضحي يختي ياضحين بشي صعب بس اسمج عايشه والح ساعه فرج ويمكن هوه يخاف الله بيج
يااخوج يندفن جوه لتراب ونضل كل يوم هم كاتلين منه واحنا كاتيلن منهم موت اخوج راح يطلع ابوج هم يطلب بثاره ويكتل منهم وهمه يكتلون منه انتي اذا رحتي توكفين بحر دموم يختي
مسحي دموعج يختي سلمي امرج للي لايغفل ولاينام هوه يتوالج ويحفضج ويحنن لكلوب عليج كولي يارب
حنين: للحضه استسلمت اتخيلت ايموت كريم لومهما يكون اخوي واحبه واتخيلت كل يوم عدنه عزه واحد من اهلي وحمزه وخلص اختار دربه مالي مهرب استسلمت بس كانت دموعي مترضه توكف جانت عندي احلام هواي اولهن لكليه والشهاده وبدله العرس وفرحه عرسي كلهن احسهن اسودن وراحت الوانهن بهتن مثل مابهتت روحي جهزتني حنان ودزو ع بنيه حفافه جيرانه حفت وجهي وعدلت حاحبي
الي فهمته متفقين 6شهور ويطلع كريم لان السالفه صارلها 6شهور وست شهور تصير سنه همه جانو رايدين فوك هل مده سنه ينحبس تأديب بس متفقين ان تنزل السنه لل6شهور 
اجه ابوي وبلغ بعد يومين ايوديني
حنان جابت هدوم وغراض وحطتهن بجنطه انه مالي واهس بكل شي مثل لعبه يحركوني صح قبلت واستسلمت للامر لواقع بس كلبي واجعني ومأتم بروحي ع روحي الي ماعرف مصيرها شنو ولاحته اعرف شيصير اوشنو منتضرني