عشقني أستاذي

البارت الخامس عشر

زينب :- گعدت من النوم على صوت أمي ما أعرف شلون وشگد نمت..

أم زينب :- زنوبه يمه تسمعيني

زينب :- أي ماما

أم زينب :- يمه خوفتيني عليچ.
صار ساعه أگعد بيچ بس ما تردين عليه بيچ شي

زينب :- لا ماما ما بيه أي شي لا تخافين

أم زينب :- متأكده يحبيبتي

زينب :- أي متأكده.
أسفه ماما والله ما حسيت بيچ لا تخافين ما بيه أي شي

أم زينب :- لا ييمه أهم شي أنتي بخير وما عندچ شي.
يلا گومي صلي المغرب وما مصليه الظهر لأن نمتي وما هونه بيچ نگعدچ وحتى من تخلصين صلاة أصب عشه أبوچ وأخوچ ومرته وأخواتچ منتظرينچ وحتى زهراء و هدى جايات اليوم لهنا يباتن لأن جمعه وعطله.

زينب :- صار ماما.
مرت أخوي (رواء) دره و ورده مال الله تنحط ع الجرح يطيب بنيه حليوه ونازكه كافي أبتسامتها بوجهنا من نجي بيت أهلنا ما يوم الملت وتأفئفت من عدنا أبد وشايله البيت وي أمي وعدها ولد يخبل بمعنى الكلمه أسمه (علي)
(كوثر) أختي الأصغر من أخوي محمد متزوجه وعدها ولد أسمه أدم.
(هدى) أختي الأصغر من زهراء متزوجه وحامل.
طبعا أخوي وأخواتي تزوجو على صغر بس أنه چنت رافضه الزواج بس تالي خوش زواج تزوجت.
گمت أخذت ملابس وغسلت وبدلت وصليت.
خلصت نزلت يم أهلي سلمت على أخوي ومرته وأخواتي ورحت للمطبخ يم أمي سألتها...
ماما أخوي ومرته وأخواتي عرفو بالشي الصارلي

أم زينب :- أي ماما عرفو

زينب :-شگالو

أم زينب :- كلهم تأذو عليچ وضايجين.
وأخوچ ما تغده أبد ومرت أخوچ حيل ضايجه من سمعت لسه وأخواتچ هم

زينب :- لا ماما ما أريد أي أحد يضوج بسببي

أم زينب :- يمه أحنا أهلچ إذا ما نضوج ونتأذه عليچ چا منو يشيل همچ ویوگف ویاچ ویسندچ

زينب :- الله لا يحرمني منكم

أم زينب :- ولا يحرمنه شفتچ ي يمه

زينب :- حضرت وي أمي العشه وشلناه خليناه على السفره وگعدنا كلنا ناكل سوه وأخواتي ضحك وسوالف وشقه وأخوي ومرته هم وياهم وأهلي يضحكون على سوالفهم وأنه گاعده أبتسم غصبا عني حتى ما أضوجهم فوگ ما هم ضايجين ومقهورين عليه.

الناس سمعتها على گد رمادها
الضحكه ما تحله بحلگ ما رادها 💔

خلصنا عشه وشلنا المواعين والسفره ورحت اغسل المواعين بس أخواتي ما قبلن ف أخذت الچاي ورحت صبيتلهم

أبو زينب :- اليوم إلا شربت چاي طيب ويريح الراس

كوثر :- أي عمي حظوظ.
من چانت كوثر تسوي الچاي محد يگلها طيب لو عاشت أيدچ بس هاي زينب تختلف (گالتها بشقه)

هدى :- أي چا شلون أحنا بنات البطه السوده وهي بنت البطه البيضه

كوثر :- لا أحنا جايبتنا أمي عياز بس هي ٩ أشهر و ١٠ أيام أبطن أمي

رواء :- وجع حتى وجع گابلتنها.
خلي أگوم أقرالها أيات لا تزهگن بيها

كوثر :- هاا حتى أنتي يا أم الرور مع الأسف عليچ يا خاينه

محمد :- ولچ أم حلگ منو الخاينه لا أجي أدفرچ أنتي وأبنچ أطلعكم من الشباك.
بعدين ما تحاچن أختي مفهوم

رواء :- هههههههههه فدوه لعمرك أي والله يفدنك الدوده وربعها (وتأشر على كوثر وهدى)

أبو زينب وأم زينب وزينب :- هههههههههه

هدى :- ولچ منو الدوده وربعها يا جراده

زينب :- ههههههه ولچن كافي هاي كلها بسببي العركه وبسبب الچاي السويته.
راح أگوم أصعد للغرفه أگعد بس سكتو

كوثر :- بعد عمري ضحكتچ.
ولچ شعدنا غيرچ نحبل نجيب أحنا

محمد :- شلچ بيها هاي السالفه ولچ.
آذا لا تحبلین ولا تجیبین هذا الصرصور البحظنچ منین

الكل :- هههههههههههه

كوثر :- عابتلك أي والله يعني إلا تحچي ما تسكت

زينب :- أرتاحيت حيل وي أهلي من يضحكون ويسولفون ولا حاولو يحسسوني بشي أبد.
بالعكس كلهم چانو متفهميني ومتفهمين اللي صارلي ولا عاتبوني ولا لاموني بالعكس يحاولون يرفهون عني وينسوني اللي صارلي.
بذيچ اللحظه حسيت أكو ناس تحبني وخايفه عليه وأنه لازم أصير قويه إذا مو علمود نفسي ف لخاطرهم.
أجو العمال شدو الغرفه ألي بقو ساعه تقريبا وراحو بعدين رجعنا گعدنا سوه بالصاله.
خلصناها سوالف وضحك وسهرنا ومحمد طلع جاب حلويات وكرزات وعصير وشغلات هواي وخاصة الشغلات الأنه أحبها.
صح أنه خلصتها أكثر شي سكته بس أسمعهم شيسولفون وأبتسم وياهم بس مرات أشاركهم بحديثهم.
أستمرت السهره للساعه ١ ونص لمن أجه علينا أبوي...

أبو زينب :- يلا بابا كافي سهر.
الوقت تأخر روحو نامو وباچر كملو حچیکم

الكل :- صار بابا

أبو زينب :- بابا زنوبه

زينب :- ها بابا

أبو زينب :- بابا صعدي نامي وارتاحي معليچ بيهم ذوله مخبلين

كوثر :- والله يا دنيااا 😥

الكل :- ههههههههه

أبو زينب :- هههههههه شوف الغيره.
يلا الكل على فراشاتكم

زينب :- ههههههه صار بابا.
تصبحون على خير

الكل :- وأنتي من أهله

زينب :- صعدت لغرفتي بدلت ملابسي وطفيت الضوه وتمددت على الچربايه وصفنت.
چنت أحس نفسي أحسن من قبل بس بعد بيه خوف.
جريت الموبايل وباوعت شفت أشعارات كومه من صديقاتي مراسلاتني على كل البرامج بس ما ألي خلگ أجاوب.
قفلت الموبايل وشمرته على جهه وغطيت وجهي بالغطه شوي بعد ما حسيت بنفسي.