معرفش أنا آخر مرة شوفته فيها كانت امتى بس اللي أنا فاكراه إنها كانت من فترة طويييلة أووي لما كنا بنلعب مع بعض تحت البيت...
*********************
فلاش باك:
(من 15 سنة) :
أم حسام واقفة في البلكونة في الدور التاني وبتنادي: حسام .. يا حساام تعالى يابني وهات أختك ريم.. بابا بينادي عشان نركب العربية ونسافر قبل ما يدخل الليل علينا (وبصت لأمل) مع السلامة يا أمل يا بنتي.
أمل بصوت عالي : مع السلامة يا طنط.
حسام بحزن وهو بيبص لأمل وماسك ايد اخته ريم الصغيرة : مع السلامة يا أمل .. اوعي تنسيني .. أنا عمري ما هنساكي أبدا.
أمل بحزن وهي بتسلم عليه وعينيها مليانة دموع بتنزل غصب عنها: وانا كمان يا حسام عمري ما هنساك.
*********************
باك:
كل اللي فاكراه عن حسام إنه أكبر مني ب5 سنين ..
كان حنين أوي عليا ..
على طول أي حاجة حلوة معاه يقسمها بيننا ..
(وابتسمت وهي بتسرح)
كان طبعا أطول مني ..
وشعره أسود ..
ههههه كان دايما يضحك عليا ويقولي.."انتي شعرك أصفر من قلة أكل العسل الأسود أما انا فبحب العسل الأسود "..
وانا كنت بزعل إن شعري الأصفر مش عاجبه فبياخد باله ويضحك و بسرعة يقولي.." لااااا وبحب كمان العسل الأبيض وخصوصا لما بيكون مع طبق خضار جنبه" .. قصده طبعا عينيا.
وكنت أرد عليه وانا بضحك ومبسوطة ان شعري عجبه..
أمل بصوت طفولي وهي بتتنطط : ماما بتقولي عينيكي شبه الزيتون الأخضر.
حسام وهو بينزل شفايفه من الجنب حركة تبين انه مش بيحبه : أنا مش بحبه-ويبص لي ويغمز- بس هحبه من هنا ورايح..
(وتتنهد أمل وهي بتحكي)
وهو عينيه كانت بني غامق.. بس بتلمع أوووي.. وخصوصا وهو بيضحك...وياسلام على ضحكته...
هييح
*********************
(قطع سرحانها في ذكرياتها صوت مامتها بتنادي)
أم أمل بتنادي بقلة صبر وانشغال في ألف حاجة نفسها تعملها لصاحبة عمرها : يا أمل .. يا أمل .. بسرعة يا بنتي خلصي تنظيف عشان الست أم حسام جاية تزورنا النهاردة.
أمل فاقت من سرحانها : حاضر يا ماما.
صح .. نسيت أقولكم إن حسام وأمه وأخته ريم راجعين من السفر النهاردة بس هيسكنوا في وسط البلد ..
أبو حسام اشتغل في الإمارات لما سافروا وحوش قرشين كويسين واشتروا شقة حلوة في وسط البلد بدل الشقة اللي في الحارة بتاعتنا .. وعشان طنط أم حسام وماما صحاب من زمان ولأجل العشرة جاية تسلم علينا النهاردة أول ما ترجع من السفر واحتمال كمان يقعدوا في شقتهم القديمة شوية على ما يوضبوا الشقة الجديدة.
نسيت بردوا أقولكم إني خريجة آداب قسم آثار و ريم أخت حسام خريجة علوم وأنا وهي مع بعض على اتصال بالشات من ساعة ما سافروا .. حسام بقى مهندس بترول بس الاتصال بالشات ما بيننا اتقطع من زمان ومش عارفة السبب بس أحيانا كان بيكلمني من عند ريم وانا وهي بنتكلم مع بعض..
