تاني يوم:
.............
أمل بتكلم ريم وبتبص في الساعة: في الميعاد مظبوط..تمام كده-وبصت لها وضحكت-ايه اللي انت لابساه ده يا ريم(ريم كانت لابسة بنطلون واسع وبأستيك من تحت وبلوزة واسعة وبأستيك على الأكمام وطرحة لفاها لورا)
ريم بتبص لنفسها:عادتي يا بنتي.. موضة..وكمان احنا هنّفض ولا هنّروح الفور سيزون..يلا بينا نشتغل.
وبعد شوية:
حسام وهو حاطت رجل على رجل:
يلا..يلا..بطلو دلع.
أمل بغيظ طفولي: ده اللي هو احنا..
داحنا من الصبح بنظف وانت قعدت على أول كرسي نظف وحطيت رجل على رجل وبتتفرج علينا.
حسام حط كف ايده ورا ودنه: بعمل ايه؟..قولي تاني كده..بتفرج-ورجع ظهره يستريح تاني على الكرسي-يعني مش فاضي اهه..بتفرج.
عمرو دخل من الباب اللي مفتوح:
السلام عليكم..بصراحة عندك حق.
حسام وهو بيسلم عليه ويحضنه:
وعليكم السلام..شفتوا شفتوا..
عمرو بيضحك وبيشاور على ريم: ايه ده؟..علاء الدين بيعمل هنا ايه؟
ريم بنرفزة وهي بتضيق عينيها:
نعم!!..انت تاني..
عمرو وهو بيضحك وبيحاول يبطل ضحك :بصراحة انتي اللي بتجيبيه لنفسك..ايه اللي انت لابساه ده!! وايه ده كمان اللي انتي لابساه يا أمل؟!!
(أمل كانت لابسة بنطلون واسع شوية وعليه بلوزة طويلة وعليها مريلة مطبخ بيضاء كلوش من تحت الرباط عند الوسط)
عمرو قالها: كاميريرا..زي الافلام القديمة-وشاور عليهم عما الاتنين-كاميريرا وعلاء الدين في نفس ذات الوقت.
أمل وريم بصوا لبعض و بنظرة لؤم ابتسموا و بصوا لعمرو ومشيوا بالمنافض بتاعتهم في ايديهم واحوا ناحيته وعمرو بص لهم باستغراب ورجع لورا وهو بيهز دماغه : فيه ايه!!
عمرو ما اخدش باله ان وراه الارض مبلولة و فجأة اتزحلق ووقع وعليه الجردل اللي كان جنبه.
البنات وحسام ضحكوا جامد..وريم اتنطتت :هيه هيه..عم مبلولي اتبل..
عمرو بص لهم وهو مبتسم رغم انه مقروف من الماية..وحسام عمال يضحك..أمل وريم ابتسموا ولفوا وراحوا ناحية حسام واللي وقع قاعد على كنبه وراه والبنات فضلوا ينفضوا من حواليه لغاية ما شعر حسام الاسود بقى ابيض من التراب.
أمل بتقول لريم بصوت طخين:
خلاص يا رايا.
ريم بصوت زيه:خلاص يا سكينة.
والبنات صقفوا في ايدين بعض وفضلوا يضحكوا على عمرو وحسام..
حسام وعمرو بصوا لبعض وفضلوا يضحكوا هما كمان وبعدها ساعدوا البنات في شيل الكراسي والكنب والحاجات التقيلة و تلميع وتنظيف الحاجات العالية لغاية العصر وخلاص هلكوا...
أم أمل وأم حسام جابوا الأكل اللي عملوه في بيت أم أمل واتغدى الكل مع بعض..وطبعا ماعداش الغدا من غير ما يحكوا ليهم على اللي عملوه في عمرو وحسام والأمهات قعدت تضحك..
.........
بعد الغدا في بيت أم أمل:
أم أمل بتعب:يا أمل..تعالي يا بنتي.
