مرت أيام كمان ولسة الحال زي ما هو وحسام بيهرب من انه يشوف امل ومعتبر النظر في عينيها خيانة لصاحبه..
في العربية الصبح:
امل برعشة وتردد انها تسأل: ريم..هو فين حسام؟..مش باين خالص.
عمرو بياكد عليها ومستغرب موقف حسام وحاسس انه متعمد يبعد عنهم: صحيح يا ريم..ده على طول بره..هو اشتغل وما قاليش ولا ايه؟
ريم وهي مش فاهمة حسام وبتفكر: لأ..بس هو..مش عارفة..هحاول اعرف..أنا ليا طرقي الخاصة عشان أعرف.
عمرو بيضحك على شكلها وهي بتفكر زي شارلوك هولمز: المفتش كرومبو..
ولا حكيم روحاني حضرتك؟
ريم ابتسمت وقلدت فيلم عبد الوهاب زمان:ما تعرفش اني من عامايلك اقدر اعرف كل اسرارك ..كل حاجة عنك وعن شخصيتك.
عمرو وهو بيهز دماغه ومبتسم لشقاوتها:طب فسري لنا شخصية كل واحد فينا يا بنت سيرين..
ريم رفعت حاجب:هو انا هفسر احلام.
عمرو ابتسم:لا لا..ماتغيريش الموضوع..ورينا قدراتك وعرفينا احنا ايه؟
ريم اتنهدت وبدات تفكر وتعد على صوابعها:
اولا حسام..استنى لما اكلمه عشان اقولك ماله.
ثانيا امل..فكلامنا كلام بنات فهيبقى بيني وبينها بس.
عمرو بسرعة بس لم نفسه وهدى شوية وهو مستغرب نفسه: طب وأنا..
عايز اعرف خط مستقبلي يا عم حزمبل؟
ريم ربعت ايديها وبتهديد :من غير تريقة...
عمرو رفع ايده كانه بيقسم في المحكمة:حاضر..انا ولد مؤدب اهه.
ريم ابتسمت وكملت بعدها بجدية: ايوة كده..شوف يا سيدي..
انت دكتور صيدلي..استنى هتقولي قديمة..اسمعني للآخر..
بس وصلت للي انت فيه بمجهودك يعني تعتبر عصامي..
شخصية ظريفة ومرحة وطبيعية في كل حاجة..
شرحك في المحاضرة ممتاز جدا جدا جدا لدرجة انا مش معاكم في صيدلة بس فهمت كلامك كله مع اني على فكرة عندي كتب من صيدلة وطب ومجلات وبحب القراية..
بس عندك عيب واحد..
لما بتدخل المحاضرة بتتقمص دور الدكتور ومابتحاولش تتنازل وتتكرم وتتعطف وتنزل لمستوى الطلبة وتتباسط معاهم
يعني بتتكبر عليهم وده عامل حاجز نفسي بينك وبينهم ..
فاهمني..
عمرو باصص لها في المراية وسرحان في عينيها وهي بتتكلم وحركات ايديها وتعابير وشها.. حفظها..حتى لما بتتكسف وتقلب طماطماية..وامتى بتبقى شرسة و جد جدا..
عمرو فاق من سرحانه على سؤالها وهي بتقول:فاهمني..
فرد بسرعة:جدا..
وبعدها ريم اتكسفت وسكتت وهي بتلوم نفسها انها تتبسط لمجرد سؤاله عن رأيها فيه..وانها تهتم لرايه في حاجات كتير..وتحاول تشوفه بلهفة في اي وقت تسمع بس انه جاي عند امل..وساعات تطلع في البلكونة في الوقت اللي حفظت انه بيطلع بالليل فيه عشان يشرب شاي وهو بيسمع نجاة او ام كلثوم..وازاي ذوقهم واحد حتى في الاغاني..
وقعدت تكلم نفسها:
بس امل..صاحبتي..
بس هي مش بتحبه..
بس برده هو خطيبها..
لا لا ده بالعافية امل بتحب حد تاني..
عمرو مايستهالش منها كده..
برده ده مش عذر..
هما احرار مع بعض.. ريم اخرجي من الحلقة دي..هتدّمري وتدمري اللي حواليكي.
ريم هزت دماغها وبصت من الشباك.
