الرعناء والأشيب

24

نأسف على التأخير  امسية عافية عليكم،
عشرة ألاف تقرة وبس الف يصوت ادري هي نجمة شماخذه منكم فصلية عدواة وياي مرت ابوكم انا 🤐🙃 خاف اطلع احلام اني وما ادري بروحي 😎🥀😍

الوفاء رابط غريب الشأن ،لا يخضع لمكان ولا لزمان ،تخضع الحواس به على وجود حبل سري بينها وبين شخص معلوم او مجهول الصفة ،لكن كل ما تعلمه أنها به وهو بها ،كقمر لا ينفك عن الابتعاد عن مدار كوكبه...!
شخص يخصك ينام بحضنك تتنفس انفاسه داخل بأعماقة و محتضن كفوفة ،
حواسكم منجمعة سوية بلحظة خلوة حبيبين تحسة بسلم بارد لگلبك العليل ، وفجأة تسمع طبول الشك تنذرلك شخصك الخاص شاطرك بيه شخص ثاني
وتحول البلسم لسهام تجرح گلبك وروحك ، جنت محاطة بهالة يأس وحيرة وشك ، قبل لا يدخل الف موتة متت واحيا بدمعة حارة محتسرة ، اول ما دخل رحت عليه بودي اطعنة بگلبة واشوفه جرحي اشلونه
نسيت شنو سويت بس جنت اصرخ وانتفض ما اريده بحياتي اذا يخون كله صار مدنس و ملك غيري ،
ثقتي بصدقة هي الي خلتني افقد ، كان مثال حي بالنسبة الي ما يكذب يوعد و ينفذ شهم بمعنى الكلمة الصورة الكاملة انكسرت بداخلي بسبب كذبه اليوم ، واهمال البارح ،لكيت نفسي محصورة بزوية بدل الخزفية الي تناثرت طشار من رجعت عليها بلا ما حس ، ايده على حلكي و اعيونه ذبلانه ما تباوع الي بتجاه ثاني ،
- اعقلي شجاج ،
يسد اعيونه الصغيره و يفتح بيها بقوة عاصرها كأنه يريد ينفجر او يوكع ! وحد منهن اما دايخ او دا يصبر نفسه لا يمد ايده عليه ،

**
رائد
توني ضارب ابرة اونسلين حتى يستقر وضعي كان حيل صاعد مع اني ماخذ علاج ، دايخ واريد فراش هادئ انام بيه بعد كعده السيارة اليأسة ، لكيت الي ردت اصارحها واذب حمولي عليها ثايرة علية وما اعرف اشلون اسيطر عليها ،
لزمتها حتى اوكفها عن صراخها فضحتنا ،
ارتعبت اكثر و شردت من كدامي وتصرخ
-كلكم هيج ، اشعندك اخذتني ، مو هي جانت كدامك ؟
-هي منو ، لا اصرخين ، اعقلي ، ما جنت يم وحده
ولا سمعتني بصراخها احس صوتي ما يوصلها ،

ما انطتني اي مجال احجي ،
كعدت ابنها مصطفى يبجي بينا
شلته
-حبيبي ليش تبجي

اخذته لسريره سكته كال اريد ماي جبت اله و شرب وبدأ يغفي من جديد بعد ما طمن ماكو شي ،
اعيوني اجت تستسلم للنوم ، بس صحيت على دخلة نوفة ،
- كوم من يمة وحاجيني وين جنت ، عفته و جريتها طلعتها لا اصحية مرة ثانية ،

- جنت عند الطبيب مو عند وحده ،
صرخت بوجهي وهي تبعد ايدي عنها
-جذاب والله جذب
فاض صبري و ازداد سخطي و كرهي لجنونها المبالغ بيه ، لعنت الشيطان و درت وجهي عنها اضبط اعصابي لا اتهور وياها ،
-ها شو درت وجهك.مالك عين تباوع عليه ،
احجي وياك ، ليش اخذتني مدام انت وياها ع علاقة ،
- ماعندي وياها علاقة
كعدت على الطقم واحس التعب ينزل لرجلية ، افرك بجبيني حتى يقل وجعة
-شو غطيت وجهك.، احجي كول اي شي
- كنت يم الطبيب وتأخرت اشوية ، اساسا اني ما كذبت على اساس امر بهلي بعد الطبيب بس ما صارت فرصة ،
اكعدي خل اشرحلج
-والله لو تحلف بالكعبة ما اصدكك كلكم نفس الجذ.....
-لا اكلمين
طلعت من طوري كلساع وعايده كلمة لكيت نفسي واكف كدامها مشنج الاعصاب واصرخ بوجهة
- منو جذاب ولج اتغلطين واصيحين ، شنو شايفتني كدامج هااا حقيرة
- لا تغلط انت الحقير و خا...
دفعتها وكعت على الارض وانحيت عليها ، رفعت وجهه من ذقنها
- اني حقير هاي تربيتج اتردين على زوجج الغلط ،
وكفت واني ذرة عقل ماكو براسي
- بسيطه اني صوجي مو صوجج
ردت اطلع من الصالة وقفني كلامها
الباكي بصوت يرجف
- روح الها يا خاين ،
رجعت الها مسرع زحفت هي يم الحايط وغطت وجهه بين ركبتيها ،
عفتها و شلعت الشراشيب الفضية تبع فتحة الصالة ؛طلعت كعدت بالسيارة واحس راسي كله اشتعل و سواد شعري راح يتحول كله شيب ، الحريگ مال اعيوني خله الحرارة تطلع منها ، كمت اتعرق بصورة مو طبيعية و نفسي ذاق ، عبالهم الهدوء الخارجي نعمة ، لكن هو نقمة تكلفك صحتك وانت تحبس كل مشاعر الغضب داخلك وتجي على نفسك في سبيل ماتفقد رشدك ما تتحول لحيوان ، امر سريتنا يريد يطيرني لمكان بتلفات الدنيا لو بعملية النقل للموصل الي صرت ما اريدها بعد ما صارت الي اسرة و كلها حاقده علية لأن ماشي بما يرضي ضميري  مشاكل الجيش اذتني حيل ، و مشاكل زوجتي النفسية خلتني اندم اخذتها ، لينا ما ترسل الي من وفاة بيبيتها لكني من شفتها على الدوام تراسل ومن أسال تكول لينا ، اخذت تليفونها و فتشته شفت القهر !،حتى ما دخلت لمحادثتها ويه لينا ، القهر بمراسلتها لغير شخص !!
اجيت اصب كامل غضبي عليها و اضربها لو لا إني لزمت اعصابي وتركتها ، الوقت المر غير معروف ، معندي تليفون اشوف بيه ، نسيته عند رسول من جنت يمة لازم اخذه من اهلة لأنه التحق بديالى ،
اخذت علاكة العلاج من المقاعد الخلفية ونزلت بعد ما ارتكز عقلي و انخمد غضبي المؤقت ،
لكيتها بالغرفة تلم بملابس
شمرتها على السرير يم الجنطة !
-هذا العلاج و بوسطه الوصفة شوفي بيها تاريخ اليوم ،
اخذت غيارات وهي  ولا كأنها سمعتني اجيب ملابس واتحط.
دخلت للحمام و فتحت ماي بارد يطفي الحرارة الي بيه ، ترست البانيو ، ودنكت غطيت راسي بيه متوسلة يطفي حرارة اعيوني و يبرد عليهم ،