رواية معشوقتي المجنونة الجزء الاول كامله

معشوقتي المجنونة الحلقه السابعه عشر

الحلقه السابعه عشر

رنا اول ما شافته اتخضت
فوزى اخدها في حضنه : رنا بنتى حبيبتى وحشتينى
رنا من اللى سمعته منه خوفها
فوزى بحنان : هترجعى معانا صح
رنا بخوف : اوعي سبنى انت عايز تموتنى مش هروح معاك فحته
فوزى : انا يا رنا اموتك انتى بنتى حبيبتى
رنا : لا مش هروح معاك فحته
فوزى : تعالى يا بنتى و ماتوجعيش قلبي عليكى اكتر من كده
ويزو : تعالى يا رنا معانا احنا بنحبك
رنا : لا لا هتموتونى مش هروح معاكم في حته
فوزى : انتى بنتى عمرى ما اموتك
رنا : ملكش دعوه بيا
فوزى بحزن : ده اخر كلام عندك يا رنا
رنا : انا بحب مدحت و هفضل معاه
مدحت بخبث : عمى انا ممكن اروح معاها عندكم عشان تطمن
فوزى اتحاول ١٨٠ درجه و قال بعصبيه : انت هنا يا تعبان و (بص ل رنا حبيبتى ) اخرة الراجل ده وحشه تعالى معايا
رنا راحت ورا مدحت : لا مش هروح معاك
فوزى قال من ورا قلبه من ضيقه من تصرفاتها : ماشي يا رنا اعملى حسابك لو شفتك تانى هقتلك بجد و مشي
نضال : باشا تحب اروح اجيبها بالعافيه
فوزى : لا يابنى دي بنتى و انا عارفها كويس مجنونه و ممكن تعمل في نفسها حاجه، اللى مجننى هي كانت هنا بتعمل ايه بدل مش عايزه ترجع
نضال : باشا الاشكال اللى زي مدحت فعلا تعبان و اكيد كان عايز منك فلوس ، بعد ما سحب الفلوس كلها اللى في حسابها
فوزى : تصدق ممكن ، و الله انا دايما بقول عليك انك تنفع تشتغل في المباحث او المخابرات
نضال بضحك : مره واحده المخابرات
فوزى : يابنى انت لسه مافتكرتش حاجه
نضال : ولا الهوا
فوزى : بس انت شكلك كنت بتلعب رياضه كتير و ده استشفيته من حركاتك و رشاقتك و ملمس ايدك و ما شاء الله جسمك صغير بس عصبك ناشف و قوي جدا اكيد كنت بتلعب لعبة فنون قتال زي كونغ فو او تاي اتشي يا اما اممم بص مش عارف بالظبط بس اكيد حاجه عنيفه و عشان كده عينتك الحارس الخاص بتاعنا
نضال : اهي كلها توقعات بس ايه الحقيقه ربنا وحده اللى يعلم ، و ع فكره انا مش زعلان كفايه انى عرفتكم
فوزى : متعرفش انا فخور بيك اد ايه فعلا راجل و لا كل الرجال
نضال : ده بس من ذوقك و انا تحت امرك
********
عند رنا
مدحت بعصبيه : انتى جريتى ليه ؟
رنا بدموع : امال كنت عايزنى اعمل ايه
مدحت : كنتى قولتيله مدحت يروح معانا
رنا : يعنى انت مسمعتش هو قال ايه
مدحت بمكر الذئب : ده ابوكى و عمره ما كان هيعمل كده
رنا : لا يعمل
مدحت بحده : و هنتصرف ازاي دلوقتى
رنا قلعت دهبها و خاتم الماظ بتاعها و الخاتم اللى جبهولها : بيع دول
مدحت ببرود : فلوسه يادوب تدفع حق الفندق
رنا : نروح نقعد في حاجه رخيصه
مدحت وصلها وقال بخبث : اطلعى انتى ، هروح ابيعهم و اشوف هنعمل ايه
طلعت رنا الفندق و مشي مدحت يبيع الحاجه و اول ما باعهم راح عند امل
امل : جيبتلى الجرعة
مدحت : اه خدى و فضلو يشمو
امل : هات الفلوس دي اشيلها
مدحت : انا لازم اشترى شقه بالفلوس دي
امل بتحريك حواجبها وايدها : احمد يا عمر و تشترى شقه ليه ان شاء الله
مدحت : امال هقعد السنيوره فين
امل بفحيح الافعى : و انت مالك بيها مش خلاص الفلوس اللى معاها بح
مدحت : تقريبا خلاص
امل : ارميها يا عنيه بطول ايدك ، ولا اوعى يا راجل تكون حبيتها
مدحت : احب مين انتى عارفه مفيش في قلبى غيرك د و انتى اللى بعتتينى ليها
امل : و انا اللى بقولك اخلع منها خلاص خالتي و خالتك و اتفرقوا الخالات
مدحت : يعنى مرجعش ليها
امل بضحكة كلها شر : لا طبعا مش هترجع هندور ع واحده تانيه و البنات كتير
مدحت : يا دماغك يا حبيبتى
*********
عند مريم خصلت امتحان و كانت مبسوطه جدا و كل البنات بتحسدها ع كرم
و طلعت مريم ع باب المدرسه لقت كرم واقف و حاطت ايده في جيبه راحتله
مريم بفرحه : انا بحبببك اوووى و نفسي اقول لكل العالم
كرم فتحلها الباب : و انا بحمد ربنا انى شوفتك و ركبو العربيه
مريم كانت بتدور في السي دي : هو انت ماعندكش رومانسي خالص كله شعبى و مهرجانات
كرم : ده قبل ما اعرفك و طلع سي دي و شغل اغانى رومانسي و اخدها مطعم طلبو غدا
كرم فونه رن اخده و قام : خمس دقايق يا فراشتى ارد ع الفون
مريم هزت راسها بالموافقه و ع شفتها ابتسامه
كرم كان معاه فون تانى اخدته و فضلت تقلب فيه شافت فيديوهات ل نايا بتقلد ممثلين بطريقه مضحكه و لقت كرم و نايا بيقلدو اغاني و فضلت تضحك
كرم رجعلها : اتأخرت عليكى
مريم بضحك : ابدا
كرم بص ع الفون اللى في ايدها و فهم : ليه بس الاحراج ده
مريم : احراج ليه دمكم خفيف اووى و لذاذ اووى مع بعض و نايا شكلها مشكله ربنا يقوي ابيه عليها
كرم بضحك : دي ربنا يقوى العالم كله عليها
و اتغدو و وصلها و مشي
*********
بعد يومين
في القوات الخاصه
مهيمن : نضال و عمرو مستعدين تنطو من الطياره
نضال و عمرو : مستعدين يا كابتن
كل الفرقة ركبو الطياره و فضلو يتدربو عالقفز
نايا نزلت و بقت تعرف تعوم في الهوا و مابقتش تخاف و عمرو بيحاول يسيطر ع الفوبيا اللى عنده و كل الفرقه عملو دايره في الهوا
مهيمن كان في نص الدائره و كان بيديهم اشارات يعملو ايه و قالهم افتحو البراشوت
الكل فتح معاه البراشوت ماعدا نايا
نايا بتشاور ان البراشوت بايظ
مهيمن شاولها ع الاحتياطى
نايا شادته فتح و نزلو كلهم كويسين
******
عند رنا كانت قلقانه جدا ع مدحت و ايه اللى اخره عليها يومين
**********
عند امل
امل بتتكلم في الفون : الو ، ايوه ، و انا اجبلك من فين ، خلاص انا هتصرف ،
مدحت بنوم : مين اللى كنتى بتكلميه
امل : ده فتحى كان عايز بنت تشتغل في اشاره و لينا نسبه
مدحت : انتى عندك حد طيب
امل بعد تفكير : عندى فكره و المكسب هيكون اكبر
مدحت يقوم من ع السرير : و ايه هي
امل بفحيح الافعى : رنا
مدحت باستغراب : بتقولى مين!؟
امل : زي ما سمعت يا عنيه
مدحت : بس ازاي دي اصلا شكلها بنت ناس
امل : افتح تلفونك و هي اكيد هتتصل بيك قولها انك كنت عامل حادثه و مفيش سكن غير هنا
مدحت : وانتى و اختى هتروحو فين
امل بخبث : اسبوع بالكتير و هنرجعلك لما تظبطها تعيش هنا و تقنعها تنزل تشتغل
مدحت : انا قلقان
امل : مش انت بتقول خايفه من ابوها ، هترضى ب اي حاجه متقلقش و كمان بتحبك اللى هتقول عليه هتعمله و هي مغمضه
مدحت : ربنا يستر و فتح الفون و اول ما فتحه جاتلها رساله اتصلت بيه
رنا : مدحت حبيبي انت كنت فين انا كنت هموت من القلق عليك
مدحت : طلعو عليا ناس ضربونى و سرقو كل حاجه كانت معايا
رنا : حبيبي فداك كل حاجه المهم انت كويس
مدحت : الحمدلله بقيت كويس
رنا : حبيبي انت فين و انا اجيلك
مدحت : انا هجيلك
و قفلو الفون
امل بضحك : يالعبك يا حماده
مدحت : هروحلها ، خدى اختى و امشو انتو
امل : ماتشغلش بالك بينا هنروح نقعد عند سوكه
مدحت : سلام
******^^
عند رنا
اول ما دخل مدحت جريت عليه حضنته
بعد ساعه
مدحت : احنا لازم نمشي من هنا في ناس دخلت صفقه معاهم و خسرت و بيراقبوني
رنا : حبيبي انا معاك في اي حته
مدحت : احنا هنروح مكان شعبى حاولي تستحملى
رنا : مادام في حضنك استحمل كل حاجه
حضرو الشنط و نزلو و قفل الحساب مع الفندق و مشي اول ما وصلو الحاره مجارى في الارض و زباله في كل حته و دبان كتير
رنا حاولت تتقبل المنظر عشان مدحت و اول ما دخلت البيت كان بسيط جدا حصيره و كنبه عربي في الصاله و الاوضه سرير و دولاب من غير رفوف و البلاط شكله وحش
رنا بقرف : مدحت انا موافقه اقعد هنا بس بليز انا عايزه ملايه نضيفه
مدحت : ما ديه نضيفه
رنا : لا متحاولش تقنعنى ان دي نضيفه بليز انا عايزه ملايه و غطه بس جداد
مدحت : حاضر يا حبيبتى ، غيرى هدومك و خدى راحتك و ارتاحى هروح مشوار
رنا تكلم نفسها : هو هنا حد يشوف راحه يالا مش اشكال المهم معايا مدحت و تقوله : اوعي تتأخر عليا
مدحت : ماتقلقيش ( باسها و نزل راح عند سوكه قعد مع امل)
رنا كانت قاعده و مقروفه من كل حاجه و قعدت ع كرسي بلاستك و استنت مدحت