نعمات جاها بوها رفعها من حوش الشيبانى والعزوز
ركبت مع عمها خالد الله لا تربحه ومعاه بوها
ومشو ...
فالطريق تسأل : يابوى شن صار فى عمى عزيز
-نعمان : عمك عزيز توفا
ودارت عمتك نعمات شوط بكى وتخبيط على عمها
ورن تليفون بوها ورد على عمها صلاح ....
-نعمان: اهو جبناها الجيفه ..
هيا طبعا سمعتها الكلمه ..لكن ماستوعبتهاش بمعناها
لاهية تعيط على عمها
خشو بالسيارة لشارع فاضى ..فيه حوش قاعدين
كيف يبنو فيه .. املعق من برة ومن داخل ومزلز
يخدم فيه عمها خالد مقاول...
فالحوش داخل امها وعمها صلاح
-امال تبكى بحرارة : متاكدين انها نعمات يا صلاح
-صلاح: اهو تو نشوفوها توة بوها رد عليا وقالى اهو
جايبها معاى ...معناها فالاكيد هيا
ووقف السيارة قدام الحوش ونزل نعمان وخالد ...
ودار خالد لباب نعمات فتحه : انزلى
-نعمات نزلت : علاش جينا هنايا يا عمى ..مش
مفروض نمشو لوفاة عمى فى حوش جدى
هيا خافت مسكينه زى اللى شكت فيهم
-خالد يبي يطمنها بيش تخش : تعالى خشى امك داخل
-نعمات : امى هنايا ...شن ادير اهنا
-نعمان عيونه حمر : خشى توة وبعتالى ساهل
خشت نعمات من باب الحوش تلاقى امها فالصالة
خشت تجرى واضبطت امها
-امال: الحمدلله يابنيتى انك حية وبخير
-نعمات تبكى : شفتى اللى صار يا ماما عمى مات
-جى نعمان فكهم من بعضهم : روح بى امال يا صلاح
جت امال تجرى لرجلين نعمان تبوس فيهم
-امال تعيط باعلى صوتها : ياوليد عمتى سامحها ..
نعمات تتفرج وكأنها فهمت الموقف
نعمان دف امال: حولى بري عليا غادى انتى احمدى
ربي خليتك تشوفيها
وتجرى امال لبنتها تضبتها: لاااا منيش مسيبه بنتى ...
يا حليلك يا نعمان الظلم واعر شن يفكه من رقبتك
هنايا فهمت نعمات ان مصيرها احرف احرف مع بوها
ومع هدا قعدت يابسه مش قادرة تتحرك ..مصدومه
