#ولد_الخالة
الحلقة الحادية عشر
حيه عالعياط اللى داراته نعمات
البنت قريب هبلت ...وهيا تعيط .. يااام هدا عمى
اللى قتلنى لزيه يااام
راضيه جبدتها من حوايجها بكل قوتها وحشتها فالدار
متع التقعميز ...
ماتبيش عمها خالد يسمع صوتها
اسامه طلع يجرى من الحمام
-اسامه: منهوا عمك ..وكيف قتلك
-نعمات تهسترت وتكلم فى اسامه :ايه بووووى و
عمامى قتلونى
-اسامه: تى خيرك انتى هبلتى وبديتى تاخدى وتعطى
-نعمات : قتلونى يا اسامه ولوحونى .. ضربونى
بالطوبو ... قطعولى جلدى بيه ..
واااك اسامه بدى يرعش مع بعضه ..
الخوف الى ماحسش بيه على روحه فالحرب
حس بيه عليها هيا فاللحظه هادى ..خاف عليها
البنت لقاها قريب تهبل
-اسامه : رجعتلك الداكرة ولا شنو يا نعمات
-نعمات : انا مش ناسيه .. انا نكدب عليك .. انا داسه
عليك فضيحتى وفضيحة اهلى .. شن منقولك اهلى
مجرمين وهما اللى قتلونى ولوحونى لما لقيتنى انت
-راضيه تجرى للباب متع الدار وسكراته بالمفتاح : يا
حليلى عمك بيسمع صوتك وبيخش يقتلك ثانى
-اسامه : فهمونى كيف صار ومنو قتلك ...
وخداها من يدها : تعالى حبيبتى قعمزى
وهيا قريب بطير .بتنقب السمى ...تنقز على رجل من
الخوف ومن حرارة الروح
-اسامه : متهبلينيش قعمزى واحكيلى
-نعمات تضرب فى يدها على صدرها: شن بنحكيلك
.. ضربونى بيش نموت ويموت سري معاى
-اسامه يعيط : منهما اللى ضربوك
-نعمات : بوى وعمامى واحد منهم عمى خالد اللى
يطقطق فم الباب توة
وينط اسامه ايجى واقف : افتحى ام الباب يا عمتى
لما نقتل امه توة
-راضيه : يا وليد خوى اهدا.. يا حليلى عالعملة اللى صارتلى
-اسامه شاد مقبض الباب ويقربع فيه : انا الليله يا
قاتله يا قاتلنى ..انا الليله نطلع بروحه افتحى الباب
