في خاطري انقولها🙊

😍🙈2

#في_خاطري_انقولها🙊
تحياتي:رونق الشتاء❄
.
.
وأنستكم بعد مغييب🙈😹
.
جيتكم اليوم وجبتلكم معاي موضوع الحق طلبوه مني اكتر من كبيدة متابعه للكتاب وحابة نحكي او نكمل هدرزتي الأوله عليه..
وموضوعنا لليوم..هوا جزء تاني للبارت"😍🙈"
واللي بعنوان
"سعيد الحظ"
.
بعد ماهدرزنا ع الشكل أو المظهر الخارجي لسعيد الحظ اللي حبه ربي ورزقه بيک حلاله وكتوبه..تو نجوا لكيف حتكون حياتك معاه"بعد الزواج"؟
أو بشكل أدق شن الأحلام اللي أي بنت تبيهن في سعيد الحظ امتاعها🙈؟.
.
تو نبدوا نتخيلوا أبرز الحاجات اللي اي بنت تبيهم🙈
"كلامي توا من باب المعاملات بس"
.
احنين
ديما رايق
مايتعصبش
وين ما تبي يطلعك
ديما يسفرك😻
ديما يسفرك😿
ديما يسفرك😹💔
ياخد كلامك،
وقبل هداااااا كلا اكيد يححبك💘.

"اني نتخيل نفسيتي تريحت🌚😹💔"
.
ع المهم الخيالات اللي دكرناهم☝ميجوش من فراغ أو انه من ربي هكي الراجل احنين وديما رايق..
كل شي ليه سبب..وكللله يعتمد عليك👌.

وفي هدرزتنا اليوم حنبدوا بكيف تخليه يتعامل معاك أو ايديرلك الحاجات اللي فوق☝
.
نبدوا ب..

احنين:بالمجمل العام مفيش راجل مش حنون ومفيش راجل مفيشي عرق الأحساس والعطف بنصه التاني..بس للأسف مش اي مرا تقدر توصل للعرق الدفين هدا في قلب الراجل..يعني..لما إنت توصلي للنقطه العميقه هدي..بمعاملتك ليه..بحنانك إنت عليه حتى لو كان قاسي حيلين حيلين..ومتقوليش من اول موقف هوا صلب هوا قاسي هوا كذا..لا يا ألبي بشطارتك تقدري تليني هالحجر اللي طحتي فيه👌😹
.
.
ديما رايق:هوا مفيش راجل ليبي ديما رايق😹💔بس يالله نحالوا نفيدوک ع الأقل تخليه أغلب اوقاته رايق..
أحم..
الراجل يبدا رايق لما يتهيأله جو مناسب ليه..يعني لما يرجع للحوش يلاقي الحوش مرتب والغدي جاهز..اصغاره"لو في"انظيفين..طبيعي حيكون جوه رايق..
وبعيدا عن هدا كلله..طبيعة الرجل تختلف ع المرا..يعني مرات اديري كل هالشي وكل الأمور تمام بس مع هدا كله جوه معكر..
كيف الحل؟
الحل يا ألبي انت بتلعبي ع الجانب المعنوي💝 يعني انك تكوني الصدر الحنون اللي المفترض يشكيله راجلك شن اللي امضايقه..مرات ضغوطات عمل،مشاكل مع عيلته..اي حاجه تخليه يتنكد..هكي المفروض اديري..مش اديريله نهارات سود..
أنت متغير
معاش اتحبني
ع تتفكر النكد وين اتشوفني..
يعني الراجل طبيعي حينفر منك ويزيد يتنكد..ومش بعيده يدور صدر تاني يشكليه"وفهمك كفايه😉😈".
.
.
مايتعصبش:مايتعصبش نهائي هدا شي مستحيل😹..بس تفاديا للأعصاب الزايده ماديريش شي يضايقه..او شي قالك عليه لا..مثلا..قالك يا افلانه لما تطلعي للمكان كذا مانبيش شي ع وجهك😑😌..مفيش داعي اديري روحک سووبر ويمن وتخلي وجهك كراسة رسم..أو حتى لمسات بسيطه..مدامه قالك لا معناها لا مفيش داعي لمشاكل ع سبب تافهه..بتقولي شن دخله حتى بويا ما قالي كذا..يا ألبي هدا راجلك يعني محسوبه عليه وفي ذمته..بوك كان يخلي فيك بارك الله فيه..بس توا خلاص حتى من الكتيب طلعتي..يعني كلمة راجلك هيا اللي تمشي عليك👌.
.
.
وين ماتبي يطلعك:اوكي التدهوير حلمنا كلنا ومفيش اي بنت تحب قعدة الحوش..بس كل شي ليه احدود..وربي عرفوه بالعقل👌..يعني متجيش كل يوم تبي تمشي لأهلك..اووكل يوم تبي برمه في السوق..انت احمدي ربك لو جبر خاطرك مره كل 4، 5 أيام بطلعه..غيرك مايطلعوش بكل..
و من جانب تاني.. تبي تواصلي جدود جد جدك..تحبي تواصلي الناس ماعندي مانقول.. بس حد بالبعد هدا وراجلك ميحبش التوصيل معناها مايلزمكش تمشيله وكنصيحة جو تركبي مع حد تاني فوتيه لانه غالبا حيرد تعزير كلاا👌..و مفيش داعي اديريله نهارات حرف ع دماغه عشان أختك تمشيلهم وإنت لا😀.
.
.
ديما يسفرك:عاد هدي ما عندي مانقول فيها..بيسفرك غصبا عنه😑👌..نبصر نبصر😹من جانب السفر كل واحد وقناعته وقدرته المعنويه والماديه..يعني في نوع من الرجاله جو بلادي ومايحبش يطلع لأي بلاد اخرى..وفي اللي عندهم فوبيا من الطيارت..يعني يحبوش المرتفعات وفي اللي قدرتهم الماديه ما تسمحش انهم يطلعوا..يعني لو راجل معنداش القدره عادي وكلي امرك لربك ولو كاتبك تسافري حتسافري💖.
.
.
ياخد كلامك:هنا عاد إنت وفلاحتك كيف تفهمي تركيبة راكله وكيف تتعاملي معاه بحيث ياخدك كلامك وايديرلك اللي تبيه..و كلامي ياخد كلامك ميدلش ع انه كلامك سحر واللي تبيه سمعا وطاعه..لا يا أااالبي..ع الاقل تقدري توصلي لمرحله تتناقشي معاه ويا تقنعيه يا يقنعك..وكانك فالحه فالحه من اولها تجيبيه😉👌😹
.
.
ونحاول نعطيك قواعد عامه لتراكيب اغلب الرجال وكيف تتعاملي مع زوزك منهم ؟

أول قاعده عامه"شاائعه":الأقطاب المتشابهه تتنافر والقطاب المضاده تتجاذب💞
.
يعني
العصبي:متكونيش معاه عصبيه
الواعر:كوني معاه دحيه"لكن متنزليش قدرك ابدا✋"
الطيب:المفروض اتكوني واعره😹بس بالشوي عليه لأنه معاش فيه منه وااجد😉👌
الناضج"يعني الي فاهم الدنيا صح":متحسسيشي انك فاهمه الدنيا زيه..لاااا اسطعبطي زي ماهو يستعبط😉😹وكان حقا مش فاهمه شي..استمري معااه تو تعيشي👍

تاني قاعده:
بالمجمل للراجل بوابتين تتعاملي معاه من خلالهم..واللي هما:
باب العقل
باب القلب
وانت وشطارتك تعرفي راجلك اي بوابه مفتوحه عنده..يعني في اللي يمشي بالمنطق والعقل والحوار.
وغيره اموره تمشي بالمشاعر والأحاسيس والجو هدا.
.
وانجوا لجناب أخخر واللي هو تقييم الأزواج بالمظاهر🙊
.
رسمي كل واحد فينا سامع من قبل:
.
_ريتي هالمتشنه السمينه السوده كيف متريحه مع راجلها..اكيد دايرتله سحر😞
_ياناري افلانه كيف الغزاله شعر واعيون وجسم..ماهي متريحه مع راجلها ودوره دوره عند هلها حرجانه😔
.
صح عندك حق دايرله سحر وتو نعطيك الطريقه يمكن تنفعك😏
هالمتشنه ساحراته ببتسامته ووجها البشوش اول ما أطل عليه..ساحرته بكلامها واسلوبه معاها اللي يخلنه يوفها قمر..هالسمينه اللي مش عاجبتك ساحراته بنظافتها وأهتمامها ابروحها و اصغارها وحوشها..هالسوده اللي اذمي فيها ساحرته ببياض قلبها وصفاء نيتها اللي فاتحتها في وجهها وين ما أتجهت..هالمخلوقه اللي حاسدتيها بصيغه ذم..ساحراته جمال روحها قبل جمال شكلها😏
وتو بعد خديتي طريقه السحر..ان شاء الله تنفعك في حياتك👅
.
بيضه واعيونه وشعر وكذا وكذا
.هكي قيمتيها انسانه صح..هديما المعايير اللي قستي بيهم سعادتها الزوجيه..مرات هالعشر اللي عاجبك يعقد اسبوع بلا مشط"تضحكوش واقع هدا😂"مرات العيون اللي سحرنك 24 امنفخات من النوم..مرات الجسم اللي عاجبك..خلينا ساكتين مش داويه عليه😶😹
.
ع المهم..
لماذا لا نرتقي بتفكيرنا وحكمنا ع الناس عشان يرتقي مستوانا كشخص ومجتمعنا ككل..ليش منبدوش من روحنا..بأنه مناخدوش الناس بالمظاهر..لأنه المظاهر تزول وما يقعد غير الجوهر
يعني الجمال حيقل مع مرور الزمن
المال حيتم كل المظاهر حثندتر. إلا جمال الروح والجوهر الأصلي هوا اللي حيقعد..
.
وهكي نكونوا كملنا بارتنا لليوم..
بارت طويل نسبيا😅
ولو تبوا حيكون في تابع3
ع حياتكم بعد تطلقوا وين تاخدوا نصائحي😹💔
.
ع المهم ربي يسعدكم ويهنيكم ويدوم زهاكم مع اللي تحبوهم💓
.
.
بووساااتي💋