في خاطري انقولها🙊

👴👵🙊

#في خاطري انقولها
تحياتي:رونق الشتاء❄"Wisha"
موضوعنا اليوم بعنوان
            "العادات والتقاليد"
العادات والتقاليد..الموضوع هدا من ابرز المواضيع اللي الناس ينقسمو فيها..
فيه اللي تعنيله القواعد و المبادئ اللي عايش عليها..وفي اللي يشبح فيها مجرد قيود وحواجز امام التطور والانفتاح والنوع التالت يشبح فيها مجرد تفتفيت فااضي ومليشي اساس من الصحه"وهدا النوع اللي عايش😂😉"من الاخير موضوع متشعب ومتفهماش كيف..وحناخدوه حبه حبه😉والي فاهماته منه ان شاء الله حنهدرزلكم عليه😘😉
اول شي شن العادات وشن التقاليد؟
العادات:الحاجه اللي تعودنا انديروها بستمرار بغض النظر نعرفوا السبب ولا..غير هكي تشبحي في امك ادير فيها وقبلها جدتك اللي شبحتها من امها ووهكدا..امم زي متلا البازين يوم الجمعه..اغلب  العائلات في المدن الليبيه يوم الجمعه غداهم بازين رغم انه مفيش اي دافع او سبب ايخليهم ايديروه..بس هكي عااده فيهم
اما التقاليد:هنا الترات والحضاره اللي ورتناها من اجدادنا واسلافنا اللي قبلنا ونففس الشي مرات نعلموا والاغلب منعلموش ع سببها ومن الامتله عليها لبس العروس للردي البودري او الحني..والحنه اللي تنقسم كل منطقه بنقشتها في اللي بالنيره وفي اللي بالمجاره و كل منطقه بتقاليدتها رغم انه منعرفوش السبب بس من تقافتنا وتقاليدنا ونفسه الزي العربي عند الرجال من تقاليدنا وغييره حاجات اخرى..
لحد الان اللي هدرزنا فيه التقاليد العامه او الشائعه واللي ع الاغلب مفيهاش قيود وواجد🙈وطبعا في غيرها وع خلافها تماما..زي العادات والتقاليد في الزواج😔
في في بعض المناطق الليبي وخصوصا في الجبل والمناطف اللي داخل ان البنت متاخدش غير ولد عمها او اي شاب من العيله او ان الامازيع ميعطوش عربي والعكس وان البنت لو اطلقت اهلها معاش يقبلوها ووغيرها من التقاليد المتشدد اللي عواقبها مضره اكتر من مفيده..ومن ابرز اضرارها زياده نسبه العنوسه عند البنات وانخفاض معدل الزوااج..يعني لما تفرض عليها متاخدش برا العيله و ترفض العرسان اللي مش امازيغ ومفيش شباب في العيله..من بيها البنيه اللي قطعت نصيبها💔وع العموم كلامي ميدلتش ع انه المدن اللي ع الساحل منفتحين ع الاخر ومعندهمش قيود بالعكس في قيود بس بنسبه اقل من المناطق اللي داخل..
ومن الامتله لي عاداتنا"العصيده"يوم الميلود ع الاغلب العاده هدي يتفقو فيها اغلب اليبيين..والعادات نفرق ومليهاش قاعده يعني كل مدينه ليها عاداتها ومرات حتى المدينه فيها كل منطقه بعاداتها..
واجمالا بالنسبه ليا الانسان اللي معنداش ماااضي مستحيل يبني مستقبل..يعني الواحد ايخلي روحه وسط لاهو متشدد في الترات ولا العكس..وبالمجمل العادات والتقاليد اكويسه مدامها موقفش قدام التطور والتقدم
.
.
وربي ايهنينا ويصلح حال ابلااادنا ياااااارب💝👐
.
.
بوووساتي💋