سجينة الروح

part 19

سجينة الروح
للكاتبة Reem
البارت التاسع عشر

كالولي اكتب فرح وانسه الحزن ورتاح...
اعترض بيدي القلم والدمع مني طاح...
اجروح عدنه شكثر ومنين نلكي افراح...
لو مات كلي الزرع هم يفرح الفﻻح...
لو ثكل ليل الحزن ﻻشمس تطلع بعد...
طول علينه الفجر والكمر ظوه وراح...
روحي مدينه صفت مابيها غير اشباح...
اصرخت صرخة حزن موش المؤذن صاح...
الله أكبر صحت حسبالهم ذباح...
حامد : احجي فضيله شنهي شجرى
فضيلة : صحت ايه صحت تعالو بسرعه
حامد : الحمدلله ربي
يمامه : شصار مو دمي نشف
حامد : ايه صحت
الحجية جميله: الْحٍمَدٍ للـّہ والشكر دخيلج ياام البنين نخيتج وماقصرتي
يمامه : امشي بسرعه نروح يله
الحجية جميله: اخذني يمه وياك
حامد : يمه البت هسه صحت بس يستقر وضعها اخذلج ليها لاتخافين
الحجية جميله: يمه گلبي طاك عليها خذني اشوفنها من بعيد وارد
حامد : يله يمه امشينا
ودق : ماما اخذيني وياج فدوه اشوف ايه
يمامه : بنتي بس تصحى وتكدر تحجي والله اخذج ويايه بس خلي نشوف وضعها بالاول
واختج همسه منو يبقى يمها
ودق : والله اشتاقيت اشوفها
يمامه : ادري بنتي بس وضع اختج لحد هسه ممعروف بس نشوف وضعها اجي اخذج
احلام : خيه الْحٍمَدٍ للـّہ على سلامتج بتج
يمامه : إٱللـِْﷻـِْﮭﮧ يسلمج تسلمين احلام مقصرتي فضيله كالت شون عيونج على البنات وخاصه همسه الله لايوجع گلبج على عزيز ولا غالي
احلام : خيه الدنيه تكاطعت شنهي وبناتج حسبت بناتي بس طمنينا على ايه انه احبنها عبن فقيره ومالها حس
يمامه : ان شاء الله يله مع السلامه
احلام : الله وياج
يمامه : رحنا نركض على المستشفى احس الطريق شطوله صار وجسمي كله يرجف
ابراهيم : اول مشفت ايه تفتح وتسد بعيونها وانه تسودنت ركضت على الطبيب ممنوع ندخل بس دخل دخلت وراه ماتحملت
الدكتور : اطلع بره اخي بس نفحصها
ابراهيم : دكتور واليرحم والديك بس اطمن عليها
الدكتور : بس نفحصها وادخلك والله انت شصير منها
ابراهيم : ابن عمتها
الدكتور : بس اشوف وضعها وابلغكم
طلعت والوبن عليها وامي تمشي ولازمه السبحه وتسبح وترجف وخابرت عليهم لان انه مااكدر اخابر مابيه جسمي كله يختض (يرجف) اريدن اطمن عليها
الدكتور تعطل يمه يمها شنهي
فضيلة : يمه غير يشوف البت والدكتوره وياه لازم يفحصوها لاتنسى هي رادت تموت والله حياها على كيفك ويه نفسك يمه
يمامه : وصلنا بسرعه الطريق حركه حرك حامد من السرعه وطبينا نركض ولكينا الطبيب هسه طلع من عدها
حامد : السلام عليكم بشرنا دكتور شلونها ايه
يمامه : طمني فدوه اني امها
الدكتور : حالياً مؤشراتها الحيويه جيده مقارنه بحالتها بس كسور الايد والرجل قويه ولازم تنتبهون على وضعها احتمال يتاخر شفائها انتي والدتها روحي للدكتوره رجاء راح تفهمج كم نقطه لازم تنتبهين الها بالتعامل وياها نوعاً ما وضعها استقر بس لازم تراقبوها وماعدها اله العافيه
يمامه : الْحٍمَدٍ للـّہ ربي وكمت ابجي زين دكتور ادخل اشوفها فدوه
الدكتوره : روحي للدكتوره بالاول وبعدين ادخلي الها الزياره حالياً شبه ممنوعه بس لان انتي امها راح اسمحلج وبمرور الايام تكدرون ادخلون الها وتطمنون اما اليوم بس امها
حامد : المهم تكوم بالسلامه شكراً دكتور ماقصرت
يمامه : رحت ركض للدكتوره رجاء ويايه حامد ميعوفني وين مااروح مثل ظلي دخلنا للدكتوره وسلمنا
شيخ اذا مصارت زحمه اريد الام وحدها
حامد : اعتذر اخذو راحتكم انه بره
يمامه : دكتوره شبيهه ايه خوفني الطبيب هي مو عدت مرحله الخطر
رجاء: شوف ام ايه البنيه متعرضه لأغتصاب وهذا الشى راح يأثر على حالتها النفسيه بشكل كامل وشفتي بنفس اليوم انتحرت تره لعبالج عدت مرحله الخط منعرف شنو الي بعقلها ماطول حاولت تنتحر بكل سهوله وبدون تردد معناها تكدر تعيدها وهم بسهوله
يمامه : غير اموت كولشي ولا يصير بيها شى
رجاء: الي مثلها طفله صغيره تألمت وعاشت مشاعر من ابشع مايكون وهوايه مثل حاله ايه تقتل نفسها لان متتحمل الي صار بيها وشفتي بنفس اليوم شمرت روحها من السطح الي عليج تنتبهين الها كولش واياج تغفلين عنها اله من تحسين حالتها تحسنت واني افضل توديها طبيب نفسي لان الي مثل وضعها ميفيدها غير الطبيب النفسي هو راح يعالجها وضع بنتج استثنائي لازم تقدرون كولشي تسوي اي ردت فعل اتسوي هو نتيجه كميه الالم والصدمه للتجربه الي مرت بيها وها ياريت بعد متكدر توكف على رجلها تجيبيها اليه للعياده حتى افحصها داخلياً واشوف مدى الضرر الي صار مكدرت اهنا افحصها بسبب وضعها الصحي وهاي مجموعه من الكريمات حتى ميبقى اثر لذولاك الوحوش الله ينتقم منهم بجسمها لان شفت شون مأذين صدرها وجسمها ادهني اله يومياً وره متطلع من المستشفى حتى لتشوف جسمها متأذي ويتأزم وضعها اكثر مما هو متأزم والله يعينج على الايام الجايه والحمدلله على سلامتها
يمامه : تسلمين دكتوره مقصرتي
طلعت واني ابجي يعني بنتي مكان متكعد تقرا وتحضر لمستقبلها تكعد تاخذ علاجات وادويه حتى اطيب من الاغتصاب وكل عمرها متجاوز ١٤ سنه الله يقبلها
حامد : شنهي الكالته الدكتوره
يمامه : لازم ننتبه الها لان احتمال تحاول تنتحر مره ثانيه
حامد : لاتكولين هيج لو اعرف اخلي حرس عليها ومااخلي شى يميها
يمامه : كعدت على الكرسي الي بالممر وابجي حامد بنتي ادمرت شون اعالجها شون اطيب جروحها الدكتوره انطتني مراهم وكريمات حتى لايبقى الاثر بجسمها زين الاثر راح من جسمها والاثر الي بگلبها والي بروحها شون بيه شون اعالجه وهي تنزف من گلبها وروحها
حامد : الله كريم انتي حطي عينج بعين الله وان شاء إٱللـِْﷻـِْﮭﮧ تعدي على خير وانه اعرفنج قويه ينامه وبنيتج محتاجتج لاتنهارين من تشوفج هيج راح تتعب كوني قويه حتى تعدي هي بقوتج وصلابتج
يمامه : شون اكون قويه وبنتي ضاع مستقبلها وحياتها سويت المستحيل حتى ميتأذن وهاي تاليتها بأيدي اروح اشتري كريمات حتى اوخر اثر الاغتصاب بيها اريد اموت مدااتحمل الي كاعد تعيشه ايه
حامد : اسم الله لاتكولين هيج لاانتي ولا هيه تموتون انتم اعزاز الگلب واذا صار بيكم شى اتأذه مااتحمل كومي يمامه وكولي الْحٍمَدٍ للـّہ البت ردت لينا وامسحي دموعج وادخلي عليها خليها تشوف ضحكتج حتى ترتاح لا تعبيها اكثر مما هي تعبانه
وانه التآمرين بيه يجرالج بس ترجع ضحكت أيه وترد واشوفنج مرتاحه
يمامه : رحت امشي بخطوات مثقله اني حيل متلهفه اشوفها وبنفس الوقت خايفه من ردت فعلها دخلت واباوع عليها مغمضه اجيت يمها بستها من وجهه الي خربه الانتحار هاي الخدود الي كلهم دم ومتفحات كلهم خطوط وجروح وذابلات صفر اوف ياكسرت روحي گلشي ولا الضنه كولشي شفت بحياتي من الم بس مثل الم بنتي واذيتها الجبل نفسه ميحمله وينهار
يمامه : الراحت ولت مني يوم مااجيت هنا
حامد : كومي روحي للبت واطمني عليها والله كريم
ايه ماما ايوته تسمعيني حبيبة امج افتحي عيونج واسمعيني وكامت تون بهدوء وبحه صوت ااااه ماما وينج
هياتني يمج ياروح امج وابوس بيها على كيفي اكعدي ماما موراح انجلط من وراج تقبلين امج تتأذه كومي حبيبتي وصيري زينه لخاطري
أيه : فتحت عيني واشوف ماما فوكايه نزلت دموعي احس روحي گلبي كولشي بيه يبجي ويه عيوني
يمامه : لتبجين ياروح امج هسه تصيرين زينه وترجعين احسن من الاول ليش هيج يابنتي موتيني عليج ليش تقبلين هيج تعيشيني برعب جنتي دوم تكولين اني ماأذي ماما اني اكثر وحده بيجن احبها وما أذيها شفتي ردتي تموتيني
اششش لتبجين گلبي اذا تحبيني صيري زينه لخاطري تره اموت بلياج مااتحمل اني الي مصبرني على عذاب الدنيا وضيمها انتن بناتي واي وحده بيجن يصير بيه شى مااتحمل اموت
بستها ورجعت نامت اثر المسكنات لان الالم الي تحسه وره مفاقت كولش قوي
بقيت يمها شويه وطلعت لان ممنوع ابقى
حامد : هاا طمنيني
يمامه : الحمدلله بس تتألم وتون
حامد : اكيد چا غير صحت من الموت
امشينا نرد للبيت انتي مو ردتي تسبحين وتبدلين ملابسج
يمامه : شلون اعوفها بس عفتها شويه صحت مااريد اتحرك اخاف تصحى ومتلكاني
فضيلة : خيه انه يمها لاتخافين ردي للبيت واخذو امي شوفو حالها نعست مابيها تحرك رجولها
الحجية جميله: چا شبيه انه اضلن هنا ماارد اله اشوفنها
حامد : يمه يومين بس تصير احسن وينقلوها لغير غرفه اجيبج الها هنا الانعاش وممنوع دخولها ليها
الحجية جميله: چا بس يمامه تدخل شبيه انه اكرص ومااخل عليها
حامد : حجيه وروح ابويه يومين واردج ليها تشوفها وشسوين سوي امشينا للبيت لاتتعبيني كل وحده منجن يرادلها گلب مامدشن يتحمل عنادجن
يمامه : رجعت للبيت سبحت وطول مااني بالحمام بس ابجي اتذكر شكلها ونتها بگلبي لو جسمها الي كله رضوض شسوي ياربي لازم اشوفلي حل بقائي هنا يدمرني ويدمر بناتي لازم اتلاحك الهن مكافي ايه والي صار بيها
طلعت للغرفه نزعت الدشداشه الي لابستها لان كلها مي مااحس غير الباب تنفتح وجنت بس بالداخلي وجان يدخل حامد
حامد : دخلت اشوف وين صارت يمامه تاخرنا وراي شغل اردها للمستشفى واروح لشيوخ عندي وياهم كعده وفتحت الباب واشوفن يمامه وانه جفلت هي من الخجل تغطي روحها وانه مثل العطشان واريدن ارتوي منها ومن كل مسامه بيها
يمامه : غير ادك الباب قبل متدخل
حامد : چا هيه غير حجرتي اكو واحد يدخل لحجرته يدك الباب
يمامه : ممكن تطلع اكمل لبسي حتى لنتأخر
واشوفه يجي بأتجاهي بهدوء واني ارجع ليوره الحاله الي اني بيها كارهه الدنيا كلها حسيت بعيونه الرغبه صار مده طويله ممتقرب مني والي صار بينا احسه كسر كولشي يربطني بيه اطلع حامد خلي ابدل
حامد : اشششش سحبت الثوب (الدشداشه) منها وشمرته بالكاع وهي رجفت وانه روحي كلها لهفه رغم گلشي هاي حب عمري هاي طيرتي وانه مشتاق ليها
يمامه : حامد اياك تلمسني
حامد : جان اسحبها باتجاه صدري وهي دفعتني
يمامه : گتلك لتلمسني
حامد : سحبت شعرها لمسته بأيدي وشميته
يمامه : حامد اترجاك كافي وهو فاصل بغير عالم ويشم بشعري ولازمه بطرف ايده
حامد : ما تحملت وانه اشوفنها هيج اله اشمنهاوصلت لرگبتها واخذت نفس وشميتها بعمق وغمضت عيوني افييييش ياريحه الجنه
يمامه : نزلت دموعي اعرف بيه يحبني وتحمل سنين بس الي انكسر بينا بعد ميتصلح
حامد : لاتبجين مااسويلج شى بس ردت اشمنج ترد رويحتي وانه احسج بأيدي
يمامه : انت تعرف انكسر كولشي بينا وهواي امور تغيرت جان يحط ايده على حلكي وسكتني
حامد : انه تلوعت بحبج ٢٠ سنه وتعلمت على اللوعه موجديده عليه لاتعلمين اليتيم على البواجي وانه بحبج يتيم ياطيرتي واعرفن گلبج هذا وحطيت ايدي على گلبها مابيوم يصفى لحبي هذا خسرته يوم ماتسودنت وامنت بأخوي ودزيت عشكي الج بورقه وهاي الورقه جانت اعدامي لاتهمين بيه انه دوم هيج اونن على ريحتج وردت اشمنها واروح نزلت شلت ثوبها وانطيته ليها وطلعت
يمامه : كعدت بالكاع ابجي مدري ابجي عليه لان ادري بيه يحبني وگلبي يوم بعد يوم يقسى عليه لو ابجي على نفسي الي خسرتها بسبب الظلم الي صار بيه لو ابجي على الايام الجايه الي مااعرف شون اتعامل ويااه ويه الكل لان وصلت لمرحله الانهيار والضياع ولكل منتظر مني الزله ولازم اكون قويه لخاطر بناتي واني اصلاً منتهيه احس روحي حتى اضعف من ايه احس اني محتاجه بناتي يحضنوني مو اني احضنهم ربي ارحم بحالي تعبت من كولشي اللبس الي عليه مستثقلته مو بس روحي شون بيه واني داخله على حرب جديده ولازم افوز بيها حتى اكسب بناتي ساعدني يارب ساعدني ماعندي غيرك
حامد : خابرت حسان هااا خويه شسويت دبرتها لا
حسان : والله ياشيخ الوادم گلها وياك بس انت تعرف بيت السماج طبابين شر ويموتون على الفصول والعطوه ماضلها گلها ثلث تيام (٣ايام) وتخلص ويبدون يهجمون علينا
حامد : ماانطيهم ابراهيم لو اعرفن انطيهم روحي يكتلوها وهو يطلع منها
حسان : انه وياك بس شون اذا ماقبلو على الديه (الفلوس) يجوز حتى فصليه يطلبون ويكسرون ظهرنا ذوله اوادم مامنهم خير وانت تعرف خيرهم چلب
حامد : چاشون يحسان انه مااعوف ابراهيم لو اعرفن احركهم گلهم واسويها دم للرچاب چافوك كسرتهم لينا بس انه اخافن على سمعه البت واله وحگ علي چان مابقيت حي بيهم گلها اشردها بس سمعت البت الي اطيح وابراهيم حلفني مااجيب سيرتها
حسان : ياخوي تهدى الموضوع جبير وماينحل هيج بس اخاف يتولونا غدر وانه اعرفهم غدارين انتبه لاهل بيتك وخاصه الولد مازن وابراهيم لان منير بغداد ماعليه شى بس ذوله هنا ويفترون ومدايرين بال حذرهم خويه مانريد نخسر واحد منهم
حامد : انه اخوك يحسان حتى احرگ الديره كلها ماابقى زلمه منهم لو كضو واحد من ولدي تعال ليه نروح لشيخ سعد وشيخ صبري منتظرينا هناك وياهم سيد حميد ندانش (نحجي) على الموضوع لازم اجمع الكل ونحلها
يمامه : كملت حامد نروح
حامد : يله حسان انتظرك خويه مرلي مودع بالله
انداريت عليها شدي الشيله زين چا هيج تنشد
يمامه : مشدوده عدل بس انت اذا شعره وحده طلعت تكوم تعيط
حامد : چا عليمن لابستها ونص شعرج طالع هاي عياره ياتلبسيها عدل ياتنزعيها
يمامه : على اساس من انزعها تقبل
حامد : يمامه انه بعقلي الف شغله لاتوتريني جري يعدل يبنت الناس انه موبحال كل شويه افكر شلبست شحطت انتبهي لوضعج ولا گل شوي منبهج انتي موصغيره واعلمنج
يمامه : حاظر اكو اوامر ثانيه
حامد : لا وامشينا تاخرنا
حامد : وصلت يمامه للمستشفى وقبل متنزل
يمامه انتبهي على روحج وعلى ايه وشتحتاجين اتصلي لاتضلين ساكته وتلوبين لاتنسين انه رجلج
يمامه : الله كريم ونزلت من السياره وهو راح مااعرف وين
حامد : خويه حسان تعال اخذ فضيله من المستشفى ردها للبيت انه ماالحك الوادم تنتظرني ومااريدن اتأخر وياك جيبلي العقد نسيت العقد مال الكاع مال سيد حميد لاامر عليك توصلها وتاخذ من فضيله العقد علمتها وين مكانه تنطيك العقد تجيبه وياك
حسان : تامر خويه بعد ناسي شى
حامد : لا سلامتك
حسان : وصلت للمستشفى ودخلت بالممر السلام عليكم
ابراهيم ويمامه وفضيله : وعليكم السلام
شونها بنتنا ان شاء إٱللـِْﷻـِْﮭﮧ احسن
يمامه : والله بعدها بس تتحسن ان شاء الله بمرور الوقت
ان شاء الله خير يله ام ابراهيم امشينا
فضيلة : وين
حسان : چا شنهي وين للبيت اردج حامد عنده شغل مايجي
ابراهيم : يمه روحي ويه عمي انتي تعبتي لاتضلين هنا
فضيلة : لا ماارد اضل يمك يمه وين اعوفنك وحدك
حسان : مو هو صغير وتخافين عليه ابراهيم زلمه ويله ماضل وكت واريد العقد اخذه واوديه لحامد
يمامه : روحي فضيله تره انتي كولش تعبتي روحي ارتاحي وباجر تعالي
فضيلة : يمه ابراهيم گلبي نار عليك شلون اعوفنك
ابراهيم : يمه رحمه لأبوي كافي تعامليني وجني طفل يحبي ( يزحف) روحي ارتاحي وانه ماعلي شى لاتخافين ربج الستار
فضيلة : ونًعــٌٓمُٓ باإٱللـِْﷻـِْﮭﮧ انتبه لنفسك يمه ولاتطلع بره المستشفى اخافن عليك
ابراهيم : لاتخافين توكلي بالله
فضيلة : صعدت ويه حسان وانه كوه اجر النفس صار اكثر من ١٩ سنه من اخر مره جنا وحيدنا دوم اشوفنه من بعيد لو يم اخويه لو اسلم وادخل مااكعد قريب عليه
لو حتى من نكعد لزم اكو احد ويانه واليوم الحظ سواها وجمعني بيه وحيدنا
حسان : شونج فضيله
فضيلة : چا هيه شبع كل شويه شونج وشونج الحمدلله زينه ارتاحيت
حسان : ليش عصبيه چا غير اطمن عليج بت عمي واطمن عليها
فضيلة : وتطمنت اسكت وسوق وردني للبيت بسرعه سكتت واني ارجف قربه مني يوترني يذكرني بلجره منه وگلبي يأذيني انه ولدي بطولي مااريدن افكر بسنين عمري الي ضاعت بسبته
حسان : ليش ترجفين وتفركين بيدج
فضيلة : چا شون ماافرك تريدني صنم ركز بالطريق ومالك دخل بيه
حسان : فضيله
فضيلة : من اشتعلت فضيله ومن ساعه السوده الولدتني بيها امي
حسان : شبيج تسودنتي
فضيلة : حسان وليرحم عمي لاتسولف وسوق
حسان : بعدج ترجفين وانه يمج بعد تذكرين لمستي ليج تذكرين عشگنا
فضيلة : اسكت مااريدن اذكر گلشي انت كسرت الگلب والروح انت غلطت العمر الي ليومنا هذا اسب الساعه الحبيتك بيها
حسان : معناها بعدج تحبيني
فضيلة : لا احبنك ولا شى بس البشر لزم يلعن الشى اليأذي وانت أذيتني
حسان : موبيدي بت عمي گلشي مقدر
فضيلة : اسكت لاتگلي موبيدي انه حبيتك ثلث سنين وروحي تعلگت بيك وعبالي تحبني مثل مااحبنك
حسان : يشهد الله وحگ ابو فاضل تصعدين وتنزلين ويه هوا الريه (الرئه)
فضيله : چا من اجيتك اتوسلك لاتخليني اتزوج المرحوم حسين مااحبنه احبنك انه شردت (انهزمت) واجيتك بليله كشره وكسرت وجه اهلي حتى لاتخليني اروحن لغيرك وانت تكلي احبنج بس مااكدر اخذج عبن والله شنو ابن عمك حسين خطبني گبلك وانت تستحي من اخويه وكتلي المره التكسر وجهه اهلها ماتصير ام جهالي وضربتني وطردتني وانه رديت خايبه لوما سترك ربك ورديت بدون مايعرف احد بشردتي چا هسه انه ميته وشابعه مي ورد
اسكت واليرحم والديك
حسان : انه جنت صغير واخافن لااخسر عمي وحامد وشردتج چان سودت وجوه الگل مو بس وجه اهلج حتى اهلي لاتنسين انتي بت عمي واليجري عليكم يجري علينا وراح يصير دم بينا عبن محد يصدك انتي شردتي وحيدج عبالهم انه نهبتج ( انهزمنا اني وياج ) ردت انتي ترفضين وراها اسير عليج واخطبج
فضيلة : لا لا گتلي ردي لهلج ماتصيرلي مره عبن عفت اهلي واجيتك ابجي لاتخليني اروحن لغيرك شون انطاك گلبك تزوج غيرك
حسان : الله اعلم هاي السنين شون تمر علي وانه اشوفنج ويااه لحد هذا يومي اجي ادخل لبيتكم ادورن عليج يفضيله انتي حب العمر وانه خسرتج ثول مني واجيتج وتعذريت وانتي قافله
فضيلة : اسكت جاي وره ماعقد علي حسين والله بطلي وتعاركي ويه اهلج واعقد عليج انته العملته بيه خلاني اسب كل لحظه حبيتك بيها وهسه لاتفتح جروحي لاتنسى انه هسه ام وليدي بطولي وليداتك بطولك الي راح مايرد جاي تفتح جروح عمرها ١٩ سنه بعد وكت خليهم يصيرون ٤٠ وتعال عاتبني
حسان : انتي هسه عزبه (ارمله) اكدر اخطبنج وتصيرين زوجتي شتكولين
فضيلة : ضربت على صدري عزه انه هسه مكان ماازوج بنتي ولدي اتزوج انه واصيرن مضحكه تسودنت يحسان كبرت وخرفيت
حسان : لاتنسين بعدج صغيره وانه احبنج واعرفج تحبيني لاتضيعين الجاي كافي الي راح انه شاريج والله شاهد احبنج ويه طلع النفس
فضيلة : هههههه اسكت حسان انت ماسويتها وانت شاب تسويها هسه ووليدك بطولك ومريتك ذهب حبابه وتحبك لاتكسرها كافي كسرتني انه لاتصير ظالم يولد عمي
حسان : چا الشرع حللي اربعه وانه مامقصر وياها وانت وحد وهيه وحد ارضي فضيله الله عالم بحالي تمنيت اشوفنج ولو مره حتى احاجيج واكلج ارضي اتزوجج واليوم رب العالمين سهلها فكري بيها مااريد اكول لحامد اله اخذ موافقتج
فضيلة : اسمع يحسان يبن عمي شيال همي لو تنطبك السما ع الگاع مااصيرن مرتك مو انه الي انذل وترجعني مكسوره گل هاي السنين وترد هسه تصلح الي سويته الي ينكسر مايتصلح ويله وصلنا تعال انزل اخذ العقد ولاتفتح بعد جروحي گلبي مايصفى عليك ليوم الدين
نزلت اركض وانطيت العقد لبشرى تودي لحسان انه مااريدن اشوفنه ترجف اعضاي من اسمع اسمه چا شون وهو وياي شون حجيت وتحملت مابجيت مالطمت على كسرته الي مااعرفن منين اجتني القوه الْحٍمَدٍ للـّہ كدرت ارده وانه قويه بس داخلي اضعف من طفل رضيع يبجي يريد امه مااسامحك يحسان طول ماانه عايشه
يمامه : اباوع على ابراهيم يروح ويجي يلوب خطيه وماكو احسن من هاي الفرصه يشوف ايه بيها لان ماكو لا خاله ولا امه
تعال ابراهيم
ابراهيم : امري عمه
يمامه : اني رايحه للكافتريا اجيب جاي واجي
ابراهيم : عمه شون ترحين انه موجود اجيبلج الي تردي
يمامه : لا اريدك تدخل لأيه وتشوفها اكيد راح ترتاح من تحسك يمها هي حيل تعزك واني مااتأخر
ابراهيم : شلون يعمه اعوفنج ترحين وحيدج اجه ابويه حامد شگله
يمامه : لتكوله شى اذا سألك عني كوله راحت للحمام يله انتبه عليها فدوه مااتأخر
ابراهيم : بس راحت ام ودق وانه ركضت دخلت عليها جانت نايمه اباوع عليها وگلبي ينزف ويه كل قطره نزفتها أيه تجرأت ولزمت راسها وبسته ريت الالم بيه ولا بيج اصحي وردي عمري احطنه جوه رجلج بس اصحي مااريدن اخسرج
لاترحين مني انه عايش واشتغل لأجل من اطلبنج من ابويه مايرفضني لان ماعندي شغل وكاع گل فلس المه حتى اتزوجج لاتضيعين تعب عمري وترحين مني
أيه : فتحت عيوني وشفت ابراهيم فوك راسي ويبجي باوعت عليه وتذكرت من شافني مصلخه وغطاني درت وجهي عنه استحي اشوفه وهو شافني بأحقر وضع ليش عشت ليش ياربي رجعتني للدنيا مااريد اعيش كولشي محجيت بس درت وجهي منه
ابراهيم : لاتصديني أيه باوعي عليه تره انه ابراهيم لونسيتي متحجي بس دموعها تنزل بهدوء مديت ايدي ومسحتهم جفلت
لاتخافين ردت امسح دموعج
أيه : كمت اخاف من كولشي مااخلي بشر يلزمني بس ماما اخاف من الهوا اذا مر وطخ بيه رجفت من لمسته ردته يطلع بس صوتي مكعد يطلع اريد احجي مكعد اكدر ليش حاولت افتح حلكي واحجي مكدرت
يمامه : هاا ماما كعدتي ليش تبجين شبيج
ابراهيم : والله عمه مااعرف اريد اسمع صوتها ماكو ماتحجي
يمامه : ماما ايه احجي شبيج ساكته بس عيونها تتحرك
روح صيح الطبيب فدوه اركض
اجه الطبيب وفحصها
الدكتور: توقعت يصير هيج بيها هذا رد فعل طبيعي لحالتها اعتقد راح تبقى مده متتكلم بسبب الصدمه
يمامه : بس من صحت حجت ونت وصاحت ماما
الدكتور : لان مجانت واعيه بشكل كامل العقل ادراكه قليل وهسه من استقر وضع العقل رفض تقبل الحياه واول شى راح يسوي يسيطر على مخارج النطق والحروف الي عدها وراح ترفض تحجي اتمنى مطول هاي الحاله
يمامه : يعني شكدتقريباً
الدكتور : حسب الحاله النفسيه حاولو تكونون قريبين منها ودوم احجو وياها لحد متقرر تحجي وترجع لوضعها الطبيعي
شكراً دكتور تعبناك
يمامه : كعدت يمها ابجي ياربي معودت صحت وكلت راح تصير زينه هلمره الحظ يشلع گلبي ويخليها متحجي خرب حظج يمامه منين متجيبيها سوده مصخمه
حامد : رجعت تالي الليل تعبان حيلي مهدود وجوعان دخلت لأحلام لكيتها نايمه
فضيله هم نايمه ومااشوفن غير تنزل فرحه
فرحه : السلام عليكم ابو جنه
حامد : وعليكم السلام الله جابج تعالي سويلي اكل تعبان واريدن أكل وانام وگلهن نايمات
فرحه : من عيووني ونزلت ركض اسويله اكل وكتله
اصعد فوك بالغرفه ارتاح شوي واجيبلك الاكل
حامد : صعدت حللت ملابسي ( بدلت) وتمددت على الكرويت واجت فرحه
تفضل ابو جنه بالعافيه
حامد : الله يعافيج بنيتي تعالي اگلي وياي
فرحه : لا تسلم ماكله مجوعانه
حامد : اعذريني بنيتي ماسألت عليج وشغيلتكم تأخرت
فرحه : فدوه الك المهم راحتك
حامد : شنهي هذا بوجهج وبيدج شنهي هذا الزراك
فرحه : هااا وكعت
حامد : چا غير تنتبهين على دربج طيحتج مبينه قويه عبن ايدج وجهج گله متأذي
فرحه : اي كولش قويه (انكسرت ايدها الگلبه احلام كطعتني تكطع احجي بگلبي)
حامد : شنهي صافنه وين رحتي
فرحه : هااا لا سلامتك مبين تعبان كمل اكل مبين مااسوي الچاي واجي
رحت ركض حضرت الجاي وحضرت معجانه وحطيت بيها مي دافي وملح وصعدت
حامد : هاي شنهي بيدج
فرحه : بالاول تفضل الجاي وحط رجلك هنا
حامد : شنهي هذا وحطيت رجلي ااااخ اويلي بويه
فرحه : كعدت يم رجله افرك بيهم سحبهم بسرعه
حامد : كومي بويه مايصير شسوين لاتعبين نفسج
فرحه : اذا الك مااتعب المن اتعب بروح ابوك خلي افرك الك رجلك حتى ترتاح
حامد : بويه مااريد كومي لاتعبين حالج
فرحه : دااحلفك والله مااتعب عفيه اعتبرني جنه وكعد اتفركلك رجلك هم تكولها كومي ميصير
حامد : هاج بويه اذا مثل جنه هاج وبدت تفرك رجلي وانه گل الالم طاح جنت حيل تعبان صار ايام ماارتاحيت حتى نوم مثل الوادم مانايمه
فرحه : بديت افركله بكل هدوء وقررت اقربه مني بهدوء ماافرص نفسي حتى لينهزم مني شويه شويه وراها سحب رجله ومسحتهم اله
حامد : شكراً بويه ماقصرتي
فرحه : تدلل اروح اذب المي واشيل الغراض اخذ راحتك
حامد : انزل جوه انام بحجرتي
فرحه : ليش متبقى هنا
حامد : لا ارتاحن جوه يله بويه وانتي نامي وارتاحي ماقصرتي
فرحه : مضغطت عليه حتى كل ميريد يجيني مااريده ينهزم مني خلي اجرب الهدوء ويااه
حامد : نزلت ادخل يم احلام واحس رجولي تاخذني لحجرتها هيه ماكو دخلت ليها واشوف ثوبها الي جان لابسته من دخلت عليها مشمور على جربايتها سحبته واشمن بيها اووف ياريحتج تمددت على الجربايه واتخيل من جنت اتقرب عليها وتغمض وتعيش اللهفه والنشوه وياي جنت احس روحي ملك زماني لحد ماطاح الزمن عليه وكسر گلشي ما داملي الفرح غير ايام وراها اخذ گلشي مني نمت والثوب بحضني تعودت انامن على ريحتها
يمامه : مر ٦ ايام من فاقت ايه بدت الحمدلله تاكل شوي شوربه لو تشرب سوائل خفيفه سوده عليه هاي الي جانت تموت على الاكل روحها بيه كامت خاشوكه الشوربه كوه تحطها بحلكها ايدها مشدوده ورجلها وكوه نحركها الدكتور كتب الها على خروج كال تبقى مده بالفراش لحد ميطيب الكسر وراها جلسات علاج طبيعي وكل ٣ اشهر لازم تحاليل كامله لوظائف الجسم
حاله ايه اطول يله تشفى بس مومهم المهم هي عايشه وكدام عيني احنا نعتبرها عايشه بس الي يشوفها يكول ميته مع وقف التنفيذ متحجي كوه تاكل عيونها شارده بغير مكان وضعها يبجي الصخر بس مابيدنا شى نحاول بكل الطرق منتركها وحدها اما ابراهيم كل يومين يروح ساعه يسبح ويبدل ملابسه ويرجع ولا تركها بس هي مااعرف ليش متتقبل وجوده وكل متشوفه ادير وجهه حاولت افتهم منها بس ماكو فايده ولا كلمه تنطق
مازن : يله عمه نرجع كملت كل اوراق الخروج
يمامه : حامد وين
مازن : عنده شغله
يمامه : گلبي لعب الوجوه صفره وابراهيم ومازن وجوهم موطبيعيه عدا حامد ميعوفني بهيج يوم لو الدنيا تحترك شصاير
اخذنا ايه بالعربانه وخطيه مازن انطه فلوس لثنين ممرضات حتى يساعدونا نصعدها بالسياره لان متتقبل احد يلزمها كوه صعدناها وهي الطريق كله تباوع من الجامه وعيونها مغوركه اوف يابنتي حاسه بيج والله روحج تلوب
وصلنا واستقبلونا بالذبيحه جوه رجلها وهي اخترعت وضمت وجهه بصدري بدون صوت
أيه : من شفت الطلي كاعد يذبحو اتذكرت الحقراء شون لزموني وذبحوني بكل گلب بارد ردت اعيط بس مكدرت لزمت ماما وحضنتها مااريد اشوف منظر الدم كل مااشوف دم اتذكر دمهم القذر الي صار عليه
يمامه : تعالي فدوه فضيله خلي ندخلها جوه تخاف من الدم
الحجية جميله: هله يمه ايه الدار ﻧـورت ياروح حبوبتج ردتج لينه سالمه تسوه الديره كلها
ولج يمصخمه البت ليش ماتحجي
يمامه : عمه منعرف فقدت النطق كالو حاله نفسيه مده وترجع زينه
الحجية جميله: سوده بوجهي يبعد رويحتي بعدوينج ولا بيج اخذيها خلي ترتاح ولا تشيلين عينج من عليها تره اكسر راسج اذا غفلتي منها
يمامه : لا عمه شون اعوفها
فضيلة : اني هم عيني عليها شعدنا غير ايوته
ودق : ركضت عليها وابجي اوف حبيبتي الحمدلله على سلامتج
ماما ليش متحجي ايه شبيهه عفيه
يمامه : مابيها شى ماما تعبانه مده ويرجع صوتها لتخافين
ودق : اني يمج مااعوفج والله لزمت ايدي حيل ماما انطيني اني ادفع العربانه مالتها
همست بأذنها ولج ضعفانه صايره تخبلين واخيراً ضعفتي بدون رجيم جان من الاول شمرتي نفسج حتى تضعفين ردت اغيرلها جوو بهذا كلامي شفتها ابتسمت والدموع بعيونها اوف اروح فدوه لأبتسامتج وبستها من راسها واخذتها للغرفه وهمسه هم تبوس بيها
باوعت عليها مااعوف بعد لو الدنيا تنگلب صيري قويه ايوته وارجعي النه تره ماعندي اغلى منج انتي وهمسه وماما
أيه : اسمع كلام ودق وابجي اعرف بيها تحبني بس متوقعت لهلدرجه وتبوس بيه وتبجي واني ابجي وياها بس مااكدر انطق
يمامه : اكولج فضيله وين حامد
فضيلة : والله ياخيه العطوه خلصت مال الطركاعه وحامد يركض هنا وهنا ليله ماينامه
يمامه : إٱللـِْﷻـِْﮭﮧ يساعده وتفض على خير ابراهيم وين راح
فضيلة : اخذه ابن خاله مازن لبيت جدته لان هنا خطر عليه جنت مأمنه عليه بالمستشفى محد يندل دربه بس هسه اذا بقى هنا يأذوه ادعي خيه يرد ولدي سالم لبيته وشغله انه دااموتن وانه اشوفن وليدي وحيدي دمه مهدور
يمامه : حقج والله ماالومج واعرف بيج مقهوره من الي صار بس هذا حظنا يافضيله انتي واني اثنينا مشلوعات گلب بحياتنا وجهالنا بس كون تعدي على خير
فضيلة : اوف يخيه گلبي يريدن يطك الله موجود مايعوف عبده
نزلت فرحه وكالعاده لابسه دشداشه كصيفه والمكياج طوخ والشعر مفتوح تلام بيها احلام من تكول عروس السبعه
فرحه : الْحٍمَدٍ للـّہ على سلامة بنتج خاله شونها هسه
يمامه : الْحٍمَدٍ للـّہ شكراً
فرحه : صدوك خاله فحصتيها لبنتج اخاف حامل شى تعرفين هيج عمر يجوز تحبل بسرعه
يمامه : هي حجت هيج لو اني قطره دم مبقت بيه شنو قصدج ولج احترمي نفسج
فرحه : شگلت اني ياخاله حجيت لمصلحتكم والله هي مصار ١٢ يوم على حادثتها بس الحذر واجب واني من باب الخوف على مصلحتكم
يمامه : شوفي افراح مدري فرحه اذا انفتح هذا الموضوع مره ثانيه وحجيتي بيه وحق من انزل القران كتلتج على ايدي اياج اسمع كلمه منج افتهمتي وابتعدي عن طريقي تره بعدج متعرفين يمامه من تتخبل شسوي
احلام : عوفيها ليه هاي چلدها يحكها تعلمت على النعل اله تاكل گل كم يوم مني نعال على گل جلدها على گفشه على صلخه بالكاع يله ترتاح تعلمت على الدبغ
فرحه : شنو مااسمحلج لتشوفين ذيج المره سكتت ومكلت لحامد عليج تقديرا. للظروف الي هو بيها بس والله اذا كمشتيني هاي المره اكوله واخلي يگلب البيت عليكم
احلام : انه بحياتها كلتها ماشفت ازبل منج وانه لازم انظفن البيت منج تعالي شوو ونزعت الي برجلي وشمرته عليها وجان تركض ليفوك وادردم
اصعدي وكضي لسانج لا اصعد وراج وحگ موسى ابن جعفر واشمرنج من فوك
يمامه : عوفيها احلام خلي تولي طفله وماعدها عقل
احلام : شبيها طفله خيه مو تركض وره الزلمه ام الرجوله ماتنام جواه أسكتي خيه اني وياج جهال موو هيه ذني مفتحات بروبه يلعب بالزلم لعب عوفينا منها انه ليها اله اتوبنها دواها عندي گليلي شونها ايه
يمامه : الْحٍمَدٍ للـّہ بس متحجي احلام شون كوليلي
احلام : خيه كولي الْحٍمَدٍ للـّہ البت سالمه شوي شوي تردوترجع جنها العافيه بس انتي لاتعوفينها وانه اخلي جنه بنتي تنام يمها
وتسولف وياها وانت هم انتبهي لصحتج وضعج مخربط
يمامه : ليش الي صار هين عليه يااحلام اروح اشوفها من رخصتج
احلام : روحي خيه هسه هاي بنت الچلب وين اخذت نعالي شمرته عليها ومااعرفن وين وله اروحن ادورن عليه واضمنه اكيد يفيدني اركعه بيها
يمامه : مر اليوم بهدوء وبليل نمت يم بناتي ومشفت حامد حتى مأجه يشوف ايه وين صار بالي كله يمه ليش داافكر بيه شجاني
ثاني يوم نفس الشى هم ماكو شنو السالفه وحسيت حركه البيت موطبيعيه وجان تعيط فضيله وليدي يمه دخيلك ربي كله ولا وليدي
الحجية جميله: بسچ من صخام بويهج خلي نشوفن شصار وانتي تثغبين ماردو الوليدات وانته تلطمين اصبري
فضيلة : يمه يكولون صايره مواجهات بينهم مامتفقين چا هم نعيد الي صار قبل سنين يمه ولدي ولد فاضل واخوتي كلها هناك شون ماالطم شوووووووون
الحجية جميله: ربج الحارسهم وانه اعرفن اخيچ سبع
فضيلة : يمه ذوله تولوهم وناس تضرب چيلات على ناس
يمامه : شكوو شصار عفيه شبيكم
فضيلة : الحكي ولج تصخمنا وتعزينا
يمامه : شكوو ياستار شصار
فضيلة : كعدو بالفصل البارحه ومااتفقو واليوم المفروض يردون يدزون شيوخ من غير محافظه عليهم وذوله تولو ولدنا وصارت بينهم مواجهه
يمامه : عزه وتالي
فضيلة : مانعرف گلشي دكيت على مازن وانه احجي وياه واسمع الصوت جنهه جبهه وانفتحت يخطه وانكطع الخط ادكن وماكو شون گليلي راحت زلمنا
يمامه : حسيت بألم بمعدتي على خوف على رهبه حسيت بلحظه اوكع كافي دم كافي قتل والله تعبت من يوم متصخمت واجيت هنا واني حياتي عباره عن موت وقتل ودم واصوات طلقات شدعي عليك ياعادل من طيحت حظي وجبتني هنا
ومنحس غير طلقات بالجوو والكل يعيط شكوو كالو الشيخ حامد تصوب وجان تكب العيطه
اني من حلات روحي ركضت للشارع يعني شنو مات لا مااريده يموت رغم كولشي مااريد يصير بيه شى حسيت شى من حياتي وراح اخسره ركضت للشارع واشوف يمكن ١٠٠ رجال والدنيا مگلوبه وجان تعيط جميله
الحجية جميله: ادخلي مايقبل حامد مره تطلع والزلم كلها بره
يمامه : عمه دااشوفه
الحجية جميله: هسه يدخل انه اعرفن ابني اسد ماتهزه الجيلات تعالي ادخلي ولاتسودين وجهج اذا شافج هيج طالعه اله يحرك عشيرتج مايرضى احد يشوف خيالج عشتوو
يمامه : اريد افتهم گلبج ميوجعج على ابنج هذا ابنج الي متصوب
الحجية جميله: انه ابني شيخ وسبع والي تخلف سباع ماتخاف وحامد اعرفنه وگلبي بارد يرد وليدي لحضني وانه مااجذب گلبي ادخلي ولاتعاندين لايدخل ويطلع الضيم كله بيج
يمامه : والله عجيبه هاي المره مرات اشوفها حتى گلب ماعدها من القسوه الي شايلتها ومرات احس ماكو احن منها راح تخبلني وجان يدخل حامد وكله دم وحسان وحمود ومازن وابن عمهم لازمي واني گلبي خمشني وطفرت عليه شو هذا خزرني يعني ادخلي جوه
بله هذا من كل عقله واني احجي على امه والله هو اضرب من امه
فضيلة : خيه ادخلي مايقبل حامد
يمامه : متكوليلي شبيه
فضيلة : خيه احنا ولدنا دمهم حار واذا عشگو مره يغارون عليها من روحهم ومايرضون يشوفون خيالها الهوا ماسامعه بعشك الشروگي هذا عشگ المهابيل يعشكون لأخر قطره بدمهم ويفدون نفسهم لعشكهم واخوي يعشكج يمامه ويغار عليج من الدنيا گلها مايتحمل هذا الشى بدمه يفور وربج اذا طخج الهوا يتخبل مو عاد كومه زلم وانتي بنصهم زين وماسحلج ودخلج لحجرتج تحملي ًواعرفي طبعه
يمامه : شمدريج يحبني
فضيلة : انه گلشي اعرف بعدين نگعد واسولفلج هواج شعمل لاخوي
مازن : يابه دخيلك امشي نروح للمستشفى ميصير هيج وضعك خطر وتنزف
حامد : الجيله طلعت لاتخاف خيطه ليه واسكت مااروحن لمكان تأكدتو الولد مابيهم شى
مازن : كلشي مابيهم بس ٢ مصوبين الحمدلله ماخذين احتياطنه
حامد : انه اعرفهم نكسين واتوقع الغدر منهم ليش كتلكم انتبهو الْحٍمَدٍ للـّہ عدت من باجر الصبح نتحرك عليهم
مازن : يابه الشيوخ اخذو عطوه خلي تفض ونروح وين متريد
حسان : خويه مازن صح تفض العطوه وننعل اهل اهلهم بس صير زين وكلشي التريده تامر بيه
حامد : اخذني لحجرتي
سندوه الولد واني اباوع اشر الهم على غرفتي دخلت شويه والكل راحو للديوان اخذهم حمود وطلعو بقى بس مازن وحسان
وجان يصيحني مازن
عمه ابويه يريدج
يمامه : مشيت بسرعه وفتحت الباب وشفته يريد ينزع الدشداشه كوه ويجر بيها وكلها دم اوكف اوكف هو هيج اصبر جان اتقرب منه ربگتني نظراته تريد تاكلني واني جبت مكص كصيت الردن ونزعته على كيفي اباوع عليه جان يحط وجه برگبتي ويهمس بأذني خفت اموتن ومااشوفنج ومااشم ريحتج
يمامه : اسم إٱللـِْﷻـِْﮭﮧ عليك
حامد : انه ميت من زمان طيرتي ميت بحبج واليوم خفت ياخذامانته وماتعرفين شكد احبنج
يمامه : يحجي وبوجهه كل الحب واللهفه رجف گلبي من كلامه قربه يوترني يتعبني مااريد احبه حيل مااريد اتعلق بيه مااريد انجرح كافي الي صار صح هذا وحد وعادل وحد بس هو لو يحبني ميتزوج عليه واني تعبت من هاي العيشه الي خلصتها خوف وتوتر وقهرودم وخاتمتها ضياع بنتي لازم انهي هذا العذاب صح الوقت ممناسب بس لازم كولشي ينحط اله نهايه كافي الي خسرته مامستعده اخسر بعد وقربه مني يخليني ضعيفه ومااريد اضعف كاافي
تقرب حيل ولزك جسمه على جسمي واشوف ايده تنزف
حامد اوكف ايدك تنزف لازم تتخيط
حامد : چا وگلبي النزف صار سنين شون اخيطنه گليلي شون وانتي هسه بحضني واشمن ريحتج ومااكدر اضمج بضلوعي
يمامه : حامد شكد تحبني وجان تطلع تنهيده منه وبصوت عالي حسيتها من گل گلبه وروحه
حامد : اااااااااااااه بكد رحمه ربج موو رحمته اكبر شى انه احبج بكد رحمته
يمامه : اذا تحبني طلكني وعوفني لحال سبيلي اني وبناتي
انصدم وفتح عيونه وخرني من حضنه
حامد : شنهي شتكولين
يمامه : طلكني حامد كافي تعبت مااريد ابقى عايشه هاي العيشه كافي جبرتني وادمرت اني تره المحبه مو بالقوه حياتي وياك انتهت واذيتني واذيت بناتي من جبتني هنا اذا تحبني صدوك وتريد يبقى بگلبي الك شويه محبه طلكني
غمض عيونه وفرك وجهه بأيده واحس النزف زاد من اعصابه وجان يتقرب مني ويهمس

كتبولي رأيكم وتعليقاتكم عالاحداث
واذا شفت اكو تفاعل انزللكم بارت جديد ب ١٢ بليل😜