سجينة الروح

part 20

الله يرحمه كالو مات ذكراهم
ماوفقنه الله ومانسيناهم
جانو بيدنه وجانو جمر بالصيف
شبعنه أجوي لكن ماشمرناهم
يتعمدون فوك أكلوبنه أيدوسون
وكرهنه أكلوبنه بس ماكرهناهم
نحلف نبتعد بس ندري جذابين
ايطيح الزعل من نتلاكه وياهم
مثلنه همه بشر بس ليش ينشمون
شبينه نختنك لومالكيناهم
مشي الدخان مايعرف لوين أيروح
عرفنه أدروبهم المن تبعناهم
بس عثره بدرب لافي لا جمار
لشلعان الگلب لمن جنيناهم
نحاجي الروح لجيبين طرواهم
هذوله الناس من البال شلناهم
چا غير انتهينه شبي گلبنه أيفور
لوشفنه بشر بالدرب حاجاهم
ونشتاقلهم وكل مايجينا الليل
انطلع بالصور وانسولف وياهم
يـاكون الگلب بي باب بي شباج
چا من الگلب كلهم طردناهم
حامد : اسمعي هاي الچلمه وحطيها هنا واشر على راسها موانه الي تمشي مره چلمتها عليه وتريد اسوي المايعجبني
يمامه : حامد افهمني
حامد : اششش مااريدن ازعلج جه انتي تعبانه من مصيبه ايه هاي الچلمه اذا انعادت اندمنج يمامه تره ضل خيط صغيرون اذا انكطع راح تشوفين حامد ثاني خليني متحملج والج معزه بگلبي وساكت ومتحمل هواي شغلات ومشيت هواي شغلات واكولن يجي يوم وتعقل وتفكر صح
بس انتي يوم بعد يوم تتمادين ودواج عندي
يمامه : يعني شسويلي قابل دااكولك المحبه مو غصبحامد : وياج انه المحبه مو غصب بس البقاء هنا غصب قبل اگلج عوفي البنيات ولي وين ماتردين هسه لا انتي متزوجه وزلمتج شيخ غصب عنك تحطين عقلج براسج واتجرين عدل
يمامه : حامد البنات تعبو وتأذو حرام تظلمهن فدوه انت كعد تشوف حال ايه حتى حجي متحجي باوعت على ايده واني احجي اشوف الدم كام ينزل من كل جهه
ياربي هاي شنو ايدك خلي اصيح مازن وجان حيل يسحبني على صدره ولازم ايدي بتك ايد وعصرهن حيل حسيت اصابيعي راح تتكسر بيده
حامد : انه ماارضى اجبرنج على شى وصگد المحبه مو غصب واعتبري روحج من اليوم مالي شغل بيج بس غصب عنج كدام الوادم كلها تسمعين كلامي
يمامه : ااااخ حامد شبيك اصابيعي انمردت بيدك عوفني وشوف حال ايدك النزف زاد
حامد : دفعتها يله ولي صيحي مازن يخطها الي وحضريلي ملابس نظيفه بسرعه
يمامه : ركضت على مازن واني اعرف فتحت على نفسي جبهه جديده بس لازم اكون كدها حتى احافظ على بناتي وميتأذون كافي الى متى ابقى اشوف حياتنا تدمر واسكت
مازن : اجيتك يابه وبديت اخيط ايده واباوع عليه يرجف وضعه موطبيعي
شبيك يابه اكو شى
حامد : لابويه سلامتك
مازن : مبين عمه خوش مأديه الواجب
حامد : هاا ولك وضربته على راسه شلك بهذا الحجي
مازن : محد يضوجك ويأذيك ويگلب حالك غيرها
حامد : بويه متشوف حالنا شونه والدم الي صار بيه العشاير
مازن : والله يا يابه شفت الدم بطولك وتمشي واحس عندك عادي وضعك مرتاح رغم متصوب هسه اشوف اعصابك تعبانه بس طبت يمك
حامد : انه هاي ماتوب اله اگتلها خلاص
مازن : هههههههه موكتلك هي السبب
حامد : كمل بويه كمل انه الها
مازن : والله يابو مازن ماتكدر گلشي تسوي اني اشوفك بالمضيف ويه الشيوخ والمصايب اسد اله وياها انعم من الكناري
حامد : ولك كوم مني اله اكسر ضلوعك
مازن : ههههههههه متتحمل الحق يله كملت الخياط صيحها خلي تنظف المچان وتحضرلي غريضاتي
مازن: حاظر يابه
يمامه : رحت يم ايه مااكدر اعوفه شفتها نايمه وبصفها ودق تقرا وهمسه كاعده بالكاع وهم تقرا بقيت اباوع عليها وسوده عليه الايد مربطه وتعبانه اويلي عليج شون اعالج روحج اندكت الباب فتحتها طلع مازن
عمه ابويه يريدج
ماشي جايه
ماما ودق انتبهي على اختج ديري بالج تغفلين عنها
ودق : حاظر ماما
يمامه : رحت اشوف حامد شيريد دخلت محتاج شى
حامد : حضريلي ملابسي
يمامه : حضرت دشداشه اله بدل وتقربت منه حتى اساعده جان يأشر بيده مااحتاج
تره هي مو شغله عناد حركه بسيطه ينفتح الخيط
حامد : قابل جاهل انه كدامج وخري انه ابدل
بدل وكمل ديطلع كتله وين رايح هيج جان سؤال عابر جان يجاوبني
رايح يم مرتي تره مو بس انتي مرتي وياج اثنين لو نسيتي
يمامه : لا منسيت روح وعافني وطلع واني بگلبي احجي هذا عود يحبني ويدور على نسوانه لو ميحبني شيسوي طلعت وراه ردت اشوف وين
فضول لااكثر كلت اكيد يم احلام شو هذا خله وصعد فوك واني تخبلت هسه شجاني هستوني طلبت الطلاك منه وهسه ارجف لان صعد يم ذيج الخبيثه ولو حقه ذيج حلوه وصغيره بله هو هسه مو متصوب المن ركض الها
اوف شيسوي خلي يسوي اروح اشوف بنتي احسن
فرحه : اندكت الباب اجيت افتحها واشوف حامد كدامي طرت من الفرح ولا توقعت راح يصعدلي خاصه بهيج وضع ومصوب ويمامه هنا تفضل ابو جنه تفضل ليش واكف ليش مدخلت مباشره للغرفه
حامد : شون بويه وانتي ماخذه راحتج بحجرتج
فرحه : الْحٍمَدٍ للـّہ على سلامتك ظل بالي عليج
حامد : الله يسلمج بنيتي اريد انام حضريلي فرشتي
فرحه : عفيه نام على الجربايه انت مصوب ونوم القنفه ابد مو مريح
حامد : لا بويه هاي فرشتج وراحتج وانه مااريد ازاحم راحتج
فرحه : عفيه لتكول هيج والله انقهر من تسوي فرق بينا تعال ولزمت ايده واخذته للجربايه وانتي وين تنامين
فرحه : تريد يمك
حامد : هااا لا اخذي راحتج اروحن انزل لحجرتي
فرحه : لا لا وين متريد انام بس ابقى هنا بالغرفه راح انام على القنفه المهم متطلع
حامد : تمددت وانه اباوعن على روحي ليش صعدت هنا هاي البت ماتگعد راحه وانه احس بروحي مجروح ومااريدن اغلط واخذها بلحظه ضعف هاي دخيله عندي ومابنيتي اتزوجها اريدن افضل طلابتها واردها لاهلها
فرحه : منمت محتاج شى
حامد : لا سلامتج نامي بويه لا يضل بالج
فرحه : ممكن احجي وياك اذا منعسان
حامد : تحجي
فرحه : اني اعرف بموضوع ايه كله
حامد : كعدت على حيلي شتعرفين
فرحه : شوف ابو جنه البيت كله يدري وخاصه من انتحرت صار الحجي بفلس وخاله احلام هي الي حجتلي وكاعده وتتشمت بيمامه وبناتها وحيل بيها والله اخذ حوبتي وانكسرت بتها وعسى ماتنكسر الثانيه وتموت بحصرتها واشكال الحجي الي ميلبس ثوب عليه اني متت قهر ورديتها بس تعرف هي لسان ومكدرت عليها وضربتني ومن شفت الزراك بيه هذا كله ضرب احلام لان دافعت على ايه
حامد : شنهي احلام هيج تسوي
فرحه : واكثر ويجوز ادكول لكل النسوان ولأهلها والبنيه تروح سمعتها لتنسى مهما صار تبقى يمامه ضره احلام واكيد تتشمت بيها بس اني كولش انقهرت مرضيت هيج تسوي وخفت احجي ومتصدكني وانكتلت منها وهم مكتلك بس اخاف تفضحكم شون بعدين اني اخاف من لسانها
وجان يطفر من فراشه ونزل يعيط
حامد : لج احلام وينج
يمامه : سمعت عياط حامد هز البيت هز طلعت اركض شجاه
الحجية جميله: شبيك يمه صابك شى
حامد : وين هاي الحقيره احلام اليوم انعل يومها اله اطيح حظها انطيتها عين
الحجية جميله: يايمه شجاك تهدى بالرحمن بعدك صوابك حار لايصير بيك شى گلي شبيها المسودنه
احلام : امر ابن عمي
يمامه : واشوف حامد عيونه نطت بس شافها وجان يلزمها من شعرها صدوك خفت منه عبالك غير واحد
احلام : ااااخ شسويت والله مامسويه شى
حامد : شون تحجين على يمامه وبناتها انه موش حجيت وحذرت موضعها ماينفتح كدام احد شون تحجين كدام فرحه وفوكاها تشمتين بيها وتضربين فرحه ومأذيتها
احلام : وروح عمي جذابه هاي وحده ًحٌٓــُيه مسمومه لا تصدك حجيها انه شون اتشمت وانه اضربتها لان لسانها زفر ويرادله كص هي الي تشمتت موش انه وروح عمي
يمامه : حامد مستحيل احلام تتشمت اصلاً محد وكف ويه بناتي وداراهن غيرها
حامد :من شوكت وانتن حبايب
الحجية جميله: يمه حامد على كيفك ويه نفسك بنت عمك انه شفتها شون تراعي الله بنيات عادل وماقصرت وياهن
حامد : غصباً عليها هم عايزه تأذيهن
احلام : وحگ هو علي انه ماحجيت ولاتنفست هاي وحده زباله وگل همها تهجم البيت
حامد : انه اعرفنج احلام چا نسيتي طلايبج ويه نسوان اخوتج لو ويه الوادم يوميه طلابه وتعال يحامد شيلني لج سنين وانه متحملج بس كله ولا هذا الموضوع اليوم اربيج گلب حتى تجرين عدل
وجريت شعرها وهي ترافس بأيدي والله جذابه
الحجية جميله: يمه حميد عوفنها البت ماعملت شى لك يمه راح تموت بيدك
يمامه : ركضت على حامد شفته تخبل على احلام وكطع شعرها وبتك ايد اول مره اشوفه هيج تعلمت عليه دوم هادئ وحتى صوته قليل يعيط بالبيت بس اليوم تكول عبالك ذب حركته بأحلام منا اني مصار ساعتين من لعبت بأعصابه ومنا هاي المسمومه مدري شحجت وياه وخبلته وخطيه احلام وكعت بيها حاولت افك ايده من شعرها خرب وهو ضخم ولا كدرتله هاي عود متصوب لو بصحته الكامله شون
ضلت امه تعيط واني وفضيله نريد نوخره منه ماكو وذيج الحقيره فرحه واكفه على الدرج تتشمت اني اعرف احلام متطلع منها رغم اعرف بيها تحب المشاكل ولسان بس گلبها طيب حتى ابد محسستني بشغله ايه ومن تحجي ويايه اطيب خاطري اله ذيج الساقطه السانها ينكط سم تالي حاولت ادفعه دخيلك بروح ابوك عوفها بروح اخوتك حامد البنيه بيها قلب لتموت
حامد : وموتت الچلاب طكت مرارتي منها
احلام : ابجي واحجي والله ماحجيت شى هاي فرحه تجذب هي حجت على ايه وانه ضربتها انت ليش ماتصدكني
حامد : من سوالفج چم عركه دخلتي بيها وتحلفين واطلعين جذابه
فضيلة : خويه انت شون تصدك بفرحه وتجذب احلام
حامد : چا نسيتي لو اذكرنج يفضيله طركاعات احلام شگد شكيتها منها هسه صارت صاچه
الحجية جميله: انه اعرفنها مسودنه ودوم مصايب وراها بس هاي المره البت مظلومه لج فرحه چا اريدن وحده خيره ماكو حتى انت يثوله طلعتي مسمومه تعالي ليه
فرحه : نعم يمه
الحجية جميله: دهر صابچ انتي شصخمتي وخليتي حميد يتسودن على البت
فرحه : والله يمه ماكلت شى بس اني جنت اسولف ويه ابو جنه وكلت احلام هي الي كالتلي على موضوع ايه وحجيت اله شكالت خاله احلام وشون ضربتني وانتي من جنتي جايه من المستشفى بليلتها ما سمعتيني وصدكتي بيها
الحجية جميله: چا انه اعلمنج تصيرين سبعه وام بيت هلنوب تهجميه للبيت
احلام :اليوم ابيج احرگه بس الزمنج انه حجيت ولا تنفست انتي ًحٌٓيه تفترين بالبيت وتسمعين لكلامنا وتذبيها براسي حتى تردين الي سويته بيج انه الج
فرحه : شفت هاي كدامك شون تتوعد الي وكمت ابجي
حامد : ولج كافي حسج والج عين تحجين
يمامه : اني مصدكتها حامد عوفها
حامد : اسمعي لج ترحين لبيت ابوج ماتضلين هنا وخلي اشوفن يامره تحجي بموضوع البت وحگ الشده الي احنا بيها اعلكج من شعرج وچيله براسج واذبنج للچلاب تاكلج
احلام : رايحه والله بس لاتضربني
يمامه : لا عفيه وين تروح
حامد : لاتسودنيني هاي حجت على بتج وتشمتت وانتي تدافعين عليها
يمامه : كتلك مصدكتها متسويها وانت هم لتسمع لكلام هاي تره انت متعرفها زين ومن ضربتها احلام لان هي الي حجت وتعدت بالكلام
حامد : البت يمكم واصله ليكم النهار گله بحجرتها بس بعد اثنين نسوان واتفقن على وحيده اله يطيحن حظها يله يرتاحن
يمامه : رجاءاً حامد شنو قابل دااكذب اني كتلك مصدكه احلام وخطيه لدزها لبيت اهلها
احلام : لا خيه اروحن لهلي ارتاح انه اذا اضل اهنا اطكن واموت لو اموت فرحه انه اعرف بروحي
حامد : ولي ولت روحج
يمامه : خطيه دفعها لأحلام وطبت تركض
ليش هيج وياها والله خطيه جان صدكتها
فرحه : قابل اني اكذب خاله
يمامه : انتي اسكتي شدخلج احد وجه الكلام الج
الحجية جميله: يله فضنها ولن گل وحده لحجرتها چا نسوان چثيرات بلا نفع بس لساناتهن بطولهن ومسودنات احنا بيا حال وهنه تكافشن ناقصات عگل وعلي
حامد : اصعدي فرحه انه جاي وراج
فرحه : من عيوني صاعده من رخصتكم
يمامه : باوعت على حامد ميصير هيج غير المفروض تسمع لأحلام خطيه والله ظلمتها
حامد : باوعت عليها صفح شنهي هاي الحنيه النزلت عليچ چا هيج گلبچ رجيج (رقيق) عليها
يمامه : مو قضيه رقه بس اني الي شفته المره مسوت شى وشالت بناتي على راسها انت مثل مسمعت لهاي فرحه جان سمعت لأحلام ياشيخ انتم موعدكم بالديوان تسمع للظالم والمظلوم لو هنا يختلف الوضع
حامد : يمامه توخرين من يمي لا اكمل حرگتي بيج تره انه اليوم صاعده عندي واريدن ابتلي بواحد ولي لحجرتج ولاتدوخيني
يمامه : تقربت عليه وهمست بأبتسامه خبث هاي كله لان كتلك طلكني (مااعرف بذاك الوقت شبيه ليش احب استفزه )
حامد : لا جه جنت مرتاح ويه فرحه ومااريدن تنقهر هاي عزيزه عليه ومااحبن احد يمد ايده عليها
يمامه : هنا تخبلت انت مو كلت علمود موضوع ايه شو هسه طلع لان احلام ضربتها
حامد : هيه الموضوعين بس انه مااريدنها تنام مكدره (مقهوره ) ومكسور خاطره
يمامه : من اشتعل خاطرها وعساها نامت ماكامت وعفت وطبيت لغرفتي ارجف
حامد : ههههه تحبيني ام خشم اليابس وتغارين بس تجذبين على روحج انه الج عرفت دواج
يمامه : صار يومين والوضع هادئ حامد من يوم عركته ويه احلام مشفته دوم يجي بليل يصعد يم المسمومه وهي طبعاً تسرح وتمرح بالبيت احلام صكارتها وطلعت من البيت والحجيه تعوم على عومها ومتحاجيها وخطيه فضيله حايره بأبنها الي لحد هسه خاتل بيت جده وكل ميريد يطلع تبقى امه ادك وتلطم ولخاطرها باقي حابس روحه بالبيت الوضع كله متوتر الكل منتظر تخلص العطوه ويشوفون شراح يصير
أيه : متمدده على الجربايه وعيوني على الشباك المفتوح الي يطب منه هوا بارد واحنا بشهر ١٢ / ٢٠٠٦ الاشجار خضره تتحرك ويه كل نسمه اطخها اباوع على الداير مدايري احسه سراب وكأني بصحراء وحدي صح محد عايفني ماما ودق والكل يمي بس اني احس روحي وحيده مكسوره تعبانه وضعي كله مدمر ايدي ورجلي مااكدر احركهم روحي ميته صوتي ميطلع عندي ايدي اليمنى زينه اكدر احركها بس بضعف كمت اكتب لماما شوي من احتاج شى صافنه وافكر بكولشي وبنفس الوقت احسد الطيور لان اطير ومحد يكدر يقيدها مثل مااني قيدوني الوحوش واذوني صافنه وجان تندك الباب وماما يمي
فتحت الباب وجان يطلع ابراهيم جنت مشتاقه اشوفه بس من اشوف وجهه اتذكر حادثتي واستحي وضايعه بين اشتياقي وبين مستحاي درت وجهي عنه
ابراهيم : السلام عليكم عمه
يمامه : هلو حبيبي برهوم تعال ادخل شجابك متكولي هسه فضيله ادك وتلطم والله شلعت گلبها لأمك
ابراهيم : اجيت اشوف ايوته وارجع وجبت الها هاي الحلويات كل النوعيات الي تحبهم
يمامه : ليش كلفت نفسك ياامي تسلم حبيبي تعال اكعد بين مااجيبلك شى تشربه
وجان تلزمني أيه وتحرك براسها يعني لتروحين
يمامه : مااتأخر ماما شبيج ابن عمتج هنا جاي يسلم عليج
أيه : مردت ماما تطلع مااريد ابقى وحدي وياه حتى مااريد اباوع بوجهه اخاف يحجي بلي صار اخاف يسألني اخاف يجرحني كمت اخاف من كولشي ومن اي احد
ابراهيم : بطه أيوته باوعيلي ليش متحطين عينج بعيني أيوته بس باوعيلي مشتاق اشوفنج والله اجيت بطريق كله موت وعلى ساعه يكتلوني بس كله علمود اشوفنج
أيه : انقهرت عليه وانداريت وعيوني كلها دموع
ابراهيم : دخيل ربج لاتبجين گله ولا دموعج احرك الديره گلها لجل قطره من عيونج
أيه : صوتي ميطلع ردت اكوله تعبانه بس هو يباوع بوجهي ويحجي وكأن يفهمني من نظرتي من دموعي من حركه راسي
ابراهيم : انه اعرفن خايفه وتعبانه بس شى وحصل انسي لازم تريدين مثل الاول اريدنج قويه سباعيه توكفين بوجه الگل انه مااريد اشوف الانكسار الي بيج
أيه : كمت ابجي واحجي بداخلي شنو الفايده اني مكسوره اني وحده انتهت حياتها بسبب حيوانات اغتصبو طفولتي منو راح يتقبلني شون امشي بين الناس مرفوع راسي واني شرفي ماكو شون اريد اعيط بس ااااخ صوتي ميطلع وكمت حيل ابجي وكأن بدموعي عياطي
ابراهيم : تقربت منها كافي لتبجين اليوم ماكو بجي تجين ويايه نطلع للشط الي تحبيه نفتر هناك شتكولين
أيه : جنت محتاجه اطلع اشم هوا بس مو ويه ابراهيم استحي رفضت بحركه براسي
ابراهيم : لخاطر برهومج تره بعد مااجيب الج حلويات واكلهم كلهم اني
أيه : ابتسمت واني بعيوني الدموع
ابراهيم : تره مو بس انتي محبوسه اني هم اختنكت حابسيني بيت جدي مثل الجاهل يعني مميت عليج اني هم اريد اغير جو
أيه : رجعت ابجي بقوه واتذكر كل الي ديصير بيه بسببي ضيعت الولد فوك مااني ضايعه شنو ذنبه يتختل وعلى ساعه يصير بيه شى
ابراهيم : كافي دخيل ربج كتلج لتبجين تره اشيلج هسه واخذج افرج بماان انتي ضعفانه هسه وتنشالين بعد شهر اشيلج بتك ايد
أيه : ضحكت واشرتله على الورقه والقلم كتب اله صيح ماما
ابراهيم : عمه تعالي وًٌيْـنج
يمامه : اجيت اركض شبيك ابراهيم ايوته بيها شى
لا سلامتها بس اريد اخذها اطلعها شويه
يمامه : شون اطلعون الجو بارد وصحتها بعدها موزينه وانت خطر عليك ميصير هيج ياابني
أيه : كتبت لماما اختنكت اريد اطلع ويااه
يمامه : ماشي تدللين ابراهيم عينك عليها
ابراهيم : افديها بروحي لتخافين
جبت الكرسي المتحرك ردت اتقرب منها صارت عدها ردت فعل اني عرفت تخاف تقربت منها
لتغمضين عيونج وباوعي عليه راح اشيلج حتى اخليج بالكرسي لان امج متكدر لتخافين مني بس ابقي مركزه ويايه
أيه : اخاف يلمسني بس من گلي هيج وافقت وجان يشيلني وجسمي كزبر وخفت ردت اغمض جان يحجي ايوته افتحي عيونج يله ويايه
فتحتها وبقيت اباوع عليه لحد محطني بالكرسي حطت ماما شال صوف على جتفي واخذت الدفتر والقلم اخاف احتاج اكتب شى واخذني ابراهيم وطلعنا اول موصلت للباب حسيت نفسي اول مره اشتم هوا من يوم مصارت حادثتي
يله امشينا يبطه
كام يمشي ويغني صوت ابراهيم حلو بالغناء جنت كولش احبه جان يغني اغنيه حبيتها
عليك أسأل عليك أسأل
عليك أسأل من الرايح ومن الجاي
واحن ليك احن ليك احن ليك
مثل الراعي ويحن للناي
واكول اصبر على غيابك وفي وماتنسى احبابك
لابد ماالشمس تكسر وراها فياي
كتبتله هاي الاغنيه مال منو
ابراهيم : هاي مال فاضل عواد
أيه : حلوه كملها جان صوته ريفي عذب وكولش حلوو ويدخل الگلب
جان ابراهيم ويه الكل يحجي بلهجه العماره اله ويايه دوم بلهجه بغداد بس جنت احب لهجه العماره اكثر بحلكه وصلنا للشط وكف الكرسي مقابيل المي
بقيت اباوع على الشط واشوف المي شون يمشي تمنيت اصير هيج نظيفه مثله امشي بهدوء وريحتي طيبه بس اني وصخه ذوله لوثوني ونزلت دموعي
ابراهيم : انداريت عليها لكيتها صافنه وتبجي اعرف هاي الفتره من اصعب فترات عمرها والدمعه ماكو اسهل منها صديقة عيونها صارت هي هسه فقدت الثقه بالكل واول شى فقدت الثقه بنفسها تقربت منها وكتلها تدرين من مات ابويه كلت الحياه انتهت كلت مراح اكدر اخذ مكانه خفت لاامي تصير مثل خيريه وتعوفنا وتتزوج رغم ادري من حقها بس خفت كلت اذا منير ومازن عمهم اخذهم ورباهم احسن تربيه اني منو ياخذني ذولاك بله ولد اخوه وغصب عنه يتحملهم بس اني شنو ذنبه يتحملني واكيد راح تصير تفرقه بينا وخاصه احنا متقاربين بالعمر
وبيت جدي روحهم محامليها وامكانيتهم ضعيفه بقيت اكل بروحي ايام لحد محسيت بالامان من احتواني خالي حامد وصار اليه الاب اني صّـْْح تمنيت ابويه عايش واعيش بظله بس هم الْحٍمَدٍ للـّہ ربج متركني ودزلي خالي حامد وجان يستاهل اصيحله يابه شفته حنين وعمره مقصر عليه حتى بالدراسه دزني خالي حال ولد اخوه لبغداد
أيه : جنت صافنه على ابراهيم واول مره يحجي هيج حسيت كأن اول مره يفتح گلبه لبشر وكل كلمه منه حاستها
ابراهيم : بس اني تركت الدراسه
أيه : كتبتله غلطت من تركتها
ابراهيم : تدرين ليش عفتها
أيه : اشرت براسي لا مااعرف
ابراهيم : علمودج
أيه : استغربت من كلامه واشرت اني ليش
ابراهيم : ردت الم مهرج جنت اشوفج نجمه عاليه ومستحيل اكدر اوصل الها انتي وين واني وين كلت لازم اشتغل واكون نفسي ويصير عندي مكان الكاع اثنين وتلاثه حتى من اتقدملج ميرفضوني
أيه : صاعقه ونزلت على راسي ابراهيم يحبني خفت ورجفت ودمعت عيني
ابراهيم : لتباوعين هيج تره تأذيني اني عمري ماأذيج انتي متعرفين شنو بالنسبه اليه انتي الحلم الي دااركض عليه بأيدي ورجلي حتى احققه انتي النجمه الي اتمنى اصعد للسما اوصلج وانزلج بحضني كتمت حبي الج من جنت صغير ودوم اشوفج كدامي تكبرين واكول بلكت الله تحس بيه وخايف حيل لابيوم ياخذوج مني
أيه : كمت ابجي وارجف وكتبته واخذوني ولوثوني وحلمك ضاع واني ضعت ضعت صرت وحده مغتصبه قذره نسيت الي صار لوما بأيدك غطيتني شفت شسوو بيه دمروني
ابراهيم : سحبت القلم من ايدها وكتبت
انتي حلمي الي عايش حتى احققه وراح ابقى طول العمر اركض بأيدي ورجلي لحد متصيرين نجمتي الي وانتي بعدج نظيفه وشريفة وتاج على راسي وراس العشيره كلها اياج بيوم اسمعج هيج تحجين مااحب مرتي تبجي وتوصف روحها بصفات محلوه
أيه : زادت دموعي اني احب ابراهيم مثل اخويه بس ليش حسيت بكلامه
كتبت اله اني اعتبرك مثل اخويه
ابراهيم : عادي اني هم اعتبرج اختي وحبيبتي وزوجتي وبنتي بس امي لا شيخلصني من فضيله هههههه
أيه : ابتسمت وابجي بنفس الوقت رجعت كتبت اله اني ماافيدك الف وحده تتمناك اني وحده ميته شسوي بيه
ابراهيم : الالف والمليون من البنات يرحن فدووه لهاي واشرت على رجلها انتي عندي تسوين كل البنات
أيه : انساني ابراهيم وعيش حياتك اني خلصت حياتي قبل متبتدي
ابراهيم : سحبت القلم مردت بعد تكتب وكتلها تدرين ليش اليوم اجيت واعترفتلج بحبي
لان باجر تخلص العطوه ومااعرف الله شضاملي واذا صار شى بيه والله اخذ امانته اريدج يوميه من تصلين تدعيلي وتجين تزوريني وحطي شغله بالج ماكو واحد بالدنيا حبج بكدي ولا راح يحبج واريدج قويه وسباعيه اريد مريتي تمشي وراسها مرفوع وتكول اني ايه حبيبة ابراهيم ومحد يكدر يمسني بگلمه
اني احبج ايه احبج يااحلى بطه
أيه : حيل تأذيت من كلامه وخفت عليه وبنفس الوقت حبيت كلامه لان من گلبه وعيونه تلمع بيها الدموع وجريت القلم منه وكتله كولها بالعمارجي احلى وجان يحجي بصوت عالي كولش
ابراهيم : اروحلج فدوه انه وگل اهل العماره
لج احبنج اعشگنج عشك المسودن
واموتن على ربج الخلقج ليه
أيه :ضحكت وكتبتله صوتك فضحتنا
ابراهيم : چا انه اريدن كل اهلنا يدرون هاي البطه صارت ليه
أيه : مردت ازيد همومه فوك الهموم شفت الفرحه بعيوني مكافي طيحت حظ الولد وكل الي هو بيه بسببي
كتبت اله رجعني كافي بردت
ابراهيم : تامرين مرتي دخيلك يبو فاضل فض سالفتي واجمعني بيها بالحلال
أيه : كتبتله ان شاء الله تفض والله يحفظك انت احسن انسان شفته بحياتي
رجعني ابراهيم وطول الطريق يغني وفرحان دعيت من إٱللـِْﷻـِْﮭﮧ ينجي ويحفظه خطيه شنو ذنبه يموت بسببي مكافي متت اني وادمرت هو هم يتأذه مثلي وصلني للبيت وشالني وحطني على الجربايه ودعني وراح اجتي ماما تاخذ الدفتر مني ضميته وره ظهري
يمامه : عرفت اكو شى صار من ضمت الدفتر وراها عفتها براحتها المهم شفت بسمتها وجهه احسن من رجعت
يمامه : ثاني يوم خلصت العطوه والدنيا نگلبت جنت خايفه على الكل ابراهيم ومازن وحمود وكلهم اما حامد جان ماخذ الخوف الاكبر بگلبي اني مااعرف مره احبه مره اكرهه مره اعانده كميه تناقضات بحياتي عجيبه بس بهاي اللحظه خفت عليه وناس تروح وناس تجي لليل فض الفصل
جان الفصل هو سجن ابراهيم وديه بذاك الوقت تكسر الظهر ١٥٠ مليون كلها تخبلت بس احسن مما يكتلوه
فضيلة : يبووو ضاع وليدي ومستقبله ولج انهجم بيتج فضيله راح تعب السنين
الحجية جميله: تهدي بالرحمن يمه گلشي قسمه
هذا عهدكم ليه يمه ولدج برگبتنا ولدج يرد مارد يمه ضاع الوليد راح ينحكم اقل شى ١٥ سنه ضعت يمه وضيعتنا وياك انه منو ليه بعدج
الحجية جميله: اذكري الله يمه خاله مايعوفه لزم يسوي شى ويرده لحضنج
فضيلة : خاله ياخال ياعم گلها ضيعت ولدي وتبرو منه
الحجية جميله: شنهي هذا الحجي لاتخربطين حامد گتل نفسه عبن يرده سالم وگال هذا احسن حل گلها چم شهر او سنه ونطيح عليهم عسى يتنازلون وهو حضرله محامي حتى تصير قضيه شسماها اعوذ بالله نسيت هااا دفاع عن النفس ويقل حكمه تهدي تكمزين منا ومنا مصروعه
فضيلة : چا هو مايحرك گلبج عبن مووليدج لو ولد فاضل جان لطمتي وگلبتي عاليها سافلها بس هذا اليتيم منو ليه اله الله انتم گلكم تبريتو ً
يمامه : على كيفج فضيله راح تموتين من الصبح لهسه بس تعيطين وادكين وتلطمين ميصير تفاولين على الولد
فضيلة : انتي اسگتي كله من وره بنتج هيه ضيعت وليدي
يمامه : اني ماازعل منج لان اعرف حقج شتحجين من حركت گلبج وهو ابن الوحيد بس لتنسين شى ابنج رجال واخوه خيته ودافع عن شرف بنت خاله وابراهيم اعتبره ابني والي سواه فضل عمري ماانساه والي صار دمر بنتي هم لتنسين حالها تعالي وسحبتها من ايدها وهي تبجي وفتحت الباب وشوفتها ايه شون كاعده على الكرسي ومربطه ولاحس ولا صوت وحتى حركه ماكو بس عيون تباوع للاشجار شوفي هاي بنتي هاي الي جانت تضحك للهوا نفسها الي جانت تجيج تبجي علمود لكمه وتكولج عمه جوعانه صبيلي اكل قبل الكل وتكوليلها تاكلين وياهم تكولج اي لازم وجبتين مااشبع
هي نفسها الي جانت تتعارك ويه اختها على الحلويات وتجي تتوسل بيج ادزين احد يشتريلها هي نفسها جانت تنام هنا بالكاع واللفه بيدها لو النستله وتجين تبوسيها وتكعديها وتمسحين حلكها جانت حياتها عباره عن اكل وضحك وتكمز بس هسه هذا حال بنتي ضايعه صوت ماكو بس ادموع حركه ماكو لان متكسره وهذا يهون مقابيل الي كعد تحسه من نار بروحها وگلبها من تشوف خواتها يبدلن ويرحن للمدرسه وهي تتفرج عليهن لان متكدر تروح هاي السنه وضاعت عليها ضاعت بنتي فضيله اني موجوعه اذا مو بكدج اكثر منج اني بنتي شرفها وحياتها راحت وانتي ابنج تاج على الراس لان دافع عن شرفه لعبالج مكيفه تره مثل ماانتي منتهيه اني اكثر
فضيلة : حضنت يمامه وابجي وابوس بيها خيه اعذريني والله گلبي موجر على وحيدي هذا تعب عمري يمامه هذا الحيله وسهر الليالي هذا شبابي وعوجبتي بگبرتي انه يوم يوم احسبن لعرسه تالي هسه اكعد اخلص ايام عمري احسب يوم يوم لطلعته من السجن
يمامه : عاذرتج والله ومزعلانه منج وحاسه بيج بس اني متأكده حامد مراح يعوفه لتخافين وربج ويه الحق النا الله ولاراد بقضائه الْحٍمَدٍ للـّہ على كل حال
بقيت خطيه فضيله تنوح على ابنها حقها الله يعينها وحبست روحها بغرفتها وعافت كولشي واني وجنه وبشرى لزمنا البيت هسه يله حسينا بقيمتها شكد جانت تعب وتشتغل خطيه تكول ١٠ نسوان احنا ٣ ومنلحك وهاي البرنسيسه فرحه كاعده وساكته بغرفتها
أيه : سمعت بأبراهيم راح يقضي شبابه بالسجن تعبت نفسياً ومتت قهر عليه دوم اتذكر الاغنيه الي غناها اليه وابجي طلبت من ودق اطلعها اليه اسمعها وسمعتها
ودق : بله هاي اغنيه هلاغاني الظاله هاي اقدم من جدي
أيه : كتبتلها احبها مالج علاقه
ودق : براحتج ست ايوته اليوم راح يجي منير من بغداد
أيه : كتبتلها مااريد اشوفه ابد ولتحجون شى كدامه
ودق : شبيج گلبي رجفتي لتخافين منحجي شى على كيفج
يمامه : صار اسبوع مشايفه حامد يركض هنا وهنا علمود شغله ابراهيم
اليوم انتظرته وبقيت كاعده دخل للبيت تعبان روحه مشايلها صرت بوجهه الله يساعدك
حامد : باوعت عليها وانه صار ايام مشايفها ويساعدج عفتها ومشيت
يمامه : ممكن احجي وياك
حامد : تعبان باجر اي شى اچلي لباجر
يمامه : ماأخرك لان انت هم تطلع من الصبح
حامد : فضيني خير
يمامه : شبيك ليش تحجي هيج ويايه من وره خشمك
حامد : شتريدين اذا تحبين نتعارك مالي خلكج ولي لحجرتج
يمامه : متلاحظ روحك كعد تتجاوز
حامد : اووف اللهم الصبر منك خير ام ودق امريني هسه عجبج
يمامه : هاااا اي هيج احجي بهدوء اكعد عندي شغله وياك
حامد : يمامه فضيني گتلج تعبااان ماتفتهمين
وجان تنزل فرحه
إٱللـِْﷻـِْﮭﮧ يساعدك ابو جنه سوده عليه اكيد تعبان حضرتلك المي والملح حتى افركلك رجلك
حامد : يبعد (ردت اكولن بعد ابوج تذكرت يمامه واكفه وعيونها ناطه من الرجيف بدلت الچلمه ) يبعد ابو جنه ورويحتي عاشت يدج
يمامه : شنووو هذا يتغزل بيها كدامي نار وشبت بيه وافرك بيدي وكتله واني صاكه سنوني روح عيني لرويحتك
حامد : اي والله ام ودق تعبان وانه اريدن ارتاح وفرحه ماتقصر براحتي مره تعادل ١٠ نسوان اداريني صگد تستاهل تكون مرت الشيخ
يمامه : (بگلبي احجي ) من اشتعل الشيخ وفرحه بنار وكاز وصخ
فرحه : يله عيني ابو جنه
حامد : اجيتج اصعدي كدامي هاا يمامه ماتحجين
يمامه : مااتسمم روح الها لهاي المايعه مالتك
حامد : شنهي مايعه شبيها جنها العافيه كافي حديثه وحليوه وتلبط لبط(تلعب لعب) بحضني وتريحني وگلشي اريدن منها تسوي وهي الممنونه وبكل حب ولهفه
يمامه : خرب اهلك حامد راح اعيط واملخه واملخها (بكلبي احجي وارجف على ساعه اعيط) كافي اسكت اعتقد عيب هذا الحجي كدامي اقلها احترم مشاعري
حامد : ليش انتي عندج مشاعر اول مره اعرفن
يمامه : تره هواي كاعد تأذيني بكلامك لتنسى اني زوجتك
حامد : اهااااا والله احلفي والله واصدكنج انتي مرتي
يمامه : حامد شبيك شجاك شنو هذا اسلوبك وعطت بصوت عالي تره مصختها حيل
حامد : جان اكضها من شفتها حيل وافركها
انه چم مره حجيت وگلت حسچ هذا العالي مااهيسه چم مره طلبت بأدب منج تسكتين ولاتعلين حسچ بس چن انتي مثل الحيوان مايمشي اله بالاهانات والضرب
يمامه :ااااخ وخر ودفعت ايده اذاني حيل فركها كولش قوي وعطت شنو حيوان موعيب هذا الاسلوب
حامد : لاتدوخيني اروحن لمريتي وانتي ذاك الحايط وطخي راسچ بيه وعفتها ومشيت
يمامه : تخبلت كمت احجي ولا يمه ولا اندار وصعد فوك وره فرحه متت قهر ودخلت ابجي اول مره يكسر خاطري حامد ويتجاوز عليه ردت اصعد الطخ راس براس رجفني وصعد ضغطي دورت على حبايه وجع راس من كثر القهر الله يشيلك انت وياها
حامد : اصعد واسمعها ادردم واني اضحك عليها شگد جنت تعبان ونفسي ممروده بس من حرگت گلبها واشوفن الغيره بتقاسيم وجهه واعصابها ارتاحيت لزمت يدي وبستها الي كضت شفايفها وعصرتها اوف يشفايفج گون اكض شفايفج بشفايفي ومااهدج للصبح اضوكن طعم شفتج الميت عليها وترد رويحتي من اشمنج بيها من اشتعل اهلج يمامه شگد احبنج
دخلت واستقبلتني فرحه والضحكه شاگه حلگها هاا بويه يكويچ الله
فرحه : ويگويك تعال ارتاح ولزمته مثل الحضن جان يدفعني بهدوء
شبيك حامد هسه جنت زين ويايه
حامد : شنهي حامد لاتنسين نفسج انه ابو جنه او تصيحين عمي او ابوي لاتندهين اسمي لاتنسين اتفاقنا
فرحه : بس قبل شويه وقاطعني بالكلام
حامد : الي صار جوه تنسيه ولا تذكري ويبقى اتفاقنا نفسه انتي دخيله وگلها ايام واردنج لهلج انه اعرفن اخرتج حيل عبن الظروف والمصايب الي صارت بس مانسيت شغيلتكم وكلها اسبوع وارجع لعمامج واكعد وياهم وافضها ومنا لذاك الوگت انتي بنيتي ولاتخليني گل شوي اعيدن بنفس الموضوع مامليتي
فرحه : بس انه احبك
حامد : اگلها ثور تگلي احلبه يابنتي يافرحه انه اعتبرج بنتي واعزج الله شاهد بس انه نسواني اثنين يمامه وذيج المسودنه احلام
فرحه : بس يمامه هاجرتك وممتقبلتك
حامد : شنهي شتكولين
فرحه : هي متحبك ومتريدك وانت مجلب بيها اصلاً يجوز حتى مصادقه واحد وتحبه
وجان يضربني راشدي قوي ولزمني من رگبتي يخنگني
فرحه : حتى لو تموتني مرتك يمامه تخونك واذا انت رجال حوك روح كولها منو هذا الي جنتي تحجين وياه وتكوليله
حامد : اليوم احرگنج انه هيج تحجين واتهمين مرتي التسوه راسچ موصوجج انه الصوچ مني گلت اسوي خير وتالي طاحت على راسي اليوم اگتلنج خلاص واشرب من دمج
فرحه : كوه اجر النفس واكوله روح تأكد منها وشوف اذا مو كلامي صحيح
حامد : دفعتها ونزلت اركض مثل المسودن مااشوفن كدامي
وفتحت الباب عليها وشفتها متمدده والبنيات نايمات جان اجرنها من ايدها
يمامه : جنت ابجي من قهرتي من حامد وهستوني مسحت ادموعي ومااشوف غير الباب ينفتح حتى مدكه مو من عوايده وجان يكومني بالقوه ويسحلني سحل لغرفتنا شبيك حامد على كيفك تأذيت من ايده حتى انضربت بالباب ودخلني للغرفه ولازم ايدي ويعصرها
حامد : تعالي اليوم لو انه لو انتي
يمامه : شصار شبيك نار وعوف ايدي شجاك
حامد : صگد انتي اليوم مخابره واحد ومحاجيته وكتيله مبقى شى وارجعلك انتظرني حبيبي انه مليت
يمامه : صفنت عليه وساكته وجان يعيط ويصك بسنونه واعصاب ويرجف
حامد : احجي لاابتلي بيج وعلي احجي
باوعت عليه وكتله اي صح