سجينة الروح

part 33

سجينة الروح
للكاتبة Reem
البارت الواحد والثلاثون
(بارت طويل لعيونكم )
(لسان حال ابراهيم )
مو هينه بصراحه نطوي اعز كتاب
وامسح كل حروفي واشطب حروفك
مولعبة وابطل منك وانساك
انه وكلبي صعبه انكلك انعوفك
مشكلتك تحب اتعيش حته اتعيش
خالي من المشاعـر بارده جفوفك
ماتعرف تقدر واحد انجن بيك
حبك من عذابة وقدر اضروفك
مارادك تواعد كلبه بالكلمات
ولا رادك تضمضم عن هلك خوفك
رادك بس حنان تعوضه وبعيناك
يرتاح شكثر من تضحك يشوفك
رادك حته منك ينضر البغداد
يناشد ذكرياته بلمسة جفوفك
رادك للنهايه تعيش بس وياه
اعمه ومايشوف وكامش اجتوفك
اجاك بلا سلاح وبيده شال ورود
شجاك اتخبلت واذبحته بسيوفك
ودق : من يوم مرفضت مازن وصار النقاش بينامشفته كلي الم لان حسيت اذيته بس هذا الصح اني طريقي غير طريقة ومابيوم نلتقي
رحت لبغداد لبيت جدي وبديت الدوام دخلت للكليه عالم جبير وحلوو اول كم يوم تعرفت على بنيه اسمها نوران اسميها نور للسهوله جانت حبابه وهادئه ابوها مدرس لغه عربيه وامها مدرسه اجتماعيات واخوها رائد بالجيش عائله قليله وراقيه وهي هم مؤدبه كولش صارت علاقتي قويه بيها من اول ايام حتى الخط سوه لان اني بشارع فلسطين وهمه هم
صار شهرين من داومت ويومياً ماما تتصل بيه تطمن اكلتي شربتي اتغطي زين اقري زين لاقيت صعوبه بالمواد جنت ادرس ليل نهار هلكت من التعب الدراسه صعبه خلتني اترحم على ايام السادس من الصعوبه اليوم الاحد بشهر الواحد ٢٠١٠ دك تلفوني اكيد ماما كالمعتاد
يمامه : هلوو حبيبتي
ودق : هلو ماماتي ً
يمامه : امي الخميس راح يجي عمج عليج تعالي للعماره
ودق : خير بيكم شى صار شى
يمامه : اسم الله ماما ماكو شى بس خطوبه ابن عمج مازن على جنه لازم تحضرين عيب
ودق : هنا اكو احساسين مرات البشر يكون متناقض بطبعه من باب اعرف بروحي مااحبه ومن باب مااريد يتزوج غيري قمه الانانيه صح بس طبيعه وتكوين الشخص واني هاي طبيعتي حسيت بضوجه وكأن شى مالتي ملكي وراح شبسرعه
يمامه : شنو شبسرعه
ودق : يعني خطوبتهم
يمامه : وليش ينتظرون الولد مكمل كولشي وهسه خطوبه ومهر وعلى شهر الثالث الزواج شويه يدفه الجو
ودق : اني مااكدر اجي ماما
يمامه : عيب يابنتي شون متجين
ودق : عندي دروس كومه عود على العرس احظر ً
يمامه : ميصير شنو سالفتج
ودق : ماما مااريد الاسبوع الجاي عندي امتحان والطريق يتعبني كتلج على العرس اجي
يمامه : براحتج ماما
ودق : سديته منها وباوعت على عيوني ليش بيهم دموع اني مو من ٣ اشهر كتله مااريدك يعني شتوقع يتمسك بيه مثلاً مسحت دموعي بقوه وكلت اني ردت حياة بعيده عنهم ولازم التزم بحياتي
وبيوم خطوبتهم بقيت مخنوكه اتصل على ماما ماكو شنو السالفه لليل يله جاوبتني وصوتها مو طبيعي كلت اكو شى وسألتها ونكرت مشت الايام ومن احجي ويه ماما وايه احسهم ضامين شى لحد مابيوم خابرت وطلعت ايه تبجي شكوو ولج جان تكول بعد ٤ ايام قرايه فاتحتي على منير لو اني عقلي طار مني ولج شون وافقتي الغبيه بس تبجي اريد افهم منها ماكو
انطيني ماما بسرعه
يمامه : هلو ماما
ودق : ليش ماما هيج متعاجزه من لكمتها هيج صارت ايه ثكيله عليج وملكيتي غير منير تنخطب اله
يمامه : اول شى صوتج نصي واحترمي شنو لكمتها ثكيله هو شعندي اغلى منكم ابن عمها وطلبها وهيه مخلتلي درب صوجها لتلوميني مباشره وافقت وكدام بيبيتها وعمها وخلتني ميته بدمي واكولهم صغيره ماازوجها كالو بس خطوبه لحد متكمل سادس ويكومون ويحجون على وضعها
ودق : طبهم مرض وخلي يحجون وماكو غير منير الگلب
يمامه : بس فهميني منير شمسوي
ودق : اني عكب باجر جايه اخلي خالو نصار يجيبني وخلي نشوف شون منير يلزم شعره منها
يمامه : انتي ليش هيج تتصرفين اني مو امج هيج ماعندي كلمه عليج
ودق : لا العفو ماما
يمامه : لعد كوليلي شكوو شبيه منير
ودق : اجي يوم وتعرفين
بقيت يومين لا ليلي ليل ولا نهاري نهار والوب يابو الي يوديني واگلب الدنيا على راسه الطايح الحظ وخطيه خالو نصار اخذني بسيارته وكوه وصلنا بس من وصلنا شفنا طلقات ورياجيل كلت شكوو هم فصل لو هلمره كاتليلهم واحد بس من سمعت الهلاهل شنو عرس مازن بس ماما كالت على الشهر الثالث دخلت لبيتنا لكيت ايه واكفه وتبجي ركضت عليه وشمرت نفسها بحضني ولج شكو
أيه : طلع ابراهيم ودق طلع
ودق : ياعيني الْحٍمَدٍ للـّہ والشكر ربي خطيه يستاهل بس شفت ايه منهاره وترجف مو مال وحده بس فرحانه سحبتها من حضني لج شبيج احجي
أيه : تعالي فوك احجيلج
ودق : خلي اسلم على ماما
أيه : ماما راحت لبيت جدو علمود تسلم وياها علاوي وهمسه وبس اني هنا
ودق : امشي فوك وصعدنا وكعدنا بغرفتها احجي شبيج منهاره
أيه : ابراهيم اذا عرف خطوبتي عكب باجر يتخبل
ودق : ليش شكو بينج وبينه لتبجين فهميني
أيه : ابراهيم يحبني
ودق : وانتي
أيه : احبه وكمت ابجي بقوه
ودق : لعد شون وافقتي على الخطوبه لج تخبلتي
أيه : مااعرف بيه راح يطلع
ودق : واذا انتي تعرفين كولش زين عمو حامد صار سنين يركض على شغله ابراهيم حتى يطلعه واكيد يجي يوم ويطلع محسبتي لهذا اليوم والمصيبه الحب متبادل يعني مو من طرف واحد
أيه : وعدته انتظره
ودق : خوش عاشت ايدج تعالي كوليلي شون الي صار وخلاج تتصخمين وتوافقين على الحقير منير وانتي اكثر وحده تعرفه هو شنو وشراد يسوي
أيه : وبديت احجيلها الموقف الي صار بخطوبه مازن
ودق : اكص ايدي اذا مو عمتج وبيبيتج مرتبيها وهذا منير وياهم شنو هذا الفلم الهندي يعني تعقليها يجرج وبس يلزم ايدج يصيرون فوك راسج عافو الدنيا والمعازيم ويدورن وره ايه ومنير
أيه : ماما هم كالت بيومها بس محد سمع الها لان جان الوضع كولش تعبان وفروها عليه وكل شويه وكالو وضعج وضعج
ودق : يطبج مرض مو كتلج كوليلهم انتي مابيج شى ليش تخافين اطب بعيونهم
أيه : اخاف والله
ودق : شتخافين وحتى اذا طلبو فحص افحص مره ثانيه قابل شراح يتغير
أيه : اني كل مااتذكر ماما كالولها بنيه وطلع ولد اكول يجوز هم تغلط الدكتوره واطلع موبنيه وارجع انهار اكول يجوز هم شخصت غلط
ودق : هذا مو حل زين عوفج من كل الي صار عمو من سألج موافقه ليش مرفضتي
أيه : من وره عمه فضيله
ودق : وهاي شسوت
أيه : حجيت شون اجتني تتوسل
ودق : يابه صايرين عصابه وحق الله هاي شبيهه عمتج موجانت فقيره وتحبنها لو هاي هم خبلوها
أيه : واني كلت اخاف تموت وتصير برگبتي ذنبها وهي وعدتني بس خطوبه ومن اخلص السادس افصخ
ودق : يلفطيره هاي جذابه تعرف بابنها راح يطلع وسوت كل هذا حتى تبعدكم وانتي مثل الغبره سويتي الي رادته
أيه : شأسوي هسه ودق كوليلي
ودق : احجي ويه ماما وعمو واكولهم على منير لازم هاي الخطوبه متصير
بس الي عجبني شعجب لا ماما ولا انتم تعرفون راح ابراهيم يطلع من السجن عمو شعجب سكت ومكال
أيه : مااعرف هسه ماما تجي ونسألها
وجان نسمع صوت منير جوه
اوكفي لتنزلين الله جابه اليوم احرك يومه
نزلت والشرار يطاير من عيني وهو يبتسم
منير : هله بالغزاله لو نكول حضرت الدكتوره ودق
ودق : لا هله ولا مرحبه انت هم الك عين وتحجي وتسلم وفوكاها تخطب ايه
منير : قابل شمسوي بت عمي واريدها شنو غرتي
ودق : غدي اغار عليك انت هو انت شنو ومنو اصلاً حتى افكر مجرد تفكير اغار انت اخر اهتماماتي اصلاً بس مستحيل اسمحلك تأذي اختي
منير : ومنو كلج راح اذيها والله اشيلها بعيوني
ودق : اسمع منير اثنينا نعرف كولش زين انت متريد ايه بس هيج حقاره
منير : شوفي ودق اني ردتج بالاول وكلت بت عمي ومتربايه كدامنا واعرفها كولش زين بس من عرفت مازن رايدج انسحبت
ودق : لا والله خلف الله عليك ليش هي شنو كيكه وقسمتوها بينكم وكل واحد بقى يستشير الثاني انت ياقطعه تريد
منير : انتي هسه شتريدين خطوبه وبعد يومين اخطب ايه شكو تلغين بعد
ودق : اسمع منير نجوم الظهر اقرب الك منها لو تموت مااخليك تتزوجها مااخلي اختي تعيش ويه نسخه ثانيه من عادل
منير : شنو قصدج
ودق : قصدي انت فاهمه زين انت انسان متهور وتتملعب ومستحيل بيوم تحب ايه وتراعي الله بيها راح تبقى دوم تخونها وتأذيها وتعيشها اتعس عيشه
منير : وشون حكمتي عليه وعلى اي اساس تقيميني
ودق : اساس الي سويته انت حتى حرمه ماعندك ردت تتعدى عليه شون تتوقع أمن على اختي يمك
منير : كتلج غلطه وصارت لتضلين تلحين
ودق : وهاي الغلطه هي الي راح تخليك متتقرب من ايه ابد وراح اكول لعمو حامد وللكل على الي سويته واوقف هاي المهزله
منير : انتي مره وسويها
ودق : والله اسويها وجان يلوي ايدي حيل ااخ عوفني
منير : اسمعي لج اني لا ابويه حامد الي يراعي مشاعرج ولا امج الي مدللتج ولا مازن اني منير ومتعرفيني اذا أريد أذي واحد ادمره
ودق : لك صايرلي رجال هد ايدي وحق الله اله اكوله لعمو وجان يضغط حيل احس ايدي راح تنخلع من مكانها بسببه
منير : شتكولين راد يتعدى عليه محد يصدك لان انتي بنفسج كلتي الهم ابن عمي وبحجايه مماسني واكدر اكلهم هي تسوي هيج حتى متتزوج اختها وتسوي مثل سوايتها حتى يرجعن لبغداد ويلعبن براحتهن مثل مدكيتي رجل ورفضتي مازن ورحتي هناك حتى يخلالج الجو يعني شرط جده وابًويه تكسروا هاي خطتكم وانشوف حجايتي لو حجايتج
ودق : لك حقير عوفني
منير : جري عدل تره بعدج متعرفيني ولسانج الزفر هذا اذا تجاوزتي بعد اكصه الج وروح ابويه اذا الكل يحسب لحضرت جنابج حساب اني بهاي ادوسج (واشر على رجلي) واحمدي الله خطبت اختج رغم هي مكسوره بس اني خطبتها لان عاقله وهادئه مو مثلج مخبله ومعقده واعرف بيها راح تصون بيتي
نزلت ايه تركض عوفها منير
منير : اكيد سمعتي الكلام الي كلته لأختج والحجي موجه الج هم الخطوبه تصير وكلمه زايده مااريد ليش تخلوني اخرب الدنيا واكول عندي علاقه بيها كولشي اكدر اسوي اكعدن راحه وخلي كولشي يتم
أيه : يتم بس روح وكافي
ودق : ولج شيتم هو بكيفه تايهين اله
منير : اني العندي گلته وياودق اذا طلعت كلمه منج وهاي ايه شاهده حتى من الكليه اخليهم يبطلوج حتى تهمه اذب عليج وهاي ماكو اسهل منها وانتي بالكليه الالاف الشغلات تصير واخليج تحلمين بشى اسمه دكتوره وعندج هنا جده تكيف بس احركها عليج واخليج تجين لهنا مكسوره خلوني عاقل
ودق : انت احقر انسان شفته لك بابا البنيه متريدك
منير : مالج علاقه اطلعي منها وانتي ايه امسحي دموعج ولتخافين مني وصيري عاقله اعيشج احسن عيشه تسمعين كلام هاي المعقده وتخربون الخطوبه وحق إٱللـِْﷻـِْﮭﮧ اخليهم سحل يجيبوج اليه وحتى خطوبه ماكو مباشره زواج واني حذرت وخلي نشوف كلمتي لو كلمتج يادكتوره ودق
أيه : هذا هو بس روح وكافي
ودق : حقير سافل طلع وسد الباب حيل واني ارجف احس بعجز شون احمي اختي اني صوجي جان المفروض من وقتها اكول الهم شجاني وسكتت هاي نتيجه سكوتي راح اختي تروح بيها انداريت عليها لج كافي بس تبجين مو عيونج خلصن من البجي
أيه : فدوه ودق اسكتي اني اخاف من منير يسويلج شى
ودق : شيسوي خلي يطير صاير رجال براسي
أيه : كولشي يسوي هو هيج واحد ينخاف منه لان توقعي الغدر منه فدوه اسكتي وخلي هاي الايام تفوت وبس اخلص السادس بذاك الوكت الله كريم هسه الوضع متأزم مصار كم يوم تهموني ويااه وصحيح كلامه محد راح يصدك وخاصه عمتج راح تلعب براس بيبي
ودق : وعمو حامد مو هو متكفل بينا
أيه : عمو حامد ميعرف بمنير هيج يسوي رغم يعرف بيه مو مال مسؤوليه بس اني لصتها عليه
ودق : شلون شسويتي يمصخمه
أيه : من كلت لماما اني موافقه هي مقبلت وكامت تعيط وسكتتها واجه عمو وكدامها سألني اني كتله هو اولى من الغريب بس ماما بقت مصره على الرفض ورادت تصير عركه بين عمو وماما بس اني كلت كدامه اني اريده وهنا ماما بعد مكدرت ادافع عليه لان بلساني كلت اريده وموافقه
ودق : من صخام الي صخمج ليش ولج
أيه : من وره عمتج وتوسلاتها ردت بس ينتهي الموضوع متعرفين هلكم يوم شصار تكول عبالك مو لكونا واكفين سوه عبالك لكوه فوكايه عمتج كبرت الموضوع حيل حتى الكل يكول لازم نسترها
ودق : وفوكاها حضرت جنابج سهلتيلهم شغلتهم
أيه : صارت بعد صارت وكمت الطم على وجهي
ودق : حضنتها حيل وهي تبجي وتلطم كافي فدوه ايوته مو راح تموتين
أيه : ياريت اموت واخلص كوليلي ودق شفت من حياتي عمري ١٦ سنه وماكو مصيبه موكعت عليه بس اني هسه همي ابراهيم شون وشراح اكول اله
ودق : الافضل هسه متشوفي لان راح الامور تتأزم امنيتي تكونين قويه وتوكفين بوجه الكل وتكولين مااريد منير مااتزوج مو بكيفكم
أيه : مااكدر اني جبانه واخاف والله جبانه ومابيه خير
ودق : كافي اسكتي لتبجين وكومي غسلي وجهج لتجي ماما ومنخلص من الاسئله
أيه : ودق لتحجين كولشي فدوه
ودق : اوووووف الله كريم وكومي غسلي عيونج راحن ايه فقيره وتخاف من خيالها وصارت شغلتها خلتها جبانه رسمي ومتكدر تواجه اصغر المواقف وانتهت شخصيتها واستسلامها راح يدمرها واني مااعرف شأسوي اني مخايفه من منير على نفسي ميهمني بس خايفه ينفذ تهديده ويزوجها هسه ذوله كولشي اتوقع منهم
يمامه : طبيت والكل تهلهل وطلقات وحضنت فضيله بالخير حبيبتي الله رجعه سالم
فضيلة : فدوه لقلبك خيه كللللللوش الْحٍمَدٍ للـّہ ربي رجعته اليه سالم كلللللوش
احلام : الفرحه فرحتين كرت عينج عيني فضيله كلللوووووش
فضيلة : رحمه الله والديج خيه يوم زواج جنه واركص للصبح بعرسها
الحجية جميله: ولجن اركضن ذهبن الغدا الوادم طگها الجوع وانتن تهلهلن
فضيلة : يمه غير فرحانه بوليدي
الحجية جميله: چا انه گلت لا تفرحين هلهلي واركصي للصبح وانه وياج هذا الغالي بس الوادم تاكل وجوهنا اذا جاعت والاكل ماصاير وحميد يلعب بيجن جوله اذا نشد على الاچل وانتن مامكملاته
فضيلة : امري يمه احلى واحسن اكل للوادم يله يبنيات نذهب الغدا كومن
يمامه : عمه
الحجية جميله: خير
يمامه : شعجب محد كال علمود طلعه ابراهيم
الحجية جميله: وانه شمدريني اسألي حميد انه نفسي مااعرف وتفاجأت چا هذا حميد يحب يشتغل ومايحجي ولا يوجع راسه بس فضيله تعرف وهم ماحجت وانه ليها بس جي فرحانه مااريدن اكسر فرحتها
احاسبها بهدين شون تضم على امها
يمامه : المهم سلامته انأجل موضوع خطوبه منير وايه لغير وقت هسه الوضع ميسمح
الحجية جميله: چا هيه بكيفج وليش نأجلها الفرحه فرحتين وحضري بنيتج عگب باجر خطوبتها
يمامه : الله كريم طلعت واني الهم ماكل گلبي شون واني اعرف ابراهيم يحبها وهيه شون وافقت على منير من وره موافقتها خلتني لاحول ولا قوه بس لو كايله لا جان كدرت اخليها حجه عليهم البنيه متريد تتزوج بس بقبولها سدت حلكي الله يستر
رجعت للبيت ومشفت حامد لان الكل ملتهي اول دخولي شفت ودق
اووف يبعد امج شكد اشتاقيتلج
ودق : واني اكثر ماما
يمامه : شخبارج تعالي كولشي احجيلي اختج وين
ودق : فوك نامت
يمامه : عرفتي ابراهيم طلع
ودق : اي وفرحت اله شبيج يوم شو مو على بعضج
يمامه : هااا لا امي كولشي ماكو يله بدلي وروحي كعدي اختج وتعالو اتغدو
ودق : وعمو وين
يمامه : يم الناس مخبوص بيهم اكيد لليل يله يبين
ودق : وهمسه
يمامه : مكابله احلام وكاعده روحها بيها شسويلها
ودق : عوفيها على راحتها صدوك واخبار جنه
يمامه : باوعت على ودق عرفت بنتي بعيونها حيره والف سؤال
زينه ومرتاحه بعد خطوبتها وكعد اتجهز للعرس
ودق : بالخير عليها
يمامه : يوم الج بنتي
ودق : يوم التخرج وافتح عياده واكون نفسي وكياني
يمامه : وراها
ودق : شنو وراها
يمامه : نجحتي وتخرجتي وفتحتي عياده واشتغلتي وكملتي دراسات ماجستير ودكتوراه وراها شنوو
ودق : حيل الله كريم ماما مدري عايشين مدري ميتين
يمامه : لازم تحسبين للمستقبل وتأكدي كل الي كعد تسوي حلو بس ناقص
ودق : وميكمل اله بالرجال مو
يمامه : مرات يكمل ومرات ينقص
ودق : واني ممستعده اجازف وتالي يطلع ناقص
يمامه : ميفيد الحجي اعرف يله كومي بدلي وصيحي اختج
ابراهيم : دخلت والكل مخبوص بيه وفرحان اله اني فرحتي الدنيا متشيلها وادور بالوجوه اريد اشوفها وينها توقعت اول وحده تستقبلني بس يجوز من الهوسه والزلم مكدرت تطلع
ممصدك طلعت وايه بيني وبينها امتار واكدر اشوفها واتنفس ريحتها بقينا لليل واني الوب اريد الوادم تفض وراحو وبقت بس ابويه حامد وامي وجده وعمه احلام وجان اطب عمه يمامه من اشوفها ترد روحي احسها مرسال من رويحتي
يمامه : الحمدلله على السلامه برهومي والله اليوم عيد عدنا برجعتك
ابراهيم : الله يسلمج عمه
حامد : تعالي هنا واشرت حتى تكعد جاري
يمامه : كعدت بصف حامد وشاورته اشتاقيتلك رجع همس بأذني
حامد : اسكتي لا وحگ علي اخذج هسه واشرد بيج چا انه نار شوقي عليج
الحجية جميله: ها يمه حميد صاير تبسبس احجي بصوت خلينا نسمع
يمامه : بلعت ريك شيحجي ودنجت خجلانه
حامد : هااا يمه خلصتي گلشي وبالچ صفه يمي
الحجية جميله: تعال ليه شون ماتگول ابراهيم طالع
حامد : والله حجيه انه ردتها مفاجاه الكم بس هو الملعون مخبر امه قبل كم يوم
فضيلة : چا غير امه واريدن افرح بيه
ابراهيم : خابرتني تنوح يابه وانه گلبي وجعني عليها وحجيت الها انه مااقبل دمعتها تنزل وتأذه هااي الغاليه
فضيلة : يبعد رويحتي فدوه اغديلك يمه (اروحلك فدووه )
يمامه : شون كدرت اطلعه
حامد : انه وعدت اخيتي اردلها وليدها وهذا بحضنها
فضيلة : گول وفعل خويه الله لايحرمني منك
حامد : بيت السماج تنازلو انطيتهم فلوس بعد وبقى الحگ العام الي خدمنا القضيه من انحكم بيها جانت قتل غير متعمد لهذا انحكم ٢٠ سنه مو اعدام وتنازلو بعد منطيتهم مبلغ ثاني والحگ العام خدمه صار اربع سنين هناك وبالفلوس والمحامين طلع
يمامه : بس همه شون اقتنعوا يتنازلون
حامد : اخوهم الجبير كعدت ويااه انه عرفت افرن راسه فر وانطيته اكثر من اخوته ناس ماتستحي حتى الميت يسامون عليه وقنعهم يتنازلون وانتهى كلشي بفضل الله وداعاويكم
الحجية جميله: الْحٍمَدٍ للـّہ والشكر ماقصرت ربي وام البنين دخيلها يومياً انخيها ترد الوليد لينا
صگد حضرو گلشي حتى نسوي عشا لوجهه الله واهل البيت واذبح يمه حميد وزع للفقره
حامد : هو يمه گلت للولد هذا منو دك عليه
حجيه جميله : وحتى هم نحضر لخطبة منير
ابراهيم : هااا منير خطب ايا نذل جان انتظرني حتى اني ويااه بيوم واحد
حامد : انت بس اشر بويه باجر احسن البنيات يمك
ابراهيم : متقصر يابه
احلام : وجنه انخطبت لمازن
ابراهيم : جنه ومازن (شون رهمت وانه اعرف مازن عينه على ودق )
احلام : والعرس بعد شهر نخلص خطبه منير وايه وراها نحضر لعرس جنه ومازن
ابراهيم : خطبت منو
يمامه : اباوع على وجه ابراهيم صار دم ومصدوم وانتبهت على فضيله تحاول تغير الموضوع حتى لحد يحس
الحجية جميله: شبيك يمه ماتسمع السجن أثر عليك منير وايه بت خالك خطبها والخطبه عكب باجر يوم الالك وافرح بيك
يمامه : اباوع ابراهيم ميرمش كام بدون مينطق حرف احس الصدمه خرسته وفضيله وجهه ينطي الوان حتى اني ارتبكت مردنا حامد ينتبه وهمزين هو جان مشغول مدري منو دك عليه ويحجي ويااه بالتلفون
طلعت فضيله وره ابنها تركض
فضيلة : يمه ابراهيم لاتكدر نفسك گلشي قسمه وبت عمك زهره تنتظرك
ابراهيم : يمه انه ماسمعت زين مو
فضيلة : لا يمه سمعت ايه انخطبت لأبن عمها وانه گتلك البت لأبن عمها وانت ماسمعت چلمتي
ابراهيم : وانه
فضيلة : انت بت عمك تنتظرك وكام يعيط اريد اسد حلكه مااكدر
ابراهيم : اليوم احرك الدنيا هاي مريتي ماياخذها مني بس الموت
فضيلة : يمه حسك دخيلك لايسمع خالك وعلي يسويها دم ومنير هنا يمه استر علينا
ابراهيم : وينه منير شون يتقرب عليها انه احبنها يمه ماياخذها مني لو اعرفن اذبحه
فضيلة : لزمته حيل صخام الصخمج فضيله ليش حبيب امك هيج تلچم گلبي عليك
ابراهيم : وينه وميلي مني اريدن اليوم اشوف يازلمه ياخذها
فضيلة : اسكت ولا تعلي حسك البت راحت لنصيبها
ابراهيم : انه نصيبها انه
فضيلة : لا مو انته وهي لو تريدك چان صبرت وانتظرتك هيه عافتك وباعتك والي يبيعني ابيعه
ابراهيم : ماتسويها ايه هاي بنيتي يمه وماتسويها
فضيلة : لا سوتها يبن بطني وعكب باجر خطبتها چا انته ضحيت بشبابك ودافعت عن شرفها وهيچ جازتك شون تامن على بيتك اكعد واسكت بت عمك اولى بيك وتصونك وتوكف بظهرك
ابراهيم : ميلي مني يمه اروحن لابوي ولمنير هاي الخطبه ماتصير
فضيلة : شتكلهم هااا انه اريدنها على اي اساس گلي
ابراهيم : اساس انه الربيت والتعبت والضحيت انه احبنها واشتريها بعمري وهي كالت انتظرك
فضيلة : هذا حجي يمه انت وين وهيه وين البت باعتك ليش ماتصدك وكفت بوجه الكل وكالت اريدنه لمنير وتكدر تسأل حبوبتك محد جبرها ولا غصبها صير عاقل وتهدا وشفت حسان اجه ركضت عليه دخيلك حسان الزم ابراهيم
حسان : هااا ولك طلعت ومن اول يوم طلايب
ابراهيم : عمي عوفني اليوم اروحن الهم وانهي گلشي
حسان : تعال وياي وتنحل بس هدي وحسك عالي لايسمعوك
ابراهيم : انه اريدهم يسمعوني هاي مالتي ومحد ياخذها مني
حسان : مًـُاشي بس اسگت وانه افهمنك امشي
فضيلة : امانتك وليدي حسان
حسان : ادخلي للدار واذا سألوج كليلهم اخذه عمه حسان يسولف ويااه
ابراهيم : عمي لاتكضني انه نار بيه نار وانت تريد تسولف
حسان : امشينا ليغاد ونسولف والتريده يجرالك
كعدنا مكان بعيد گلش والدنيا ليل ونسولف
غرد يبعدعمك
ابراهيم : شغرد وايه تروح مني
حسان : البت رادت ولد عمها چا شون تاخذها منه ياعيبة العيبه هاي الرجوله عمي
ابراهيم : عمي البت تريدني وانه اتفقت وياها تنتظرني
حسان : چا ليش ماانتظرت هااا شو سكتت ليش ماانتظرت
ابراهيم : انه اريدن احجي وياها يجوز اجبروها
حسان : انت تعرف ابوك حامد مايجبر بنياته وهاي الجبيره راحت لبغداد تدرس وعافت ولد عمها وماجبرها تريد يجبر ايه وهيه اعز البنيات عنده انت من گل عقلك بويه سلم امرك البت عافتك وانخطبت ولد عمها وچلمه زايده تصير عيبه بحكك
ابراهيم : انه اريدن احجي وياهم
حسان : شتكول والله البت خابرتني وكالت انتظر وطلعت لكيتها مخطوبه ورايده ولد عمها وانه اريدنها خلي يتركها وانه اخذها چا شنهي احد گلك احنا بتركيا بويه البت طول ماسولف بيها ولد عمها صارت ليه چا هو الك حك حتى ينهي عليها وانت غصب عنك تسكت
ابراهيم : چا شون گليلي انه داموت عمي داموت وكمت اصرخ حييييل احس بكل صرخه تطلع روحي وگلبي من اعضاني
حسان : يعينك الله ماگلك شى انه حاسس بيك وبيوم صرت بمچانك بس هاي الدنيا ماكو احد يموت وره واحد والدنيا تمشي هسه تكبر وتزوج وتنسى
ابراهيم : شنسي عمي چاانسى تعب السنين لو وناتي من تعب الگاع حتى اجمع مهرها لو من تركت الدراسه حتى اكون مستقبل واتقدم ليها لو انسى ايامي بالسجن والعذاب الي شفته لأجل نظره منها انه عايش ليها عمي حسان عايش ليها
حسان : لزمته شوف وليدي هذا حجي مو مال زلم وانت زلمه حوك صير گوي ولاتنهار شدتها كم يوم وتعيش طبيعي
ابراهيم : مااكدر وروح ابوي مااكدر لو ميت بالسجن ولا اشوفن هذا اليوم
شون اسمع الهلاهل ويكض (يلزم) ايدها ويلبس لو يبوسها اموتن ماتحمل اموتن
حسان : اسكت تبجي لك اسكت
ابراهيم : انه انتهيت وحگ من خلق السما انتهيت وكعدت بالكاع ابجي
حسان : امشينا نروح لكربلا ماتضل اذا ضليت تسوينا طلابه
ابراهيم : مااروحن لزم اشوفنها
حسان : لك يمسودن شتشوف امشينا هسه اخذك ولاترد حتى للبيت
ابراهيم : عمي بس اشوفنها واگللها ليش ولج ليش
حسان : امشي ابراهيم ولاتعاند يله اخابر امك ابلغها حتى لايضل بالها
فضيلة : بشر خويه
حسان : انه ماخذه لكربلا الولد اذا ضل يسودنا اذا سألج حامد گله نذر عليه واخذه حسان عبن هو تعبان وماانتظروه
فضيلة : تسلم خويه عينك عليه بروح عمي وليدي امانتك
حسان : الله كريم وماارده اله وره الخطبه
فضيلة : تسوي فضل بس نخلص من الطركاعه الفت على روسنا
ابراهيم : طول الطريق وانه صافن ليش شنهي الحصل انه ماقصرت بشى صگد هيه قبلت صگد ماانتظرتني گلها تگلي ماانتظرتك وافقت ليش ايه هاي اليش تيزاب على جسمي گل مااكولها تحرك جزء مني
دخلت لكربلا واول مادخلت للعباس سلام الله عليه طحت بابه ابجي واناشغ واكولن
ياابا الفضل انه مامسوي شى حرام دومي ماشي على حب الله وماغضبته بيوم وحتى من حبيتها ماكضيتها اخافن من الحرام ومااحبن المشاكل بحالي واكولن كلشي يهون وماعاق الوالدين ليش هيج اتعذب ردتها على حب الله تصير مريتي انه يتيم ودوم اكولن الله يتمني حتى ينطيني الصبر والايمان وانه مؤمن بقضائه بس الصبر منين اجيبنه گلشي صبرت ودوم اكولن الْحٍمَدٍ للـّہ بس هلمره الاختبار صعب ربي اختبارك صعب ياابا الفضل دخيلك احلفنك بزينب الحوراء وخدرها تردها ليه انه ماتحمل بعدها گلشي تحملت اليتم والقله وشلت الحال وگلشي صار بيه واكولن الْحٍمَدٍ للـّہ اصبر گلشي بيد الله ويجي يوم ويرحمني بس هلمره صعب اصبر احسن بضلوعي نار
وعطت بصوت هز الحضره هز دخيلك ياابا الفضل نار وتسعر بيه لو رب العالمين ياخذ امانته لو تردها
ضليت ابجي احس من وفاة ابوي ماباجي هيج وضلينا يومين بكربلا وثالث يوم طلعنا للنجف زرت الامير علي وانه احسن روحي ماتت اكيد هسه هيه انخطبت بليلتها انه بحضره الامير كاعد لازم الشباك وابجي موبيدي احبنها وانه صغير كبرت وانه اصيحن. بإسمها وفوكاها تزوج وتكعد گبالي لو جبل ينهار وره ثلث تيام (٣ايام ) رديت وانه الي يشوفني يكول محكوم بالاعدام ومنتظر ينفذوه
أيه : اليوم خطوبتي اني ميته بليه روح اباوع بالوجوه اتذكرت مازن قبل كم يوم نفس السيناريو صار بس الاختلاف اني الي احبه يريدني مو حب من طرف واحد اباوع على ودق صايره بركان وماما دمعتها بعينها ومتكدر تحجي فضيله ضحكتها شاكه وجهه شك احلام والبنات كلها تركص والهلاهل ملت المكان اسال وينه ابراهيم شون حالك هسه
منير يضحك وطاير وكل ميريد يلمسني انفر منه حتى هو حس جابو السيد واني رجفت كمت من مكاني رحت لغرفه ماما وصحتها مااريد عقد يوم فدووه
يمامه : هو بيدي يابنتي هاي عداتهم لازم علمود الشرع اطلعي عيب منا العالم
أيه : مااريد يعقد عليه فدوه صيحيلي بابا حامد
يمامه : وين اصيحه وهو بين الرياجيل
أيه :صيحي ماما عفيه وابجي
دزيت ولد صغير واجه
حامد : هاا بويه شنهي
يمامه : هاي ايه تبجي بغرفتي وتريدك
حامد : دخلت عليها هاا بويه شجرالج
أيه : بابا فدوه مااريد يعقد سيد
حامد : ميصير يابويه غير عن الحلال والحرام چا شون يلمسج ويلبسج الحلقه بدون ماتكونين مريته وحلاله
أيه : ابوس ايدك بابا مااريد فد سنه هيج ونعقد هسه مااريد اصلاً مااريد يتقرب مني ويطخني
حامد : ليش يابويه انتي مو ردتيه
أيه : (شكول اله واقنعه ) مووو
حامد : شنهي احجي
أيه : انه بعدني مطيبانه وتركت العلاج يم الدكتوره بعدها حالتي النفسيه مااكدر احد يطخني
يمامه : حامد فدوه هاي تنهار اذا احد لزمها ومن اجينا للعماره مكملت الجلسات
حامد : انتي مو كلتي البت صارت ورد وگلشي مابيها ونفسيتها زينه
يمامه : اي صحيح بس مو مال رجال يلزمها وهيه تخاف بداعت علاوي عندك هاي اذا لزمها منير تتخبل
حامد : زين يعقد عليها بس مايكضها
أيه : لا بابا فدووه
حامد : مايصير السيد هنا والوادم كلها موجوده شگل الهم البت ماترضى بويه ايه الله يرضى عليج عديها انه مااخلي يكض شعره منج بس اعقدي عيب من الوادم چا لو كايلين من الاول مانطلب سيد ترهم بس مو هو موجود وكل ولد عمي والشيوخ واگل الهم البت ماترضى
أيه : ماشي بس ميلمسني
حامد : ولا يكض شعره منج اله بموافقتج وحتى الحلقات انه البسهم الكم چا الاتراك احسن منكم
أيه : ابتسمت على حجايه بابا حامد يعرف بالاتراك هاا بابا تباوع مسلسلات من ورانه
حامد : هاي امج طلعت عيني
يمامه : عزه اني شعليه هو مره مشغله مسلسل وانت فتت وتابعت ويايه
أيه : يروحولك فدوه
حامد : يبعد ابوج يله امسحي دموعج واطلعي للوادم والتريدي يجرالج
أيه : هدأت وطلعت
يمامه : دااطلع وجان يجرني
حامد : اگلج هيه منهي العروس انتي لو بتج
يمامه : بله بربك هذا وكته حامد العالم تنتظرني وتنتظرك
حامد : چا الوادم شعدها يمي حلالي وبكيفي
يمامه : حضنته وبسته من خده
حامد : هااا منهي اليتحارش لاتسودنيني واخذج هسه لبغداد واكضي ليله وحيدنا واعوفها كلها
يمامه : هههههههه والله تسويها يله حبيبي خلي نطلع
حامد : بله انداري اشوفنج زين
يمامه : افتريت كدامه
حامد : من اشتعل ابيك عبيس على كوله امي هذا گله اليه
يمامه : ههههههه والله اليوم انت طالعه عينك
حامد : چا الي يشوف هذا الحلا گله وماتطلع عيونه اله اعمى
يمامه : اسم الله عليك حبيبي يله امشينا
حامد : بس كوليها ليه
يمامه : هههههههه احبنك وحگ علي بن ابي طالب احبنك يحامد يبن جميله
حامد : يبوووو عليك يحامد اليوم منهي يخلصج مني وعلاوي دعبلي يم خواته انه الج اطلع الضيم كله
يمامه : اوويلي منك بس لو اعرف الضيم مالتك شوكت يخلص
حامد : طول ماانتي بحضني كل ليله اطلع ضيم ٢٠ سنه بيج چا الصبرته گليل يطيرتي
يمامه : ههههههههه يله حبيبي نطلع كافي
حامد : امشينا يبعد گلب حامد
كعدوني وره الباب واسمع السيد يقرا وكلت بابا حامد لان قاصر بس راد يسمع موافقتي كلت نعم واحس ابراهيم فوك راسي ويباوع عليه ومقهور مني مخنوكه اريد ابجي اريد اعيط بس محد راح يفهمني خوفي والجبن مالتي وصلني لهاي المرحله
وصدوك الوعد الي قطعه بابا حامد اليه صار ومنير شعره ملمس مني وتخبل بس ساكت لان ميكدر يحجي وبابا حامد هيج امر جان يوم صعب كولش ومأذي
ودق : جنت واكفه اطحن بروحي واني اشوف أًختي تنظلم وتتزوج واحد ميسوه اظفرها ومااكدر احجي سكتت والنار بگلبي ومن صاحوها علمود السيد متحملت وطلعت بالحديقة اريد هوا مااريد ابجي منهار داخلي ومابيدي شى اسوي وجان يجيني صوته
مازن : شونج ودق الْحٍمَدٍ للـّہ على سلامتج
ودق : انداريت واشوف مازن لابس ستره سبور وبنطرون طالع كولش حلوو وانيق وعطره يوصل لراس الشارع انتبهت على كل تفصيله بيه رغم هو من زمان هيج كشاخ ومرتب بس مااركزحيل
مبروك على الخطوبه
مازن : الله يبارك بيج ليش مأجيتي
ودق : جان عندي امتحان وان شاء الله بالعرس احظر
مازن : هله بيج بكل وقت وعفتها ومشيت
ودق : مازن
مازن : انداريت عليها نعم
ودق : انت مرتاح
مازن : ليش يفرق عندج
ودق : اكيد غير ابن عمي ومثل اخويه
مازن : لتذبين على الجرح ملح وتكولين اداويك من رخصتج
ودق : مفهمت قصده بس محجيت شى يضوج ليش هيج عيوني تباوع عليه وادور واشوفه واكف وياها لو لا
شفت جنه طايره بيه واكفه يمه وهو بحاله بس يحاول يبين مهتم بيها هسه اني احير بأختي لو بمازن وجنه شجاني هيج مركزه وياهم
خلص اليوم وصار الهدوء يعم ارجاء البيت بعد مجان كله هلاهل وركص وجهال وناس تعيط وناس تكمز بقينا انظف بالبيت والبنات كلهن ويانه لحد مرجعنا كولشي لمكانه الغراض رجعت لمكانها بس وضعنا الي تغير ومراح يرجع صعدت لكيت ايه نايمه ودمعتها على خدها اوف شبيدي عليج يارب ساعدها تأذيت حيل بستها وطلعت لغرفتي
مرت يومين ورجعت لبغداد والتهيت بدراستي بس لحظة مفاركت ايه تفكيري وحتى مازن يجي بفكري بين فتره والثانيه
مر اسبوع على الخطوبه ورحعت للمدرسه وحتى الحلقه اذبها ماالبسها احسها سجن ومسجونه بيها
وبيوم
جنت راجعه من المدرسه وصلنا السايق واني بالطريق لمحت ابراهيم يتمشى بنهايه البستان مال عمو حامد قريب الشط گلبي لاب عليه اريد افهمه لحد هاي اللحظه ملتقيت بيه خفت انزل من السياره والسايق يكول لعمي نزلت للبيت طبيت سلمت على ماما
يمامه : هلو ياروح امج شونج بالامتحان
أيه : الْحٍمَدٍ للـّہ ماما اني رايحه يم جنه شويه واجي
يمامه : لتتأخرين علمود الغدا
أيه : ماشي مااتأخر ذبيت الجنطه ورحت ركض علمود اشوفه وگلبي ينفض والهث من الركض شفته كاعد على حجاره جبيره وبيده جكاره واول مره اشوفه يدخن ويغني بس صوته كله الم وعبره ويجر نفس قوي بالجكاره بقيت واكفه وراه واسمعه يغني
سهلة عندك يا حبيبي من تجافي
وانة يلغالي احلفتلك
وانة بلحب اقسمتلك
لغير شخصك ما اوافي
شغير كليبك علية
يصير شاطي ينسة مية
موانة وانت ثنين جنة
مثل وردة ونبع صافي مثل وردة وماي صافي
جانت الاغنيه تطلع من كل گلبه بكل الم احس تجرح روحه وتطلع بصوت كله حزن وضل يغني كل الاغنيه ويجر بالجكاره للاخير
وكتله بصوت هادئ وغصه بگلبي هذا اللقاء اصعب شى صارلي بعد حادثتي المشؤومه لان واكفه كدام اكثر انسان حبني وضحه بروحه لخاطري وبنظره اني خاينه ونكرت كل تعبه بس شسوي الظروف حكمتني
همست بهدوء اول مره اشوفك ادخن
ابراهيم : انداريت وممصدك اسمع صوتها
ايه
أيه : بقى صافن عليه وكأنه ممصدك شايفني وبيني وبينه نص متر
ابراهيم : شجابج هنا
أيه : اجيت احجي وياك
ابراهيم : ليش اكو حجي ينكال بعد كل الي صار
أيه : اي اكو كولشي اكو
ابراهيم : احجي اسمعج ياام بيتي ورويحتي
هااا العفو نسيت صرتي على اسم رجال ثاني
أيه : تقربت منه وكعدت بصفه ودنجت والعب بالمي بأيدي واحجي وعيونه تاكلني احسه حتى برجفته لان كاعده يمه وكتله
شتتوقع مني واني جبانه ولا حول ولا قوه اليه انت تعرف اني من زمان مااحجي ودوم اكول اي لأي شى اهلي يكولون عليه
ابراهيم : واني ايه مفكرتي بيه
أيه : فكرت وفكرت هوايه بس ملكيت غير حل وضعي حساس ومنير ابن عمي اولى بيه
ابراهيم : لتخبليني انتي وعدتيني تنتظرين
أيه : اي صح مردتك تتعب بالسجن كلت اخفف شويه عليه وثاني شى كلشي قسمه ونصيب جان يلزمني حيل وجرني من ايدي بقوه ويحجي وينفض بيه
ابراهيم : لج شنو تلعبين عليه لو تستخطيني ولج اني ابراهيم الي عمري منزلت راسي غير لله ومع الاسف الج هيج تجازين حبي تقشمرين عليه وتعطفين بكم كلمه
أيه : هد ايدي ابراهيم كعد تأذيني
ابراهيم : وهذا ولج (اشر على قگلبه بقوه ) متحسين بيه شكد متأذي دينزف ومابيدي شى اوكف نزفه لج اني داموت وانتي تكوليلي كولشي قسمه ونصيب اني الي كضيت عمري كله ازرع بيج وانتظر اليوم الي تكونين بحضني وتحبيني تبيعيني بأول محطه زين انتي بعدج صغيره ليش منتظرتي اكو شى بينج وبين منير
أيه : ملختها لأيدي عوفني
ابراهيم :مااعوفج اله تجاوبيني احجي
أيه : ابن عمي ورادني ماكو شى
ابراهيم : ممصدكج انتي كل عمرج ١٦ سنه وينج وين الزواج وعمه يمامه شون قبلت
أيه : اني كتلها موافقه جريت ايدي حيل منه وكفت على حيلي وهو هم وكف وصرنا وجهه بوجهه واحجي بأعصاب انهاريت وكتله انت شتريد مني هاا شتريد تريد تتزوجني شون الك نفس بيه شون تكدر تتلمسني وغيرك لمسني انت شفتهم بعينك شون جانو فوكايه بيدك دكمت قميصي وشفت صدري شلون مأذيني وكله اثار قذارتهم مكلت هاي قذره صارت متصلح تكون زوجتي مكلت شون اكدر اتلمسها وغيري لامسها
ابراهيم : لج انتي اشرف من الشرف والي صار مو ذنبج وجنت قابل بكولشي وكلت احطها على راسي لان انتي بنتي
أيه : لتكول بنتك
ابراهيم : اي بنتي وغصباً عليج الي كضيت عمري كله انتظرها اباوع عليج وانتظرج يوم يوم تكبرين حتى متجرأت اتقرب منج كلت لحدمااكمل اموري واتقدم عليها وتصير حلالي
أيه : وهسه صرت لغيرك انساني ياابن الناس اني ماافيدك هنا علا صوته اكثر ويحجي ومره يضرب على صدره ومره على راسه حسيت بأنكساره وانهياره واني كدامه ابجي
ابراهيم : هيه هينه لو لعب جهال اني عشكتج واسودنت بعشكچ شون اشوفه يلمسج كوليلي شون اشوفه يحضنج شون يلمس شعرج لج شون تنامين وطولج ويه طوله ويشم ريحتج وعطت ياالله اخذ عمري مااريد اعيش اخذ امانتك كافي مااتحمل
أيه : يحجي واني طكيت بجي كتله اسم الله لتكول هيج واحاول الزم ايده لان يضرب على راسه
ابراهيم : شون مااكول وانتي صرتي لغيري وفوكاها راضيه ليش بشنو قصرت وياج كوليلي كتلج انتظريني والله اخليج على راسي والله اعيشج احسن عيشه وكلتي انتظرك ٤ سنوات واني محبوس بين الحياطين واكول تهون طول مانهياتها تكون بحضني ولج اربع سنوات واني كله احلم بلحظه الي اطلع منها واشوفج واخذج بحضني واكولج عديناها وخلصت وحضري نفسج راح تصيرين ام بيتي اربع سنوات جان من يصير الليل وكلها تنام اظل سهران اباوع على السكف الي يخنك اكبر واحد واتخيل عًيْونج وهي تكولي اصبر حتى من اريد اغني مااغني بس الاغاني الي سمعتهم الج لان احسهم مالتنا اني وياج انتظرت يوم يوم اطلع واحسب الثواني قبل الدقايق والساعات حتى اطلع واخذج بحضني ليش ايه ليش جان كتيلي ماانتظرك مااريدك مااحبك طبك مرض انت رضيت تنسجن وما مستعده اضيع عمري ويه واحد مسجون والله جان رضيت وسكتت بس انتي كتلي انتظرك وهيه كلمه بسيطه بالنسبه الج بس بالنسبه اليه جانت الهوا الي اتنفسه جوه السجن وهاي الكلمه الي صبرتني وخلتني احلم شون اكون بيت وياج وجهال كلمه صعدتيني بسابع سما ومن طلعت ركعتيني بالكاع لج ليش مو اني احبج
أيه : كعد بالكاع ويبجي نزلت عليه واني ابجي وياه ومااعرف شون حضنته حسيت اريد انسى كولشي كل الي مر عليه بهل كم سنه ابراهيم بمرور الايام صار حبيبي وتأكدت من حبي اله بس مااكدر احجي جنت محتاجه احضنه مثل ماهو محتاج حضني ومشتاقلي حضنته حيل وجهه على صدري ويبجي مثل الطفل وابجي ويااه وكتله والله اني احبك والله جان يرفع راسه ويمسح دموعه
ابراهيم : وخري مني لاتنسين انتي على ذمه غيري وحرام الزمج
أيه : وخرت وكتله اسفه من كثر مشتاقيت الك نسيت نفسي
ابراهيم : اذا مشتاقه وتحبيني لعد ليش انخطبتي اني تعبان وشلون لحد هسه امشي بطولي مميت من القهر مااعرف يعني البيه كافيني لتزيديها عليه احجي شصار وليش رحتي لغيري وليش قبلتي بمنير هاي اليش راح توكف عقلي جاوبيني وريحيني
أيه : امك السبب
ابراهيم : شنو امي ليش
أيه : وكعدت كولشي احجيله من لزموني ويه منير لحد يوم الخطوبه
وكف على حيله وعيونه دم منا بجى ومنا اتفاجأ بكلامي بحيث دمارات ايده وراسه طلعو من الاعصاب وركض واني اركض وراه اريد الزمه ماكو وطب بداخل البيت وعاط عيطه هز البيت هز طلعو الكل والمصيبه بابا حامد موجود والكل صفن شبيه ابراهيم ويحجي ويعيط ويرجف واني واكفه وراه ابجي وخايفه
يمه وينج
يتبع .....