انا ايمان...زوجي هو اخو اخواتي..لكن ما اخوي ...دي فزورة؟.....لا ابدا ما فزورة
خلوني ابدأ ليكم القصة من البداية...من زمان شديد..من قبل حتى ما اتولد!!!!
عائلة امي مقسومة على قسمين..قسم اغنياء ومقرشين ومروقين... و قسم تاني عاديين و اقل من عاديين.....امي من القسم التاني دة..العاديين ديل
جدي ابو امي تاجر على قدر حاله كان عنده دكان في سوق واحدة من القرى من ضواحي شرق النيل... عنده 3 بنات وولدين...خالتي الكبيرة نفيسة و بعدها اخالتي احسان و بعدين الصغيرة امي سمية... .جدي كان لما كل واحدة من بناته تجي تتزوج، بفصل ليها جزءمن الحوش.... وببني ليها اوضة وبرندة بمنافعها... وتسكن معاه في الحوش الكبير هي واسرتها.. زي عادة ناس شرق النيل ....لانهم دائما عندهم حيشان كبيرة.
خالاتي وامي كانوا مشهورات بالجمال والادب في القرية... وكمان برضه معروفات انهم هميمات وخدامات في البيت.... و كلهم درسوا لغاية المرحلة الثانوية وبعد داك سريع اتزوجوهم كلهم ...امي اصغر واحدة في خالاتي ...واتزوجت اخر واحدة فيهم..
ابوي اسمه حسين غريب ما من قرية ناس امي...اصلا هو من منطقة جنوب شندي...جابوه منقول لقرية ناس امي مدير للمدرسة الابتدائية... و اتزوج امي و جاء سكن في حوش جدي ...
الناس قالوا لجدي كيف تدي بنتك لراجل غريب ..لكن هو كان راجل فاهم ومتدين..قال لاهله الرسول صلى الله عليه وسلم قال( ان جاءكم من ترضون دينه وخلقه فزوجوه..) ...ولما ولدوني جدي هو الاختار لي اسم (ايمان) وامي وابوي طوالي وافقوا على الاسم ...
وكدة بدأ الفصل الاول من حياتي ..
كنت عايشة مع امي وابوي في بيت جدي......ابوي كان بمشي لاهله كل شهر مرة تقريبا....لانهم بعيدين طبعا.....
حبوبتي ام امي اتوفت بعد زواج امي.. بعد ولادتي انا بسنة تقريبا....وجدي عايش وسط بناته في حوش واحد ما ....حوجوه لاي شئ بعد وفاة امهم...
لما عمري بقى سنة امي حملت لكن اجهضت في الشهر التالت...و تاني ما حملت الا لما انا بقيت عمري حوالي 4 سنوات...
الحاجات الفي الفترة دي ما بتذكرها كويس.. طشاش طشاش.. لكن لما امي تمت 3 شهور في الحمل في يوم معين كدة بتذكره بتفاصيله كلها.....دة كان اليوم البدأ فيه الفصل التاني من حياتي..
بتذكر كان يوم جمعة ابوي سافر يزور اهله في قريتهم.....امي راقدة جوة في الاوضة وانا كنت بلعب برة في البرندة بتاعتنا.....باب حوشنا اتفتح وجوا داخلين جدي ومعاه خالتي نفيسة اكبر خالاتي......انا طوالي جريت على جدي ونطيت فيه عشان يشيلني زي ما بعمل طوالي .....
لكن المرة دي جدي ما ضحك معاي زي عادته ..ووشه كان متغير واسود ...وهو داخل على اوضة امي و انا جارية وراه قال لي ( العبي برة هنا يا ايمان...)
انا وقفت في البرندة برة اعاين ما مستوعبة..ماله جدي ياربي يكون زعلان مني؟...
شفت جدي مشى قعد جنب امي في السرير... و خالتي نفيسة قعدت في السرير التاني....جدي قعد يتكلم مع امي... ما سمعته قال شنو..لكن شفت امي نططت عيونها... وقامت من السرير وقفت على حيلها... و مشت ليها خطوة ولا خطوتين... وجات واقعة في الارض...
في نفس اللحظة ديك خالتي نفيسة جات جارية مارقة من الاوضة... وطلعت من البرندة.... ووقفت في نص الحوش ...ورفعت يديها فوق ....و قامت تكورك باعلى صوتها ( الليلة ووووب يا حسين ....)
انا جريت على امي اكورك (امي ..امي قومي)
وجدي كان برفع فيها من الارض... و شفت دموعه سايلة.... و قعدت اكورك ( جدي.. امي وقعت مالها؟...) وهو ببكي ما رد علي و رفع امي رقدها في السرير ...
من الكواريك بتاعة خالتي الحوش برة اتملا ناس ..خالاتي جوا جارين... و جيراننا ...واهلنا... و الناس كلها تبكي وتكورك... و يشيلوني و يحضنوا فيني ويبكوا..
وعرفت انه ابوي اتوفى...حصل حادث للبص السافر بيه لاهله ...
وبالليل داك امي شالوها المستشفى... و عرفت انها اجهضت...تاني
وبدا الفصل التاني من حياتي..
بقينا عايشين انا وامي برانا في بيت جدي..... الشهور الاولى بعد وفاة ابوي امي طول الوقت دمعتها سايلة.... و خاصة لما نكون انا وهي برانا.... طوالي تحضني عليها و تبكي ...وانا اسكت فيها واقش دموعها ...
شوية شوية مع الايام و بكلام جدي الكتير معاها امي بدأت تصبر ...و امتثلت وبكاها وقف ..وشغلت نفسها بي و بجدي..استلمت اموره كلها من خالاتي و بقت متولية امره تماما...
بعد سنة من وفاة ابوي ..وكنت يوم بلعب في برندتنا برة مع ايناس بنت خالتي نفيسة هي قدري في عمرها..... وامي كان معاها جدي.... و خالاتي الاتنين.....كانوا ليهم فترة قاعدين يتكلموا ....ونحن برة ما شغالين بيهم... لغاية ما انا سمعت امي تبكي وتقول ليهم ( انا ما بخلي بنتي ...ما بخلي بنتي اصلو...)
انا بكا امي بقى ما حاجة غريبة بالنسبة لي... اتعودت عليه لكن كنت مستغربة من كلامها ..انها ما ح تخليني ابدا....ما فهمتها قاصدة شنو ....
بعدداك عرفت سبب بكاء امي من محاسن بنت خالتي نفيسة....هي اكبر مننا انا وايناس... وجايبة خبر اي حاجة ... قالت لي انو امي خطبها راجل عشان يعرسها.... لكن قال عايزها من غير بنتها... وامي رفضت عشان السبب دة...
انا طوالي شعرت بكراهية للراجل دة... رغم اني ما عارفة هو منو.... لكن بس عشان داير ياخد مني امي ويفرقني منها....وفجاة دخلتني خوفة انه ممكن يوم يجي واحد يسوق امي مني ويحرمني منها......وبقيت خايفة كل ما جدي يجي يقعد يتكلم مع امي انه يكون في واحد جاي يسوقها مني...لكن مافي زول تاني اتقدم لامي...منو العايز ليه واحدة معاها طفلة؟.... الناس اولادهم ما قادرين عليهم
لغاية ما اتقدم لامي عمي علي....
عمي علي من اهل امي... من القسم الغني من اسرة امي.....ابوه كان تاجر كبير ورحل بزوجته واولاده من حلتنا للخرطوم بدري شديد.. ...عمي علي و اخوانه كلهم اتعلموا واشتغلوا كويس ..عمي علي كان عنده شركة تصدير و استيراد...عنده بيت كبير في نمرة 3 ... عمي علي كان برضه ارمل.... زوجته اتوفت بعد وفاة ابوي بسنة تقريبا....وعنده ولدين و بنت... الكبير عادل و الولد البعده انور و البنت اصغر حاجة اسمها عبير....
اخت عمي علي الكبيرة اسمها انوار ساكنة باسرتها قريبة ليه في نمرة 3 .....وفي السنة البعد وفاة زوجته، انوار دي حاولت تمسك لاخوها البيت لكن كان صعب عليها لانه عنده بيتها واولادها هي كمان...
المهم انوار جابت اخواتها وجوا قعدوا مع عمي علي و اقنعوه انه لازم يتزوج تاني.....خاصة وانه كان ما كبير شديد كان عمره 50 سنة تقريبا.....هو كان متردد وخايف يجيب زوجة ابو لاولاده وتحصل مشاكل...اخواته قالوا خلي الموضوع دة علينا نحن...
اخوات المرحومة زوجة عمي علي كلهم كانوا متزوجات...و مافي طريقة يعوضوه واحدة بدل اختهم... لكن كانت عندهم بنت خالتهم ما متزوجة... وهم كانوا بلمحوا انهم دايرين عمي علي يتزوجها ...لكن اخوات عمي علي ما ماكانوا متشجعات علي بنت الخالة دي ..لانها كانت صغيرة ومتطلعة و ما متزوجة قبل كدة.. ..خافوا انها تقعد تشوف نفسها وما تهتم بالاولاد ما تقدر على خدمتهم....
كانوا عايزين واحدة بمواصفات معينة ..واحدة تكون عزباء ..يعني مطلقة او ارملة ..وتكون مسكينة وطيبة وما متطلعة... و هميمة تقدر على خدمة اخوهم واولاده...يعني باختصار واحدة زي امي...
ناس انوار اخوات عمي علي كانوا متواصلات مع عائلة ناس امي شديد... و بعرفوا امي وعارفين طبعها و ظروفها وطوالي رشحوها لاخوهم... و هو ذاته كان بعرفها وطوالي وافق عليها...
وجوا خطبوا امي من جدي.. وطبعا جدي وراهم شرط امي انها عايزاني انا معاها.... عمي علي و اخواته قالوا ليه هي وبنتها فوق راسنا...وانا طبعا عرفت.. و في عمري الصغير دة حبيت عمي علي شديد ..لانه ما حرمني من امي وما فرقني منها...
ولما بقيت عمري 6 سنوات عمي علي اتزوج امي وبدأ اطول واهم فصل في حياتي....
يتبــــــــــــــــــــــــــــع
