عديت 3 سنوات في الجامعة ... عبير ولدت بنت سمتها اسيل عمرها سنتين حسع... و انور شغله مشى كويس في الشركة الهندسية... و خطب واحدة زميلته مهندسة وعرسهم حددوه بعد سنة ..
اما عادل باقي ليه سنة واحدة ويخلص الدكتوراة ... وعرفنا انه ناس الجامعة في بريطانيا عرضوا عليه وظيفة معاهم لكن ما حدد لسة ح يقعد معاهم ولا ح يرجع السودان...
في اخر سنة تالتة دي كان عرس محاسن بنت خالتي نفيسة اخت ايناس الكبيرة.....طبعا مشينا انا وامي والتومات قبل العرس بكم يوم قعدنا معاهم للخدمة و التجهيزات...
في ايام العرس دي اتعرفت بخالد ..
خالد دة امه بت عم امي..اتخرج من الجامعة و شغال محاسب في شركة ....والايام القبل العرس دي كان بجي طوالي لناس خالتي بحكم القرابة والجيرة ..هو كان قيافة و طويل ..ولاحظت ليه مهتم بي و طوالي يجي يسلم علي و يقعد يحاول يفتح معاي المواضيع..
انا اصلا ما كنت مهتمة ..في غيره حاولوا معاي في الجامعة لكن ما قدرت اعتبر اي واحد فيهم اكتر من زميل او صديق ...الاخد قلبي و سكن فيه ما بتزحزح ولا بدي اي واحد غيره فرصة معاه.....المهم اني ما شجعت خالد و لا اديته وش ...
بعد خلص العرس ورجعنا البيت، يوم امي نادتني براي و قالت لي ( اتصلت علي ام سلمة بنت عمي ..قالت دايرنك لخالد ولدها ...شافوك في عرس محاسن و عجبتيهم...)
انا اتصدمت لاني ما اديت خالد اي وش.... بالعكس وضحت ليه باكتر من طريقة اني ما مهتمة....يقوم يمشي طوالي يختني امام الامر الواقع ..وحتى من غير يفاتحني في الموضوع؟
زعلت وقلت لامي( انا خالد دة ما بعرفه كويس ..كيف اقبل بواحد ما بعرفه؟...)
امي قالت لي ( اجي كمان داير ليه عرفة..امه بنت عمي و ابوه ذاته قريبنا..يعني ما ناس غرباء ,ولامحتاجين نسأل منهم ولا نعرفهم ...)
قلت ليها ( لكن يا امي انا ما عايزة اتزوج امه ولا ابوه ...انا هو شخصيا ما بعرفه ..انتي بتعرفي امه وابوه وباقي اهله كويس ...وهم ناس كويسين... لكن هو ما بالضرورة يكون زيهم ..دة زواج ..يعني حياتي كلها ...)
امي قالت لي ( و الخطوبة دي لشنو؟ ما عشان تعرفيه ...هم حسع ذاتهم ما قالوا دايرين عرس طوالي ... هو ذاته لسة ما جاهز ...بس دايرين يحجزوك ساكت ..)
زعلي زاد وقلت لامي( يحجزوني دة شنو؟.. انا اصلي شنو؟ بيت و لا دكان؟ بعدين هوكان اول ياخد رأي انا قبل ما يمشي يكلم اهله ويجوا يكلموك..)
امي قالت لي ( ماله يا بنتي ..جاي بالباب عديل ما بتاع لف ودوران و حركات اولاد الزمن دة...)
قلت ليها ( يا امي ...على الاقل يعرف مني.. يمكن اكون مخطوبة ..يمكن عندي زول تاني....) و طبعا ياهو دة ذاته الكلام الما عايزاه امي...كلمة اني عندي زول تاني...رغم اننا ما حصل اتكلمنا صراحة وجها لوجه ..هي عارفة انا عايزة منو و انا عارفة رأيها شنو في الموضوع ...
طوالي قالت لي (يا بتني انتي ح تعيشي حياتك على احلام و وهم؟.. انا من زمان حذرتك لكن ما بتسمعي الكلام ..يا بنتي انا ما عايزاك تتعذبي و لا تتألمي بلا داعي....)
سكتت شوية وقالت ( يمكن تكوني شايفاني ما بفهم في الكلام دة....لكن الحب دة ما هو اي شئ...وياما ناس اتزوجوا عن حب و فشلوا لانه الظروف ما كانت صاح... وما كانت مناسبة... و ياما ناس اتزوجوا الزواج التقليدي دة و حياتهم ماشة وناجحة زي العجب...لانهم مناسبين لبعض من كل النواحي....وظروفهم مناسبة لبعض)
كلام امي دة سبب لي كمية من الاحباط ما عادية... وقعدت ساكتة ما قادرة ارد عليها لاني حسيت في اعماقي ان كل كلمة قالتها صحيحة..
امي تاني اخدت نفس و قالت لي ( الله يرضى عليك يا ايمان يا بتي..لو عايزة رضاي ادي خالد فرصة وشوفي....وفي الاخر ما في زول بجبرك على حاجة انتي ما عايزاها ...)
قلت لامي ( خلاص اديني فرصة خليني افكر واستخير..)
حسيت بامي ارتاحت لما حست بي رخيت شوية قالت لي ( كويس ..لكن ما تتاخري ..انا قلت لام سلمة برد عليك خلال يومين ولا تلاتة...)
قعدت يومين وانا مخي يدور زي الطاحونة ...... من ناحية افكر في نفسي وفي عادل وحبي ليه...حبي المانعني اتخيل ولو مجرد تخيل اني ممكن اكون لزول غيره حتى لو اقعد من غير زواج ... ومن ناحية تانية افكر في امي و خوفها و شفقتها علي.. خوفها اني اضيع حياتي على امل ما ح يتحقق...
في الاخر وبعد استخرت وصلت لقرار اني اقول لامي موافقة على خالد.. على الاقل كدة اريح بال امي و برضه اخليها ما تفكر تجيب لي خطاب تاني غيره....برضه قلت ادي نفسي فرصة واشوف يمكن لو اديت خالد فرصة اقدر احبه و اتخلص من مشاعري تجاه عادل الما عندي فيه امل...
كلمت امي لكن اشترطت عليها انه ما نعمل خطوبة رسمية ....نخليه بس كلام بين الاهل لغاية ما اخلص سنة رابعة دي وبعدين نشوف....
امي ما صدقت طوالي اتصلت على بت عمها ام سلمة و كلمتها .....في نفس اليوم جاني اتصال من رقم غريب لما رديت لقيته دة خالد.. بعد سلم علي قربت اشاكله واقول ليه انت ليه تمشي تكلم اهلك واهلي قبل ما تاخد رأي انا؟ ..لكن قلت مافي داعي للمشاكل من البداية.
قال لي ( كيفك يا خطيبتي؟...)
انا غاظتني الكلمة دي لكن اتمالكت نفسي و قلت ليه ( لسة الكلام دة بدري عليه...دة تعارف ساكت انا وضحت الكلام دة لامي كويس عشان تكلمكم..) قلت احسن اضع ليه النقاط فوق الحروف من الاول ..
قال لي ( انا غايتو بالنسبة لي ما عايز معرفة اكتر من كدة ..عارف نفسي داير شنو ....)
قلت ليه ( لكن انا من حقي اعرفك اكتر... و ادي نفسي فرصة اشوف الموضوع ح يمشي لقدام ولا لا ...)
قال لي (اصلو ما مشكلة ..وح اعمل ليك وجع وش لغاية ما تعرفيني زي ماعايزة واكتر كمان....)
قلت ليه ( في حاجة تانية برضه عايزة اوضحها ...انا ما بقدر اطلع معاك برة البيت ولا الجامعة ما دام مافي شئ رسمي بيناتنا..)
قال لي ( لكن كدة صعبتيها شديد...لكن برضه ما مشكلة يا ستي ..بجيك في الجامعة و بكرهك بالتلفون...) حسيته النوع البخفف في دمه بالقوة داك ..ما عارفة حقيقي و لا عشان انا اصلا ما متقبلاه..
امي اظنها ضربت كلمت اخواتها لانه تاني يوم ايناس جاتني في الكلية وساقتني على جنبة وقالت لي (دي شنو الاخبار المفاجئة دي؟ ...مبروك...) انا ايناس ما كلمتها ..لاني اصلا نفسي طالعة من الموضوع ....
قلت ليها ( مافي حاجة يباركوها لسة....دة تعارف بس...ندرس بعض ونشوف ح يحصل شنو..)
حسيت بيها ما متحمسة للموضوع قلت ليها( انتي رأيك فيه شنو خالد.دة.. بتكوني بتعرفيه احسن مني)
سكتت كدة زي المترددة تاني قالت ( هو طبعا ود اهلنا وساكنين قريب لينا ...وبعرف امه واخواته ناس كويسين شديد .. لكن انا ما عندي بيه معرفة شديدة كدة هو شخصيا ..ما اقدر اقول ليك عليه حاجة...) حسيت بترددها و كأنه في كلام ما عايزة تقوله ...
تاني قالت لي ( على اي حال زي ما قلتي دة تعارف ساكت... اديه فرصة وادي نفسك فرصة... و نشوف الامور تمشي كيف...) ما حبيت اضغط عليها عشان اعرف ليه هي ما متحمسة...اصلا انا ذاتي ما خلاص باقية عليه وولا متحمسة ليه برضه...
ناس البيت.. عمي علي و انور وعبير برضه امي كلمتهم ...طبعا عادل عرف منهم ...اكيد بكون ارتاح نفسيا انه انا خلاص ارتبطت بزول تاني.... و اتذكرت كلامه لي يوم عرس عبير... انه حبي ليه حب مراهقة و اني لما اكبر ح اتخلص من الحب دة ..... و ح القى زول تاني قريب لي في العمر احبه ....
يتبـــــــــــــــــــع
