و مرت 6 سنوات على زواج امي.. عادل اتخرج من الجامعة ونتيجته كانت ممتازة ناس الكلية عرضوا عليه وظيفة مساعد تدريس... اشتغل معاهم وبدأ يعمل في الماجستير طوالي...
و انور دخل الجامعة كلية الهندسة المدنية... ووصل سنة رابعة ولسة في هظاره ولعبه داك...
عبير دخلت كلية المختبرات الطبية.... وحسع في سنة تانية
و التومات روان وريان في الروضة.... معاي في نفس مدرستي... انا كنت في سنة سادس...
في الفترة القعدناها معاهم في البيت عمي علي ما كان ابدا بفرق بيني وبين اولاده... و عادل و انور وعبير احتووني معاهم كاني اختهم بالجد... و انا خلاص بالنسبة لي هم بقوا اسرتي... واصلا تقريبا انا فتحت على انهم هم اسرتي واخواني ...
لكن بعد كبرت كدة... بقيت بحس بامي ما دايراني اخد راحتي شديد و اعتبر اني زيي زيهم..... ما كانت عايزاني اعتبر نفسي واحدة منهم بالجد... و ما اعتبر انه عندي حق في البيت دة ولا العز دة...ولا اتعود عليه شديد... اظنها كانت خايفة علي من الصدمة اذا حصل اي شئ وانا طلعت من البيت دة...انا ما بتذكر كانت بتقول لي شنو بالظبط لكن المهم فكرتها وصلت لي...انه العز دة كله ما حقي ..وانه انا هنا زي الضيفة بس ...
في الفترة الفاتت دي كلها اهل المرحوم ابوي كان تواصلهم معاي بسيط شديد او شبه معدوم ....اصلا ابوي الله يرحمه امه وابوه كانوا متوفين...وكان عنده اخو واحد واختين....وكلهم بسيطين وعلى قدر حالهم....بعد ابوي اتوفى اظن جوا بس للعزاء و ...وتاني جوا مرة واحدة ..
و لما عمي علي اتقدم لامي جدي سافر لعمي و عماتي وكلمهم... و قالوا ما عندهم مانع على العرس... و لا عندهم مانع اني اعيش مع راجل امي..اصلا ما مافي زول فيهم بقدر يتحمل مسؤليتي... و ما دام عمي علي كان مستعد يكفلني دة ريح الناس كلهم..
بعد امي اتزوجت و جينا نمرة 3 اهل ابوي ديل انقطعوا مننا مرة واحدة.....ومرات كنت بسمع ناس خالتي نفيسة وامي بتكلموا عنهم.... لما خالتي نفيسة تنتقدهم وتقول ليه ما بسألوا من بنتهم ؟؟.. امي كانت بتقول ليها هم مساكين و على قدر حالهم و كل زول فيهم مشغول بحاله ما عندهم طريقة لسفر..
انا من ناحيتي كان بحز في نفسي لما اشوف عمات ناس عبير معصورات عليهم وانا ما عندي اهل ابو....لكن كنت بس بسكت ساكت... واقول يمكن كلام امي صحي و ما عندهم قدرة يجونا...
الحاجات دي كلها اثرت علي شوية و خلتني ارجع لهدوئي وسكوتي القديم داك... وخليت الجرأة و الشقاوة الاتعلمتها من عبير ...
وطبعا اصلا ما انقطعنا من حلتنا في شرق النيل.... كل فترة والتانية امي بتسوقني انا والتومات نمشي نقيل هناك.. ..وبعد كبرت شوية بقت تخليني مرات امشي براي في الاجازة اقعد مع ناس جدي وخالتي نفيسة.... خاصة انه بنتها ايناس صاحبتي شديد ...دة كله برضه حسسني انو امي ما عايزاني ارتبط بنمرة تلاتة بس ....و انه لازم يكون عندي برضه ارتباط بحلتنا واهلها.
انا لما بقيت عمري 12 سنة تقريبا جدي ابو امي مرض و رقد المستشفى كم يوم... و اتوفى لرحمة مولاه....
كانت صدمة شديدة لامي ولي....طبعا مشينا بيت جدي للعزاء وامي قعدت هناك اسبوع وكانت متجرسة شديد ...نحن الباقين جينا راجعين نمرة 3 عشان المدرسة و الجامعات .. انا جدي دة كانت عندي ليه مكانة خاصة من كنا قاعدين معاه في البيت..وحسيت كأني اتيتمت للمرة التانية....
بعد رجعنا البيت كل ما أتذكره و اتذكر لعبه معاي دموعي تجري ...عادل لاحظ لي قام جابني قعدني و قعد يتكلم معاي وقال لي (جدك كان راجل طيب وقاري القران... و نحن بدل نبكي عليه احسن ندعي ليه ربنا يدخله الجنة..لانه البكاء بس بعذبه...)
وقال لي كلام تاني كتير كان عنده اثر علي بالجد....طوالي سكت من البكاء ....و بقيت مع كل صلاة ادعو لي جدي... ....
امي بعد جات راجعة من البكاء لسة كانت حزينة شديد ...و دمعتها دايما في عينها...طوالي عمي علي سريع عمل ليها اجراءات العمرة وسافروا السعودية وساقوا معاهم التومات.. نحن الكبار خلونا عشان المدرسة و الجامعة...
اثناء ما ناس امي وعمي علي في السعودية ..عادل بقى يجي من شغله في الجامعة بدري شوية مع مواعيد جيتي من المدرسة ....وطوالي يجي يفقدني يشوفني اكلت ولا لا ؟؟....عندي واجب ولا لا.؟؟؟ .محتاجة لاي شئ ..؟؟؟ و كان متابعني كدة لغاية ما امشي انوم... لغاية ما ناس امي جوا راجعين من السفر...
وانا بالنتيجة تعلقي بعادل زاد زيادة وبقيت ما شايفة زول زيه...
في الفترة ديك طبعا بديت ادخل في فترة المراهقة... وبقيت طويلة وجسمي اتغير و اتقسم ...وكنت لسة زي زمان بحوم في البيت مرات بالبيجاما او قميص بيت عادي قصير... قامت امي يوم نادتني براي... و واتكلمت معاي براحة ...قالت لي انه ناس عادل وانور ديل ما اخواني بالجد.... ولما يكونوا هم في البيت انا لازم البس طويل واكمام طويلة و طرحة ...
حكاية اللبس دي ما كانت حاجة صعبة شديد علي لانه غرف الاولاد كانت في الطابق الفوق... و غرفة ناس امي... وغرفتنا انا و عبير تحت... يعني حتى لما عادل وانور يكونوا في البيت غالبا بكونوا قاعدين فوق ما بنزلوا الا للوجبات... او بعد المغرب بنزلوا يقعدوا تحت.......
لما بقيت زي 14 سنة حصلت نقطة تحول كبيرة في حياتي... مشاعري تجاه عادل بدت تتغير تماما ...
التعلق الشديد لسة قاعد ..لكن بدل ما كان تعلقي بيه حب بنت صغيرة بااخوها الكبير او تعلق ببطل اسطوري...مشاعري و تعلقي بيه بدا يتحول الى حب... حب عدييييل...حب البنت للولد ...حب ...عشق...وله ..اي شئ ممكن تقولوا عليه
اصلا انا طبعا كنت بكون مبسوطة لما عادل يكون موجود في البيت وقاعد معانا و...الحكاية دي بقت زايدة شديد... سعادة و انبساطة لما يكون موجود.. و ترقب طول اليوم متين ح يجي راجع...و تعاسة لما يكون طالع من البيت ..ما احس بالبيت كامل الا لما يرجع هو..
وبالليل سهر وتفكير فيه وخاصة لما يكون مافي...يا ربي مع منو؟ مع اصحابه ولا مع بنت؟ ما انوم الا لما اسمع صوت عربيته رجعت البيت...
ورغم اني حاولت بقدر الامكان انه مافي زول من ناس البيت يشعر باحساسي تجاه عادل ....لكن باين امي حست اني مايلة لعادل ....سبحان الله كانت حساسة جدا في اموري.....دة كله عشان ما عايزاني اتخذل او اتصدم لاي سبب من الاسباب ..
يوم كدة كنت قاعدة معاها برانا ومن غير مناسبة قالت ( عادل بعد اتعين في الجامعة حقو بعد دة يفكر في العرس ...) انا قلبي ضرب شديد... و استغربت يا ربي بتقول لي في الكلام دة ليه ..عاينت ليها ..كانت شايلة سبحتها كالعادة لكن مدنقرة وهي بتتكلم ما بتعاين لي....
سكتت شوية وواصلت ( والله انا شايفة لو شاف واحدة من بنات اهله ديل بكون احسن... واحدة تكون قريبة لعمره) ورفعت راسها وعاينت لي مباشرة وقالت (واحدة تكون من اهله.. و مناسبة ليه ...ومن نفس مستواه..ما اظن اي زول يكون عنده اعتراض....)
وطوالي الرسالة وصلتني...كلامها معناه :عادل دة ما تفكري فيه...انتي ولا قدره ...ولا من مستواه... و لا مناسبة ليه ...
امي الحساسة ما عايزاني احلم باحلام ما بتتحقق و اصحى على واقع مر و اتصدم..وبرضه انا عارفاها مسالمة ما بتحب المشاكل وكلام الناس الكتير .....ما عايزة اهلهم يقولوا خطفت الراجل و كمان خطفت ولده لبنتها...
يتبــــــــــــــــــــــــــــــــــــع
