اغلب البشر عانوا من الحب منا من احب وعاش حلم جميل مع من احب ربما لشهور او لسنوات عديدة ومنا من يصل به الامر الي الوصول الي ترتيبات الجواز ليظهر القدر بابهه صوره للتفرقة بينهم ليشعر الاتنين انهم علي قيد الحياة فقط باجسادهم انما قلوبهم وعقولهم لم تعد جاهزة لاستقبال الي صدمة اخري فالاولي كانت كافية للقضاء عليهم وانهاء كل شيء ،منا من يكمل حياته دون غضة او البكاء علي الاطلال ناظرا الي المستقبل مستبشرا به خير املا في ان يكون افضل ويحمل المزيد من الافراح .
المرة دي روايتنا بتتكلم عن قصة واقعية وأنا كنت من أطراف القصة دي وفي قلب الحدث معليش هي شوية حزينة يلا نبدأ
بسم الله
أنا توسل عمري 20 سنة عايزة احكي ليكم قصة حياتي وكل الحصل معي
عيلتي بتتكون من 6 نفر أبوي عبدالله من أولاد الجزيرة جا سكن الخرطوم من زمن العشش الوقت داك يداب فكرو يبنو مستشفى إبراهيم مالك سكن مع خالو إبراهيم وماما بت زوجت خال بابا إبراهيم يعني خال بابا راجل أم ماما اها كيف اتزوجو دة ما عارفة المهم اتزوجو وسكنو في بيت ماما الورثتو من حبوبتها الربتها ربنا يرحمها و في الوقت داك الحكومة رحلتهم من العشش لي حي الازهري جنوب الحزام اللحظة ديك كانت حامل بي ولد وربنا ما كتب ليهو يعيش ومرت السنوات وظهرنا نحنا التلاتة بنات واخوي
تماضر الكبيرة وبعدها تقوى أصغر منها بي تلاتة سنة ونص وتقوى أكبر مني بي سنتين ونص وأخيراً أخوي الوحيد ميسرة أصغر مني بي تلاتة سنة
مرت السنوات في عيد كدة كنت في سادس أساس أمي قالت لينا امشو زيارة لي خالتكم هي في مربع 11 ونحنا في مربع 2 أختي تقوى رفضت أنا واخوي وأختي الكبيرة غيرنا هدومنا وطلعنا مشينا في الشارع أختي الكبيرة قالت لينا عندي بيت ناس صاحبتي قريب بي جاي نمشي ليها وبعدها نمشي بيت ناس خالتي طبعاً نحنا ما حنقدر نقول ليها شيء فاضطرينا نمشي بيت ناس صاحبتها دقينا الباب فتح لينا ولد شاب سلم علينا ودخلنا جوة وجاب لينا موية و جاب الشيالة قال لينا شيلو حلاوة وبعدها أختي قالت لينا انتظروني هنا ( كنا في الراكوبة ) بعد شوية بجيكم نمشو دخلت جوة مع الشاب وخلتنا برة وأنا قمتا براحة ماشة طاوقتة عاينت بي الباب لقيت الشاب راقد وأختي بي فوق ليهو طبعاً ما فهمتا شيء ( عقلي لسة عقل أطفال ) رجعت قعدت مكاني قعدت بعد فترة جونا برة أختي كانت بتصلح في قميصها ما اديت الموضوع أهمية كبيرة طلعنا مشينا بيت ناس خالتي والعصر رجعنا البيت و بعد فترة نسيت القصة دي
بعد فترة حصلت مشكلة في بيتنا وأختي الكبيرة طلعت خلت البيت برضو ما فكرت في الموضوع ( عقلي لسة عقل أطفال ) وبعد تلاتة يوم من الموضوع دة جيت من المدرسة دخلت البيت لقيت ابوي قاعد مع إنو ما بجي بدري من الشغل وخالتي الفي مربع 11 وخالي ومرتو واختي الكبيرة لاحظت ليها كانت حامل طبعاً اتخلعت حملت كيف وهي ما عرست ( العقل لسة عقل أطفال )بقيت حاسة انو سبب مشاكل الايامات الفاتت في بيتنا أختي وكرهت خالي في اللحظة ديك لأنو رجعها البيت في الإجازة ولدت وأنا بقيت شايلة هم صحباتي كان سألوني أختك ولدت كيف وهي ما عرست وسبحان الله عندي صحبتي معاطة كدة سألتني توسل سمعت اختك تماضر ولدت قلت ليها دة منو الكذب عليك لأنو أختي ما عرست حتولد كيف ( اضطريت أكذب بس لي متين )
أنت تقرأ
لماذا أنا .. قيد الكتابة
General Fictionهو قدر كلو مقدر ومكتوب وكلو لي خير القدر هو ليس عائق بل هو نصيبنا من هذه الحياة هو قصتنا في هذه الحياة هو حكم الله في خلقه وفي مشيئته ، القدر ليس عائق بل هو قدرة الله في كونه... الحمدلله حتى يبلغ الحمد منتهاه ..
