أختي تماضر حملها الأول جابت بت عاشت شهر واتوفت والتاني جابت ولد والتالت جابت شو ما عارفة لأنو سبحان الله المولود اتولد و معدتو كلها برة محل الجهاز التناسلي وزاتو ما عاش فترة طويلة اتوفى بعد اسبوع ولا اسبوعين ما عارفة
واريتو كان تتعظ وتخلى عمايلها البتعملها دي لأنو وللمرة الرابعة مشت حملت وأبوي في المرة دي بالذات زعل شديد ولم ملابسو في شنطتو وقرر يخلي البيت إلا امي حنستو حتى قعد .تاني يوم من قرار أبوي أمي قعدت توصي فيني وقالت لي إنها هي وأبوي حيخلو البيت ووصتني إنو ما نتفترق أنا وتقوى وميسرة بعد كلام أمي دي قعدت ابكي شديد وهي تبكي ( في اللحظة ديك فكرت أمي وأبوي خلو البيت وعمي اتكفل بينا طبعاً عندنا ود عمي ساكن معانا من كنت صغيرة لكن هو زول هادي ما عندو دخل بي حياتنا بقى لينا الأخ والأب والسند تاني بعدت الأفكار دي من رأسي ودخلت العوضة اشوف كتبي كنت ممتحنة تالتة من الزعل شلتهم شرطهم ) بعد كلام أمي دة أبوي اتراجع الحمد لله وما طلع من البيت وقبل عيد الأضحى بي أيام أختي ولدت ( طبعاً بي سبب أختي بقيت أكره الأطفال شديد )
ولدت تماضر قبل عيد الأضحى بي أيام والمرة دي حبوبتي أم أمي طلبت مني اجي أقضي معاها أيام العيد لأنو هي براها مع إنو خيلاني ساكنين معاها لكن البيت مقسم واي زول بكون قاعد في القسم تبعو أختي تقوى سافرت مدني مع جدي ( عم أمي ) وأنا لميت عفشي مشيت بيت حبوبتي البيت قريب من بيتنا ما بعيد برجلينك ممكن تمشي الشارع التاني من بيتنا مشيت يوم عرفة بعد المغرب نمنا في الحوش مع إني ما بحب ارقد برة نهائي وبرضو لو ما اتغطيت ما بقدر انوم شلتا توب خالتي بعد ما صليت العشاء رقدت نمتا صحاني خالي زي الساعة واحدة بالليل قال لي العشاء قمتا أكلت مع إني من النعس ما قدرت أكل كتير بعد أكلت شربت موية من الزير وكملت نومي
(الله أكبر الله أكبر الله أكبر لا إله إلا الله الله أكبر الله أكبر ولله الحمد )العيد دة صحيت بي سماع صوت تكبيرات العيد ما زي العام المضى لكن برضو كنت فاقدة حاجة فاقدة صوت خطوات أبوي لمن يقوم بمشي وبجي كتير جنبنا و أمي واختي واقعين في البيت نضافة جد
قمت صليت ونضفت مع مرة خالي ( مرت خالي دي بحبها حب عجيب ما برضى فيها شيء صحبتي الانتيم لي قدام حنلاقيها إسمها حواء ) وفرشنا الملايات وسريع مشيت استحميت لكن الوقت ما كفاني اسوي شعري مشيت صليت صلاة العيد ورجعت من دون ما اسمع الخطبة ( فاقدة أختي تقوى شديد بنمشي الجامع سوا العيد التاني لي ما امشي معاها الجامع سوا ولمن نرجع من الصلاة بنعيد للجيران )عملت شعري وبعدها حبوبتي جات من الجامع بعدها أبوي جا داخل عايدني وخيلاني شوية كدة وصلو خالتي وعيالها قضينا يوم حلو مع بعض المساء الكل رجع بيتهم وأنا صليت العشاء وقعدت اراجع دروسي ( ممتحنة تالتة السنة دي )بعد انتهيت طفيت الأنوار وقفلت الأبواب رقدت نمت
أنت تقرأ
لماذا أنا .. قيد الكتابة
Fiksi Umumهو قدر كلو مقدر ومكتوب وكلو لي خير القدر هو ليس عائق بل هو نصيبنا من هذه الحياة هو قصتنا في هذه الحياة هو حكم الله في خلقه وفي مشيئته ، القدر ليس عائق بل هو قدرة الله في كونه... الحمدلله حتى يبلغ الحمد منتهاه ..
