لماذا أنا .. قيد الكتابة

الجزء 6

بالليل مشت العروس بيت بت عمتي والبنات زفوها هناك مشيت ليهم لقيتهم كلهم قاعدين يرسموا

أم كلثوم ( العروس ):تعالي يرسمو ليك

أنا :لا ما عايزة ما بحب الرسم

رقدت نمتا ما صحيت إلا الصباح مشيت صبحت لي أمي 

الضهر غيرت لبست فستان أسود فنايلي وطرحة سودة ( أعشق الأسود لأنو الأسود يليق بي ) جيت ماشة في الصيوان أمي نادتني

أنا :عايزة حاجة

ماما :سلمي على مرت عمك و عيال عمك ( عمي دة مغترب في السعودية )

سلمت عليهم ومشيت العصر سمعت البنات ماشين بيت العريس في عرض طبعاً كالعادة رفضت أمي حنستني مشيت مع خالتي ورجعت طوالي قعدت في حوش عمي التاني براي لأنو نفسياتي قامت علي ومقفلة معي لي آخر حد صليت المغرب وقعدت في الحوش براي جا آمر وعدي سلمو علي

آمر :ارح يلا

أنا :وين

آمر :مش أمس اتفقنا نطلع سوا

أنا :اها لكن اتفقت معاك نطلع العصر وعلى ما أظن حالياً المغرب والعشاء زاتو قرب

آمر :معليش يا ستي كنت مشغول

أنا :ما بقدر أطلع هسع 

آمر :خلاص مع السلامة

بعد العشاء طوالي رقدت نمت بعد سمعت أبشع خبر انو نحنا حنرجع بعد بكرة زعلت شديد لأني ما حاسبة حنقعد كتير ما شلت معي ملابس كفاية و بكدة نفسياتي بقت كعبة ومقفلة معي للآخر عشان كدة رقدت نمت جنب خالتي ( مرت عمي السافرت معانا من الخرطوم ) تاني يوم قمت زهجانة والأخلاق مقفلة فل ابيت اشرب شاي زاتو بعد الشمس شرقت طلعت اتمشى شوية جيت جنب بيت ناس عمي ( بيت ناس آمر) دخلت سلمت لي عمتي وقعدت اتونست معاها وطلعت مشيت الجبل قعدت فترة ومشيت للعروس لقيتها قاعدة مع بت عمي وبت عمتي قعدت شوية ورجعت البيت ختو الفطور فطرنا وغسلت ملابسي وطلعنا نودي عدت العروس بيتهاومن هناك طلعنا همنا هوامة ما رجعنا إلا مع أذان المغرب 

تاني يوم بعد القطور اتحركنا للخرطوم و في خلال الإجازة دي اتوطدت علاقتي بي آمر شديد بقينا كل يوم نتقابل حتى إني بمشي يومياً بيت ناس حبوبتي عشان اشوفو في يوم مشيت بيت ناس خالي في شرق النيل قعدت 4 أيام ورجعت زي العصر بعد المغرب جري مشيت بيت ناس حبوبتي اشتقت لي آمر 

وقت دخلت بيت ناس حبوبتي لقيت مرت عمي بس قاعدة و آمر وأخوه ياسر بركبو ليها الستائر في برندتها قعدت معاها برة بعد شوية مشت جوة وجا آمر وقف جنبي ( لمن يقيف جنبي بحس بي دقات قلبي زايدة وشعور غريب )

آمر :وينك ياخ مختفية كدة 

أنا :مشيت بيت ناس خالي

آمر :اشتقت ليك

أنا :تشتاق ليك العافية

.

.

.

.

.

الليلة نتائج تالتة 

تقوى :عاد لو جبتي 60 ما قصرت

تماضر :يمكن ما تنجح زاتو

ميسرة :متوقعة نفسك بذيعوك قاعدة قدام التلفزيون كدة

ديل أخواني طبعاً جنس إحباط أصلو ما بطمنو الزول ما مشكلة لأني ما متوقعة أجيب 70 ما انو كان حلمي يذيعوني في التلفزيون من وأنا صغيرة ( لكن يبقى الحلم مجرد حلم إحتمال تحققه 10% ) نسبة لي مرضي فما كان بالحسبان إني أنجح وأبوي مجهز لي كل الإمكانيات للإعادة

المؤتمر إنتهى ورسلنا رسالة لي ناس أريبا لكن ما جانا الرد أختي عندها شريحة سوداني ابت ترسل مع إنو ناس سوداني برجعو ليك الرد بي سرعة رقدت في السرير 

أنا :والله يا ماما الدنيا رمضان والشمس حارة كان ما فطرت ما بطلع من البيت دة بلا نتيجة بلا بطيخ

ميسرة :عارفة نفسك ساقطة

ولا عبرت كلام ميسرة رقدت مستخمية بي مزاج جات أختي قالت لي

تقوى :مليني رقم جلوسك 

أنا : . . . . .

بعد شوية

تقوى :بليدة زي ما قلت ليكم 

ماما :اها جابت كم

تقوى :76 بس

أنا :76 وبس

تقوى :76.7

أنا :جادة

ميسرة :اي

ماما :ألف مبروووووك

بعد شوية كدة خالتي دقت قالت نتيجتها أبت تطلع مشيت بيت ناس حبوبتي وشلتا معي تلفون تقوى شحنتو رصيد ودخلنا الرقم طلع رسوب شكلها راسبة عربي خالاتي زعلو شديد حتى مبروك ما قالوا لي ( غيرة وروح شريرة ما تركزو شديد خلونا نواصل )طلعت برة جيت مارة بي حوش مرت عمي باركت لي ولقيت آمر بارك لي ورجعت البيت 

في عيد الرمضان سافرنا أنا وأمي وخالتي مدني عرس جدي ( عم أمي طبعاً اعمام امي غالبيتهم أصغر منها ) سافرنا الخميس ورجعنا السبت لأنو التقديم بدأ قدمت تربية  شالوني تربية جامعة السودان شهر حداشر مشيت الجامعة سجلت وبعد اسبوع حننزل

.

.

.

أول يوم في الجامعة قمت قبل الأذان الأول اتجهزت لبست عباية سودة وطرحة سودة وجزمة سودة ( ما تستغربو بحب الأسود )وشنطة رمادي بي أسود بعد الآذان التاني أذن صليت وطلعت مع تقوى ( بتدرس جامع القرآن الكريم محاسبة آخر سنة ليها ) اتفارقنا في العربي هي ركبت عربية تانية وأنا مشيت بي رجولي للكلية وشفت الجدول ومشيت القاعة صاحبت ريم ومي والملكة ما ادونا ولا محاضرة فطرت ورجعت البيت 

تاني يوم لمن وصلت اتصلت لي ملكة قالن لي انتظريني جنب بوابة الدراسات بعد 5 دقايق جات وعانينا شديد لحدي ما لقينا القاعة ومن دون مبالغة نص ساعة ضاعت ونحنا بنفتش فيها ( ناس تربية البرالمة قاعات الأمبدات أكيد تعبتو وانتو بتفتشوها )

#يلا شباب سي اور سووون( الله يخلف على استاذ انقليزي درسنا ههههههه )

#نتلاقى