مرت الأيام و الإجازة الصيفية جات قعدنا في البيت في يوم أنا وصحبتي مدينة قررنا نزور صحبتنا هنادي فجأة بت أختي ( الما معروف أبوها منو ) مرضت شالوها مشو بيها المستشفى وأنا وصحبتي طلعنا مشوارنا استمتعنا شديد بالزيارة وشوية نفسيتي ارتاحت ورجعنا البيت تاني يوم الضهر بت أختي اتوفت فرحت شديد لي سببين لأنو ما عندي أجوبة لي صحباتي وبرضو ربنا ريح البت دي من كلام الناس وما تتعذب ساكت
في الإجازة نزلت كورس مختلط ( أولاد وبنات ) كنت داخلة سنة سابع الأولاد كانوا كتار ونحنا بتين بس أنا و بت تانية اسمها نازك صاحبنا ولد اسمو عدنان غريب الأطوار تحس بيهو متوحد ونادراً ما يتونس مع زول بقى صاحبنا شديد كل يوم بنرجع مع بعض عدت أيام الكورس بلمح البصر وآخر يوم لينا في الكورس طلعنا رحلة البحر كانت جميلة جداً و صبت مطر حلت الجو نحنا بنلعب بي طرف والأولاد بي جهة والأساتذة بطبخو ياه أيام جميلة ( الذكريات الجميلة نتمنى عودتها والعيش فيها بكل ما أوتينا من أحاسيس ومشاعر )
المدارس فتحت ونزلت سنة سابع طبعاً هي مرحلة صعبة الزول العداها كأنوا خلاص طلع من مرحلة الأساس مرت الأيام وجا الرمضان والعيد مروا وفي عيد الضحية قررنا نسافر القضارف اتجهزنا تمام وسافرنا قبل العيد بي يوم . يوم السفر بدري قمنا استحمينا لبست لي شداد بنبي وطونك أبيض بي بنبي وكارينا بيضاء وطرحة بنبية ( ملابسي أغلبها شدادات وبناطلين )وصلنا بعد الضهر وهاك يا السلام ناس كتار جو سلمو علينا وجابو لينا موية طعمها مالح بقة واحدة وما زدت تاني شوية كدة جابو لينا عصير اورنجا سخن اطريت اشربو لأني عطشامة شديد صلينا الضهر وغيرت ملابسي لبست شداد أسود وتي شرت أحمر معمول بالكرشيه وعباية بي فوق ليهو وطلعنا مشينا بيت عمو مالك ( بحب عمي دة شديد لأنو من صغيرة كان موجود في بيتنا ودائماً بجينا ) عد اليوم على خير ونمنا
تاني يوم الصباح قمت بدري مشيت حوش عمي التاني ( متوفي ربنا يرحمو ويغفر ليهو ) قعدت جنب بت عمي كانت بتغسل عدة
أم كلثوم ( بت عمي ):صحيتي بدري مالك
أنا :ما بحب انوم بعد الصلاة
الليلة يوم عرفة وعادة ناس بلدنا يعملو الخبايز في كل عيد سواءاً عيد الفطر أو الأضحى قيلنا وهم بعملوا في الخبيز لحدي بعد المغرب ( يا حليل الخرطوم زي الوقت دة في الحي بتاعنا تلقى كل شفع الحي شايلين جرادل أو باقات بيتهم بدقو ويغنو يا سعيد فور بعيد الليلة الوقفة وبكرة العيد طبعاً أبوي ما بحب الإزعاج من يجو جنب بيتنا يطلع يشاكلهم هههههههههههههههه أيام هل ستعود ) تاني يوم صحيت الفجر على صوت الطيور والديك والحمير ( عندنا في الخرطوم بصحى على صوت الله أكبر الله أكبر الله أكبر إله إلا الله الله أكبر الله أكبر ولله الحمد )
أنت تقرأ
لماذا أنا .. قيد الكتابة
Ficción Generalهو قدر كلو مقدر ومكتوب وكلو لي خير القدر هو ليس عائق بل هو نصيبنا من هذه الحياة هو قصتنا في هذه الحياة هو حكم الله في خلقه وفي مشيئته ، القدر ليس عائق بل هو قدرة الله في كونه... الحمدلله حتى يبلغ الحمد منتهاه ..
